Apa a fu ogu twa hara, ose kulira morwa ngatu mu rongora. Nampili ngomu ga here Rasarusa, Jesus kapi ga lilire morwa yeeyi ga fire Rasarusa. Age kwa lilire morwa kufira nkenda vena va fisire, ngomu sa yi likida sihorokwa somwaJohanesa.—Joh. 11:36.

Apa Jesus ga zuvhire asi Rasarusa kuna kuvera, kapi ga genderere kuza kembo lyawo a ka mu verure. Etjangwa kutanta asi: “Apa [Jesus] ga mu zuvhire asi ta vere, makura ta likeresa kooko mazuva gavali.” (Joh. 11:6) Morwasinke ga lirangerere? Ga kere nositambo. Age kwa tente asi: “Uvera ou kapi nau mu lya, nye asi u fumadekese ko Karunga, hena asi MunwaKarunga nage a fumanene mo.” (Joh. 11:4) Jesus kwa kere nositambo sokuruganesa nomfa daRasarusa ‘mokufumadekesa ko Karunga.’ Monkedi musinke? Jesus kwa here kurugana sitetu sokuvhumbura kaume kendi montoko.

Monzogera novarongwa vendi mosihorokwa esi, Jesus kwa fanekesere nomfa kokuponyoka. Eyi yiyo ga va tanterere asi ‘ta zi a ka mu pindure.’ (Joh. 11:11) KwaJesus, kupindura Rasarusa koufe kwa fana ngwendi mukondi ana kupindura munwendi monompofu. Yipo nye, kapi ya kere hepero a guve morwa nomfa daRasarusa.

Yisinke nye ya tumangedere Jesus a lire? Elimbururo tatu li gwana mosihorokwa. Apa Jesus ga ligwanekerere naMaliya mumbyaRasarusa nokumumona kuna kulira ntani nava wopeke, “makura ta handukire momutjima oku guna mu pwaga.” Pokudimburura kukora kwawo, Jesus nage ta lizuvhu kukora komutjima makura ‘tagu mu pwaga.’ Eyi yiyo ‘Jesus ga lililire.’ Ayo ya mu guvisire unene mokumona vakaume vendi omu vana guwu.—Joh. 11:33, 35.

Sihorokwa esi kulikida asi Jesus ga kara nononkondo dokutengwidira vahali vetu keparu mouzuni woupe. Aso hena kutulikida asi Jesus ga kara nomalizuvho kowo ava fisa vahali vawo. Sirongwa simwe natu lirongera ko kosihorokwa esi kuna kara asi twa hepa kukara nonkenda kowo vana guwu morwa nomfa domuhali gwawo.

Jesus ga yi divire asi ta ka vhumbura Rasarusa. Nye simpe ga lilire, morwa eharo nonkenda kovakaume vendi. Mokulifana, nose nkenda zetu kuvhura zi tu tumangede tu ‘lilise ko ava vana kulira.’ (Rom. 12:15) Kupwagesa ruguwo rwangoso, kapi ayi likida asi muntu kapi ga kara nepuro mehuguvaro lyevhumbuko. Jesus kwa tura po sihonena sosiwa sokulikida nkenda kowo vana guwu pokulira nampili ngomu ga vhumbwire Rasarusa.