1, 2. Ngapi omu nkedi ezi va tu rera nonkarapamwe ezi twa kara ayi tu kundama?

NATUVENYE kutukundama monkedi omu va tu rera ntani nonkarapamwe ezi twa kara, eyi kutanta asi vakaume vetu nonompo detu. Eyi yiyo atu dwarere monkedi zongandi nokuhara nondya dongandi nokukara nonkareso zongandi.

² Nye yininke yimwe mulyo unene kupitakana ndwareso zetu ndi nondya. Pasihonena, ngomu tuna kukura, ose kuturonga asi yininke yimwe yiwa ano eyi yimwe yidona. Nye vantu kwa kara nomagano gokulisiga-siga kuhamena youhunga neyi yepuko. Ezwi lyetu lyokomutjima nalyo kukundama matokoro getu. Bibeli kwa tanta asi: ‘Vapagani ava va pira Veta, kulimburukwa paunsitwe eyi za hepa ko Veta.’ (Rom 2:14) Nye eyi ngesi kutanta asi nsene kapi pwa kara veta zaKarunga zokuvyukilira, kuvhura tupu tu kwame noveta domomapata ndi domomukunda omu twa tunga ndi?

3. Gava nokonda mbali deyi Vakriste nava dilira kukwama noveta douzuni ou.

³ Pwa kara nokonda mbali domulyo deyi Vakriste nava dilira kurugana ngoso. Zokuhova, Bibeli kutudiworokesa asi: “Pa kara nzira ezi ava tara vantu asi za hungama, nani nye azo kutwara konomfa.” (Yis. 16:25) Morwa kapi twa sikilira mo, ose vantu kapi twa kara nononkondo dokupangera nonzira detu. (Yis. 28:26; Jer. 10:23) Zauvali, Bibeli kulikida asi nkareso nonoveta domouzuni ou kwa yi zonagura Satana morwa yige ‘mupangeli gouzuni ou.’ (2 Kol. 4:4; 1 Joh. 5:19) Yipo nye, nsene tuna hara Jehova a tu tungike nokutuhafera,  twa hepa kulimburukwa eyi va uyunga moVaroma 12:2.—Resa.

4. Yisinke natu ka zogera mosirongwa esi?

⁴ Sirongwa esi tasi ka zogera yitwa yitatu yomoVaroma 12:2. (1) Morwasinke twa hepera ‘kurundurura magazaro getu’? (2) Yisinke ya hamena mo? (3) Ngapi natu rundurura magazaro getu?

5. Kwalye da tembe nonkango daPaurusa domoVaroma 12:2?

⁵ Nonkango domupositoli Paurusa domombilive ezi ga tjangerere Varoma momvhura 56, kwa tembe koVakriste vakwawo wovagwavekwa, kapisi kovahapuli. (Rom. 1:6) Age kwa va korangedere va rundurure magazaro gawo ntani ‘va dire kulifana nouzuni ou.’ Nkango ‘uzuni ou’ kwa kwaterere mo noveta nonompo nonkareso nondwareso eyi ngayi va dimbwilisa asi awo Varoma. Paurusa pokuruganesa nkango “mwa ha lifana” kwa likidire asi Vakriste vamwe ngazi va kundama nkareso zoVaroma. Ngapi omu ngazi va kundama?

6, 7. Momazuva gaPaurusa, yisinke ya reterere udigu Vakriste womoRoma?

⁶ Naina, apa vadinguli ava ka dingura Roma, awo kukamona erunda lyonontembeli nonontoko nomatungo goupungwiro woyininke yanare noyira ntani nayimwe hena ngoso. Matungo ogo kutuvatera tu lironge yoyinzi kuhamena omu ngava paruka Varoma ntani noukareli wawo. Monobuke dehistoli lyoVaroma, ose kuresa mo kuhamena maudano gonyanya nomarumbasano gononkambe noyidanauka yoruhonda. Roma kwa kere sitata soungawo, ano vantu ngava gwana nompito dononzi dokugwana yimaliwa.—Rom. 6:21; 1 Pet. 4:3, 4.

⁷ Varoma kwa kere nonontembeli dononzi nokukarera yikarunga yoyinzi, nye sinzi sovantu kapi va kere nelikwatakano lyenene noyikarunga yawo. Kwawo ukarelikarunga kwa hamenene mo kudana yilika ngwendi mahampuruko, makwareko nomatamu, ano eyi kwa kere ruha rweparu lyawo lyankenye ezuva. Eyi kwa reterere udigu Vakriste womoRoma. Sinzi sawo kwa kulililire mokukarera yikarunga yoyimpempa, yipo nye va hepere kutura po marunduruko mokukara Vakriste wousili, nampili konyima zekuho lyawo, awo va hepere simpe kurundurura magazaro gawo.

8. Ngapi uzuni ou una kara siponga koVakriste naina?

⁸ Ngwendi mosiruwo soVaroma, uzuni naina kuna kara siponga koVakriste. Morwasinke? Morwa mpepo zouzuni kuna lihanene nakunye. (Resa Vaefeso 2:2, 3; 1 Johanesa 2:16.) Madowo nomagazaro nonoveta nononkareso  domouzuni siponga unene morwa kuvhura kutupukisa tu kare ruha rouzuni ou. Eyi yiyo nye twa hepera kulimburukwa epukururo eli asi ‘twa ha lifana nouzuni ou’ nye ‘tu rundurure magazaro getu.’ Yisinke twa hepa kurugana?

9. Marunduruko musinke ava tura po wovanzi komeho va ka gwane ekuho?

⁹ Ngomu muntu ana kulironga nokutura pasirugana mausili goBibeli, age ta tameke kuhedera pepi naJehova. Age kusiga ukarelikarunga woyimpempa nokutura po marunduruko meparu lyendi. Age kukondja mokudwara muntu gomupe nokuhonena Jesus. (Efe. 4:22-24) Tuna hafa asi vantu wovanzi kuna kutura po marunduruko gangoso nkenye mvhura, nokuligava vene kwaJehova Karunga pokugwana ekuho. Eyi kuhafesa unene mutjima gwaJehova. (Yis. 27:11) Aga yigo gelike marunduruko ga hepa kutura po muntu ndi?

10. Ngapi omu kurundurura magazaro kwa lisiga nokuwapukurura?

¹⁰ Kurundurura magazaro getu kwa hamena mo yoyinzi kupitakana tupu kutura po ezokomeho ndi ewapukururo. Nkango ‘kurundurura magazaro’ zomoVaroma 12:2 kutanta asi twa hepa kulitjindja nawa-nawa kupitira mononkondo dompepo zokupongoka. Marunduruko aga ga hepa kutura po Mukriste kapi mwa hamena tupu kuhageka nkareso zondona nombuuyungiso zondona nomparukiso zokunyata. Morwa vamwe ava va dira kukara nediwo lyoBibeli nawo kuhetekera ko kunyokera po yininke yoyidona. Makura yisinke nye Mukriste ga hepa kurugana mokurundurura magazaro gendi?

11. Yisinke Paurusa ga uyungire eyi ya hepa po komuntu mokurundurura magazaro?

¹¹ Paurusa kwa tjenge asi: “Sigeni Karunga a rundurure magazaro geni.” Apa nkango “magazaro” ava zi ruganesa moBibeli, kwa kwatera mo matedo getu nonkareso zetu nonondunge detu. Ketamekero lyombilive zendi zokoVaroma, Paurusa kwa tumbwire vantu ava va kere ‘nomagazaro gomadona.’ Vantu vangoso ‘kwa zura umbudi nounye, ruhonda noudona noudumbe nezinzameho, nomfudu nedipago nonomutangu noyimpempa’ ntani nayimwe hena ngoso. (Rom. 1:28-31) Ngesi tuna yi kwata egano eyi Paurusa ga gaverere mapukururo koVakriste ava va tungire novantu vena asi va ‘rundurure magazaro gawo makura va situnuke nawa-nawa.’

12. Yisinke ava gazara vantu wovanzi naina, ntani morwasinke nkareso zangoso za karera siponga koVakriste?

¹² Ose kuna kuparuka novantu wovadona ava va kara nomagazaro aga ga singonona Paurusa. Awo kugazara asi  ugova kukwama nompango nonoveta doBibeli. Vamitili novakondi wovanzi kupulisira vanona va rugane yeeyi vana hara. Awo kuvaronga asi nkenye ogu ga kara noumanguruki wokutokora asi yipi yoyiwa neyi yoyidona. Vantu vangoso, kwa pura asi kapi pwa kara nkedi zokudiva youhunga neyi yepuko, ntani asi kapisi hepero kulimburukwa Karunga nonompango dendi. (Epis. 14:1) Nkareso ezi siponga koVakriste. Nsene kapi tuna kutakamesa, kuvhura tu tameke kuhageka kukwama mapukururo aga azi gava mbunga zaJehova nokutameka kusivana kuhamena nkenye eyi tuna kudira kuhafera. Ndi kuvhura tu dire kukwatesa ko mapukururo gomoMatjangwa kuhamena yilihafeso neruganeso lyoInterneta ntani nerongo lyokuzeruka.

13. Morwasinke twa hepera kulikonakona nyamwetu?

¹³ Nsene kapi tuna hara tu ‘lifane nouzuni ou,’ ndi asi tu pulisire uzuni u pangere magazaro getu nomalizuvho getu, twa hepa kukonakona nkareso zetu noyitambo yetu. Wopeke kuvhura va dire kudiva magazaro getu ntani kuvhura va tu tantere asi nkareso zetu ngwaangwa. Nye nyamwetu nyose wokudiva nsene kuna kupulisira eyi twa lironga moBibeli yi rundurure magazaro getu nokutwikira kusitunuka nawa-nawa.—Resa Jakopo 1:23-25.

14. Yisinke nayi tu vatera tu ture po marunduruko aga gana hepa po?

¹⁴ Mokurundurura magazaro getu, kwa hamena mo kurundurura eyi ya kara momutjima gwetu. Yisinke nayi tu vatera tu ture po marunduruko gangoso? Apa atu lirongo eyi ana tu harere Jehova kuliza nositambo sendi somoBibeli, monkedi omu atu tambura mapukururo gamo kuhorora magazaro getu ntani kulikida marunduruko aga twa hepa kutura po yipo tu koneke ‘mpango zaKarunga ezi za sikilira mo.’—Rom. 12:2; Heb. 4:12.

15. Apa atu tambura ehongo lyaJehova, marunduruko musinke atu tura po?

¹⁵ Resa Jesaya 64:8. Sifanekeso esi ga ruganesere muporofete Jesaya kuturonga sirongwa somulyo. Ngapi omu Jehova, Muhongi, natu honga ose, erova? Apa a tu hongo kapi a tjindji emoneko lyetu. Nye age kurundurura eyi ya kara momutjima gwetu. Apa atu tambura ehongo lyendi, ose kumupulisira a rundurure magazaro nomalizuvho getu. Eyi yiyo twa hepa mokunyokera po mapukiso gouzuni ou. Ngapi omu Jehova a tu hongo?

16, 17. (a) Singonona eyi a rugana muhongi kerova nsene ana hara kulirugana sipako somulyo. (b) Ngapi omu Nonkango daKarunga adi tu vatere tu rundurure magazaro getu nokukara sipako somulyo kwaJehova?

¹⁶ Mokuhonga yipako yoyiwa, muhongi ga hepa kuruganesa erova lyewa. Nye pwa kara yininke yivali ga hepa kurugana. Sokuhova, ga hepa kuzeresa erova. Ntani ga hepa kulirunga nomema gokugwanena po yipo li rerupe kulihonga mwankenye nkedi omu ana li harere.

¹⁷ Muhongi kapi a ruganesa tupu mema mokuzeresa erova nye hena kunengedekesa ko erova yipo li rerupe kulihonga. Moomu tupu mema aga rerupike erova va li honge, yimo Nonkango daKarunga adi rundurura magazaro getu. Apa atu tameke kulironga Bibeli, azo kutuvatera tu hageke kugazara omu ava gazara vanauzuni yipo tu tameke kugazara omu a gazara Karunga.  Makura age ta tu rundurura tu kare sipako somulyo esi na vhura kuruganesa. (Efe. 5:26) Nkenye apa kutukorangeda tu rese Bibeli nkenye ezuva nokuza komapongo. Morwasinke? Pokurugana ngoso, ose ngatu tambura nawa ehongo lyaJehova.—Epis. 1:2; Yirug. 17:11; Heb. 10:24, 25.

18. (a) Morwasinke twa hepera kuteda ko koNonkango daKarunga nsene tuna hara di rundurure magazaro getu? (b) Mapuro musinke naga tu vatera?

¹⁸ Nsene tuna hara Nonkango daKarunga di rundurure magazaro getu, twa hepa kurugana ko yoyinzi kupitakana tupu kudiresa nokudilironga. Vantu wovanzi kwa resa Bibeli nokudiva eyi ya kara mo. Nampo wa ligwanekera novantu vangoso moyirugana yokuzuvhisa. Vamwe kwa kwata novelise doBibeli momutwe. * Nye kapi ayi rundurura magazaro nomparukiso zawo. Morwasinke? Morwa Nonkango daKarunga kurundurura tupu magazaro govantu nsene va di pulisira di gume nomutjima dawo. Pokuyitura pasirugana oyo, twa hepa kuteda ko kweyi atu lirongo moBibeli. Twa hepa kulipura asi: ‘Ame na yi pura asi yinzi ya hamena mo kapisi erongo tupu ndi? Na yi limonena meparu lyange asi ou usili ndi? Ame kusikisa mo meparu lyange eyi ani lirongo ndi kuronga tupu wopeke? Apa ani lirongo Bibeli, ame kulizuvha ngwendi Jehova kuna kuuyunga name ndi?’ Nsene tu teda ko komapuro gangesi, ose ngatu hedera pepi naJehova. Eyi atu lirongo nsene yi guma mutjima gwetu, ayo ngayi tu tumangeda tu ture po marunduruko meparu lyetu, ano eyi ngayi hafesa Jehova.—Yis. 4:23; Ruk. 6:45.

19, 20. Ngapi ngatu gwanena mo uwa nsene tu sikisa mo epukururo lyoBibeli?

¹⁹ Nsene tu resa Bibeli nokuteda ko nkenye ezuva, ngayi tu vatera tu twikire kurugana eyi ga uyunga Paurusa asi: ‘Lihutureni muntu gomukuru-kuru noyikara yendi eyi ga yika. One mu dware muntu gomupe, ogu ga wapera kutambura unongo.’ (Koros. 3:9, 10) Nsene tu kwata nawa egano eyi azi rongo Bibeli nokuyitura pasirugana, ayo ngayi tu tumangeda tu dware muntu gomupe ogu nga tu popera koyiraha yaSatana.

²⁰ Mupositoli Peturusa kututantera asi: ‘Omu limburukwe kwaKarunga, kapisi omu kwama-kwame hena madowo goukaro weni wanare, nye omu kare vapongoki moukaro weni naunye.’ (1 Pet. 1:14, 15) Sirongwa sokukwama ko ngasi ka faturura omu Jehova nga tu tungika nsene tu kondja kurundurura magazaro getu nokusiga nkareso zetu zanare.