1. (a) Mononkedi musinke vantu ava tambura mapukururo, ntani morwasinke? (b) Ngapi omu muntu gelinenepeko a tara mapukururo?

VANTU kutambura mapukururo mononkedi dokulisiga-siga. Pasihonena, vamwe kuvhura kutambura mapukururo gokutunda komuntu ogu ga kara nononkondo nokunyoka gokutunda komuntu gepupi lyawo ndi muntu ogu ga dira kukara nononkondo. Apa vamwe ava gwana episuro ndi epukururo, awo kuguva nokudompa mutjima ndi kulifa nomuga. Nye vamwe kulizuvha etumangedo nokuhara kutura po marunduruko. Morwasinke vantu ava tambwire mapukururo mononkedi dokulisiga-siga? Konda zimwe kuna kara elinenepeko. Apa muntu gelinenepeko a gwana mapukururo, age kugazara asi kapi gana mu fire, makura ta nyoka kugatambura nokudira kugwanena mo uwa.—Yis. 16:18.

2. Morwasinke Vakriste wousili ava tambwire mapukururo gokutunda moNonkango daKarunga?

² Mokulisiga, Vakriste wousili kutambura mapukururo, unene po nsene kuna kutunda moNonkango daKarunga. Nompangera daJehova kutupa nondunge nokuturonga nokutuvatera tu nyokere po yiraha ngwendi kudowokera emona noruhonda ntani nepangwe ndi unkorwe. (Yis. 20:1; 2 Kol. 7:1; 1 Tes. 4:3-5; 1 Tim. 6:6-11) Ntani hena, ose kukara ‘nomutjima’ goruhafo morwa kulimburukwa nompangera daKarunga.—Jes. 65:14.

3. Nkareso musinke zomuepisarome twa hepa kuhonena?

³ Mokukara nelikwatakano lyewa naGuhyetu gemeguru Jehova, twa hepa kutwikira kutura pasirugana mapukururo gendi gomawa. Twa hepa kuhonena nkareso zomuepisarome ogu ga tjenge asi: “Yipango yoge emona lyange lyanarunye, ayo ekwafo lyomutjima gwange.” (Epis. 119:111) Ngwendi muepisarome, nose kuhafera kulimburukwa yipango yaJehova ndi poyiruwo yimwe ose kuyitara asi udigu kuyilimburukwa?  Nampili poyiruwo yimwe tu lizuvhe asi udigu kutambura mapukururo, twa ha dompa mutjima. Pokudimburura asi yipango yaKarunga mulyo unene, ayo kuvhura kunkondopeka ehuguvaro lyetu. Ngesi tu konakoneni nonkedi ntatu omu natu yi rugana.

4. Yisinke ya dilire kurunduruka meparu lyaNdafita?

⁴ Hompa Ndafita nga ligwanekere nomaudigu ntani noruhafo meparu, nye kosili esi sa dilire kurunduruka meparu lyendi, ehuguvaro lyendi lyenene moMusiti gwendi. Age kwa tanta asi: “Koge ove HOMPA, yiko nina kuvyukisa ekanderero lyange, moge yimo na huguvara ove Karunga gwange.” (Epis. 25:1, 2) Yisinke ya vaterere Ndafita a tunge po ehuguvaro lyangoso moGuhwe vemeguru?

5, 6. Yisinke adi tu tantere Nonkango daKarunga kuhamena elikwatakano lyaNdafita naJehova?

⁵ Vantu wovanzi kukanderera tupu kwaKarunga nsene vana kara nomaudigu gomanene. Awo kwa fana ngwendi kaume ogu a ku uyungisa tupu nsene ana hepa yimaliwa ndi evatero lyongandi. Konyima kuvhura o lipure nsene asi kaume ogo sili ga ku hara. Ukaume waNdafita naJehova kapisi yimo ngoso wa kere. Elikwatakano lyendi naJehova kwa likidire epuro neharo lyendi lyokuhara Karunga meparu lyendi nalinye, moyiruwo yomaudigu neyi yoruhafo.—Epis. 40:8.

⁶ Koneka nonkango daNdafita dokuhamberera nokupandura Jehova edi asi: “HOMPA, HOMPA gwetu, edina lyoge yireru omu lya fumana konauzuni oku, efumano lyoge ove kwa pitakana eguru.” (Epis. 8:1) Nonkango edi kulikida asi Ndafita kwa kere nelikwatakano lyenene noGuhwe vemeguru. Ndafita kwa likidire rupandu koyirugana yaJehova Karunga yokutetukisa nokumufumadeka “mutenya mudima.”—Epis. 35:28.

7. Ngapi atu gwanene mo uwa mokuhedera Karunga pepi kupitira mekanderero?

⁷ Ngwendi Ndafita, twa hepa kuuyunga naJehova nkenye apa yipo tu nkondopeke ehuguvaro lyetu mwendi. Bibeli kutanta asi: “Hedeni Karunga pepi, nage a mu hede pepi.” (Jak. 4:8) Kuhedera Karunga pepi kupitira mekanderero kuna kara zimwe zononkedi domulyo omu natu gwana mpepo zokupongoka.—Resa 1 Johanesa 3:22.

8. Morwasinke natu nyokerera po kurugurura nonkango momakanderero getu?

⁸ Apa o kanderere, ove kurugurura nonkango ndi? Nsene yimo, komeho zokukanderera, gazadara ko eyi ono hara kutumbura mekanderero. Pasihonena, nsene o rugurura nonkango apa no uyunga nakaume koge, ngapi omu na lizuvha? Kuvhura nga dire kukupurakena hena. Nye Jehova age kupurakena komakanderero govakareli vendi wokulimburukwa. Nampili ngoso, twa hepa kunyokera po kurugurura nonkango momakanderero getu.

9, 10. (a) Yisinke natu vhura kutumbura momakanderero getu? (b) Yisinke nayi tu vatera tu kanderere kutundilira komutjima?

⁹ Nsene tuna hara kuhedera Karunga pepi, makanderero getu ga hepa kutanta yuma. Moomu tuna kutantera Jehova magazaro nomalizuvho getu, yimo hena ngayi nkondopeka ehuguvaro lyetu mwendi. Nye yisinke twa hepa kutumbura momakanderero getu? Nonkango daKarunga kulimburura asi: “Momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu.” (Fil. 4:6) Yosili, nkenye eyi yina kukundama eparu ndi elikwatakano lyetu naKarunga kuvhura kuyitumbura momakanderero getu.

¹⁰ Ose kuvhura tu lirongere ko yoyinzi komakanderero govagara novakadi  wokulimburukwa womosiruwo sanare. (1 Sam. 1:10, 11; Yirug. 4:24-31) MoMapisarome kwa kara mo makanderero gomanzi gokutundilira komutjima nomarusumo kwaJehova. Malizuvho govantu goruhafo naga goruguwo kwa ga tumbura momakanderero nomomarusumo ogo. Kuteda ko komakanderero ogo kuvhura kutuvatera yipo makanderero getu ga tante yuma.

11. Morwasinke natu tedera ko komapukururo gaKarunga?

¹¹ Ndafita kwa tente asi: ‘Veta zaHOMPA zosili, azo kugava nondunge kovantu vangoso-ngoso.’ (Epis. 19:7) Yipo nye, nampili vantu wokudira nondunge kuvhura va kare nonondunge pokulimburukwa koyipango yaKarunga. Nye mapukururo gamwe gomoMatjangwa, twa hepa kuteda ko nsene tuna hara tu gwanene mo uwa. Pasihonena, kuteda ko konompango doBibeli kuvhura kutuvatera tu limburukwe apa atu ligwanekere nomaheteko kosure ndi koyirugana ndi tu kwaterere konompango daKarunga kuhamena honde, ndi tu kwaterere koupirambinga wetu ndi kuhamena maliwapaiko nondwareso. Pokuteda ko komapukururo gaKarunga ngayi tu vatera tu liwapaikire momaukaro gangoso. Makura ose ngatu diva eyi twa hepa kurugana komeho ukaro u ka horoke. Eliwapaikiro lyangesi kuvhura kutuvatera tu nyokere po kutura mapuko gomanene.—Yis. 15:28.

12. Mapuro musinke twa hepa kuteda ko aga naga tu vatera tu limburukwe koyipango yaKarunga?

¹² Ngomu tuna kundindira matumbwidiro gaKarunga ga sike mo, epuro lyetu mwago simpe ha lya nkondoparera ndi? Pasihonena, twa yi pura nawa-nawa asi Babironi zonene ntaantani va ka zi zonagure po ndi? Matungiko gokomeho, ngwendi mwenyo gwanarunye moparadisa apa pevhu, simpe ha twa karera nepuro mwago ndi? Ose kutwikira nomupampi mosirugana sokuzuvhisa ndi kuna kutura madowo getu muhowo meparu? Ehuguvaro lyevhumbuko nokupongora edina lyaKarunga nokuhungameka upangeli wendi, simpe kuna kukara nomulyo kwetu ndi? Kuteda ko komapuro ogo kuvhura kutuvatera tu sikise mo eyi ga uyungire muepisarome asi: “Yipango yoge emona lyange lyanarunye.”—Epis. 119:111.

13. Morwasinke vapositoli va dilire kukwata egano yininke yimwe? Gava sihonena.

¹³ Yininke yimwe eyi va tumbura moBibeli kuvhura tu dire kuyikwata egano morwa siruwo saJehova sokuyizeresa kapi simpe sina siki mo. Jesus kwa rugurukire kutantera vapositoli vendi asi ngava mu hepeka nokumudipaga. (Resa Mateusa 12:40; 16:21.) Nye vapositoli kapi va yi kwete egano eyi ga tembe. Awo kwa ya yi kwete tupu egano konyima zevhumbuko lyendi apa ga ya va monekerere, age “makura ta mahura nondunge dawo va zuvhe matjangwa.” (Ruk. 24:44-46; Yirug. 1:3) Ntani konyima tupu zokuvapoowomwena mpepo zokupongoka poPentekoste momvhura 33 yipo va yi kwete egano asi Uhompa waKarunga ngau tameka kupangera meguru.—Yirug. 1:6-8.

14. Koyiha yomvhura 1900, sihonena musinke sosiwa va tulisire po vanavazinyetu nampili ngomu va kere nendindiro lyepuko kuhamena mazuva gopouhura?

¹⁴ Mokulifana, koyiha yomvhura 1900, Vakriste wousili kwa kere nendindiro lyepuko kuhamena ‘mazuva gopouhura.’ (2 Tim. 3:1) Pasihonena, momvhura 1914, vamwe kwa gazarere asi tava zi meguru. Apa endindiro lyawo lya dilire kusika mo, Vakriste owo kwa twikilire kukonakona Matjangwa nokunongonona asi va hepere tanko kudemenena kosirugana sokuzuvhisa. (Mar. 13:10) Yipo nye, momvhura  1922, J. F. Rutherford, ogu nga pitisire mosirugana sokuzuvhisa, kwa tantererere ava va kere posigongi soyirongo esi sa karerere moCedar Point, Ohio, moAmerika asi: “Konekeni asi Hompa kuna kupangera! One nyove vakarelipo vendi. Yipo nye, diviseni, diviseni, diviseni, Hompa nouhompa wendi.” Kutunda pena dogoro ngesi, kudivisa “mbudi zongwa zoUntungi waKarunga” kwa kara sidimbwiliso sovakareli vaJehova.—Mat. 4:23; 24:14.

15. Ngapi natu gwanena mo uwa mokuteda ko konkedi omu Jehova ga ruganena kumwe novantu vendi?

¹⁵ Ayo ya wapa kuteda ko konkedi zongwa ezi Jehova ga tulisa po mokusikisa mo matumbwidiro gendi kovantu vendi vanare nava vantaantani. Eyi ngayi tu vatera tu kare nehuguvaro lyenene asi Jehova nga sikisa mo sitambo sendi. Kuteda ko komatumbwidiro gaKarunga kutuvatera tu tunge po ehuguvaro mwago.

16. Mauwa musinke atu gwanene mo apa atu litura mo unene mosirugana soUhompa?

¹⁶ Karunga gwetu Jehova, age Karunga gononkondo. Muepisarome kwa tanta asi: ‘Kutupu Karunga gononkondo ngwendi nyove.’ Age kwa gweda ko asi: “Ee, nonkondo doge musi kounene?” (Epis. 89:8, 13) Mokuliza nononkango odo, Jehova kuhafera nokutungika elituromo lyetu mosirugana sendi soUhompa. Age kumona vakareli vendi, va kare vagara ndi vakadi ndi vanona ndi vakondi, asi awo “kuviyauka narunye.” (Yis. 31:27) Apa atu litura mo unene mosirugana soUhompa, ose kuhonena Musiti gwetu. Kulitura mo unene mosirugana saKarunga kuturetera ruhafo ntani kuhafesa hena Jehova.—Resa Episarome 62:12.

17, 18. Morwasinke natu tantera asi yirugana youlimburukwi kutuvatera tu tunge ehuguvaro momavyukiso gaJehova? Gava sihonena.

 ¹⁷ Monkedi musinke yirugana yetu youlimburukwi ayi tu vatere tu tunge po ehuguvaro mwaJehova? Gazara eyi ya horokere apa siruwo soVaisraeli sokuhwilira moSirongo sEtumbwidiro sa sikire mo. Jehova kwa pangerere vapristeli va simbe sikesa segwanekero va taguruke mukuro gwaJorodana. Nye ngomu vantu va hederere pepi nomukuro, awo va mwene omu gwa zulire mukuro nomu mema ga pupire nononkondo. Yisinke va hepere kurugana Vaisraeli? Awo va dikire nokamba dawo konontere domukuro nokundindira yivike yongandi yipo mema ga pwire ndi? Hawe, awo kwa huguvarere unene mwaJehova nokukwama mavyukiso gendi. Ngoyitundwamo, Bibeli kwa tanta asi: ‘Nompadi dovapristeli tupu da lyete momema asi tjava, makura mema taga sikama ndjikiti ngwendi rukenka, . . . makura vapristeli tava sikama ndjikiti pevhu lyekukutu moJorodana, awo Vaisraeli navenye kuna kutaguruka pevhu lyekukutu.’ (Jos. 3:12-17) Ee, ruhafo musi va kere naro Vaisraeli mokumona omu mema gana sikama ndjikiti! Epuro lyawo mwaJehova kwa nkondoparere morwa awo kwa kweme mavyukiso gendi.

¹⁸ Yosili, naina Jehova kapi ana kurugana yitetu yangoso kovantu vendi, nye age kututungika apa atu kwama mavyukiso gendi. Mpepo zaKarunga zokupongoka kutunkondopeka yipo tu sikise mo sirugana setu sokuzuvhisa uzuni mudima. Ntani Jesus Kristusa, Mbangi zonene zaJehova, kwa tumbwidira varongwa vendi asi nga va vatera mosirugana esi somulyo pokuvatantera asi: “Yipo nye nomu zira konomuhoko nadinye, mu ka di ninke di kare varongwa vange. . . . Tareni, ame neni ngani kara dogoro nokouhura wouzuni.” (Mat. 28:19, 20) Nombangi dononzi edi da kara nonomuga ndi nowoma wokuuyunga nava wopeke kwa tanta asi mpepo zaKarunga zokupongoka kwa va pa uradi wokuuyunga novantu moyirugana yokuzuvhisa.—Resa Episarome 119:46; 2 Vakolinte 4:7.

19. Ehuguvaro musinke twa kara nalyo nampili kapi tuna kuvhura kurugana unene mosirugana saKarunga?

¹⁹ Vanavazinyetu vamwe kapi ava vhuru kurugana unene mosirugana saKarunga morwa mauvera ndi ukurupe. Nye awo kukara nehuguvaro asi ‘Guhyawo ga zura nkenda, Karunga ogu a kwafa nkenye apa’ kukwata egano maukaro gawo. (2 Kol. 1:3) Nayinye eyi ava rugana mosirugana sendi age kuyitara asi mulyo. Natuvenye twa hepa kudiworoka asi ezoworo lyetu kwa korera mokulikida kwetu epuro monzambo zaKristusa zosizoweseso.—Heb. 10:39.

20, 21. Nonkedi musinke dimwe omu natu likida ehuguvaro mwaJehova?

²⁰ Ukareli wetu kwa kwatera mo kuruganesa siruwo nononkondo detu noyiweka yetu moomu twa vhulira kuliza noukaro wetu. Tuna hara kurugana nomutjima gwetu nagunye “sirugana somuudisi goMbudi zoNgwa.” (2 Tim. 4:5) Ose kukara noruhafo pokuvatera wopeke “va ka sike kediwo lyousili.” (1 Tim. 2:4) Yosili, kufumadeka nokuhamberera Jehova kunkondopeka elikwatakano lyetu nendi. (Yis. 10:22) Kutuvatera hena tu tunge po ehuguvaro lyenene moMusiti gwetu.—Rom. 8:35-39.

²¹ Ngomu tuna yi zogere, kuhuguvara momavyukiso gaJehova kapi ayi wiza po pwayene, twa hepa kukondja mokutunga po ehuguvaro olyo. Yipo nye, nkondopeka ehuguvaro lyoge pokukanderera. Teda ko omu Jehova ga sikisa mo mpango zendi mosiruwo sanare ntani nomu nga ka zi sikisa mo komeho. Twikira kunkondopeka ehuguvaro lyoge mwaJehova pokumukarera. Yosili, kupurakena koyipango oyo, ngo paruka narunye!