1, 2. Yisinke ga rugene Jesus konyima zokudana Paska kumwe novapositoli vendi wovalimburukwi momvhura 33?

AZO ngurova zaNisan 14 momvhura 33. Jesus novakaume vendi wovanene ntani tupu vana kumana kudana Paska. Silika esi sava diworokesere omu Karunga ga zowere Vaisraeli moupika woVaegipite. Ano varongwa vendi wovalimburukwi ntaantani tupu va ka gwane “ezoworo lyanarunye.” Ezuva lyokukwama ko, Mupitisili gwawo gokudira nzo tadi ka mu dipaga nonkore dendi. Nye sirugana esi sokukoresa ngasi twaredesa ketungiko. Etjisango lyohonde zaJesus ngali zowora vantu kononzo nokonomfa.—Heb. 9:12-14.

² Mokuninka asi tu dire kudivara ewapaiko olyo lyeharo, Jesus kwa tulisire po Murarero ogu gwa pinganenene po Paska. Age kwa yi rugene eyi pokubamagura mboroto za hana muhahu nokuzipa vapositoli vendi wovalimburukwi 11, makura ta tanta asi: “Oru yiro rutu rwange nina kumupa. Omu yi rugane tomu diworokere nge po.” Age kwa rugene yokulifana konkinda zovhinyu zongeha, pokuvatantera asi: “Nkinda ezi egwanekero lyepe lyomohonde zange, ezi ngava mu tjisangera.”—Ruk. 22:19, 20.

3. (a) Marunduruko musinke gomanene ga horokere konyima zonomfa daJesus? (b) Mapuro musinke twa hepa kugazadara ko ngomu tuna kukonakona ekanderero lyaJesus?

³ Egwanekero lyoveta pokatji kaKarunga nomuhoko goVaisraeli kwa kere pepi nokuhaga. Alyo ngava lipinganesera po negwanekero lyepe pokatji kaJehova novasikuli vaJesus wovagwavekwa. Jesus kwa kere nosinka sosinene kuhamena muhoko ogu gomupe gopampepo. Vaisraeli vene-vene kapi va kere mouumwe mokukarera kwawo Karunga, eyi ya reterere eswau kedina lyaKarunga lyokupongoka.  (Joh. 7:45-49; Yirug. 23:6-9) Jesus kwa here vasikuli vendi va ruganene kumwe yipo va yererepeke edina lyaKarunga. Makura yisinke ga rugene Jesus? Age kwa geve ekanderero lyomulyo unene eli ga dira kugava rumwe nkenye muntu. (Joh. 17:1-26; Tara efano) Ngomu tuna kukonakona ekanderero eli, tu gazadareni ko komapuro aga: “Karunga ga limbwilire ekanderero lyaJesus ndi? Ame kuna kuparuka kuliza nekanderero olyo ndi?”

4, 5. (a) Yisinke natu lirongera ko omu Jesus ga tamekere ekanderero lyendi? (b) Ngapi Jehova ga limbwilire ekanderero lyaJesus?

⁴ Jesus kwa rongere varongwa vendi yininke yoyinzi yokutetukisa dogoro mokatji komasiku. Makura ta tara keguru nokukanderera asi: “Tate, siruwo sina siki mo. Yererepeka nye munoge, munoge nage a ku yererepeke, moomu wa mu pa epangero lyovantu navenye, asi a gave kwanavenye ava wa mu pa, mwenyo gwanarunye. . . . Ame na ku yererepeka pevhu. Ano sirugana esi wa pa nge ni si rugane, na si sikisa mo. Ano apa ngesi, Tate, yererepeka nge pwamoge neyererepeko eli na kere nalyo poge, awo uzuni simpe patupu.”—Joh. 17:1-5.

⁵ Jesus kwa tamekere nekanderero lyendi pokutumbura yininke eyi ya kere nomulyo kwendi. Sinka sokuhova ga tumbwire sokuyererepeka oGuhwe vemeguru, ngomu ga yi tumbura mekanderero lyendi asi: “Guhyetu, Edina lyoge ava li pongore.” (Ruk. 11:2) Sauvali, age kwa kandererere kuhamena yihepwa yovarongwa vendi asi Guhwe a “gave kwanavenye ava wa mu pa, mwenyo gwanarunye.” Konyima zoyo, ntani nye Jesus ga tumbwire yihepwa yendi pokutanta asi: “Tate, yererepeka nge pwamoge neyererepeko eli na kere nalyo poge, awo uzuni simpe patupu.” Jehova kwa tungikire Munwendi gomulimburukwi, Jesus, pokumupa ‘edina lyenene li pitakane’ lyovaengeli.—Heb. 1:4.

6. Yisinke vapositoli va hepere kurugana mokukagwana mwenyo gwanarunye, ntani ngapi twa yi diva asi ya va tompokere?

⁶ Mekanderero lyendi, Jesus kwa tumbwire hena eyi twa hepa kurugana tu gwane uhwi womwenyo gwanarunye. (Resa Johanesa 17:3.) Age kwa tente asi twa hepa kutwikira ‘kudiva’ Karunga naKristusa. Nkedi zimwe zokuyirugana eyi kuna kara pokuruganesa meho getu nomatwi getu tu lironge yoyinzi kuhamena Jehova naMunwendi. Nkedi zauvali, twa hepa kusikisa mo eyi tuna kulironga. Vapositoli awo nare va yi tulire pasirugana apa Jesus ga kandererere asi: “Nonkango edi wa pa nge, na di va pa. Awo yiyo va di tambura.” (Joh. 17:8) Nye mokugwana mwenyo gwanarunye, awo va hepere kutwikira kuteda nonkango daKarunga nokudisikisa mo meparu lyawo. Vapositoli wovalimburukwi ya va tompokere mokuyirugana eyi dogoro konomfa dawo ndi? Nhi, ya va tompokere. Ose twa yi diva eyi morwa madina gawo kwa ga tjanga ketateko lyomamanya murongo nagavali goJerusarema zompe.—Ehor. 21:14.

7. Yisinke ayi tanta ‘kudiva’ Karunga, ntani morwasinke ya karera nomulyo?

⁷ Nsene tuna hara kuparuka narunye, twa hepa ‘kudiva’ Karunga. Yisinke ayi tanta eyi? Nkango zoRugereka va ruganesa apa kuvhura kuzitoroka hena asi “kutwikira kudiva” ndi “kukara nediwo.” Yipo nye, kudiva Karunga kutanta asi kutwikira kulironga  yoyinzi kumuhamena. Eyi kwa kwatera mo yoyinzi kupitakana tupu kudiva yikara nositambo sendi. Kudiva Jehova kwa kwatera mo kukara neharo lyenene kwendi nokovapuli vakwetetu. Bibeli kwa faturura asi: “Ogu ga dira kuhara mukwawo, ogo kapi ga diva Karunga, yeeyi Karunga yige eharo.” (1 Joh. 4:8) Kudiva Karunga kwa kwatera mo hena kumulimburukwa. (Resa 1 Johanesa 2:3-5.) Ee, situmbukira musi kounene sokukara ngagumwe ogu ga diva Jehova! Nye twa hepa kutakamesa asi twa ha zumbanesa elikwatakano lyetu lyewa naKarunga ngwendi moomu ga lizumbanesere Judasa Iskaliyoto. Yipo nye twa hepera kukondja mokukwaterera kelikwatakano lyetu nendi. Nsene tu yi rugana, Jehova nga tu pa uhwi womwenyo gwanarunye.—Mat. 24:13.

8, 9. Sininke musinke somulyo po kwaJesus apa ga kere pevhu, ntani yisinke ga nyengere?

⁸ Pokuresa ekanderero lyaJesus mwaJohanesa egaununo 17, kulikida nawa-nawa asi Jesus kwa kere neharo lyenene kapisi kovapositoli vendi kwelike, nye hena noku kwetu. (Joh. 17:20) Sininke somulyo po kwaJesus kapisi ezoworo lyetu. Siruwo nasinye esi ga kere pevhu, sininke somulyo po kwendi kwa kere sokupongora nokuyererepeka edina lyoGuhwe. Pasihonena, apa ga divisire sirugana sendi mosinagoge zomoNasareta, Jesus kwa resere mobuke zaJesaya asi: ‘Mpepo zaKarunga pozili pwange, yeeyi age kwa gwaveka nge asi ani udisire vahepwe mbudi zongwa.’ Yosili, Jesus kwa tumbwire edina lyaKarunga apa ga resere sirugana esi.—Ruk. 4:16-21.

⁹ Komeho Jesus a wize pevhu, vampitisili womaukarelikarunga woVajuda ngava rongo vantu va dire kuruganesa edina lyaKarunga. Gazara tupu omu Jesus ga nyengere oyo. Age kwa tanterere varwanesi vendi asi: ‘Ame kwa wiza medina lyaTate, nye one kapi muna kutambura nge. Nsene pa wiza gumwe medina lyamwene, ngano yige mu tambura po.’ (Joh. 5:43) Makura mazuva gongandi  tupu komeho a ka fe, Jesus kwa pwagesere sinka sendi sosinene mekanderero asi: “Tate, yererepeka edina lyoge!” (Joh. 12:28) Mekanderero eli tuna kuzogera, kulikida nawa-nawa asi sininke somulyo po meparu lyaJesus kwa kere sokuyererepeka edina lyoGuhwe.

10, 11. (a) Yisinke ya hamenene mo mokudivisa edina lyoGuhwe? (b) Morwasinke varongwa vaJesus vana kudivisira edina lyaKarunga?

¹⁰ Jesus kwa kandererere asi: “Edina lyoge na li horwera vantu ava wa pa nge mo mouzuni. Awo woge va kere, nye yiyo wa va pa nge, awo yiyo va sikisa mo nonkango doge. Ame kapi nani kara hena mouzuni, nye awo mouzuni vana kara, ano ame tani wiza koge. Tate goKupongoka, va kungira medina lyoge eli wa pa nge, asi va lize mutjima gumwe ngwendi nyose.”—Joh. 17:6, 11.

¹¹ Kudivisa edina lyoGuhwe kovarongwa vendi kwa hamenene mo yoyinzi kupitakana tupu kulitumbura. Jesus kwa va vaterere va dive asi yilye Jehova noyikara yendi ntani nomu a tu tekura. (Ex. 34:5-7) Ano ngesi Jesus kuna kara Hompa meguru ntani kuna kutwikira kuvatera varongwa vendi va divise edina lyaKarunga mouzuni mudima. Nositambo musinke? Sokuvatera vantu wovanzi va dive Jehova komeho u wize uhura wouzuni ou. Makura apa ngasi sika mo siruwo, age nga parura nombangi dendi dokulimburukwa!—Hes. 36:23.

12. Yininke yitatu musinke ya hepa po yipo yi tu tompoke mosirugana setu sokuzuvhisa?

¹² Apa ga kere pevhu, Jesus kwa rugene unene mokuvatera varongwa vendi va funde po maupirankondo gawo. Eyi kwa kere nomulyo morwa va hepere kumanesa sirugana esi ga varekere Jesus. Jesus kwa kandererere asi: ‘Moomu wa tuma nge mouzuni, name yimo na va tumu mouzuni.’ Mokuvatompoka mosirugana sokuzuvhisa, Jesus kwa nkondopekere yininke yitatu yomulyo. Sokuhova, Jesus kwa kanderere asi varongwa vendi kapi va hamena kouzuni waSatana wokunyata. Sauvali, age kwa kandererere asi varongwa vendi va va pongwere mousili woNonkango daKarunga. Sautatu, Jesus kwa rugurukire kulikwambera asi varongwa vendi va lize mutjima gumwe tupu moomu ga kara age mouumwe noGuhwe. Nkenye gumwe gwetu ga hepa kulipura asi: ‘Ame kuna kurugana yininke yitatu eyi ga tumbwire Jesus mekanderero ndi? Jesus kwa kere nehuguvaro asi nsene varongwa vendi va yi rugana oyo, vantu wovanzi ‘mouzuni ngava pura asi nyove wa tuma nge.’—Resa Johanesa 17:15-21.

13. Ngapi omu ekanderero lyaJesus va li limbwilire mosiruwo sovapositoli?

¹³ Apa atu resa buke zoYirugana, ose kuvhura kumona asi Jehova kwa limbwilire ekanderero lyaJesus. Vakriste wokuhova kwa hamenene mo Vajuda novapagani nonongawo nonohepwe novakareli novahekurwawo, ntani gazara tupu maligaunuko ngano aga va kere nago! Nye awo kwa kere mouumwe yiyo mupositoli Paurusa ga va hetakanesere komaruha nagenye gorutu romuntu, ano Jesus ngomutwe gwawo. (Efe. 4:15, 16) Mouzuni waSatana womaligaunuko, uumwe ou kuvhulika tupu morwa mpepo zaJehova zokupongoka.—1 Kol. 3:5-7.

14. Ngapi omu ekanderero lyaJesus va li limburura momazuva getu?

¹⁴ Nye yininke ya rundurukire apa va fire vapositoli. Pwa kere varwanesi usili, ano marongo goyimpempa kwa tamekere  mombungakriste ntani kapi va kere mouumwe. (Yirug. 20:29, 30) Nye momvhura 1919, Jesus kwa mangwilire vasikuli vendi wovagwavekwa moupika woukarelikarunga woyimpempa nokuvapongaika va kare ‘momalikwatakano gene-gene.’ (Koros. 3:14) Ngapi omu sirugana sawo sokuzuvhisa sa kundama uzuni mudima? Konyara ‘nonzwi dapeke’ dokupitakana mamiliyona ntambali dokutundilira ‘momarudi nomomakoro nomonomuhoko nomomaraka nagenye’ ngesi kuna kukarera Jehova mouumwe novagwavekwa vaKarunga. (Joh. 10:16; Ehor. 7:9) Eli kuna kara elimbururo lyokutetukisa kekanderero lyaJesus eli asi: “Uzuni u dive asi nyove wa tuma nge, yiyo wa va hara moomu wa hara nge.”—Joh. 17:23.

15. Yisinke ga hundilire Jesus kuhamena vasikuli vendi wovagwavekwa?

¹⁵ MoNisan 14, Jesus kwa yererepekere vapositoli vendi pokutulisa po egwanekero nawo va ka pangere kumwe nendi moUhompa. (Ruk. 22:28-30; Joh. 17:22) Kuhamena navenye ava ngava ya kara vasikuli vendi wovagwavekwa, Jesus kwa va hundilire po asi: “Tate, na hara asi, ava wa pa nge, va kare nawo oku na kara, va mone eyererepeko lyange eli wa pa nge, yeeyi ove kwa hara nge, uzuni awo simpe nokuusita si.” (Joh. 17:24) Eyi kuretera ruhafo nonzwi dapeke daJesus ntani kulikida asi Vakriste wousili naina kuna kara sili mouumwe ntani kapi ava lifire mfudu.

16, 17. (a) Nononkango musinke Jesus ga hulisire ekanderero lyendi? (b) Yisinke tuna tokomene kurugana?

¹⁶ Sinzi sovantu mouzuni kuncenuna vantu vaJehova ava va kara mouumwe, eyi kuhorokera morwa yimpempa eyi ava rongo vampitisili womaukarelikarunga. Momazuva gaJesus namo yimo ngayi horoka ngorooro. Yipo nye Jesus ga hulisire nekanderero lyendi nononkango edi asi: “Tate gomuhungami, uzuni kapi wa ku diva, nye ame na ku diva, ano awo va diva asi nyove wa tuma nge. Ame na va divisa edina lyoge, yiyo ngani li va divisa nokomeho, asi eharo eli wa hara nge nalyo li kare mwawo, name ni kare mwawo.”—Joh. 17:25, 26.

¹⁷ Yosili Jesus ga divisire edina lyoGuhwe. Naina, ngoMutwe gombungakriste, age kuna kutwikira kutuvatera tu divise edina lyoGuhwe nositambo sawo. Tu limburukweni mpangera zaJesus zokuzuvhisa nomupampi nokuninka varongwa. (Mat. 28:19, 20; Yirug. 10:42) Tu kondjeni unene mokukara mouumwe ngovantu vaKarunga. Makura ngatu paruka kuliza nekanderero lyaJesus mokuyererepeka edina lyaKarunga nokugwana ruhafo rwanarunye.