Filima zosiparatjangwa A Trip Down Market Street ezi va haferere vatareli za likidire yihorokwa yeparu lyankenye ezuva kwa karerere moSan Francisco, moAmerika kehagero lyomvhura 1 900. Ava va likidire filima ozo kwa kere nefano komeho zetuwa eli va tulire korutjeno nokulipirukidisa monzira ezi ava gendi vantu. Mofilima ozo kwa likidire mo nonkambe dina kukoka karukara nomatuwa ganare naga gantani novarandi ntani vamati wokurandesa nosaitunga.

Eyi ya ninkisire filima ezi zi kare zokuguvisa kuna kara yihorokwa eyi va likidire mo ya horokere momazuva 18 Kudumogona 1906, komeho tupu zekankamo lyevhu nomundiro eyi ya dipagere vantu wovanzi ntani nkare yi zonagure po ruha narunye rositata oso. Vantu vamwe ava va likidire mo kwa kere tupu nomazuva gomasesu gokuparuka. Scott Miles gumwe gomoruvharo rwava va likidire filima ozo kwa tanta asi: “Ame kwa mwene vantu ava va dilire kudiva eyi nayi ka va horokera. Ame kwa va zuvhilire nkenda.”

Yina lifana nomomazuva getu. Nose kuna kuzuvhira nkenda vantu. Awo kuhokwa tupu eparu lyankenye ezuva va hana kudiva eyi nayi ka horoka ntaantani, ezonaguro lyouzuni ou nomparukiso ezi zondona. Mokulisiga nekankamo lyevhu eli ali horoka hararasi, pana kara siruwo sosisupi sokurondora vantu kuhamena ezuva lyaJehova lyompanguro. Yimo, ove nkenye sivike kulihameka mezuvhiso lya tunda embo zende embo, nye litura mo unene mokurondora vantu.

Sihonena saJesus kuna kara nomulyo morwa nga zuvhisa nkenye apa. Age nga zuvhisire nkenye ogu nga ligwanekere nendi, a kare asi mufutisi gomutero ogu ga gwene monzira ndi mukadi ogu ga gwene pondjombo. (Ruk. 19:1-5; Joh. 4:5-10, 21-24) Nampili posiruwo esi ga here kupwizumuka, Jesus ga kere neharo lyokutwikira kuronga vantu. Morwa kufira nkenda vantu, eyi ya mu ninkisire a gave yoyinzi kupitakana tupu kugava umbangi. (Mar. 6:30-34) Ngapi elituromo lyaJesus vana kulihonena naina?

Melika kwa tunga metungo eli lya kara metakameso lyenene. Sinzi sovamaparambo vendi awo  vanayirongo ava ava ruganesa noselefoni edi va dira kutura mobuke zonotelefona ntani madina gawo nago kapi ga kara mobuke ozo. Age kuhafera mpito zokulikarera ezi pokuzogera novamaparambo vendi ava ali gwana nawo membamba. Age kwa tanta asi: “Ame kuyitara asi mukunda gwange gokuzuvhisira.” Melika kusimba yimbapiratjangwa yomomaraka gokulisiga-siga, ano wovanzi kutambura yitratate noyifo. Age hena kuvatantera kuhamena Interneta zetu zoaderesi jw.org. Age ga tameka malirongo goBibeli gongandi.

Sonia nage kuzuvhisira kwankenye ogu ana gwana. Age kurugana kosipangerogona sandokotora, ntani ga litulira po sitambo sokugava umbangi kwankenye murugani mukwawo. Pomuhowo, age kwa litulilire po siruwo sokudiva yihepwa yankenye gumwe. Makura age kuruganesa vili zendi zomuzuhwa mokuzogera nankenye gumwe yomoBibeli. Ngoyitundwamo, Sonia ya mu tompoka mokukara novarongwa vavali woBibeli. Age hena kuna kugazara kuruganesa nominute dendi depwizumuko yipo a uyunge nowo vana kundindira ndokotora.

Gumwe ga parukire ekankamo lyevhu momvhura 1906 kwa uyungire asi: “Aso kwa kere simpagwa sosinene sa dira kuhoroka rumwe mositata.” Nye yimpagwa oyo, yinunu mokuyihetakanesa nezuva eli ngava ya futisa “ava va dira kudiva Karunga.” (2 Tes. 1:8) Jehova kwa hara asi vantu va litezurure nokutambura mbudi zerondoro ezi dina kugava Nombangi dendi.—2 Pet. 3:9; Ehor. 14:6, 7.

Ove wa kara nompito zokuvatera vantu va dimburure siruwo esi tuna kuparuka ntani va dire kukondjera yininke yopanyama yipo va tengure kwaJehova. (Sef. 2:2, 3) Ruganesa nkenye mpito mokugava umbangi kovarugani vakweni nokovamaparambo woge ntani nava o gwanekere nawo. Ngo litura mo unene mokurondora vantu ndi?