1. Yisinke sinzi sovantu ava gazara kuhamena mupika, ntani ngapi ya lisiga noupika ou va tumbura moVaroma 6:22?

SINZI sovantu kugazara asi mupika kuna kara muntu ogu ga kara konhi zepangero lyahekurwendi nokumutekura momudona. Nye kukara mupika gwaKarunga kwa lisiga unene. Nonkango daKarunga kuuyunga kuhamena vapika ava va kara neharo lyokukarera Hekurwawo geharo. Apa mupositoli Paurusa ga singwenene Vakriste ‘ngovapika vaKarunga,’ age kwa tente asi awo kuruganena Karunga morwa eharo. (Rom. 6:22) Yisinke ya hamena mo kukara mupika gwaKarunga? Ngapi natu nyokera po kukara mupika gwaSatana nouzuni wendi? Mauwa musinke aga tundu mokukara mupika gwaJehova nokumukarera noulimburukwi?

2. (a) Yisinke ngayi tumangeda mupika goMuisraeli a tokore kutwikira kukara mupika? (b) Yisinke ngayi likida nsene mupika vana mu tjiura kokutwi?

² Veta zaKarunga ezi ga geve koVaisraeli kutuvatera tu kwate egano eyi ya hepa po mokukara mupika gwaJehova. Mupika goMuhebeli ngava mu mangurura momvhura zautano-nauvali kosirugana sendi. (Ex. 21:2) Nye nsene mupika ogo kwa hara hekurwendi nosirugana sendi ntani kapi ana hara kuza, Jehova kwa tulire po ewapaiko lyokulikarera. Hekurwendi ta mu twara pevero lyoupongoki ndi koyikuravero, makura ta ka mu tjiura kutwi nontungo. (Ex. 21:5, 6) Morwasinke ya karerere ngoso? Meraka lyoRuhebeli, nkango kulimburukwa kwa likwatakana nokupurakena nokuzuvha. Mokumutjiura kokutwi, mupika ngoso kwa likidire asi ana hara kutwikira kuruganena hekurwendi noulimburukwi. Eyi tayi tu vatere tu kwate egano eyi ya hamena meligawo lyetu kwaJehova, kukara neharo lyokumulimburukwa morwa twa mu hara.

3. Morwasinke atu ligavere nyamwetu kwaKarunga?

 ³ Apa twa gwene ekuho, ose kwa tulire po etokoro lyokukarera Jehova ndi lyokukara mupika gwendi. Apa twa ligeve kwendi, ose kwa tumbwidilire asi ngatu mu limburukwa ntani ngatu rugana mpango zendi. Kwato ogu ga tu sininikire mokutura po etokoro lyangoso. Nampili vadinkantu ava va gwana ekuho, awo kwa yi rugana oyo morwa eharo lyawo lyokuhara Jehova kapisi mokuhafesa vakurona vawo. Natuvenye kwa ligava nyamwetu kwaGuhyetu gemeguru, Jehova, morwa eharo. Mupositoli Johanesa kwa tjenge asi: “Eharo lyetu lyokuhara Karunga lyeli asi, ose atu sikise mo yipango yendi.”—1 Joh. 5:3.

4. Yisinke ya hepa po mokukara “vapika wouhungami”?

⁴ Ee, ruhafo musi twa kara naro kwaJehova mokutupulisira tu kare vapika vendi! Epuro lyetu monzambo zaKristusa zosizoweseso kwa tu pa mpito tu dire kukara vapika wononzo. Eyi kutanta asi nampili ngomu twa dira kusikilira mo, ose kuvhura kulimburukwa Jehova naJesus ngoVahekuru vetu. Paurusa ga yi zeresere mombilive zendi zimwe pokutanta asi: “Ligazareni nyamweni asi mwa fa kombinga zononzo, yiyo muna kerere nomwenyo Karunga mwaJesus Kristusa.” Makura yipo ga rondwere asi: “Yeeyi mwa diva nawa-nawa asi ogu nomu ligava mu mu kerere oku tomu mu limburukwa, vapika vendi nomu kara. Eyi kutanta asi, mu vapika wononzo edi adi twara konomfa, ndi velimburuko eli ali twara kouhungami. Pandureni Karunga! Yeeyi nare vapika wononzo mwa kere, nye ntaantani tomu limburukwa nonomutjima nadinye kousili ou mwa gwana merongo eli mwa tambura. One hena kwa mu zowora mo mononzo, makura yiyo nye muna kara vapika wouhungami.” (Rom. 6:11, 16-18) Koneka asi Paurusa kwa uyungire kuhamena ‘kulimburukwa nonomutjima nadinye.’ Yosili, eligawo lyetu kwaJehova kutuninkisa tu kare “vapika wouhungami.”

5. Yisinke atu rwanesa, ntani morwasinke?

⁵ Ngovapika vaKarunga wokuligava, ose kurwanesa yininke yivali. Sokuhova, kudira kusikilira mo kwetu. Paurusa nage kwa kere merwano eli. Age kwa tjenge asi: “Komutjima gwange ame Veta zaKarunga kwa zi panda unene. Nye ame kumona hena veta zapeke ezi azi rugana morutu rwange. Veta ozo kurwisa Veta zomomutjima gwange. Azo yizo za tura nge moupika wononzo edi adi pangere morutu rwange.” (Rom. 7:22, 23) Morwa kapi twa sikilira mo, twa hepa kutwikira kurwanesa po madowo gorutu, madowo aga aga tu ninkisa tu rugane yokudira kuhafesa Karunga. Mupositoli Peturusa kwa tu korangeda asi: “Kareni ngwendi vantu wokumanguruka, nye walye omu foferesa udona kemanguruko nampili nakauke, nye kareni ngwendi vapika vaKarunga.”—1 Pet. 2:16.

6, 7. Ngapi omu Satana a ninkisa uzuni u moneke ngwendi uwa unene?

⁶ Sauvali, ose kurwanesa uzuni ou wa kara mepangero lyonompepo donondona. Satana, mupangeli gouzuni kuna kuruganesa yirwiso yendi yipo a teze po ulimburukwi wetu kwaJehova naJesus. Age kuna hara a tu ninke tu kare vapika vendi pokutuzeda tu hame kouzuni wendi. (Resa Vaefeso 6:11, 12.) Nkedi zimwe omu a pukisa Satana kuna kara pokuninka uzuni wendi u moneke ngwendi uwa unene. Mupositoli Johanesa kwa rondwere asi: “Muntu ntene a hara uzuni, eharo lyaGuhwe mwendi mutupu. Nayinye eyi ya kara mouzuni, ngwendi edowo lyorutu nedowo lyomeho nomalitumbadekero gemona, kapi ayi tundu kwaGuhyetu, mouzuni ayi tundu.”—1 Joh. 2:15, 16.

 ⁷ Mouzuni ou sinzi sovantu kuna kudowokera kukara nemona lyenzi. Satana kuninkisa vantu va pure asi kukara noyimaliwa yoyinzi kureta ruhafo. Yitora yina lihanene nakunye. Matjingiso kukorangeda vantu va lipongaikire emona nokukara noyilihafeso. Pasihonena, vanangesefa woyigenderwa kukorangeda marungendo gokuza komavango gomawa. Nayinye yomouzuni kutukorangeda tu rundurure mparukiso zetu, nye monkedi omu una tu harere uzuni.

8, 9. Siponga musinke sa kara po, ntani morwasinke?

⁸ Peturusa kwa rondwere Vakriste womomazuva gendi ava va tamekere kutambura magano gouzuni pokutanta asi: “Awo kwa hafera kukara moyipito eyi aga panga madowo gawo gorutu momutenya. Awo nomuga, awo nyata. Nsene vana kara none pokulya mombungakriste, nkenye apa awo kuhafera yikara yawo yoyimpempa. Moruho romarutu gawo, pokuuyunga kwawo nonkango doyinyami da hana mulyo, yipo ava kwatere ava vana kuhara kutunda moupagani. Awo kuvatumbwidira emanguruko, nye awo vene ko vapika vezonauko yeeyi ogu ya kwata yuma, mupika gwayo ga kara.”—2 Pet. 2:13, 18, 19.

⁹ Kuhafesa ‘edowo lyomeho’ kapi ayi mangurura muntu. Nye ayo kuninkisa muntu a kare mupika gomupangeli gouzuni ou, Satana Muzonaguli. (1 Joh. 5:19) Ayo siponga unene kukara mupika gemona, morwa udigu kumanguruka ko.

10, 11. Wolye ana di taparara Satana, ntani ngapi omu erongo lyokuzeruka lina kukundama vadinkantu?

¹⁰ Ngwendi moomu ga yi rugene moEdeni, Satana naina kuna kutaparara ava va dira kukara nediwo. Vadinkantu yiwo ana kutaparara po unene. Satana kapi ayi mu hafesa apa vadinkantu ndi nkenye ogu a tokora kukara mupika gwaJehova. Satana kwa hara kuteza po ulimburukwi wava navenye va ligava kwaJehova.

¹¹ Apa mupika ngava mu tjiura kokutwi, age nampo nga zuvhu kukora. Nye konyima, age nga kara nosidiviso esi ngasi likida asi age kwa tokora kuruganena hekurwendi. Ayo kudigopera ndi kukoresa vadinkantu pokutura po matokoro gokulisiga nava womapupi gawo. Pasihonena, Satana kukorangeda magano aga asi kukara nosirugana sokuzeruka mouzuni ou kureta ruhafo, nye Vakriste va hepa kutara asi yihepwa yawo yopampepo mulyo  unene. Jesus kwa rongere asi: “Ava ava zuvhu nonkango daKarunga nye tava di pungura, yiwo po verago.” (Ruk. 11:28) Vakriste wokuligava kurugana mpango zaJehova meparu lyawo, kapisi zaSatana. Awo kwa tokomena kuresa Veta zaJehova, oku tava zi konakona mutenya nomasiku. (Resa Episarome 1:1-3.) Sinzi somarongo gokuzeruka mouzuni ou kapi aga pe mukareli gwaKarunga siruwo sokuteda ko koNonkango daKarunga nokumukarera.

12. Veta musinke zina tamba vanona naina?

¹² Mupangeli gouzuni ou kuvhura kudigopekesa eparu lyoMukriste. Mombilive zendi zokuhova koVakolinte, Paurusa kwa uyungire asi: “Nsene asi o mupika wa kere apa va ku horowora, wa ha yi pakera mbili, nye mpili asi polili evega lyokumanguruka, wa ha li zengeda.” (1 Kol. 7:21) Kumanguruka moupika kwa korerere konomvhura edi va tulire po. Naina, moyirongo yoyinzi, kwa tura po veta asi vanona va hepa kuza kosure dogoro ponomvhura dongandi. Makura konyima zoyo, vadinkantu kuvhura va horowore mokutwikira nelirongo ndi hawe. Ayo kuyadigopera Mukriste mokukarera Jehova nsene a horowora kutwikira nelirongo lyokuzeruka mouzuni ou.—Resa 1 Vakolinte 7:23.

13. Erongo musinke ali vatere unene vakareli vaJehova?

¹³ Paurusa kwa rondwere Vakriste woVakorosi asi: “Omu takamese, walye ava mu diinine po vantu nounongo nomasanseko goyimpempa aga ga tunda konompo dovantu nekepangero lyonompepo douzuni, ya hana si yokutunda kwaKristusa.” (Koros. 2:8) Varongi wovanzi kuronga ‘unongo nomasanseko goyimpempa aga ga tunda konompo dovantu.’ Erongo lyokuzeruka omu mwa hamena marongo gangoso, kapi ali rongo varongwa udivi wokomawoko, makura awo kapi ava vhuru kulirera vene. Nye Vakriste awo kuhorowora erongo eli ali va pe ediwo omu nava rugana yirugana yokomawoko yipo hena va vhure kukarera Karunga. Awo kutambura epukururo lyaPaurusa eli ga geve kwaTimoteusa asi: “Ukwakarunga kugawopeka sili muntu, ntene a litara asi, eyi ga weka yina mu gwanene. Ano ntene tuna kara nonondya nomudwaro, ngano yi tu gwanene makura.” (1 Tim. 6:6, 8) Mevango lyokugwana noharade dokuzeruka yipo madina gawo ga fumane, Vakriste wousili awo kurugana unene mokugwana ‘nombilive domapandadeko’  pokulihameka unene mokuzuvhisa.—Resa 2 Vakolinte 3:1-3.

14. Kuliza noVafilipi 3:8, ngapi omu Paurusa ga tere mfumwa zendi zokukara mupika gwaKarunga naKristusa?

¹⁴ Koneka sihonena somupositoli Paurusa. Age kwa mu rongere mulirongi gomatjangwa, Gamaliyeli, ogu ga divikwire unene. Erongo eli ga gwene kuvhura kulihetakanesa nerongo lyokounivesiti naina. Nye ngapi omu Paurusa ga li tere pokulihetakanesa nomfumwa zokukara mupika gwaKarunga naKristusa? Age kwa tjenge asi: “Nayinye . . . omu nina kuyitara, ayo yininke yomawoko-woko tupu, ntene ni yi faneka nokudiva Hompa gwange Jesus Kristusa.” Age kwa gwederere ko asi: “Mwarwendi ame yiyo nye na yi yokekera yininke nayinye eyi. Ame kuna yi nyokere asi ni kongwere po Kristusa.” (Fil. 3:8) Mutaro gwaPaurusa kuvhura kuvatera vadinkantu woVakriste novakurona vawo va ture po etokoro lyewa kuhamena elirongo. (Tara mafano.)

15, 16. Erongo musinke azi gava mbunga zaJehova, ntani nositambo musinke?

¹⁵ Nkareso musinke za kara konosure domarongo gokuzeruka? Komavango ogo, varongwa kuhondera nokuruganesa yikorwesa mepuko. Ntani hena kuronga ko erongo lyelisinto. (Efe. 2:2) Nye mbunga zaJehova kugava erongo lyomulyo po mombungakriste. Natuvenye kuvhura tu gwanene mo uwa moSikora zoUkareli. Pwa kara hena nosikora dimwe omu natu vhura kugwanena uwa. Pasihonena, pwa kara sikora zovazuvhisi wokukarerera wovanavazinyetugara wovadike ava tumbura asi Sikora zoBibeli zoVagara woVadike, ntani zovazuvhisi wokukarerera wovalikwali ava tumbura asi Sikora zoBibeli zovalikwali. Nosikora edi kutuvatera tu limburukwe Hekurwetu gemeguru, Jehova.

¹⁶ Kuvhura tu gwane mausili gomanzi moIndeksi zoRuhungu ndi Watchtower Library CD-ROM. Sitambo sosinene po serongo lyetu lyoBibeli kuna kara sokukarera Jehova. Alyo kuturonga omu natu vatera vantu va likwatakane naKarunga. (2 Kol. 5:20) Makura ava atu rongo ngayi va vatera nawo va ronge wopeke.—2 Tim. 2:2.

17. Mauwa musinke no gwanena mo mokuhorowora erongo lyomulyo po?

¹⁷ Mosifanekeso saJesus sonoranda, vakareli ndi vapika vavali wokuhuguvara kwa va pandadekere kosirugana sawo, ano eyi kwa hafesere hekurwawo makura ta gwederere ko kosirugana sawo. (Resa Mateusa 25:21, 23.) Nsene tu horowora erongo lyomulyo po ose ngatu hafa ntani eparu lyetu ngali kara nositambo. Konakona sihonena saMichael. Age kwa tompwere nawa mosure. Apa vamitili vendi va mu zigidire kepongo va ya zogere nendi nsene kuvhura a ze kounivesiti, awo kwa va tetwire apa va ya dimbwilire asi kapi ga horowora elirongo lyokuzeruka. Nye age kwa horowere sure zedeuro lyopokaruwogona. Eyi ya mu vaterere a lirere mwene oku ta rugana uzuvhisi wokukarerera. Age ga lizuvhire asi ga tura po etokoro lyepuko ndi? Age kwa tanta asi: “Erongo eli na gwana ngomuzuvhisi gokukarerera ntani ngomukuronambunga mulyo unene. Matungiko noyitumbukira eyi ani hafere mulyo unene kupitakana yimaliwa eyi nkare ni kare nayo. Ame nina hafa sili kweyi na dira kukondjera erongo lyokuzeruka.”

18. Morwasinke natu horowera erongo lyomulyo po?

¹⁸ Erongo lyomulyo po kuturonga mpango zaKarunga nokutuvatera tu kare vapika vendi. Alyo kutupa ehuguvaro ‘lyokutuzowora mo moupika wezonauko,’ ano mouhura ngatu za “mezowoko lyouyerere wovana vaKarunga.” (Rom. 8:21) Yomulyo po, alyo kutulikida nkedi zongwa po zokuhara Hekurwetu gemeguru, Jehova.—Ex. 21:5.