Apa vazuvhisi vavali wokukarerera va va zigidire membo limwe moKenya, awo kwa va tetukisire pokumona mugara ogu ga rere pombete. Age kwa kara nokarutu kokanunu nomawoko gomasupi. Ngomu va mu tanterere etumbwidiro lyaKarunga eli asi “yirema yomondambo ngayi lidinkura tayi dana,” mugara kwa purakenene noruhafo.—Jes. 35:6.

Vazuvhisi va ya yi dimbwilire asi Onesmus kwa mu hampuruka nouvera woyisupa ava tumbura asi osteogenesis imperfecta. Nampili sininke soureru nsene si mu guma kuvhura kuteka, morwa yisupa yendi kapi ya kora. Morwa kwato uhaku wouvera ou, Onesmus kwa yi tambura tupu asi eparu lyendi nalinye nga kara mokukora ntani posipundi sourema.

Onesmus kwa tambwire elirongo lyoBibeli. Nye ozina kapi va yi kwatesere ko asi a ze komapongo goSikriste asi neisi na ka remana a ka gwederere kokukora kwendi. Makura vanavazinyetu yipo ngava mu kwatere yokomapongo, ano Onesmus ngayi purakenenene membo. Konyima zomakwedi gatano, yipo ga tokwere asi ana hara kuza komapongo yi kare asi yinke nayi ka horoka.

Apa nga zi komapongo ngayi gwederere kokukora kwendi ndi? Hawe. Age kwa tanta asi: “Kukora kwange nga kusesupa posiruwo momapongo.” Age kwa gazarere asi esesupo lyendi lyokukora kwa litesere po epuliro lyendi lyepe. Onane vendi va dimbwilire marunduruko monkareso zamunawo ano eyi ya va hafesere makura nawo tava tambura elirongo lyoBibeli. Onane vendi kwa tanta asi: “Kukarera Karunga yiwo uhaku wamunwange.”

Mwaza siruwo, Onesmus kwa ya kere muzuvhisi gokudira kugwana ekuho. Ano konyima ta ya gwana ekuho ano age ngesi kuna kara mukwafimbunga. Nampili ngomu a dili kuruganesa maguru newoko lyendi limwe, age ga kara neharo lyokurugana unene mosirugana saJehova. Age kwa here kukara muzuvhisi gokuvatera nye kwa kere nomasinganyeko. Morwasinke? Morwa ga divire asi ntudi nga hepa evatero lyavamwe mokumusindaika posipundi sendi sourema. Apa ga tanterere Vakriste vakwawo sitambo sendi, yipo va mu tumbwidilire asi ngava mu vatera. Eyi yiyo va rugene mokumuvatera a rugane uzuvhisi wokuvatera.

Apa Onesmus ga kere nositambo sokukara muzuvhisi gokukarerera ga kere hena nosinka. Posiruwo esi, etjangwa lyezuva kwa mu pere ekorangedo eli ga hepere. Alyo kwa kere etjangwa lyemEpisarome 34:8 asi: “Hetekeni mu tare asi HOMPA ngapi omu ga wapa!” Konyima zokuteda ko ketjangwa olyo, Onesmus kwa tokwere kukara muzuvhisi gokukarerera. Ngesi age kuna kuzuvhisa mazuva gane mosivike ntani ga kara novarongwa woBibeli ava vana kutura po ezokomeho pampepo. Momvhura 2010, ga ka kere moSikora zoVazuvhisi wokukarerera. Ee, ruhafo musi ga kere naro Onesmus pokumona asi murongi gwawo gumwe kwa kere munazinyetugara gwina ga ka mu zuvhisilire sikando sokuhova!

Onesmus ngesi ntaantani a gwanese nomvhura 40. Vakurona vendi va dogoroka, nye vanavazina womombungakriste kumupakera mbili. Age kuna kuhafera matungiko nagenye aga ana kugwana ngesi, ntani kuna kundindira nononkondo apa ngadi ka sika mo nonkango edi asi: “Nagumwe si gomosirongo esi twa kara nga sivana asi ta vere.”—Jes. 33:24.