1, 2. (a) Morwasinke ya karera nomulyo ‘mokuvangarara, tu wape kukanderera’? (b) Mapuro musinke twa hepa kulipura kuhamena makanderero?

MUGARA gumwe ogu nga rugana yirugana yomasiku kwa tanta asi: “Siruwo sosidigu kuvangarara kuna kara pomasasiku apa ezuva ali hara kusa.” Yosili, vamwe ava ava dili kurara masiku nagenye nawo kuvhura va yi kwatese ko. Kuvhura tu yi hetakanese nosiruwo esi tuna kuparuka ngesi. Ose kuna kuparuka pepi nouhura wouzuni waSatana, ntani aso kuna kara ngwendi siruwo somasiku, omu Vakriste naina va hepa kukara vana vangarara. (Rom. 13:12) Ee, siponga musi nayi kara kwetu nsene tu rara pampepo posiruwo esi sokuhulilira. Ayo ya wapa asi tu ‘lididimikire’ nokulimburukwa epukururo eli asi ‘vangarareni, mu wape kukanderera.’—1 Pet. 4:7.

² Morwa kuna kuhedera pepi nouhura wouzuni waSatana, ayo ya wapa kulipura asi: ‘Ngapi omu ani litura mo momakanderero gange? Ame kuruganesa nkenye rupe rwekanderero, ntani ame kukanderera nkenye apa ndi? Ame kukanderera po nkenye apa wopeke ndi ame kukanderera tupu koyininke eyi nina hepa ndi nina hara? Ntani ngapi omu ekanderero lya kara nomulyo keparuro lyange?’

3. Marupe musinke ga hamena mo mekanderero?

³ Mombilive zendi zokoVaefeso, mupositoli Paurusa kwa tumbwire asi “omu kanderere nkenye apa.” (Efe. 6:18) Momakanderero getu, kuvhura tu likwambere Jehova atu vatere yihepwa yetu ntani tu funde po yilimbikiso. ‘Muzuvhi gomakanderero’ kupurakena komahundiro getu. (Epis. 65:2) Nye nsene tatu kanderere, twa hepa kudemenena komarupe gamwe gekanderero. Ago kwa hamena mo kuhamberera nokupandura nokulikwambera.

4. Morwasinke twa hepera kuhamberera Jehova momakanderero getu?

 ⁴ Pwa kara nokonda dononzi deyi twa hepera kuhamberera Jehova momakanderero getu. Pasihonena, ose kututumangeda tu mu hamberere apa atu gazara ‘koyininke yononkondo eyi ga rugana’ ntani ‘kounene wendi ou wa mana mpata.’ (Resa Episarome 150:1-6.) Eyi yiyo novelise ntazimwe demEpisarome 150 adi tu korangedere yikando 13 asi ngano tu hamberere Jehova. Nefumadeko lyenene kwaKarunga, mutjangi gumwe gomuepisarome kwa dimbire asi: “Ame kukuhamberera rutano-naruvali mezuva morwamapangero goge gosili.” (Epis. 119:164) Yosili, Jehova ga fira ehamberero. Nose kuvhura tu mu hamberere momakanderero getu “rutano-naruvali mezuva,” kutanta asi nkenye apa.

5. Ngapi omu nkareso zorupandu azi gamene?

⁵ Rupe rumwe rwekanderero kuna kara kugava rupandu. Paurusa kwa korangedere Vakriste womositata saFilipi asi: “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu.” (Fil. 4:6) Ayo ya wapa mokupwagesa rupandu kutundilira komutjima apa atu kanderere kwaJehova, unene po mokumona asi ose kuna kuparuka momazuva gopouhura omu vantu vana ‘dili rupandu.’ (2 Tim. 3:1, 2) Nkareso zokudira kugava rupandu kuna lihanene unene mouzuni. Nsene kapi tuna kutakamesa, nose kuvhura zi tu kundame. Nsene tu likida rupandu momakanderero getu kwaKarunga, ose ngatu hafa ntani ngatu kandana po ‘kuvhunguta ndi kusivana nkenye apa’ kuhamena eparu. (Juda 16) Apa vanturagumbo ava kandererere kumwe nomapata gawo ntani va hamesere mo rupandu, ayo ngayi kukorangeda vakadi novana vawo va kare nonkareso zorupandu.

6, 7. Yisinke kulikwambera, ntani yisinke natu vhura kulikwambera kwaJehova?

⁶ Kulikwambera kuna kara rupe rwekanderero omu mwa hamena malizuvho. Yisinke natu vhura kulikwambera kwaJehova? Kuvhura tu likwambere kwendi apa atu ligwanekere nomahepeko ndi nsene kuna kara mouvera wounene. Poyiruwo yangoso, ya wapa kulikwambera kwaJehova a tu vatere. Ngoso kuna kutanta asi twa hepa kulikwambera tupu apa atu ligwanekere nomahepeko ndi apa atu vere?

⁷ Mokutuvatera tu limburure epuro eli, tu konakoneni eyi ga uyungire Jesus mekanderero lyendi lyosihonena apa ga tumbwire edina lyoGuhwe noUhompa wawo nompango zawo. (Resa Mateusa 6:9, 10.) Udona una vhuka unene mouzuni ou, ano mapangero kapi gana kuvhura kugava kovantu eyi va hepa. Eyi kutupa konda zongwa zokukanderera asi edina lyaKarunga va lipongore ntani asi Uhompa wendi u wize u ya guse po epangero lyaSatana. Esi hena kuna kara siruwo sokulikwambera asi mpango zendi va zi sikise mo pevhu ngwendi meguru. Yipo nye twa hepera kukara tuna vangarara nokuruganesa marupe nagenye gekanderero.

8, 9. Morwasinke natu dilira kupangura Peturusa novapositoli vakwawo ava va rere mosikunino saGesemani?

⁸ Nampili ngomu mupositoli Peturusa ga korangedere Vakriste va ‘vangarare, va wape kukanderera,’ mwene posikando simwe ya mu sumpilire kuyirugana oyo. Age kuna kara gumwe govarongwa ava va rere apa Jesus ga kandererere mosikunino saGesemani. Nampili ngomu Jesus ga va tanterere asi “vangareni oku tomu kanderere,” awo kwa gwililire monompofu.—Resa Mateusa 26:40-45.

⁹ Mevango lyokupangura Peturusa novapositoli vakwawo kweyi va rere, twa hepa kudiworoka asi awo kwa rorokere  morwa yinzi va rugene mezuva olyo. Awo kwa wapaikire Paska ano kongurova yipo va ya zi dene. Ntani Jesus kwa va pere mavyukiso omu nava rugana Murarero gwaHompa yipo va dive omu ngava diworoka nomfa dendi komeho. (1 Kol. 11:23-25) “Apa va mene kudimba rusumo rompandu, makura tava pwaga, va ze koNdundu zoMauzwe,” ano mokukasika oko va hepere kugenda sinano sosire nokupita mononzira daJerusarema. (Mat. 26:30, 36) Posiruwo oso nampo kwa kere pokatji komasiku. Ngano nose twa kere mosikunino saGesemani masiku gena, ngano nose twa gwililire monompofu. Jesus kapi ga pangwire vapositoli vendi ava va rorokere, nye age ga yi divire asi “mwenyo . . . kupura usimbu, nye rutu kapi rwa paka nonkondo.”

10, 11. (a) Sirongwa musinke ga lirongere Peturusa kweyi ya mu horokerere mosikunino saGesemani? (b) Ngapi omu sihorokwa saPeturusa sina kukundama?

¹⁰ Peturusa masiku gena ga rere mosikunino saGesemani, kwa lirongere sirongwa somulyo monkedi zondigu. Jesus kwa tente asi: “Masiku ganaina one namuvenye tomu ka limbilirwa mwarwange.” Nye Peturusa kwa limbwilire asi: “Nampili navenye va limbilirwe mwaroge, ame nampili kuna manga, asi ni limbilirwe mwaroge?” Makura Jesus yipo ga tanterere Peturusa asi masiku ganaina to ka patana nge rutatu. Peturusa makura ta tanta asi: “Ame nampili ngano kufa, kufa tupu noge, nokukupatana si ame.” (Mat. 26:31-35) Konyima, Peturusa ga ya patanene, ngamoomu tupu ga yi uyungire Jesus. Apa ga yi dimbwilire eyi ga rugene, Peturusa makura ta ka “lira makurulira.”—Ruk. 22:60-62.

¹¹ Kweyi ya mu horokerere, Peturusa ga lirongere mokudira kulihuguvara mwene. Kukanderera kwa ya mu vaterere. Ngapi omu twa yi diva? Morwa Peturusa yige ga tjenge asi twa hepa ‘kuvangarara, tu wape kukanderera.’ Ose kutambura epukururo eli lyoBibeli ndi? Ose kukanderera nkenye apa, pokuyilikida asi twa ‘huguvara’ mwaJehova ndi? (Epis. 78:7) Twa hepa kutura hena pasirugana epukururo lyaPaurusa eli asi: “Ogu ana kugazara asi age kuna sikama nawa-nawa, a takamese ga ha liganda.”—1 Kol. 10:12.

12. Morwasinke sihonena saNehemiya sa karera sosiwa kwetu?

¹² Sihonena simwe sosiwa kuna kara saNehemiya, ogu ga kere mupindi gwahompa Aretaserekesesi gwaPeresiya koyiha yonomvhura 450 komeho zokuwiza Kristusa. Nehemiya kuna kara sihonena sosiwa sogu ga kandererere kwaJehova  nomutjima gwendi nagunye. Bibeli kutanta asi age ‘kwa dililire nokukanderera kwaKarunga’ mazuva gomanzi morwa ukaro wokuguvisa woVajuda moJerusarema. (Neh. 1:4) Apa Aretaserekesesi ga mu pulire eyi ana guvire, makura Nehemiya ta “kanderere kwaKarunga gemeguru.” (Neh. 2:2-4) Yitundwamo? Jehova kwa limbwilire makanderero gaNehemiya monkedi omu vantu vendi va gwanenene mo mauwa. (Neh. 2:5, 6) Sihorokwa esi kwa nkondopekere epuro lyaNehemiya!

13, 14. Yisinke twa hepa kurugana mokukara nepuro lyokupama ntani tu nyokere po edompeso lyaSatana?

¹³ Kukanderera nkenye apa ngwendi Nehemiya, kutuvatera tu kare nepuro lyokupama. Satana kwato nkenda, age kutuhomokera apa atu dompo mutjima. Pasihonena, nsene kuna kuvera ndi tuna dompo mutjima, kuvhura tu tameke kugazara asi siruwo esi atu kara moyirugana yokuzuvhisa nkenye kwedi kwato mulyo kwaKarunga. Vamwe vetu kuvhura tu lizuvhe udona morwa eyi twa ligwanekera nayo meparu. Satana kwa hara tu pure asi ose kwato mulyo. Mahomono gendi unene po kwa ga wapaikira mokutudompesa mutjima nokusesupika epuro lyetu. Nampili ngoso, pokukara tuna ‘vangarara, tu wape kukanderera,’ ngatu pameka epuro lyetu. Yosili, ‘silikandwiso sepuro kuvhura kudimisisa yikutji yomundiro, eyi a ponyesa Mudona.’—Efe. 6:16.

¹⁴ Nsene tu kara tuna ‘vangarara, tu wape kukanderera,’ kapi ngayi tu tetukisa apa ngatu ligwanekera nomahepeko makura tu teze po ulimburukwi wetu kwaJehova. Nsene tatu ligwanekere nomaheteko nomaudigu, twa hepa kudiworoka sihonena saNehemiya nokukanderera usimbu-simbu kwaKarunga. Ose kuvhura kunyokera po mahepeko nokulididimikira eheteko lyepuro lyetu kupitira tupu mevatero lyaJehova.

15. Mapuro musinke twa hepa kulipura kuhamena kukanderera po vapuli vakwetu?

¹⁵ Jesus kwa kandererere po Peturusa yipo a pame mepuro. (Ruk. 22:32) Epafurasa ogu ga parukire mosiruwo saPaurusa, kwa temwininine sihonena saJesus mokukanderera po vapuli vakwawo womoKorosi. Paurusa kwa va tjangerere asi: “Age kumukondjera nkenye apa momakanderero, asi mu sikilire mo, one hena mu kore mwanayinye eyi ga panga Karunga.” (Koros. 4:12) Twa hepa kulipura asi: ‘Ame kulitura mo unene mokukanderera po vanavazinyetu mouzuni mudima ndi? Rungapi ani kanderere po vanavazinyetu ava vana kuhepa morwa yimpagwa? Siruwoke na hura kukanderera po ava va kara noyitumbukira yoyinene mombunga zaJehova? Ame kukanderera po vanavazinyetu mombungakriste ava vana kara noudigu ndi?’

16. Ya kara nomulyo kukanderera po vanavazinyetu ndi? Faturura.

¹⁶ Kukanderera po vakwetu kwaJehova kuvhura kuvavatera. (Resa 2 Vakolinte 1:11.) Nampili ngomu Jehova a dili kurugana ko tupu yuma morwa vakareli vendi wovanzi kuna kukanderera yininke yokulifana, nye age kuhafa pokumona eharo lyawo lyokulihara-hara ngomu ana kulimburura makanderero gawo. Yipo twa hepera kulitura mo unene mositumbukira setu sokukanderera po vakwetu. Ngwendi Epafurasa, twa hepa kulikida eharo lyokomutjima nokulitura mo unene mokukanderera po vanavanzinyetu. Mokurugana ngoso, ose ngatu gwederera koruhafo rwetu, morwa “kugava kwa kara nerago, kwa pitakana kutambura.”—Yirug. 20:35.

17, 18. Ngapi omu ‘kuvangarara, tu wape kukanderera’ naku tu vatera?

¹⁷ Komeho tupu Paurusa a uyunge asi “masiku mokupita nye gana kerere, ezuva li pume,” age kwa tjenge asi: “Morwa muna diva asi siruwo musinke esi: siruwo ntaantani sina siki mo nye asi mu pinduke mo monompofu deni. Ano siruwo sokutuparura kuna tu sikakana nye, kupitakana apa twa pulire petameko.” (Rom. 13:11, 12) Uzuni woupe waKarunga pepi una kara, ntani eparuro lyetu kuna kuhedera pepi kupitakana omu atu yi gazarere. Esi kapisi siruwo sokurara pampepo, ntani twa ha pulisira madonganeso gouzuni ou ga tu ninkise tu dire kukara nosiruwo sokuuyunga naJehova mekanderero. Nye twa hepa ‘kuvangarara, tu wape kukanderera.’ Kurugana ngoso ngayi tu vatera tu lihameke ‘moyirugana yokupongoka nokutjira Karunga’ ngomu tuna kundindira ezuva lyendi. (2 Pet. 3:11, 12) Monkedi omu atu paruka kulikida nsene tuna vangarara pampepo ntani nsene twa yi pura nawa-nawa asi uhura wouzuni ou woudona pepi una kara. Yipo nye twa hepera ‘kukanderera narunye.’ (1 Tes. 5:17) Twa hepa kutemwinina Jesus ntani nokupapara evango lyokulikarera nsene tuna hara kukanderera kwaJehova. Nsene tu litura po siruwo sokugwanena po mokukanderera kwaJehova, ayo ngayi tu hedesera pepi nendi. (Jak. 4:7, 8) Eli ngali kara etungiko lyenene!

¹⁸ Matjangwa kwa tanta asi: “Pomazuva goukaro wendi, Jesus kwa zamberere Karunga makanderero nomalikwambero nonkugo zonene nomahodi, asi a mu parure monomfa, makura a mu zuvhe morwetjiroKarunga lyendi.” (Heb. 5:7) Kwa hundilire nokulikwambera nokukwaterera koulimburukwi wendi kwaKarunga dogoro kehagero lyeparu lyendi apa pevhu. Ngoyitundwamo, Jehova kwa parwire Munwendi ogu ga hara monomfa nokumupa mwenyo gokudira kufa. Nose kuvhura tu kare valimburukwi kwaGuhyetu gemeguru, yi kare asi maheteko ndi maudigu musinke natu ligwanekera nago. Yosili, kuvhura ngatu gwane mfeto zomwenyo gwanarunye nsene tu ‘vangarara, tu wape kukanderera.’