POSIRUWO sehaneso lyongenderera lyomazuva ntane mwaSiwogedi/Sitarara 1929, vazuvhisi wokupitakana 10 000 kwa lihanenene moAmerika. Awo kwa hanesere kovantu nobuke notubukegona mamiliyona. Mokatji kovazuvhisi owo woUhompa kwa kere mo vazuvhisi wokukarerera eyovi limwe. Sivaro sawo kwa ligwedererere! Simbapira Bulletin * kwa divisire asi “hararasi tupu” sirugana sovazuvhisi wokukarerera kwa ligwedererere pwarutatu kutundilira 1927 dogoro 1929.

Koyiha zomvhura 1929, pwa kere udigu wounene woyimaliwa. Mouvali momazuva 29 gaSikukutu 1929, unangesa ou au likida mulyo goyimaliwa kwa kere noudigu ou wa gurumwisire yikweparu yosirongo. Nombanga kwa pete. Nofarama nado kwa pete. Nofabilika dononene nado kwa pete. Mamiliyona govantu kwa zumbanesere yirugana yawo. Nkenye ezuva, vantu wokusika 1 000 ngava zumbanesa mambo gawo morwa kudira kuvhura kugafutira.

Ngapi vazuvhisi wosiruwo nasinye ya va tompokere mosiruwo esi soudigu? Matuwa gokukara nononzugo yigo ga va vaterere. Matuwa ogo kwa vaterere vazuvhisi wokukarerera wovanzi va twikire nosirugana sawo. * Posiruwo sosigongi, matuwa ogo ngava ga ruganesa ngonohotera. Momvhura 1934, simbapira Bulletin kwa geve mauzera omu nava tungira ketuwa nzugo ezi nazi kara nopomba zomema nesuga nombete ntani yokugava ugenya pomufu.

Vazuvhisi ava va kere noudivi mouzuni mudima ngava tura nonzugo komatuwa gawo. Victor Blackwell kwa tanta asi: “Nowa kapi ga kere noudivi wokutunga emuwato, ano name kapi na kere noudivi wokutungira nzugo ketuwa.” Nye ga tungire.

Avery naLovenia Bristow kwa kere nonzugo ketuwa. Avery kwa tanta asi: “Ame kwa fene ngwendi mbati mositemba sendi, nzugo zange kwa kere nkenye apa name.” Vazuvhisi ava ntani Harvey naAnne Conrow, nonzugo dawo odo dokomatuwa kwa kere domaparafona. Nkenye apa ngava diruka, maparafona gamwe ngaga gu ko. Avery kwa tanta asi: “Kwato ogu ga mona rumwe sikoto sokufana ngoso, ntani apa sa ya pilire po kwato ga si mwene hena.” Nye Avery kwa tente asi “kapi na mona rumwe epata lyoruhafo” ngwendi lyoConrow novana vawo. Harvey Conrow kwa tjenge asi: “Kwato eyi twa hepere, ntani twa lizuvhire epopero lyenene mosirugana saJehova nemepakerombili lyendi.” Konyima vepata lyaConrow navenye kwa zire koSikora saGiliyata ntani kwa ya va tumine koPeru ngovatumwa.

Epata lyaBattaino nawo vazuvhisi wokukarerera. Giusto naVincenza konyima zokudimburura asi ngava kara vareti, awo kwa tjindjire etuwa lyawo lyoFord li kare embo eli lya “monekere ngwendi hotera zongwa” mokulihetakanesa nonotende edi  ngava rara. Kumwe namunawo awo kwa twikilire mosirugana sawo esi va here unene sokuzuvhisira Vaitalia ava va tungire moAmerika.

Vantu wovanzi ngava purakene kombudi zongwa nye kapi ngava vhuru kugava yigava koyimbapiratjangwa yoBibeli morwa vahepwe. Mevango lyoyimaliwa, awo ngava gava yininke yapeke. Vazuvhisi wokukarerera vavali kwa tumbura yininke 64 eyi ngava va pe ngoyigava. Ayo kwa likwama “ngwendi elikwamo lyoyininke eyi ava randesa mositora.”

Fred Anderson kwa ligwene nomunafarama gumwe ogu ga here nobuke detu makura ta gava makende gomeho ngoyigava aga ga kere gozina. Ano pofarama zokukwama ko, mugara kwa here yimbapiratjangwa yetu nye kwa tente asi: “Ame kwato makende gokuresesa.” Makura apa ga dwere makende gokomeho aga twa mu pere yipo ga vhulire kuresa nobuke nokugava ko yigava konobuke nokomakende.

Herbert Abbott nga simbi sikorogo sononhunhwa metuwa lyendi. Konyima zokugwana yinhunhwa yitatu ndi yine, nga yi twara kositanda a ka yi randese makura ta zwida mawoli metuwa lyendi. Age kwa tjanga asi: “Poyiruwo yimwe kapi ngatu kara noyimaliwa, nye oyo kapi ngayi tu hagekesa mokuzuvhisa. Apa ngatu kara nomawoli metuwa, ose ngatu twikire ngorooro kuzuvhisa nokuhuguvara mwaJehova.”

Kuhuguvara mwaJehova kwa vaterere vantu vendi mosiruwo nasinye oso somaudigu. Maxwell naEmmy Lewis, apa lyava gwene ekundungu ya va tompokere kutunda monzugo zawo zosikoto ezi za tekere pokatji morwa kwa zi gwililire sitji. Maxwell kwa tjanga asi: “Yihorokwa eyi kapi ya tu hagekesere kuzuvhisa. Yirugana yinzi ntani twa hepere kuyirugana.” Nevatero lyovakaume, Maxwell naEmmy kwa tungwilire nzugo zawo zosikoto.

Mosiruwo esi somaudigu, mamiliyona govazuvhisi womupampi woNombangi daJehova nawo kuna kulikida nkareso zangoso. Ngwendi vazuvhisi vena wokukarerera, nose tuna tokomene mokutwikira kuzuvhisa dogoro Jehova nga tante asi sirugana sina pu.