“Omu yi rugane mokudiworokera nge po”
‘Ta pandura Guhwe, ta bamagura [mboroto], ta tanta asi, “Guseni, mu lye, oru yiro rutu rwange vana kumugavera. Omu yi rugane mokudiworokera nge po.”’—1 KOL. 11:24.
1, 2. Yisinke va divire vapositoli apa va kere morugendo rokuza koJerusarema?
VANOMENI womoJerusarema kwa mwene kwedi kuna terama. Makura tava divisa sigongi somasimbi, ano masimbi taga divisa etameko lyokwedi kokupe, Nisani. Tava tumu nontumi di ka hanese mbudi ezi nakunye. Vapositoli va yi divire asi siruwo sokudana Paska kuna kuhedera pepi. Awo va yi divire asi Jesus ga here kuza koJerusarema komeho zokutameka Paska.
2 Jesus novapositoli vendi kwa kere moPereya (mesinya mwina lyaJorodana) morugendo rwendi rokuhulilira koJerusarema. (Mat. 19:1; 20:17, 29; Mar. 10:1, 32, 46) Apa ngali divikwa koVajuda ezuva lyokuhova lyokwedi kwaNisani, va hepere kundindira mazuva 13, ano moNisani 14 konyima zokukatoka ezuva makura tava dana Paska.
3. Morwasinke Vakriste ava litulire mo mezuva lyoPaska?
3 Murarero gwaHompa, ogu guna lizi nezuva lyoPaska zanare, ngagu kara konyima zokukatoka ezuva 14 Kudumogona 2014. Alyo ngali kara ezuva lyokulikarera koVakriste wousili novarongwa woBibeli. Morwasinke? Morwa eyi atu resa 1 Vakolinte 11:23-25 asi: “Hompa Jesus masiku aga va mu horwere, ga gusire mboroto, ta pandura Guhwe, ta zi bamagura, ta tanta asi, ‘Guseni, mu lye, oru yiro rutu rwange vana kumugavera. Omu yi rugane mokudiworokera nge po.’ Nkinda nazo ngosikwawo.”
4. (a) Mapuro musinke no lipura kuhamena Murarero? (b) Ngapi omu atu diva ezuva lyoMurarero nkenye mvhura? (Tara kakende “Murarero gwaHompa 2014.”)
4 Yosili, ove ngo ka kara posilika esi Jesus ga tanterere vasikuli vendi asi va hepa kusidiworoka nkenye mvhura. Lipura nyamoge asi: ‘Ngapi omu na hepa kuliwapaikira silika oso? Yininke musinke ngava ruganesa? Ngendeseso musinke ngava ka kwama posilika oso? Yininke eyi ngava ka rugana ntani nosilika sene, ngapi ya kara nomulyo kwange?’
MBOROTO NOVHINYU
5. Yisinke ga tanterere Jesus vapositoli vendi va rugane mokuliwapaikira Paska?
5 Apa Jesus ga tanterere vapositoli va ka wapaike nzugo ezi nava ka lira Paska, age kapi ga tumbwire yifuwiso; nye age kwa here yininke yokuwapera, nzugo zokuzera nevango lyokugwanena po eli na ka ponga kumwe novarongwa vendi. (Resa Marukusa 14:12-16.) Awo va hepere kuwapaika yuma yomurarero, kukwatera mo mboroto za hana muhahu novhinyu zongeha. Apa va mene kulya Paska, Jesus kwa uyungire kuhamena mboroto novhinyu.
6. (a) Konyima zokulya Paska, yisinke ga uyungire Jesus kuhamena mboroto? (b) Mboroto musinke ava ruganesa poMurarero?
6 Mupositoli Mateusa ogu ga kere po, konyima kwa ya tjenge asi: “Jesus ta gusa mboroto, ta pandura Guhwe, ta zi bamagura, a zi pe varongwa vendi, ta tanta asi: ‘Guseni mu lye.’” (Mat. 26:26) “Mboroto” kwa kere za hana muhahu, ngomu ngava yi rugana poPaska. (Ex. 12:8; Deut. 16:3) Mboroto ngava zi ruganesa korukokotwa nokomema, pwa hana yihaheso ndi yifuliso ndi va ture mo mungwa. Morwa kwa kere za hana muhahu, azo kapi ngazi furu. Azo kwa kere za hana yuma, zokukukuta ntani ureru kuzibamagura. Naina, mokuliwapaikira Murarero, vakuronambunga kuvhura va hundire gumwe a duve mboroto pokuruganesa usura worukokotwa nomema, nokuzikanga posipana nomagadi gomanunu. (Nsene usura worukokotwa kwato, kuvhura kuruganesa usura woroso ndi woyilya ndi wepungu.) Ndi kuvhura kuruganesa mboroto zoVajuda, ezi ngava dili kutura yihaheso ndi mauta ndi nonyanga.
7. Vhinyu musinke ga ruganesere Jesus, ntani vhinyu zorudi musinke nava vhura kuruganesa naina poMurarero?
7 Mateusa kwa twikira ko asi: “[Jesus] makura ntani ana gusa nkinda, ta pandura Guhwe, ta zi va pe, ta tanta asi: ‘Nwaa-nweni mo namuvenye.’” (Mat. 26:27, 28) Eyi ga gusire Jesus mokuwoko kwendi kwa kere nkinda zovhinyu zongeha. (Kapisi mandjembere va keme, morwa aso kapi sa kere siruwo sokuzangura mandjembere.) Vhinyu kapi za kere ruha roPaska zokuhova ezi va rugene moEgipite, nye Jesus kapi ga silikire kuruganesa vhinyu poPaska. Age kwa zi ruganesere poMurarero gwaHompa. Eyi yiyo Vakriste ava ruganesere vhinyu poMurarero. Kwato eyi va hepa mokugwederera komulyo gohonde zaJesus, mokulifana vhinyu zongeha ava ruganesa kapi ava zi vhongo noyitoveseso. Kuvhura kuruganesa vhinyu zokuruganena kembo ndi zokuranda mositora, ngwendi vhinyu ava tumbura asi Burgundy ndi Cabernet ndi Chianti.
YISINKE AZI TANTA MBOROTO NOVHINYU?
8. Morwasinke Vakriste va litulira mo mokudiva eyi azi tanta mboroto novhinyu?
8 Mupositoli Paurusa kwa yi zeresere asi Vakriste va hepa kudiworoka Murarero gwaHompa. Kovapuli vakwawo womoKolinte, age kwa tjenge asi: “Eyi ga pa nge Hompa, na yi mu divisa asi: Hompa Jesus . . . , ga gusire mboroto ta pandura Guhwe, ta zi bamagura, ta tanta asi, ‘Guseni, mu lye, oru yiro rutu rwange vana kumugavera. Omu yi rugane mokudiworokera nge po.’” (1 Kol. 11:23, 24) Morwa Vakriste kwa va pangera va diworoke nkenye mvhura Murarero, awo va litura mo mokudiva eyi azi tanta mboroto novhinyu.
9. Magano musinke gepuko va kara nago vamwe kuhamena mboroto ezi ga ruganesere Jesus?
9 Vanangereka vamwe kutanta asi Jesus kwa uyungire asi: ‘Oru yiro rutu rwange,’ makura awo kwa yi pura asi rutu rwendi yiro ga situnukisire ru kare mboroto. Nye oyo ya lilimba nousili. * Apa va lire vapositoli vendi mboroto za hana muhahu, age Jesus muzuni. Yosili, Jesus kwa uyungire pasifanekeso, ngwendi moomu nga yi rugana poyiruwo yimwe.—Joh. 2:19-21; 4:13, 14; 10:7; 15:1.
10. Yisinke azi fanekesa mboroto ezi ava ruganesa poMurarero gwaHompa?
10 Mboroto ezi va mwene vapositoli nokuzilya kwa fanekesere rutu rwaJesus. Rutu musinke? Posiruwo simwe, vakareli vaKarunga kwa lizuvhire asi morwa Jesus kwa bamagwire mboroto nye kwato sisupa sendi sa tekere, mboroto kwa fanekesere “rutu rwaKristusa,” mbungakriste zovagwavekwa. (Efe. 4:12; Rom. 12:4, 5; 1 Kol. 10:16, 17; 12:27) Mwaza siruwo, va ya yi kwete egano asi mboroto kwa fanekesa rutu rwaJesus ropanyama. Jesus kwa ‘tu hepera parutu,’ dogoro tava ka mu pampara. Yipo nye, poMurarero gwaHompa, mboroto kufanekesa rutu rwaJesus ropanyama oru rwa “simba nonzo detu.”—1 Pet. 2:21-24; 4:1; Joh. 19:33-36; Heb. 10:5-7.
11, 12. (a) Yisinke ga uyungire Jesus kuhamena vhinyu? (b) Yisinke azi fanekesa vhinyu ezi ava ruganesa poMurarero gwaHompa?
11 Eyi kutuvatera tu kwate egano eyi ga tembe Jesus apa ga uyungire kuhamena vhinyu. Tatu resa asi: “Nkinda nazo ngosikwawo, apa va mene kulya, ta zi gusa, ta pandura Guhwe, ta tanta asi, ‘Nkinda ezi Egwanekero lyEpe lyomohonde zange.’” (1 Kol. 11:25) Sili nkinda yizo za kere egwanekero lyepe ndi? Hawe. Nkango “nkinda” kwa tembe eyi ya kere mo, vhinyu. Kosinke za fanekesere vhinyu ezi ga uyungire Jesus? Kohonde zendi ezi za ya tjikangere.
12 Mevangeli lyaMarukusa, tatu resa nonkango daJesus asi: “Ezi yizo honde zange zEgwanekero lyepe, ezi ngazi tjikangera wovanzi.” (Mar. 14:24) Yimo, honde zaJesus kwa ya ‘tjikangerere wovanzi edongonono lyononzo.’ (Mat. 26:28) Yipo nye, vhinyu zongeha kufanekesa honde zaJesus. Kupitira mohonde ozo, ose kuvhura kugwana emanguruko mosizoweseso, ‘makura nonzo detu tava di dongonona po.’—Resa Vaefeso 1:7.
Vapositoli kwa nwine vhinyu ezi za fanekesere honde zaJesus (Tara paragarafu 11, 12)
MURARERO GWAHOMPA
13. Yisinke ngo vhura kundindira poMurarero gwaHompa?
13 Nsene sikando soge sokuhova kuponga noNombangi daJehova poMurarero gwaHompa, yisinke ngo vhura kundindira? Epongo nevango lyewa oku nkenye gumwe nga lizuvha emanguruko nokuhafera silika. Kuvhura ngapa kare nombya dononsesu nye kapisi yifuwiso yokulisiga-siga ngwendi posipito. Mukuronambunga gokuwapera nga gava siuyungwa sokutunda moBibeli sokuhamena silika oso monkedi zokuzera ntani zefumadeko. Age nga vatera navenye va kwate egano eyi ga tu ruganena Kristusa. Jesus kwa tu fira yipo a tu zowore. (Resa Varoma 5:8-10.) Muuyungi nga faturura mahuguvaro gavali aga va kara nago Vakriste.
14. Mahuguvaro musinke ngava ka zogera mosiuyungwa soMurarero?
14 Ehuguvaro limwe kuna kara lyokukapangera kumwe naKristusa meguru, eli va kere nalyo vapositoli vendi. (Ruk. 12:32; 22:19, 20; Ehor. 14:1) Ehuguvaro lyauvali kuna kara eli va kara nalyo sinzi soVakriste wovalimburukwi ava vana kukarera Karunga mosiruwo setu. Awo kwa kara nehuguvaro lyokukaparuka narunye pevhu moparadisa. Makura mpango zaKarunga ngazi ka sika mo pevhu ngwendi meguru, sininke esi ava kanderere Vakriste nkenye apa. (Mat. 6:10) Matjangwa kugava mauzera kuhamena nkareso zokutetukisa ezi ngatu ka limonena komeho.—Jes. 11:6-9; 35:5, 6; 65:21-23.
15, 16. Yisinke ava rugana mboroto poMurarero gwaHompa?
15 Kouhura wosiuyungwa, muuyungi nga yi likida asi siruwo sina siki sokurugana eyi ga tanterere Jesus vapositoli vendi. Ngomu tuna yi tumbura nare, ngava ruganesa mboroto za hana muhahu novhinyu zongeha. Ayo ngayi kara positafura esi ngasi kara pepi nomuuyungi. Age nga demenena kweyi ga rugene neyi ga uyungire Jesus apa ga tulisire po silika esi. Pasihonena, mwaMateusa tatu resa asi: “Jesus ta gusa mboroto, ta pandura Guhwe, ta zi bamagura, a zi pe varongwa vendi, ta tanta asi: ‘Guseni mu lye, oru yiro rutu rwange.’” (Mat. 26:26) Jesus kwa bamagwire mboroto za hana muhahu nokuzipa vapositoli vendi. Pepongo eli ngali kara momazuva 14 Kudumogona, ngo ka mona yintau yomboroto za hana muhahu vana tura posiyaha.
16 Ngava ruganesa yiyaha yokugwanena po yipo ngayi sike kovantu navenye nosiruwo. Ngava si rugana monkedi zongwa zefumadeko. Ngava gava ekanderero lyesupi, ano konyima ntani ngava pitisa yiyaha monkedi zongwa. Vasesu tupu ngava makera komboroto novhinyu, monombungakriste dononzi kwato ngwendi moomu ya horokere momvhura 2013.
17. PoMurarero, ngapi omu ava kwama sihonena saJesus kuhamena vhinyu?
17 Makura ntani nga ka demenena kweyi va singonona mwaMateusa asi: “[Jesus] makura ntani ana gusa nkinda, ta pandura Guhwe, ta zi va pe, ta tanta asi: ‘Nwaa-nweni mo namuvenye, yeeyi ezi yizo honde zange zegwanekero lyepe, ezi ngazi tjikangerera wovanzi edongonono lyononzo.’” (Mat. 26:27, 28) Mokukwama sihonena oso, ngava kanderera hena ntani vana kupitisa ‘nonkinda’ dovhinyu zongeha.
18. Morwasinke ya karera nomulyo kukara po nampili vasesu ndi kwato gokumakera komboroto novhinyu?
18 Sinzi sava ava kara po kapi ava makere komboroto novhinyu ngomu ava yi pitisa morwa Jesus kwa yi likidire asi vaava tupu ngava ka pangera kumwe nendi moUhompa yiwo ava makere ko. (Resa Rukasa 22:28-30; 2 Tim. 4:18) Wokuhupa ko kukara tupu vanomeni. Nye kukara poMurarero gwaHompa kwa kara nomulyo, morwa kulikida asi twa kara norupandu konzambo zaJesus. Posilika oso, awo kugazadara ko komatungiko aga ngava ka gwana morwa nzambo saJesus zosizoweseso. Awo kwa kara nehuguvaro lyokukara mokatji ‘kemukurumbunga’ eli ngali ka paruka ‘mahepeko gomanene.’ Awo kuna kara vakareli ava va “kuhwa yikoverero yawo va yi zeresa kohonde zoNzwigona.”—Ehor. 7:9, 14-17.
19. Yisinke no vhura kurugana mokuliwapaikira Murarero gwaHompa nokugwanena mo uwa?
19 Nombangi daJehova uzuni mudima kurongikida silika esi zokulikarera. Yivike yongandi komeho zosiruwo, ose ngatu lihameka mo mokuzigida wovanzi va ya kare po. Ntani hena, momazuva aga ngaga twaredera koMurarero, sinzi setu ngatu resa yihorokwa yomoBibeli kuhamena eyi ga rugene Jesus neyi ya horokere kuliza nezuva olyo momvhura 33. Ose ngatu liwapaikira yipo ngatu ya kare po. Ayo ya wapa mokuyasika komeho zorusumo nekanderero lyokupatwilisa silika yipo tu tambure vagenda nokuhafera elikwamo nalinye. Natuvenye ngatu gwanena mo uwa pokukwama moNobibeli detu ngomu muuyungi ana kutumbura matjangwa. Yomulyo po, ekaropo lyetu poMurarero ngali likida rupandu konzambo zaJesus ntani noulimburukwi wetu kompangera ezi asi: “Omu yi rugane mokudiworokera nge po.”—1 Kol. 11:24.
^ para. 9 Heinrich Meyer, mulirongi goMundovesi, kwa tanta asi: “Rutu rwaJesus kwa kere simpe ruzuni (nomwenyo), ntani asi honde zendi simpe kapi va zi tjisangere.” Age kwa tente hena asi Jesus kwa ruganesere “nonkango doureru” mokufaturura ntanto zomboroto novhinyu yipo vapositoli vendi va kwate egano eyi ga tembe.
