Ngo tura po malizambero morwa Uhompa ndi?
“Karunga kwa hara ava ava gava neharo lyewa.”—2 KOL. 9:7.
1. Malizambero musinke ava tura po wovanzi, ntani morwasinke?
VANTU kutura po malizambero koyininke yomulyo po kwawo. Vakurona kuruganesa siruwo noyimaliwa nononkondo dawo mokuruganena uwa vana vawo. Vanona va hara kudanauka nokuhafera yininke yimwe, nye vaduki ava va hara kukarera po sirongo sawo momarumbasano gomanene, kuruganesa novili dononzi nkenye ezuva mokuliyomberesa. Jesus nage ga tulire po malizambero koyininke yomulyo po kwendi. Age kapi ga litulire mo mokukara noyininke yondiro ndi kukara novana, nye kwa demenene kokuzuvhisa mbudi zoUhompa. (Mat. 4:17; Ruk. 9:58) Vasikuli vendi nawo kwa lizamberere mokukwatesa ko Uhompa waKarunga. Kukwatesa ko Uhompa kwa kere sininke somulyo po yiyo nye va lizamberere mokulitura mo unene. (Mat. 4:18-22; 19:27) Nose kuvhura tu lipure asi: ‘Yisinke yomulyo po meparu lyange?’
2. (a) Malizambero musinke ga kara hepero koVakriste navenye wousili? (b) Malizambero musinke ava tura po vamwe?
2 Malizambero gamwe hepero koVakriste navenye wousili ntani mulyo mokutunga po elikwatakano lyewa naJehova. Malizambero gangoso kwa kwatera mo siruwo nononkondo detu edi atu ruganesa mokukanderera nokuresa Bibeli nokurugana ukareli wepata nokuza komapongo nomoyirugana yokuzuvhisa. * (Jos. 1:8; Mat. 28:19, 20; Heb. 10:24, 25) Ngoyitundwamo yelituromo lyetu nomatungiko gaJehova, sirugana sokuzuvhisa kuna kugenderera ntani wovanzi kuna kuwiza ‘kontembeli’ zaJehova. (Jes. 2:2) Mokukwatesa ko yirugana yoUhompa, wovanzi kutura po malizambero mokukarugana koBeteli nokutunga Yinyanga yoUhompa neyi yoYigongi nokurongikida yigongi ndi kuvatera ava vana kara moyimpagwa. Yirugana oyo kapisi yihepwa mokukagwana eparu nye ayo mulyo mokukwatesa ko sirugana soUhompa.
3. (a) Ngapi natu gwanena mo uwa pokutura po malizambero morwa Uhompa? (b) Mapuro musinke natu ka zogera?
3 Pana kara hepero zonene zokukwatesa ko Uhompa. Ayo kuhafesa sili mokumona asi wovanzi kuna kutura po malizambero nehafo! (Resa Episarome 54:6.) Nkareso ezi zougavi kuturetera ruhafo ngomu tuna kundindira Uhompa waKarunga u wize. (Deut. 16:15; Yirug. 20:35) Nampili ngoso, natuvenye twa hepa kulikonakona nyamwetu. Pwa kara nonkedi omu natu vhura kukwatesa ko Uhompa ndi? Ngapi omu tuna kuruganesa siruwo noyimaliwa nononkondo noudivi wetu? Kosinke twa hepa kutakamesa? Tatu ka zogera sihonena esi twa hepa kukwama mokutura po malizambero yipo tu gwane ruhafo rorunene.
NONZAMBO DOMOSIRUWO SOVAISRAELI
4. Ngapi omu Vaisraeli ngava gwanene mo uwa mokugava nonzambo?
4 Mosiruwo soVaisraeli, kugava nonzambo kwa kere nkedi omu ngava gwana edongwenenopo lyononzo. Vantu va hepere kugava nonzambo yipo Jehova a va hafere. Nonzambo dimwe kwa kere dopaveta, ano dimwe demeharo lyavene. (Lev. 23:37, 38) Nonzambo deswakerero nadinye ngava di gava ngosigava kwaJehova. Sihonena sosiwa sononzambo dangoso kwa si likidire pepongoro lyontembeli momazuva gaSaromo.—2 Hist. 7:4-6.
5. Ewapaiko musinke ga tulire po Jehova kowo va dilire kuweka yimuna?
5 Jehova kukwata egano nkenye gumwe mokudira kugava sigava sokulifana, ntani age kuhepa nkenye gumwe a gave kuliza neyi ga kara nayo. Veta zaJehova kwa hepere ko asi honde zosikorama, ezi za kere ‘mundundumba gouwa wokomeho’ kupitira mwaMunwendi Jesus, va zi tjise. (Heb. 10:1-4) Nampili ngoso, Jehova kapi ga ndindilire asi nkenye gumwe a rugane yeeyi za tente veta ozo. Pasihonena, Karunga nga tambura nonzambo donomputukuwa nsene muntu ogo kapi ga weka yimuna. Yipo nye, nampili woruhepo nawo ngava gava nonzambo nehafo. (Lev. 1:3, 10, 14; 5:7) Nampili ngomu nonzambo doyimuna da li sigire, pwa hepere yininke yivali kwankenye ogu nga gava nzambo morwa eharo lyendi lyokugava.
6. Yisinke va hepere ko kovantu ava ngava gava nonzambo, ntani morwasinke ya karerere nomulyo kukwama veta ozo?
6 Sokuhova, muntu ga hepere kugava yoyiwa po. Jehova kwa tanterere muhoko asi nkenye esi nava zamba sa hepa kukara sosiwa po yipo a si ‘tambure.’ (Lev. 22:18, 20) Nsene simuna si kara sokuremana, Jehova kapi nga tambura nzambo zangoso. Sauvali, muntu ogu ana kugava nzambo ga hepa kukara ana kuhuka ntani ana pongoka. Nsene muntu ogu ana kugava nzambo kapi ana kuhuka, ga hepa kugava nzambo zononzo yipo a wapeke elikwatakano lyendi naJehova komeho a gave nzambo zemeharo lyamwene. (Lev. 5:5, 6, 15) Eyi kwa kere nomulyo unene. Jehova kwa yi nkondopekere hena asi nkenye ogu ana dili kukuhuka pampo nsene a gava nzambo zemeharo lyamwene, ngava mu gusa mo mombunga zovantu vendi. (Lev. 7:20, 21) Nye nsene muntu ogu ana kugava nzambo a kara nelikwatakano lyewa naJehova ntani eyi ana kugava kuna kara ya hana sipo, age kulizuvha ruhafo rorunene.—Resa 1 Histoli 29:9.
TURA PO MALIZAMBERO
7, 8. (a) Yisinke ava gwanene mo wovanzi pokutura po malizambero morwa Uhompa? (b) Yisinke twa kara nayo eyi natu gava ngonzambo?
7 Mokulifana, naina vantu wovanzi kuna kulitura mo unene moyirugana yaJehova ano eyi kumuhafesa. Kuruganena vanavazinyetu kureta ruhafo. Munazinyetugara gumwe ogu ga lihamekere mosirugana sokutunga Yinyanga yoUhompa nokuvatera ava ava kara moyimpagwa kwa tanta asi ayo udigu kufaturura ruhafo oru a li gwanekere naro pokurugana yirugana oyo. Age kwa tanta asi: “Pokumona ruhafo rovanavazinyetu apa ava gwana Sinyanga sosipe ndi ava gwana evatero kosimpagwa, ayo kuninkisa nge ni lizuvhe asi aso sirugana somulyo unene.”
Nonzambo kwa kere demeharo, kwa lifana nedi atu gava naina (Tara paragarafu 7-13)
8 Mbunga zaJehova kutulisa po nompito nkenye apa dokukwatesa ko sirugana sendi. Momvhura 1904, munazinyetu C. T. Russell kwa tjenge asi: “Nkenye gumwe a litare mwene asi erenga eli ga horowora Hompa pokuruganesa siruwo noyimaliwa nononkondo dendi paapa ga hulira mokufumadekesa ko Hompa.” Nampili ngomu atu gwanene mo mauwa gomanzi, twa hepa kurugana ko yuma mokugava nonzambo kwaJehova. (2 Sam. 24:21-24) Ngapi omu natu ruganesa nawa eyi twa kara nayo?
Vabeteli womoAustralia
9. Kuhamena siruwo setu, mpango musinke zaJesus zomwaRukasa 10:2-4 natu tura pasirugana?
9 Siruwo setu. Ayo kuhepa siruwo nelituromo mokutoroka nokunduruka yimbapiratjangwa nokutunga mavango goukareli nokurongikida yigongi nokuvatera ava ava kara moyimpagwa ntani nokulihameka moyirugana yimwe hena yomulyo. Ose kwa kara tupu nonovili dongandi mezuva. Jesus kwa geve mpango ezi nazi vhura kutuvatera. Apa ga tumine varongwa vendi mokuzuvhisa, age kwa va tanterere mokudira ‘kumorora vantu monzira.’ (Ruk. 10:2-4) Morwasinke ga gaverere mapukururo gangoso? Mulirongi gumwe goBibeli kwa tanta asi: “Kulimorora kovantu womosiruwo sanare, kapi kwa kere ngwendi naina, nye yininke yoyinzi ya kwaterere mo ngwendi kulidingira-dingira nokulincumita ntani nokutongamena. Nayinye eyi kwa hepere siruwo sosinzi.” Jesus kapi ga korangedere vasikuli vendi va kare vantu wovadona. Nye age kwa va vaterere va dimburure asi awo kwa kere nosiruwo sosisupi ntani va hepere kusiruganesa nawa mokurugana yininke yomulyo po. (Efe. 5:16) Nose kuvhura tu ture mpango ezi pasirugana yipo tu kare nosiruwo sokugwanena po mokurugana yirugana yoUhompa.
Vazuvhisi woUhompa poSinyanga soUhompa moKenya, moAfrika
10, 11. (a) Mononkedi musinke ava ruganesa yigava yetu yokoyirugana youzuni mudima? (b) Mpango musinke va tumbura 1 Vakolinte 16:1, 2 nazi tu vatera?
10 Yimaliwa yetu. Apo pwa hepa yimaliwa yoyinzi mokukwatesa ko yirugana yoUhompa. Nkenye mvhura yimaliwa yokusika pomamiliyona murongo kuyiruganesa koyihepwa yovatareli wokudingura novazuvhisi wosiruwo nasinye ntani vatumwa. Kutundilira momvhura 1999 Yinyanga yoUhompa yokupitakana 24 500 kwa yi tunga moyirongo yoruhepo. Nye simpe pana hepa Yinyanga yoUhompa 6 400. Nkenye kwedi yifo yoRuhungu noAwake yokusika pomamiliyona 100 kuyinduruka. Nayinye eyi kuyikwatesa ko yigava yetu yokutundilira komutjima.
11 Mupositoli Paurusa kwa geve mpango ezi natu kwama kuhamena kugava yigava. (Resa 1 Vakolinte 16:1, 2.) Megendeso lyompepo zokupongoka, age kwa korangedere vanavazina womokolinte mokudira kundindira dogoro kouhura wosivike va tare nsene asi pana hupu yuma yokugava, nye ngano va hepere kupungura ko yimaliwa ketamekero lyosivike kuliza neyi va kere nayo. Ngwendi mosiruwo sanare, vanavazinyetu naina kupungura ko yigava komeho zosiruwo kuliza noukaro wawo. (Ruk. 21:1-4; Yirug. 4:32-35) Jehova kuhafera nkareso zangoso zokugava.
Komitiye zovalizambeli wokutunga moTuxedo, moAmerika
12, 13. Yisinke ayi ninkisa vamwe va dire kulitura mo mokuruganesa nonkondo noudivi wawo, nye ngapi Jehova na va vatera?
12 Nonkondo noudivi wetu. Jehova kutungika elituromo lyetu lyokuruganesa nonkondo nediwo morwa Uhompa. Age kwa tu tumbwidira mokutuvatera apa atu roroka. (Jes. 40:29-31) Ose kulizuvha asi ediwo lyetu kapi lya gwanena po mokuvatera mosirugana soUhompa ndi? Ose kulizuvha asi wopeke yiwo va kara noudivi ndi? Diworoka asi Jehova kuvhura kuvatera nkenye ogu a kare noudivi ngwendi moomu ga vaterere Besareli naOholiyaba.—Ex. 31:1-6; Tara efano pepenuno 11.
13 Jehova kutukorangeda tu rugane paapa twa hulira. (Yis. 3:27) Apa va tungwilire ntembeli, Jehova kwa tanterere Vajuda va tede ko kosirugana esi va rugene. (Hag. 1:2-5) Awo kwa va donganesere makura kapi va demenene kosirugana sawo. Ayo ya wapa kwetu tu likonakone nsene asi ose kuna kutura mpango zaJehova muhowo meparu lyetu. Twa hepa kugazadara ko kweyi ‘yina kuhoroka’ nokutara nsene ose kuna kulihameka mo unene mosirugana soUhompa momazuva aga gopouhura.
KUGAVA KULIZA NEYI TWA KARA NAYO
14, 15. (a) Ngapi omu asi tu kundama sihonena sovanavazinyetu womoyirongo yoruhepo? (b) Etokomeno musinke twa hepa kukara nalyo?
14 Vantu wovanzi kwa tunga moyirongo yoruhepo. Mbunga zaJehova kuhetekera ko ‘kukwafa’ vanavazinyetu woruhepo ava va tunga moyirongo oyo. (2 Kol. 8:14) Nye nampili vanavazinyetu ava va kara neyi yoyisesu kuhafera situmbukira sokugava. Ayo kuhafesa Jehova apa woruhepo ava gava neharo lyewa.—2 Kol. 9:7.
15 Mosirongo simwe soruhepo moAfrika, vanavazinyetu vamwe kwa kara nosipata sosinunu ntani yimaliwa ayi tundu mweyi ava randesa, kuyiruganesa mokukwatesa ko sirugana soUhompa. Mosirongo sooso, mwa kere hena etungo lyoSinyanga soUhompa. Vanavazinyetu womomukunda ogo kwa here kuvatera. Nye etungo olyo kwa kere posiruwo esi ngava limi. Morwa kuhara kuvatera, awo ngava vatere ketungo lyoSinyanga soUhompa mutenya ano masiku ngava zi va ka rugane momapya gawo. Ee, nkareso musi zelizambero! Eyi kutudiworokesa vanavazinyetu womoMakedoniya. Awo kwa kere “noruhepo rorunene” nye awo kwa likwamberere mokuvatera kutunga Sinyanga. (2 Kol. 8:1-4) Ngano nkenye gumwe gwetu ‘a gave pokuyereka paapa da hulira nonkondo dendi kweyi ga mu pa HOMPA Karunga gwendi.’—Resa Deuteronomium 16:17.
16. Yisinke twa hepa kurugana yipo malizambero getu a ga pande Jehova?
16 Nye twa hepa kutakamesa. Ngwendi moomu ya kere mosiruwo soVaisraeli, twa hepa kudivilisa asi nonzambo detu demeharo di kare donongwa edi na panda Karunga. Yisinke twa hepa kurugana kuhamena eyi? Twa hepa kusikisa mo yitumbukira momapata getu ntani noukareli wetu kwaJehova. Kugava siruwo setu noyiweka yetu mokuvatera wopeke ya ha tu ninkisa tu ncenune elikwatakano lyepata lyetu naJehova ndi tu dire kulipakera mbili. Monkedi zangoso, ose kuna kugava eyi twa dira kuweka. (Resa 2 Vakolinte 8:12.) Ntani hena, nose twa hepa kunkondopeka elikwatakano lyetu naJehova. (1 Kol. 9:26, 27) Kara nehuguvaro asi apa atu paruka kuliza nonompango doBibeli, malizambero aga a tu tura po kuturetera ruhafo ntani Karunga ‘kugapanda’ unene.
MALIZAMBERO MULYO UNENE
17, 18. Ngapi omu atu lizuvhu kuhamena ava ava tura po malizambero morwa Uhompa, ntani yisinke twa hepa kugazadara ko?
17 Vanavazinyetu wovanzi kuligava vene ‘ngonzambo’ kupitira moyirugana yawo yokukwatesa ko sirugana soUhompa. (Fil. 2:17) Ose kupandura unene ava ava likida nkareso zangoso zougavi. Vakadikwara novana wovanavazinyetu ava ava pitisire mosirugana soUhompa kwa kuvapandadeka konkareso zawo zougavi nelizambero.
18 Yirugana yinzi ya hepa po mokukwatesa ko sirugana soUhompa. Natuvenye ngano tu gazadare ko omu natu kwatesa ko momunene sirugana soUhompa. Nsene tu yi rugana ngatu gwana mfeto ngesi nye ngatu ka gwana zonene “mouzuni wokomeho.”—Mar. 10:28-30.
^ para. 2 Tara sirongwa “Tu gaveni nonzambo domutjima nagunye kwaJehova” moRuhungu 15 Murongagona 2012, epenuno 21-25.