1, 2. (a) Yilye “Hompa gwanarunye,” ntani morwasinke situmbwisiso oso sa mu waperera? (Tara efano.) (b) Yisinke ayi tu kokere koupangeli waJehova?

HOMPA SOBHUZA II gwaSwaziranda kwa pangerere konyara nomvhura 61. Oso kuna kara siruwo sosire kupangera, unene po momazuva getu. Nampili ngomu hompa Sobhuza ga pangerere siruwo sosire, pwa kara hompa ogu a pangere narunye kupitakana vantu. Bibeli kutanta asi age “Hompa gwanarunye.” (1 Tim. 1:17) Muepisarome kwa divisa mupangeli ogo asi Jehova “Karunga yige HOMPA gwanarunye nanarunye.”—Epis. 10:16.

² Epangero lyaKarunga kwa lisiga neli lyovantu morwa alyo lyanarunye. Nye nkedi ezi a pangere Jehova yizo azi tu kokere koupangeli wendi. Hompa ogu ga pangerere Israeli ure wonomvhura 40 kwa yererepekere Karunga pokutanta asi: ‘HOMPA munankenda age muneharo, ukata kuhanduka, age kwa kara neharo lyanarunye. HOMPA kwa tura sipundi sendi souhompa meguru; age hompa gwanayinye.’ (Epis. 103:8, 19) Jehova kapisi Hompa tupu nye age hena Guhyetu gemeguru geharo. Nye monkedi musinke Jehova ga yi likida asi Guhya? Ngapi omu Jehova ga ruganesa uhompa wendi kutunda apa va mu rwanesere moEdeni? Malimbururo komapuro aga ngaga tu vatera tu hedere pepi naJehova nokumukarera nomutjima nagunye.

3. Yilye sisitwa sokuhova mepata lyaJehova, ntani wolye hena va sitire ‘ngoyisitwa yekeguru’ ndi asi vana vendi?

³ Ee, ruhafo musi ga kere naro Jehova apa ga sitire Munwendi gelike a huru! Karunga kapi ga tekwire Mbeli zendi ngosininke sokudira mulyo. Nye age kwa mu here nokurugana kumwe nendi mokusita mamiliyona govaengeli. (Koros. 1:15-17) Bibeli kwa va tumbura asi ‘vakereli ava ava rugana eyi ga hara,’ awo kukarera Karunga noruhafo ntani age kuvafumadeka pokuvazigida asi “yisitwa yekeguru” ndi asi vana vendi. Awo ruha rwepata royisitwa yendi nayinye.—Epis. 103:20-22; Joba 38:7.

4. Ngapi omu vantu va ya kara ruha rwepata lyaKarunga lyoyisitwa nayinye?

⁴ Apa ga mene kusita eguru nevhu, Jehova kwa nenepekere epata lyendi. Konyima zokuwapaika evhu ngembo lyokuwapera, Jehova yipo ga sitire mugara gokuhova Adamu, a mu fane. (Gen. 1:26-28) NgoMusiti, Jehova kwa ndindilire ko kwaAdamu a limburukwe. NgaGuhya, Jehova kwa vyukisire Adamu monkedi zeharo nonkenda. Age kapi ga pere Adamu noveta dokusilika umanguruki wendi.—Resa Genesis 2:15-17.

5. Yisinke ga rugene Karunga mokuninka evhu li zure vantu?

⁵ Kapisi ngwendi sinzi sovahompa wovantu, Jehova age kutekura vakareli vendi ngepata nokuvahuguvara pokuvapa yitumbukira. Pasihonena, age kwa pere Adamu situmbukira sokuruka madina yikorama nayinye. (Gen. 1:26; 2:19, 20) Karunga kapi ga sitire mamiliyona govantu wokusikilira mo mokuzwida evhu. Nye age kwa sitire mukadi gumwe gokusikilira mo Eva, ngomuhameni gwaAdamu. (Gen. 2:21, 22) Makura ta pe mpito valikwali owo yipo va zwide evhu novana vawo. Moukaro wokusikilira mo, vantu ngano va vhulire kulivhukisa nokuninka evhu nalinye li kare Paradisa. Sitambo saJehova kwa kere asi vantu novaengeli ngepata limwe ngano va mu karere narunye. Yosili, Jehova kwa yi likidire asi age Guhya geharo pokugava eparu lyewa kwaAdamu naEva!

6. (a) Ngapi omu urwanesi wa tamekere mepata lyaKarunga? (b) Ngapi omu twa yi diva asi Jehova simpe mupangeli?

⁶ Adamu naEva kapi va here kutambura Jehova ngoMupangeli gwawo. Nye awo kwa horowere po kukwama Satana, muengeli ogu ga rwanesere Karunga. (Gen. 3:1-6) Kuligusa ko koupangeli waKarunga, kwa va reterere kukora noruhepo nonomfa kumwe novana vawo. (Gen. 3:16-19; Rom. 5:12) Karunga kapi hena ga kere novakareli wovalimburukwi pevhu. Eyi ngesi kwa tente nye asi kapi ga vhulire hena kukara mupangeli goyisitwa yepevhu ndi? Hawe! Jehova kwa tjidire mo Adamu naEva mosikunino saEdeni, ano mokuvakondera va dire kutengwira mo yipo ga tulire ko vakerubi. (Gen. 3:23, 24) Ntani hena, Karunga kwa yi likidire asi age guhya geharo pokunkondopeka asi sitambo sendi sokukara nepata lyovaengeli ntani novantu wovalimburukwi nga si sika mo. Age kwa tumbwidilire asi ‘moruvharo’ rwaAdamu ngamu tunda gumwe ogu nga ya zonagura po Satana noyitundwamo yononzo.—Resa Genesis 3:15.

7, 8. (a) Ngapi omu va kere vantu mosiruwo saNowa? (b) Yisinke ga rugene ko Jehova?

⁷ Monomvhura mafere edi da ya kweme ko, vagara vamwe ngwendi Abeli naHenoka kwa ya horowere po kulimburukwa Jehova. Nye, sinzi sovantu kapi va tambwire  Jehova ngaGuhya ntani ngaHompa gwawo. Ano posiruwo saNowa, ‘udona kwa lihanenene nakunye.’ (Gen. 6:11) Eyi ngesi kwa tente asi Jehova kapi ga vhulire kupangera evhu ndi? Yisinke azi uyunga ko Bibeli?

⁸ Gazara kuhamena sihorokwa saNowa. Jehova kwa pere Nowa mauzera kuhamena omu nga tunga emuwato omu nga parukira nepata lyendi. Karunga hena ga likidire eharo kovantu navenye pokutantera Nowa a ‘udise uhungami.’ (2 Pet. 2:5) Nowa kwa tanterere vantu va litezurure nokuvarondora kezonauko eli lya kere pepi, nye kwato ogu ga mu purakenene. Monomvhura nadinye odo dononzi, Nowa nepata lyendi kwa kere mokatji kovantu wonyanya noruhonda. NgaGuhya geharo, Jehova kwa poperere nokutungika Nowa nepata lyendi. Pokureta Ekuruhanzo, Jehova kwa likidire upangeli wendi pokuzonagura po vantu novaengeli wovadona.—Gen. 7:17-24.

9. Konyima zEkuruhanzo, mpito musinke Jehova ga geve kovantu?

⁹ Konyima zapa Nowa nepata lyendi va tundire memuwato, awo kwa pandwire Jehova kepakerombili nekepopero lyendi. Makura Nowa ta tungu sizambero nokugava nonzambo mokukarera Jehova Karunga. Age kwa tungikire Nowa nepata lyendi pokuvatantera asi: “Livhareni mu vhuke mu zwide evhu.” (Gen. 8:20–9:1) Age hena apa kwa geve mpito kovantu mokumukarera mouumwe nokuzwida evhu.

10. (a) Konyima zEkuruhanzo, kupi ntani nangapi vantu va tamekere kurwanesa Jehova? (b) Yisinke Jehova ga rugene ko mokuninka sitambo sendi si sike mo?

¹⁰ Ekuruhanzo kapi lya gusire po kudira kusikilira mo, vantu simpe va hepere kulididimikira mapukiso gaSatana naga govaengeli wovarwanesi. Vantu kwa tamekere hena kurwanesa upangeli waJehova. Pasihonena, mutekurwaNowa Nimuroto kwa rwanesere upangeli waJehova. Nimuroto kwa mu singonona asi ‘mukongo ndi murwanesi gomunene kosipara saHOMPA.’ Age kwa tungire yitata, ngwendi saBabironiya nokulitura mwene a kare hompa ‘mosirongo saSineara.’ (Gen. 10:8-12) Yisinke ga rugene ko Hompa gwanarunye kwahompa ogu gomurwanesi nekelituromo lyendi lyokurwanesa sitambo saKarunga ‘sokuzwida evhu’? Karunga kwa piyaganekere eraka lyovakwami navenye vaNimuroto, ‘nokuvaharaganesera mwaza uzuni.’ Nkenye oku va zire kwa hanesere ukarelikarunga woyimpempa nokukwama upangeli wovantu.—Gen. 11:1-9.

11. Ngapi Jehova ga likidire asi ga huguvara kaume kendi Abirahamu?

¹¹ Nampili ngomu vakareli woyikarunga yoyimpempa va vhukire konyima zEkuruhanzo, nye pwa kere simpe vantu vamwe wovalimburukwi ava ngava karere Jehova. Gumwe gwawo kwa kere Abirahamu, ogu ga sigire embo lyawo lyewa mositata saUru nokukatunga monotenda nomvhura dononzi. (Gen. 11:31; Heb. 11:8, 9) Mosiruwo esi nga renda-renda, Abirahamu kapi ga huguvarere mepopero lyovahompa wovantu, nye mwaJehova ogu ga mu poperere nepata lyendi. Muepisarome kwa uyungire kuhamena epopero lyaJehova asi: “Age kapi ga sigire nampili gumwe a va hepeke, age nga tugumukire ohompa mwarwawo.” (Epis. 105:13, 14) Morwa Jehova kwa huguvarere kaume kendi Abirahamu, makura ta mu tumbwidire asi: ‘Vahompa ngava tunda hena moge.’—Gen. 17:6; Jak. 2:23.

12. Ngapi Jehova ga likidire upangeli wendi moEgipite, ntani ngapi ya kundamene vantu vendi?

 ¹² Karunga kwa tumbwidilire Isaka munwaAbrahamu namutekurwendi Jakopo asi nga va tungika, moruvharo rwawo ngamu tunda vahompa. (Gen. 26:3-5; 35:11) Nye komeho zokureta vahompa, ruvharo rwaJakopo kwa ka kere vapika moEgipite. Eyi ngesi kwa tente asi Jehova kapi nga sikisa mo etumbwidiro lyendi ndi asi kapi ga vhulire hena kukara mupangeli goyisitwa yepevhu ndi? Hawe! Posiruwo sendi, Jehova kwa likidire nonkondo dendi ntani asi ga kara nononkondo unene kupita Farawo. Vaisraeli ava va kere moupika kwa huguvarere mwaJehova ogu gava zowere pasitetu va pite mEfuta lyEgeha. Yosili, Jehova simpe kwa kere mupangeli goyisitwa nayinye ntani ngaGuhya geharo, age kwa ruganesere nonkondo dendi mokupopera vantu vendi.—Resa Exodus 14:13, 14.

13, 14. (a) Morusumo, yisinke va dimbire Vaisraeli kuhamena upangeli waJehova? (b) Etumbwidiro musinke Karunga ga tumbwidililire Ndafita?

¹³ Konyima tupu zapa va va zowere mo moEgipite pasitetu, Vaisraeli kwa dimbire rusumo rwefundo mokufumadeka Jehova. Rusumo oru kwa ru tjanga mwaExodus egaununo 15 velise 18 ezi azi tanta asi: “HOMPA yige nga pangera narunye-narunye.” Yosili, Jehova kwa ya kere Hompa gomuhoko gomupe goVaisraeli. (Deut. 33:5) Nye vantu kapi ya va gwanenene po yokukara asi Jehova Mupangeli gwawo gokudira kumoneka. Apa da pitire po nomvhura 400 konyima zapa va tundire moEgipite, awo kwa pulire Karunga ava pe hompa gomuntu, ngwendi nomuhoko dovapagani edi da va kundurukidire. (1 Sam. 8:5) Nye Jehova simpe ga kere Hompa, ano eyi kwa yi likidire apa Ndafita ga kere hompa gwauvali goVaisraeli.

¹⁴ Ndafita kwa retere sikesa segwanekero koJerusarema. Posilika esi soruhafo, Varevhi kwa dimbire rusumo rokufumadeka Jehova oru va tjanga 1 Histoli 16:31 asi: “Tantereni nomuhoko asi HOMPA yige mupangeli!” Gumwe kuvhura a lipure asi: ‘Mokumona asi Jehova yige Mupangeli gwanarunye, ngapi omu ga ya kere Mupangeli posiruwo sina?’ Jehova kwa ya kere Mupangeli apa ga tulire po hompa gokumukarera  po. Kukwata egano omu Jehova ga ya kere Hompa mulyo unene. Komeho Ndafita a fe, Jehova kwa mu tumbwidilire asi uhompa wendi ngau twikira dogoro narunye pokutanta asi: “Ngani tumba munoge gwaamoge nga kare hompa, ano uhompa wendi ngani u koreka.” (2 Sam. 7:12, 13) Etumbwidiro eli, kwa ya sikilire mo apa ‘munwaNdafita’ ga ya monekere konyima zonomvhura dokupitakana 1 000. Yilye, ntani siruwoke ga ya kere hompa?

15, 16. Siruwoke va mu gwavekere Jesus ngaHompa, ntani mawapaiko musinke ga tulisire po kuhamena Uhompa apa ga kere pevhu?

¹⁵ Momvhura 29, Johanesa Mukuhwi kwa tamekere kuzuvhisa asi: “Untungi weguru pepi una kara.” (Mat. 3:2) Apa Jesus ga mu kuhwire Johanesa, Jehova kwa gwavekere Jesus ngaMesiyasa getumbwidiro naHompa gokomeho goUhompa wendi. Jehova kwa likidire eharo kwaJesus pokutanta asi: “Ogu yige Munwange ogu na hara, ga za nge komutjima.”—Mat. 3:17.

¹⁶ Mosirugana sendi nasinye sokuzuvhisa, Jesus kwa yererepekere Guhye. (Joh. 17:4) Age kwa yi rugene eyi pokuudisa kuhamena Uhompa waKarunga. (Ruk. 4:43) Ntani age kwa rongere vasikuli vendi va kanderere asi Uhompa u wize. (Mat. 6:10) NgaHompa gokomeho, Jesus kwa divisire varwanesi vendi asi: “Untungi waKarunga mouli mokatji keni.” (Ruk. 17:21) Komeho zonomfa dendi, Jesus kwa ‘tumbwidilire vasikuli vendi uhompa.’ Eyi kutanta asi varongwa vendi vamwe wovalimburukwi ngava kara vahompa kumwe nendi moUhompa waKarunga.—Resa Rukasa 22:28-30.

17. Ngapi Jesus ga tamekere kupangera momvhura 33, nye yisinke ga hepere kundindira?

¹⁷ Siruwoke Jesus ga tamekere kupangera ngaHompa goUhompa waKarunga? Kapi ga tamekere kupangera poopo. Jesus kwa mu dipagere kositenguko, makura vasikuli vendi kwa liharaganene. (Joh. 16:32) Ngwendi pwanare, Jehova simpe ga kere Hompa. Mezuva lyautatu, age kwa vhumbwire Munwendi, ano mezuva lyoPentekoste momvhura 33, Jesus kwa tamekere kupangera nombungakriste dovamumbya vendi wovagwavekwa. (Koros. 1:13) Nye Jesus ga hepere kundindira pokukara Hompa pevhu nalinye ‘ngoruvharo’ rwetumbwidiro. Jehova kwa tanterere Munwendi asi: “Yo hingire oku korulyo rwange, dogoro noku ngani tura nonkore doge konhi zonompadi doge.”—Epis. 110:1.

18, 19. Yisinke nayi tu tumangeda tu rugane, ntani yisinke ngatu ka lironga mosirongwa sokukwama ko?

¹⁸ Monomvhura mayovi, vaengeli novantu kwa rwanesa uhompa waJehova. Jehova kapi ga hagekesa po upangeli wendi. NgaGuhya geharo, age kwa poperere nokupakera mbili vakareli vendi wovalimburukwi ngwendi Nowa naAbirahamu ntani Ndafita. Eyi kututumangeda tu hedere pepi naGuhyetu gemeguru nokulimburukwa Hompa gwetu.

¹⁹ Nye kuvhura tu lipure asi: Ngapi omu Jehova ga kara Hompa mosiruwo setu? Ngapi omu natu kara vakareli wovalimburukwi koUhompa waJehova nokukara vana wokusikilira mo mepata lyendi lyoyisitwa nayinye? Yisinke ayi tanta apa atu kanderere asi Uhompa waKarunga au wize? Sirongwa sokukwama ko ngasi ka limburura mapuro aga.