Eyi na horowere apa na kere munona
Apa na kere mumatigona
Ame kwa kere nonomvhura murongo apa vanona womosirongo saKambodiya va wizire posure zetu modoropa zaColumbus moOhio, moAmerika 1985. Mumati gumwe gwawo ga divire kanunu Ruingilisa. Nevatero lyomafano, age kwa tamekere kusimwitira nge yihorokwa yoyidona yehepeko nedipago ntani yetjwauko. Pamwe ngani lili masiku apa ngani diworoka vanona owo. Na here kuvatantera ko kuhamena ehuguvaro lyoParadisa ntani nevhumbuko, nye awo kapi ngava zuvhu Ruingilisa. Nampili ngomu na kere simpe mumatigona, tani tokora kulironga Rukambodiya yipo ni vhure kutantera ko vanasure vakwetu kuhamena Jehova. Kapi na divire omu etokoro eli ngali kundama eparu lyange.
Kulironga Rukambodiya kapi ya kere ureru. Yikando yivali na tokwere kuhageka, nye Jehova kwa korangedere nge kupitira movakurona vange. Mwaza siruwo, varongi ntani vanasure vakwetu kwa tamekere kukorangeda nge ni kondjere yirugana yokufuta yimaliwa yoyinzi. Nye ame kwa here kurugana uzuvhisi wokukarerera, makura tani tokora kugwederera ko kelirongo lyange eyi ya ya vaterere nge ni gwane yirugana yokupa nge siruwo yipo ni sikise mo sitambo sange. Apa ngani pwaga kosure, ngani zi novazuvhisi vamwe wokukarerera moyirugana yokuzuvhisa. Ntani hena ngani lizambere mokuvatera vanasure ava va here kulironga Ruingilisa, etokoro eli lya ya vaterere nge unene konyima zosiruwo.
Apa na kere nonomvhura 16, ame kwa zuvhire kuhamena kambunga koRukambodiya modoropa zaLong Beach moKalifoniya, moAmerika. Ame kwa ka dingwire kambunga oko nokukalironga kuresa Rukambodiya. Apa tupu na mene sure, yipo na kere muzuvhisi gokukarerera ntani na twikilire kuzuvhisira Vakambodiya ava va kere pepi nembo lyetu. Apa na kere nonomvhura 18, tani gazadara ko kuhamena kudirukira moKambodiya. Alyo kwa kere evango lyosiponga, nye na divire asi movantu ava mamiliyona murongo womoKambodiya, moveli wovasesu ava va zuvha mbudi zongwa zoUhompa. Posiruwo sina, amo kwa kere mo tupu kambunga kovazuvhisi 13 mosirongo nasinye. Sikando sange sokuhova kukadingura Kambodiya paapa na kere nonomvhura 19. Konyima zonomvhura mbali, tani tokora kudiruka nokukakara moomo. Ame na gwene yirugana yokutoroka nokuronga Ruingilisa eyi ngayi vatere nge moyirugana yokuzuvhisa. Konyima, na ya gwene mulikwali ogu ga kere noyitambo ngwendi yange. Kumwe namukadange, ose kwa hafera kuvatera vantu wovanzi moKambodiya va ligave kwaKarunga.
Jehova ga pere nge ‘eyi gwa tokomena mutjima gwange.’ (Epis. 37:4) Kutulisa po varongwa yiso sirugana sosiwa po kwanayinye. Nomvhura 16 nadinye edi na kara moKambodiya, kwa mona omu kambunga kovazuvhisi 13 kana kuligwederera dogoro ka ya sike konombungakriste 12 ntani notumbungagona 4 tokulikarera!—Esimwititi lyaJason Blackwell.