1. Nompito musinke donongwa vana kuhafera vadinkantu woVakriste?

OSE kuna kuparuka mosiruwo somulyo unene. Mamiliyona gokonomuhoko nadinye kuna kugogomokera koukareli wousili kupita pwanare. (Ehor. 7:9, 10) Vadinkantu wovanzi kuna kuhafera yilimonena ngomu vana kuvatera wopeke va kwate egano usili woBibeli. (Ehor. 22:17) Vadinkantu vamwe kuna kurugana malirongo goBibeli pokuvatera vantu va hafere eparu lyewa. Vamwe kuna kuzuvhisira mbudi zongwa konomukunda momaraka gapeke. (Epis. 110:3; Jes. 52:7) Yisinke wa hepa kurugana mokuhafera sirugana esi vana kurugana vantu vaJehova?

2. Ngapi omu sihonena saTimoteusa a si likida asi Jehova ga kara neharo lyokugava yitumbikira kovadinkantu? (Tara efano.)

² Ngomudinkantu, kuvhura o ture po matokoro aga konyima ngaga kupa nompito dokuhafera sirugana saKarunga. Pasihonena, Timoteusa gomoLisitira kwa tulire po matokoro gomawa aga ga mu ninkisire a gwana situmbukira sokukara mutumwa apa ga ya sikire koyiha yonomvhura 20 ngoso. (Yirug. 16:1-3) Konyima tupu zomakwedi gongandi, mupositoli Paurusa ga hepere kusiga mbungakriste zompe zomoTesaronika morwa makwamakwamo. Yipo nye Paurusa ga tumine mudinkantu Timoteusa a tengure koTesaronika a ka korangede vapuli vakwawo. (Yirug. 17:5-15; 1 Tes. 3:1, 2, 6) Gazara tupu omu ya hafesere Timoteusa mokugwana situmbukira sina!

3. Etokoro musinke lyomulyo unene no vhura kutura po meparu, ntani siruwoke no li tura po?

³ Moudinkantu, yiso siruwo sokutura po matokoro gomulyo. Nye etokoro lyomulyo unene kupitakana nagenye, etokoro lyoge lyokukarera Jehova. Siruwoke no tura po etokoro olyo? Jehova kutanta asi: “Diworoka musiti goge momazuva goge goudinkantu.” (Muud. 12:1) Nkedi zokuvhura ‘kudiworoka’ Jehova kuna kara mokumukarera nomutjima goge nagunye. (Deut. 10:12) Etokoro lyoge lyokukarera Karunga nomutjima goge nagunye yilyo lyomulyo unene. Alyo ngali kundama eparu lyoge nalinye.—Epis. 71:5.

4. Kugusa ko etokoro lyokukarera Jehova, matokoro musinke hena naga kundama omu o karere Karunga?

⁴ Yimo, etokoro lyoge lyokukarera Jehova kapisi yilyo lyelike ngali kundama eparu lyoge. Pasihonena, wa hepa kutokora nsene asi ngo kwara, muntu musinke ngo kwara ntani sirugana musinke ngo rugana. Matokoro ogo mulyo, nye pomuhowo ya wapa mokutokora kukarera Jehova nomutjima goge nagunye. (Deut. 30:19, 20) Morwasinke? Morwa matokoro nagenye aga kuruganena kumwe. Etokoro lyoge kuhamena nonkwara noyirugana ngali kundama omu ngo karera Karunga. (Hetakanesa Rukasa 14:16-20.) Mokulifana, etokoro lyoge lyokukarera Karunga ngali kundama etokoro lyoge kuhamena nonkwara noyirugana. Yipo nye, yininke yomulyo po ya hepa kukara muhowo meparu lyoge.—Fil. 1:10.

5, 6. Simwitira omu kutulisa po matokoro gomawa ayi twaredesa koyilimonena yoyiwa. (Tara sirongwa sosiparatjangwa “Eyi na horowere apa na kere munona” mosifo esi.)

⁵ Nsene ono tokora kukarera Karunga, gazadara ko eyi ana ku harere no rugana ntani no tokora omu no mu karera. Munazinyetugara goMuyapani kwa tjanga asi: “Apa na kere nonomvhura 14, kwa ka zuvhisire nomukuronambunga ogu ga dimbwilire asi ame kapi nina kuhafera sirugana sokuzuvhisa. Monkedi zongwa, age kwa tanterere nge asi: ‘Yuichiro, tengura kembo. Ka hingire o ka ligazadare ko kweyi ga kuruganena Jehova.’ Ame kwa rugene moomu ga tanterere nge. Tani twikire kugazadara nokukanderera koyuma eyi mazuva gongandi. Kanunu-kanunu, nkareso zange tazi litjindji. Makura tani tameke kuhafera kukarera Jehova. Ame ngani hafere kuresa kuhamena sirugana soutumwa, makura yipo na tamekere kugazara kukarera Karunga nomutjima nagunye.”

⁶ Yuichiro ta tanta hena asi: “Tani tameke kutulisa po matokoro aga ga ya vatera nge ni ya karere Jehova moyirongo yoponze. Pasihonena, ame kwa tokwere kulironga Ruingilisa. Apa na mene sure, tani gwana yirugana yokuronga Ruingilisa eyi ya pulisilire nge mokurugana uzuvhisi wokukarerera. Apa na kere nonomvhura 20, yipo na tamekere kulironga Rumongoliya ntani na gwene mpito zokukadingura kambunga kovazuvhisi woRumongoliya. Ano konyima zonomvhura mbali yipo na ka dingwire sirongo saMongolia 2007. Apa na pwege mokuzuvhisa novazuvhisi vamwe wokukarerera nokudimburura asi vantu wovanzi vana kara neharo kousili, yipo na here kudirukira ko ni ka vatere. Makura tani tengura koYapani mokukaliwapaikira. Ame kwa rugana uzuvhisi wokukarerera moMongolia kutundilira mwaKudumogona 2008. Eparu kapisi ureru moMongolia. Nye vantu kupurakena kombudi zongwa, ano ame kuvavatera va hedere pepi naJehova. Ame kuna kulizuvha asi na horowora nkedi zongwa zeparu.”

7. Matokoro musinke natu litulira po, ntani sihonena musinke ga tu sigira Mosesa?

⁷ Wa hepa kutura po matokoro ganyamoge kuhamena omu ngo ruganesa eparu lyoge ngagumwe goNombangi daJehova. (Jos.  24:15) Ose nokuvhura si kukutantera asi ngo kware ntani muntu musinke ngo kwara ndi asi yirugana musinke ngo rugana. Ngo horowora yirugana eyi ya hepa edeuro lyenunu ndi? Vamwe veni kwa tunga monomukunda doruhepo; ano vamwe moyitata yoyinene. Mouzuni mudima, one mwa lisiga moyikara nomoudivi noyilimonena neyi mwa hara ntani noyitambo yopampepo. Eparu lyeni lya lisiga neli lyovadinkantu woVahebeli ava va kere moEgipite neli lyomudinkantu Mosesa. Age kwa kulilire mombara zahompa, nye vadinkantu vakwawo woVahebeli kwa kere vapika. (Ex. 1:13, 14; Yirug. 7:21, 22) Ngwendi nyove, nawo kwa parukire mosiruwo somulyo. (Ex. 19:4-6) Nkenye ogu ga hepere kutokora nsene asi nga karera Jehova nomutjima nagunye. Mosesa kwa tulire po etokoro lyewa.—Resa Vahebeli 11:24-27.

8. Evatero musinke lya kara po kovadinkantu ava vana kugazadara kutura po matokoro meparu?

⁸ Jehova kukuvatera o tulise po matokoro gomawa moudinkantu woge. Age kukupa mapukururo morupe ronompango edi no vhura kuruganesa momaukaro gokulisiga-siga. (Epis. 32:8) Ntani hena, vakurona woge wovapuli novakuronambunga kuvhura va ku vatere omu no ruganesa nompango edi. (Yis. 1:8, 9) Tu zeni tu ka konakone nompango ntatu domoBibeli edi nadi tu vatera tu ture po matokoro gomawa aga ngaga kundama eparu lyetu monkedi zongwa.

9. (a) Ngapi Jehova ga ku pa mfumwa zoumanguruki wokutura po matokoro? (b) Nompito musinke no gwana ‘pokupapara muhowo Uhompa’?

⁹ Hova tanko kupapara Untungi waKarunga nouhungami wendi. (Resa Mateusa 6:19-21, 24-26, 31-34.) Jehova ga ku pa mfumwa zoumanguruki wokutura po matokoro. Age kapi a ku tokwere po asi siruwo sokuhura kupi moudinkatu woge no ruganesa mokuzuvhisa. Nye Jesus kwa tu ronga asi ya kara nomulyo kupapara muhowo Uhompa. Monkedi omu o ruganesa eyi ga uyungire Jesus ngayi kupa nompito dokulikida eharo lyoge kwaKarunga nokovamusinda woge ntani nokulikida rupandu kehuguvaro lyomwenyo gwanarunye. Matokoro goge kuhamena nonkwara noyirugana kulikida asi ove wa kara nosinka unene kuhamena emona kupitakana ‘kupapara muhowo Uhompa waKarunga nouhungami wendi’ ndi?

10. Yisinke ya reterere Jesus ruhafo, ntani matokoro musinke ngaga ku retera ruhafo?

¹⁰ Gwana ruhafo mokuvatera wopeke. (Resa Yirugana 20:20, 35.) Ezi kuna kara mpango zomulyo meparu ezi ga tu ronga Jesus. Age kwa kere muntu goruhafo morwa nga rugana mpango zoGuhwe kupitakana eharo lyamwene. Jesus ngayi mu hafesa mokumona vantu wokulinunupika omu vana kutambura mbudi zongwa. (Ruk. 10:21; Joh. 4:34) Nampo nove wa lizuvha ruhafo oru aru tundu mokuvatera wopeke. Nsene matokoro goge ga tundilira konompango edi ga rongere Jesus, ove ngo gwana ruhafo meparu ntani ngo hafesa Jehova.—Yis. 27:11.

11. Morwasinke Baruku ga zumbaneserere ruhafo rwendi, ntani epukururo musinke ga mu pere Jehova?

¹¹ Ruhafo rwetu rorunene kutunda mokukarera Jehova. (Yis. 16:20) Hamutjanga gwaJeremiya, Baruku, posiruwo simwe ga zumbanesere ruhafo rwendi. Age kapi ga haferere hena kuruganena Jehova. Jehova kwa mu tanterere asi: “Ove kuna kulipaparera yininke yoyinene nyaamoge? Wa ha yi lipaparera. Ame tani ka retera vantu navenye udona wounene. Nye ove ko, mwenyo goge ngani gu parura nkenye oku ngo za.” (Jer. 45:3, 5) Yisinke ngano ya hafesere Baruku? Yokulipaparera mwene yininke yoyinene ndi yokurugana eyi ga mu harerere Jehova nokuparuka ezonauko lyaJerusarema?—Jak. 1:12.

12. Etokoro musinke lya retera Ramiro ruhafo meparu?

 ¹² Munazinyetugara gumwe ogu ga gwana ruhafo mokuvatera wopeke kuna kara Ramiro. Age kwa tanta asi: “Ame kwa tunda mepata lyoruhepo momukunda gomonondundu daAndes. Apa mukurwange ga here kufutira nge kounivesiti, azo kwa kere mpito zongwa. Ame opo ntani tupu vana kukuhwa nge ngagumwe goNombangi daJehova, ntani na gwene hena mpito nazopeke, ezi ga zigidire nge muzuvhisi gokukarerera tu ka zuvhise kumwe nendi modoropagona. Makura tani zi, tani ka lironga kukurura nohuki, yipo na patwilire ngesefa zokukurura nohuki mokulireresa ko. Ngomu twa rongere vantu Matjangwa, wovanzi kwa yi tambwire noruhafo. Konyima, na ya lipakererere nombungakriste zompe ezi ngazi ruganesa eraka eli ani uyunga. Ame ngesi nina kara muzuvhisi gosiruwo nasinye ure wonomvhura murongo. Kwato hena sirugana simwe esi ngasi pa nge ruhafo oru nina kara naro ngesi ngomu nina kuvatera vantu pokulironga mbudi zongwa meraka lyawo.”

13. Morwasinke siruwo soudinkantu sa karera sosiwa kukarera Jehova nomutjima nagunye?

¹³ Hafera kukarera Jehova moudinkantu woge. (Resa Muudisi 12:1.) Kapisi hepero kulizuvha asi pomuhowo wa hepa kugwana yirugana yoyiwa ntani no karera Jehova. Siruwo sosiwa sokutameka kukarera Jehova nomutjima nagunye kuna kara siruwo soudinkantu. Vadinkantu wovanzi kwato yitumbukira yoyinzi mepata ntani awo va kara noukanguki wouwa nononkondo dokurugana yirugana youdigu. Yisinke ono hara kuruganena Jehova moudinkantu woge? Nampo sitambo soge sokurugana uzuvhisi wokukarerera ndi ono hara kuzuvhisira konomukunda. Nampo ngesi kuvhura o rugane unene mombungakriste zeni. Yi kare asi sitambo soge musinke mokukarera Karunga, wa hepa kukara neyi yokulireresa. Lipura nyamoge asi: ‘Sirugana musinke na hepa kurugana, ntani edeuro lyokuhura kupi sa hepa?’

14. Yininke musinke wa hepa kutakamesa apa no tulisa po matokoro meparu?

¹⁴ Nompango ntatu domoBibeli tuna zogere kuvhura kukuvatera o tokore sirugana esi no rugana. Nampo nosaitunga edi adi kara nonombudi doyirugana ndi vandambo woge kuvhura va ku tantere oku kuna kara yirugana momukunda ogu ono hara kukazuvhisira. Vantu owo kuvhura va gave evatero, nye wa hepa kutakamesa. Vantu ava va dira kuhara Jehova kuvhura va tunge eharo momutjima goge lyokuhara yininke yomouzuni. (1 Joh. 2:15-17) Nsene o gazadara unene kweyi au gava uzuni, mutjima goge kuvhura kugupukisa usimbu.—Resa Yisewe 14:15; Jer. 17:9.

15, 16. Wolye nava vhura kukupa mapukururo gomawa kuhamena yirugana?

¹⁵ Apa no diva eyi ono hara kurugana, wa hepa mapukururo gomawa. (Yis. 1:5) Wolye nava vhura kukuvatera o horowora yirugana eyi ayi lizi nonompango domoBibeli? Purakena kovantu ava va kara neharo koge noku kwaJehova, va ku diva nawa ntani ukaro woge. Awo ngava ku vatera o dimburure eyi wa hara kurugana neyi no vhura kusikisa mo. Nampo eyi ava uyunga ngayi ku vatera o gazudurure ko koyitambo yoge. Nsene asi vakurona woge kwa hara Jehova, alyo etungiko. Ntani hena, vakuronambunga awo vagara ava va kura pampepo ava nava vhura kukupukurura. Mokugwederera ko, zogera novazuvhisi wokukarerera novatareli wokudingura. Morwasinke va tulira po etokoro lyokurugana yirugana yoUhompa yosiruwo nasinye? Ngapi va tamekere uzuvhisi wokukarerera, ntani ngapi omu ava lirere vene? Matungiko musinke va gwanena mo mosirugana sokuzuvhisa?—Yis. 15:22.

¹⁶ Ava va ku diva nawa kuvhura va ku pe mapukururo gomawa. Pasihonena, tu tante asi ono hara kutunda mo mosure nokutameka uzuvhisi wokukarerera morwa walye kuna kulizuvha asi yirugana yokosure udigu. Muntu ogu ga ku hara kuvhura a kwate egano sitambo soge ntani nokukuvatera o dimburure asi sure kuvhura kukuvatera mokulironga elididimikiro, sikara somulyo wa hepa mokukarera Jehova nomutjima nagunye.—Epis. 141:5; Yis. 6:6-10.

17. Yirugana musinke wa hepa kunyokera po?

¹⁷ Nkenye ogu a karere Jehova ngali gwanekera nomaukaro aga ngaga tura epuro lyendi mosiponga nokuhara kumugusa ko kwaJehova. (1 Kol. 15:33; Koros. 2:8) Nye yirugana yimwe kuvhura kutura epuro lyoge mosiponga. Koveli vamwe womomukunda gweni “va zumba epuro lyawo” morwa kuhorowora yirugana yangoso ndi? (1 Tim. 1:19) Ya wapa kunyokera po yirugana yangoso eyi nayi vhura kuzonagura po elikwatakano lyoge naKarunga.—Yis. 22:3.

18, 19. Yisinke no rugana nsene kapi ono kara neharo lyokurugana unene mosirugana saJehova?

¹⁸ Nsene wa tunga momutjima goge eharo lyokukarera Jehova Karunga, hafera nompito edi adi tundilire mokumukarera moudinkantu. Tulisa po matokoro aga ngaga kupulisira o hafere kukarera Jehova mosiruwo esi somulyo.—Epis. 148:12, 13.

¹⁹ Yisinke no rugana nsene kapi ono kara neharo lyokurugana unene mosirugana saJehova? Wa ha hageka mokunkondopeka epuro lyoge. Mupositoli Paurusa kwa fatwilire eyi ga rugene mokugwana etungiko lyaKarunga, age kwa tjenge asi: “Ntene tomu gazara moyininke yimwe namopeke, Karunga nga yi mu horwera poruzera. Sosinene po, tu kwameni nzira ezi tuna gendi dogoro ntaantani.” (Fil. 3:15, 16) Diworoka asi Jehova ga ku hara ntani mapukururo gendi mawa. Pulisira Jehova a ku vatere mokutulisa po matokoro gomawa moudinkantu woge.