“Uhompa woge au wize” —Siruwoke?
‘Apa ngomu mona yininke eyi, ngomu dive nye asi yina siki, pevero ana kara.’—MAT. 24:33.
1, 2. (a) Yisinke ayi tu ninkisa tu dire kumona yuma? (b) Yisinke twa diva kuhamena Uhompa waKarunga?
VANTU nsene vana mono sihorokwa, nkenye ogu kusidiworoka mononkedi dokulisiga-siga. Mokulifana, muntu kapi a vhuru kudiworoka nkenye nkango ana mu tantere ndokotora. Ntani hena, muntu kuvhura a dire kugwana nonsapi ndi makende gokomeho nampili popepi yina mu karere. Yihorokwa eyi kwa likwatakana neyi va tumbura vakonakoni asi utwiku ndi kudira kumona yuma ndi kudivara yuma, morwa kugazara nayopeke. Uruvi wetu yimo au rugana ngorooro.
2 Vantu wovanzi vana twika mokudira kumona eyi yina kuhoroka mouzuni. Kuvhura va yi kwatese ko asi uzuni wa runduruka unene kutundilira 1914, nye kapi vana kumona eyi yina kutanta yihorokwa oyo. Ngovalirongi woBibeli, ose twa yi diva asi Uhompa waKarunga kwa wizire 1914 apa Jesus va mu tumbire a kare Hompa meguru. Nye twa yi diva asi yinzi ya hamena mo pokukanderera asi: ‘Uhompa woge au wize. Mpango zoge ava zi sikise mo pevhu ngwendi meguru.’ (Mat. 6:10) Ayo kwa hamena mo uhura wouzuni ou woudona. Apa ngau wiza uhura wouzuni ntani nye mpango zaKarunga ngava zi sikisa mo pevhu ngwendi meguru.
3. Uwa musinke atu gwanene mo pokulironga Nonkango daKarunga?
3 Morwa ose kulironga nkenye apa Nonkango daKarunga, ose kuna kumona esikiliromo lyouporofete ou. Nye vantu wovanzi kapi vana kulimona. Awo kuna litura mo unene meparu ano eyi kuvanininkisa va dire kumona umbangi ou asi Kristusa kwa tameka kupangera 1914 ntani ntaantani nga ya pangure uzuni. Nampili ngoso, lipura asi: Nsene nare na gusa kukarera Karunga, nina kara ngesi nosinka kweyi yina kuhoroka kupita pwanare ndi? Nampili ntaantani ko kere Mbangi, kosinke lina demenene eparu lyoge? Li kare asi elimbururo lyoge musinke, tu zogereni nokonda ntatu domulyo deyi twa pulira asi ntaantani mpango zaKarunga nga zi sike mo pevhu.
VARONDI WONONKAMBE
4, 5. (a) Yisinke ga rugana Jesus kutundilira 1914? (Tara efano pepenuno 27.) (b) Yisinke va fanekesa varondi wononkambe vatatu, ntani yisinke ya horoka?
4 Momvhura 1914, Jesus Kristusa kwa mu pere nkata zouhompa, nokumufanekesa asi ana rondo ponkambe zonzera. Makura ta pwaga a ka funde uzuni woudona waSatana. (Resa Ehororo 6:1, 2.) Uporofete wemEhororo egaununo 6 kwa faturura asi apa va u tulire po Uhompa waKarunga, mouzuni ta mu horoka yita nerumbu nehamba lyomukagu nonomfa. Yihorokwa oyo kwa yi fanekesa kovarondi wononkambe vatatu vana kukwama Jesus Kristusa.—Ehor. 6:3-8.
5 Ngamoomu va yi pumbire, ‘mbili kwa zi gusa po pevhu,’ nampili ngomu vantu ava tumbwidire uumwe nombili. Yita yoPomuhowo yoUzuni kuna kara simwe soyihorokwa eyi ya gusa po mbili mouzuni. Kutundilira 1914, nampili ngomu vakonentu va hetaikira ko, erumbu simpe kuna kutwikira. Kwato ogu na vhura kuyipatanesa asi mauvera noyimpagwa ‘nomahamba gomukagu’ kapi yina kudipaga mamiliyona govantu nkenye mvhura. Yihorokwa oyo kuna kuligwederera kupita pwanare. Ono dimburura eyi yina kutanta eyi ndi?
Ngovarondi wononkambe, ukaro wouzuni kuna kutwikira kudonapa unene (Tara paragarafu 4, 5)
6. Wolye va kwete egano esikiliromo lyouporofete woBibeli, ntani yisinke va rugene?
6 Vantu wovanzi kwa tukukire apa ya horokere Yita yoPomuhowo yoUzuni ntani nesakisa lyaSipanye. Nye, Vakriste wovagwavekwa kwa ndindilire nononkondo mvhura 1914 apa sa hege siruwo sovapagani ndi ‘sa sikire mo.’ (Ruk. 21:24) Awo kapi va divire eyi nayi ka horoka. Nye, va yi divire asi 1914 Uhompa waKarunga tau ka tameka kupangera. Apa tupu va kwete egano esikiliromo lyouporofete woBibeli yipo va divisire kovantu asi Uhompa waKarunga una tameke kupangera. Wovanzi ava va zuvhisire mbudi zoUhompa kwa va hepekere momudona. Ehepeko eli nalyo kwa kere esikiliromo lyouporofete woBibeli. Monomvhura edi da kweme ko, nonkore doUhompa kwa ruganesere noveta, nyanya, eturo modorongo, ndi edipago mokuhetekera ko kuhagekesa po sirugana sokuzuvhisa.—Epis. 94:20; Ehor. 12:15.
7. Morwasinke vantu wovanzi vana kudilira kumona eyi yina kuhoroka ngesi mouzuni?
7 Mokumona asi pana kara maumbangi gomanzi asi Uhompa waKarunga wa tameka kupangera mouzuni, morwasinke vantu wovanzi va dira kuyitambura? Morwasinke vana kudilira kukwatakanesa eyi yina kuhoroka mouzuni kumwe nomauporofete goBibeli aga vantu vaKarunga ava zuvhisa? Nampo sinzi sovantu kuna kudemenena tupu kweyi gana kuvhura kumona meho gawo. (2 Kol. 5:7) Ndi kuna kuhokwa yinka yomouzuni yiyo vana kudilira kumona eyi ana kurugana Karunga. (Mat. 24:37-39) Vamwe nampo kuna kuvapukisa magano gepuko gouzuni waSatana. (2 Kol. 4:4) Pwa hepa epuro lyenene yipo o mone eyi una kurugana Uhompa waKarunga ngesi. Ee, ruhafo musi tuna kara naro pokumona eyi yina kuhoroka!
UDONA UNA VHUKA
8-10. (a) Ngapi omu 2 Timoteusa 3:1-5 za sikilira mo? (b) Morwasinke natu tantera asi udona una vhuka?
8 Pana kara konda zauvali zeyi twa pulira asi Uhompa waKarunga ntaantani ngau ya rugane ko yuma kweyi yina kuhoroka mouzuni: Morwa udona wovantu una vhuka. Maukaro aga va pumbire mwa-2 Timoteusa 3:1-5 nare ga gusa kuhoroka. Maukaro ogo, gana ligwederere kupita pwanare. Ove kuna kuyimona eyi ndi? Tu konakoneni yihonena yimwe yesikiliromo lyouporofete ou.—Resa 2 Timoteusa 3:1, 13.
9 Hetakanesa yininke eyi ya horokere koyiha yonomvhura 1940 ndi 1950 ntani neyi yina kuhoroka naina komavango goyirugana nomoyilihafeso nomomaudano nomondwareso. Ngesi nyanya noruhonda yina vhuka nakunye. Vantu kurumbasana va likide ogu ga kara nononkondo ndi nonyanya kupita vakwawo. Eyi ngava tara 1950 asi yininke yonomuga ngesi kuna kuyilikida konotivi ngwendi yiwa kutarera. Wovanzi va dimburura epukiso lyava ava likwara vagara novagara ndi vakadi novakadi omu lina kulihanena mouzuni kupitira moyilihafeso nomondwareso zawo. Ose tuna hafa asi twa diva omu Karunga a tara yininke oyo.—Resa Juda 14, 15.
10 Ndi Mukriste kuvhura a hetakanese eyi ngava tara asi nkareso zondona movadinkantu koyiha yonomvhura 1950 neyi yina kuhoroka naina. Vakondi ngava kara nosinka nsene vana vawo kuna kukoka makanya nokuruganesa yikorwesa ndi kuna kudana monkedi zoruhonda. Naina, erapoto lyonombudi dokutetukisa kuna divikwa nakunye: Murongwa gumwe gonomvhura 15 kwa royere varongwa vakwawo, 2 kwa fire ano 13 kwa remanene. Kambunga kovadinkantu wokukorwa kwa dipagere mukadona gonomvhura ntane nokutoona oguhwe nasipwa sendi. Mosirongo simwe somoAsia kwa rapota asi vadinkantu nawo kwa lihameka mo moukorokotji ou wa horoka monomvhura murongo da ka pita. Kwato gumwe gokuvhura kupatana asi udona naina kapi una vhuka.
11. Morwasinke vantu wovanzi ava dili kuyidimburura asi udona una vhuka?
11 Mupositoli Peturusa kwa tanta asi: “Pomazuva gouhura ngapa horoka vadinikarunga vamwe woukaro ou aga pangere madowo gavene. Ngava mu zora, tava tanta asi: “Kwa va tumbwidira asi nga wiza, gupi nye? Gupi po apa? Ozinyakurwetu va fa nare, nye nayinye ha ya kerera moomu ya kere pesito lyouzuni.” (2 Pet. 3:3, 4) Morwasinke vantu vamwe ava karere noukaro wangoso? Ayo kumoneka asi moomu tuna kumona rorunzi yininke yangoso, yimo atu dili kuyipakera mbili. Nsene ukaro wakaume ketu u litjindja hararasi, eyi kuvhura kututukukisa, nye nsene nkareso zovantu zi litjindja kanunu-kanunu, ose pamwe kapi atu yi dimburura. Nye elitjindjo lyangoso, twa ha yi ncenuna morwa siponga.
12, 13. (a) Morwasinke nayi dilira kututjilisa yihorokwa yomouzuni? (b) Yisinke nayi tu vatera tu lididimikire maudigu ‘gopomazuva gopouhura’?
12 Mupositoli Paurusa kwa tu rondwere asi “pomazuva gopouhura ngapa kara yiruwo yoyidigu.” (2 Tim. 3:1) Nye ose kuvhura kugalididimikira, kapi twa hepa kutjira. Nevatero lyaJehova nompepo zokupongoka ntani mbungakriste, ose kuvhura kukara ngorooro noulimburukwi nampili tu ligwanekere nomadompeso. Morwa “nonkondo edi dononene daKarunga, kapisi detu.”—2 Kol. 4:7-10.
13 Ya wapa mokukwata egano omu Paurusa ga tamekere nouporofete wopomazuva gopouhura nononkango edi: “Ove diva asi.” Nonkango edi kwa nkondopeka asi uporofete ou ngau sika mo sili. Ose twa yi diva asi uzuni ou ngau twikira kudonapa dogoro Jehova nga rete uhura. Ose twa yi dimburura asi vantu mouzuni kapi hena vana kara nonkareso zongwa. Pwanare nkareso zovantu kapisi yimo za kere ngoso. Vantu wovanzi kuvhura kuncenuna eyi yina kutanta eyi, nye yihorokwa eyi ya horoka kutundilira 1914 kupameka ehuguvaro lyetu asi Uhompa waKarunga ntaantani u ka hagekese po udona naunye.
VANTU AVA VANTAANTANI KAPI NGAVA LIPITIRA
14-16. Konda musinke zautatu zeyi natu pulira asi Uhompa waKarunga ntaantani u “wize”?
14 Ehistoli lyovantu vaKarunga kutupa konda zoutatu zeyi natu pulira asi uhura pepi una kara. Pasihonena, komeho Uhompa waKarunga u tameke kupangera meguru, mbunga zovagwavekwa ngazi karere Karunga noulimburukwi. Yisinke va rugene apa eyi va ndindilire momvhura 1914 ya dilire kusika mo? Sinzi sawo kwa twikilire kukarera Jehova noulimburukwi nampili ngomu va ligwanekerere nomahepeko nomaheteko. Mwaza nomvhura, sinzi sovagwavekwa owo va kwete egano mulyo gomvhura 1914, kwa limburukwire dogoro konomfa.
15 Mouporofete wendi kuhamena mazuva gouhura wouzuni waSatana, Jesus kwa tente asi: “Vantu ava vantaantani kapi ngava lipitira, yininke nayinye eyi ayo ya hana kuhoroka.” (Resa Mateusa 24:33-35.) Apa Jesus ga tumbwire “vantu ava vantaantani,” age kwa tembe konombunga mbali doVakriste wovagwavekwa. Mbunga zokuhova zeezi za parukire mo-1914, ano za kwete egano asi Kristusa kwa tamekere kupangera ngaHompa momvhura ozo. Ava va hamenene mombunga ezi kapisi vaava tupu va parukire 1914, nye hena kwa va gwavekere nompepo zokupongoka momvhura ozo ndi komeho zomvhura ozo.—Rom. 8:14-17.
16 Ava va hamenene mombunga zauvali ‘zovantu ava vantaantani’ vaava va parukire kumwe posiruwo songandi novagwavekwa womombunga zokuhova. Ntani kwa va gwavekere posiruwo esi awo vamwe womombunga zokuhova simpe vazuni. Yipo nye asi kapisi nkenye mugwavekwa naina kwa hamena mo ‘movantu ava vantaantani’ ga uyungire Jesus. Ava womombunga zauvali ngesi vana kurupa. Nye nonkango daJesus domwaMateusa 24:34 kupameka ehuguvaro lyetu asi vamwe ‘wovantu ava vantaantani kapi ngava lipitira’ va hana kumona etameko lyoudigu wounene. Eyi kupameka unene ehuguvaro lyetu asi ntaantani Hompa goUhompa waKarunga a ka zonagure po uzuni woudona nokukareta uzuni woupe wouhungami.—2 Pet. 3:13.
KRISTUSA NTAANTANI A KA FUNDE
17. Ngapi maumbangi aga tuna zogere naga tu vatera tu kwate egano mauporofete goBibeli?
17 To mono omu mauporofete goBibeli aga tuna zogere gana kusika mo ndi? Jesus kwa tu rondora asi kapi twa diva ezuva novili apa ngau wiza uhura. (Mar. 13:32; Mat. 25:13) Nye ose kwa diva “siruwo” somazuva gopouhura ngomu ga yi tumbwire Paurusa. (Resa Varoma 13:11.) Ose kuna kuparuka mosiruwo oso. Nsene tu kwata egano uporofete woBibeli neyi ana kurugana Jehova Karunga naJesus Kristusa, ose ngatu mona maumbangi gana kulikida asi uhura wouzuni ou woudona pepi una kara.
18. Yisinke ngayi horokera ava ava dili kutambura upangeli waJesus Kristusa?
18 Ava ava dili kutambura upangeli waJesus Kristusa, mufundi ogu ana rondo nkambe zonzera, ngayi va sininika va tambure asi mepuko va kara. Awo kwato oku ngava hendukira mpanguro ezi zina kuwiza. Apa ngayi horoka oyo, wovanzi ngava takuma asi: “Yilye ogu na vhura kulisikamena?” (Ehor. 6:15-17) Nye, egaununo 7 lyEhororo kugava elimbururo kepuro olyo. Vagwavekwa ntani nemukurumbunga, awo ngava ‘lisikamena’ mezuva olyo morwa Karunga kwa va hafera. Makura “emukurumbunga” ngali paruka momahepeko gomanene nokukahwilira mouzuni woupe waKarunga.—Ehor. 7:9, 13-15.
19. Ngomu tuna diva asi uhura pepi una kara, yisinke ono kundindira nononkondo?
19 Nsene tu twikira kukwata egano mauporofete goBibeli aga gana kusika mo naina, uzuni waSatana kapi ngau tu donganesa. Ntani kapi ngatu kara vatwiku kweyi yina kutanta yihorokwa eyi yomouzuni. Kristusa ntaantani nga ka funde nokukazonagura po uzuni ou woudona poyita yaHarumagedoni. (Ehor. 19:11, 19-21) Gazara tupu ruhafo oru ngatu kara naro konyima zoyo!—Ehor. 20:1-3, 6; 21:3, 4.