1. Mokumona asi ose kwa tu sita tu kare ngwendi Karunga, evhuliko musinke twa kara nalyo?

OGO “kwa kara gwendi oguhwe,” ezi yizo mbuuyungiso ava ruganesa unene vantu. Ano ayo usili asi sinzi sovanona kwa kara ngwendi vakurona vawo. Nkenye munona kupinga yikara koguhwe noku kozina. Jehova, Guhyetu gemeguru yige Mugavi geparu. (Epis. 36:9) Ngovana vendi wopanyama, ose kwa kara ngwendi Guhyetu mononkedi dimwe. Mokumona asi kwa tu sita tu kare ngwendi yige, twa kara nevhuliko lyokugazara nokutura po matokoro ntani nokutulisa po ukaume.—Gen. 1:26.

2. Morwasinke twa karera ukaume naJehova?

² Jehova kuvhura a kare Kaume gwetu gomuwa po. Ukaume wangoso kwa karera po morwa Karunga kwa tu hara ntani ose kwa kara nepuro mwendi nomu mwaMunwendi. Jesus kwa tente asi: “Karunga kwa here uzuni unene-nene, yiyo ga u pere Munwendi gelike a huru, asi nkenye ogu a mu pura a dire kuzonauka, nye a kare nomwenyo gwanarunye.” (Joh. 3:16) Pwa kara yinonena yovantu wovanzi ava va tulisire po ukaume naJehova. Ngesi tatu ka zogera yihonena yivali.

3, 4. Yisinke ya ninkisire ukaume waAbirahamu naJehova u lisige nou woVaisraeli?

³ Jehova kwa singonwene zinyakurwa goVaisraeli asi ‘Abirahamu, mukwetu.’ (Jes. 41:8) Mo-2 Histoli 20:7 kwa tumbura hena Abirahamu asi mukwawo zaKarunga. Yisinke ya ninkisire Abirahamu a kare noukaume wangoso noMusiti gwendi? Morwa epuro eli ga kere nalyo Abirahamu.—Gen. 15:6; resa Jakopo 2:21-23.

⁴ Jehova kwa ya kere Guhyawo naKaume koruvharo rwaAbirahamu oru rwa ya kere muhoko gwaIsraeli. Nye, mwaza siruwo va ya tezere po ukaume wawo naKarunga. Morwasinke? Morwa va ya hagekere kulikida epuro momatumbwidiro gendi.

5, 6. (a) Ngapi omu Jehova ga ya kara Kaume koge? (b) Mapuro musinke twa hepa kugazadara ko?

⁵ Moomu ono kulironga yoyinzi kuhamena Jehova, yimo epuro lyoge neharo lyoge ngayi nkondopara. Gazara apa wa lirongere muhowo asi Karunga yipo ga kara ntani kuvhura a kare kaume koge gomunene. Ove kwa lirongere asi natuvenye kwa pinga nzo morwa kudira kulimburukwa kwaAdamu. Ntani wa ya kwete egano asi vantu kwa kere nonkore daKarunga. (Koros. 1:21) Makura wa ya dimbwilire asi Guhyetu gemeguru kapi ga kara ure nose ntani ga litura mo mwetu. Apa twa lirongere kuhamena ewapaiko lyonzambo zaJesus zosizoweseso nokutura epuro mwalyo, yipo twa tamekere kutunga po ukaume naKarunga.

⁶ Apa atu gazara kuhamena omu twa ya diva Jehova, kuvhura kulipura asi: ‘Ame kuna kutura po ezokomeho moukaume wange naKarunga ndi? Ehuguvaro lyange mwaJehova neharo lyange kwendi kuna kunkondopara nkenye ezuva ndi?’ Gumwe ogu ga kere noukaume wounene naKarunga kwa kere Ngidiyona. Ngesi tatu ka konakona sihonena sendi sosiwa nomu natu si kwama.

7-9. (a) Sihorokwa musinke sokutetukisa ga limonenene Ngidiyona, ntani noyitundwamo musinke? (Tara efano pepenuno 21.) (b) Ngapi natu kara vakaume vaKarunga?

⁷ Mupanguli Ngidiyona kwa karerere po Jehova mosiruwo sosidigu konyima zapa va hwililire moSirongo sEtumbwidiro. Vapanguli egaununo 6 kwa tumbura asi muengeli gwaJehova kwa ya dingwire Ngidiyona poOfura. Posiruwo sina, Vamidiyana kwa here kuhomekera Vaisraeli, ano eyi kwa va tjilisire. Eyi yiyo ya ninkisire Ngidiyona a hwage rukokotwa mokahore-hore yipo a ru popere koVamidiyana. Hararasi muengeli ta mu horokere nokumutantera asi “ove ntoni zoupampi.” Nye Ngidiyona kwa kere nesinganyeko nsene Jehova na vhura kuvavatera, ogu ga parwire Vaisraeli koVaegipite. Mokukarera po Musiti, muengeli kwa tumbwidilire Ngidiyona asi Karunga nga mu vatera.

⁸ Ngidiyona kwa lipulire omu na vhura ‘kuzowora Vaisraeli momawoko goVamidiyani.’ Jehova kwa mu pere elimbururo lyokuvyukilira asi: “Ame noge ngani kara, makura ngo toone Vamidiyana ngwendi mugara gumwe tupu ono kutoona.” (Vap. 6:11-16) Nampili ngoso, age simpe ga kere nomasinganyeko, makura yipo ga pulire Karunga a mu pe sidiviso. Koneka asi monzogera ezi Ngidiyona kwa tere Jehova ngoMuntu.

⁹ Yihorokwa eyi ya kweme ko kwa nkondopekere epuro nelikwatakano lyaNgidiyona kumwe naKarunga. Ngidiyona kwa terekere nondya makura ta di twarere muengeli. Apa muengeli ga gumine konondya odo makura di rungwinine komundiro, Ngidiyona yipo ga divire asi age muengeli gwaJehova. Ngidiyona ta tanta noutjirwe asi: “HOMPA Mupangeli! Ame kuna  mono muengeli goge kosipara!” (Vap. 6:17-22) Sihorokwa oso sa tezere po ukaume waNgidiyona naKarunga ndi? Hawe! Ngidiyona kwa ya divire nawa Karunga. Ose kwa yi diva eyi morwa sizambero esi ga tungire Ngidiyona pevango olyo kwa si rukire asi: “HOMPA yige mbili.” (Resa Vapanguli 6:23, 24.) Nsene tu teda ko kweyi Jehova a tu ruganene nkenye ezuva, ngatu yi dimburura asi age Kaume gousili. Kukanderera nkenye apa kwaKarunga kuturetera mbili ntani kunkondopeka ukaume wetu kumwe nendi.

10. Kuliza nEpisarome 15:3, 5, yisinke ga hepa ko Jehova kwetu mokukara vakaume vendi?

¹⁰ Mokuninka asi Jehova a kare Kaume ketu, twa hepa kusikisa mo yihepwa yongandi. Ngomu va yi tjanga mEpisarome 15, Ndafita kwa dimbire kuhamena eyi twa hepa kurugana mokukara monzugo zaJehova, kutanta asi mokukara kaume kaKarunga. (Epis. 15:1) Ngesi tatu ka demenena koyihepwa eyi yivali: kudira kurundira ndi kuswaura vakwetu ntani nokukara vahungiki. Ndafita kwa twikilire ko kuhamena ogu a tambura Jehova ngakaume asi: “Ogu a dili kurundira vakwawo neraka lyendi. . . . Age kapi a tambura yomoufutunkume, kogu ga dira kuzona yuma.”—Epis. 15:3, 5.

11. Morwasinke natu nyokera po mbuuyungiso zokuswaura?

¹¹ MEpisarome limwe, Ndafita kwa rondwere asi: “Walye o uyunga yoyidona.” (Epis. 34:13) Nsene tu dira kulimburukwa kepukururo eli, ngano ngayi teza po ukaume wetu naGuhyetu gemeguru. Yosili, kurundira ndi kuswaura kuna kara sikara saSatana, nkore zonene zaJehova. Nkango “Muzonaguli” kwa tunda konkango zomoRugereka ezi azi tanta asi “muswauli.” Nsene tu nyokera po kuuyunga vakwetu momudona, ngayi tu vatera tu nkondopeke ukaume wetu naJehova. Unene po monkedi omu atu uyunga vanavazinyetu ava ava pitisire mombungakriste.—Resa Vahebeli 13:17; Juda 8.

12, 13. (a) Morwasinke natu hungikira mwanayinye? (b) Ngapi omu ehungiko lyetu ali kundama wopeke?

¹² Vakareli vaJehova kwa va diva asi awo vantu wokuhungika. Mupositoli Paurusa kwa tjenge asi: “Omu tu kandererere, yeeyi ose tuna yi diva nawa-nawa asi, ose kwa kara nezwi lyaKarunga lyewa lyokomutjima, morwa ose kwa hara kuhungika mwanayinye.” (Heb. 13:18) Morwa ose kwa tokomena ‘kuhara kuhungika mwanayinye,’ twa hepa kunyokera po kukumbangera vanavazinyetu. Pasihonena, nsene nyose twa va kuta moyirugana, twa hepa kudivilisa asi kuna kuvatekura nawa ntani nokuvafuta kuliza netumbwidiro lyetu. NgoVakriste, twa hepa kuhungika novarugani vetu ntani nankenye ogu. Ano nsene ose kwa tu kuta Mukriste mukwetu, twa ha ndindira asi a tu tekure monkedi zokulikarera.

¹³ Vantu mouzuni rorunzi kupandadeka Nombangi daJehova morwa kuhungika kwawo. Pasihonena, mugendesi gongesefa zimwe zonene kwa dimbwilire asi Nombangi daJehova kusikisa mo etumbwidiro lyawo. Age kwa tente asi: “One kukwaterera komalizuvhasano geni.” (Epis. 15:4) Nkareso zangoso kutuvatera tu kwaterere koukaume wetu naJehova. Ntani azo kuyererepeka Guhyetu gemeguru geharo.

14, 15. Ngapi natu vatera vantu ava atu gwana mokuzuvhisa va kare vakaume vaJehova?

¹⁴ Nampili ngomu vantu va pura asi Karunga yipo ga kara, sinzi sava atu gwana mokuzuvhisa kapi ava mu tara asi age Kaume kawo gomuwa po. Ngapi omu natu va  vatera? Konakona mapukururo aga ga pere Jesus varongwa vendi 70 apa ga va tumine vavali-vavali asi va ka zuvhise: “Muna kuza monzugo, tanko tomu morora. Nsene si muntu gombili, mbili zeni tazi wiza pwendi. Nsene yimo sa, mbili zeni tazi mu tengwire nyamweni.” (Ruk. 10:5, 6) Ose kuvhura kukokera vantu kousili kupitira monkareso zetu zombili. Nsene tu kara nombili kowo ava tu rwanesa, ayo kuvhura kuvatumangeda ngava purakene ko mbudi zetu sikando nasopeke.

¹⁵ Apa atu gwana vantu ava va kara moukarelikarunga woyimpempa ndi ava ava kwama nompo dawo, ose kutwikira kuvalikida nkareso zombili. Ano ose kutambura navenye komapongo getu ava wa rorora uzuni ntani vana hara kulironga kuhamena Karunga ogu atu karere. Yirongwa yosiparatjangwa “Bibeli kurundurura eparu lyovantu” kutupa yihonena yoyinzi yoyiwa.

16. Monkedi musinke natu kara vakaume ntani “varugani kumwe naKarunga”?

¹⁶ Vantu ava ava rugana kumwe nkenye apa kunkondopeka ukaume wawo. Navenye ava va ligava kwaJehova kwa kara nomfumwa zokuvatumbura asi vakaume ntani “varugani kumwe naKarunga.” (Resa 1 Vakolinte 3:9.) Ngomu tuna kulihameka mokuzuvhisa nomosirugana sokuninka varongwa, yimo hena ngatu gwana ediwo lyenene lyokudiva yikara yaGuhyetu gemeguru. Ose kumona omu mpepo zokupongoka azi tu vatere tu sikise mo sirugana setu sokuzuvhisa mbudi zongwa.

17. Ngapi omu yigongi yoyinene neyi yoyinunu ayi likida asi Jehova Kaume ketu?

¹⁷ Ngomu tuna kulihameka mo unene mosirugana sokuninka varongwa, yimo ngatu nkondopeka malizuvho getu kwaJehova. Pasihonena, ose kuna kumona omu Jehova ana kukandana po varwanesi mokudira kuhagekesa po sirugana sokuzuvhisa. Age kutuvyukisa, ntani ayo kututetukisa monkedi omu ana kutwikira kuturonga kupitira momapongo nomoyimbapiratjangwa. Koyigongi yetu yoyinene neyi yoyinunu, ose kuyidimburura asi Jehova kukwata egano maudigu noyihepwa yetu. Konyima tupu zosigongi setu simwe, epata limwe kwa tjenge asi: “Yiuyungwa kwa gumine nomutjima detu. Ose kwa lizuvhire asi Jehova ga tu hara unene ntani ana hara yi tu tompoke.” Konyima zokukara posigongi sokulikarera moIliranda, valikwali womoNdovesiranda kwa pwagesere rupandu rwawo monkedi omu va va tambwire nokuvapakera mbili. Awo kwa tente asi: “Ose kuna kupandura unene Jehova naJesus Kristusa. Awo kwa tu horowora tu kare ruha romuhoko ogu gwa kara mouumwe. Ose kapi tuna kuuyunga tupu kuhamena uumwe nye kuna kuuhafera nkenye ezuva. Eyi twa ka limonenene kosigongi  sokulikarera moDublin kutudiworokesa nkenye apa kuhamena situmbukira sosiwa esi twa kara naso sokukarera Karunga gwetu gomunene.”

18. Yisinke natu lipura nyamwetu kuhamena euyungokumwe lyetu naJehova?

¹⁸ Euyungokumwe lyewa kunkondopeka ukaume. Naina, vantu nkenye apa kulitumina nombudi kupitira koInterneta nokoselefoni ndi kulitoonena nongodi ngonkedi zokuuyunga kumwe. Mokuyihetakanesa, ngapi omu atu tara euyungokumwe naKaume ketu gomuwa po, Jehova? Yosili, age ‘Muzuvhi gomakanderero.’ (Epis. 65:2) Nye ose kulitulira po siruwo mokuuyunga kumwe naKarunga ndi?

19. Nsene kutudigopera kupwagesa malizuvho getu, evatero musinke atu gwana kwaGuhyetu gemeguru?

¹⁹ Vakareli vamwe vaKarunga kuvadigopera kupwagesa malizuvho gawo gokonhiinhi. Eyi yiyo Jehova ana tu harere tu rugane nkenye apa natu kanderera. (Epis. 119:145; Malira. 3:41) Nampili ngomu atu lizuvhu asi udigu kupwagesa malizuvho getu, twa kara nevatero. Paurusa kwa tjangerere Vakriste womoRoma asi: “Yeeyi kapi twa diva eyi twa fira kukanderera, nye Mpepo ko mwazene yizo azi tu kanderere mo oku tazi keme ya hana kuvhura kutanta. Nye Karunga ogu a kona-kona nomutjima dovantu, kwa diva eyi azi gazara Mpepo. Yeeyi Mpepo kukandererera mo vapongoki, moomu ga yi harera Karunga.” (Rom. 8:26, 27) Nsene tu resa nobuke domoBibeli ngwendi Joba noMapisarome ntani Yisewe, ose kuvhura tu gwane magano gomawa omu natu pwagesa malizuvho getu kwaJehova.

20, 21. Ehengagwido musinke atu gwana mononkango daPaurusa domoVafilipi 4:6, 7?

²⁰ Apa natu ligwanekera nomaudigu, tu diworokeni nonkango daPaurusa edi ga tjangerere Vafilipi asi: “Walye omu kara nosinka soyuma. Nye momakanderero geni omu hundire nkenye eyi muna hepa kwaKarunga. Omu yi hundire nkenye apa nonomutjima dompandu.” Apa atu kanderere kwaKaume gwetu gomuwa po monkedi zangesi, ose kulizuvha ehengagwido lyosili. Paurusa kwa gwedere ko asi: “Ano mbili zaKarunga, ezi za pitakana unene nondunge nadinye, ngazi kungira nomwenyo deni nomagazaro geni mwaJesus Kristusa.” (Fil. 4:6, 7) Yipo nye, tu likideni rupandu ‘kombili zaKarunga’ ezi azi kungu nomwenyo nomagazaro getu.

²¹ Ekanderero kutuvatera tu tulise po ukaume naJehova. Yipo nye, atu ‘kanderereni narunye.’ (1 Tes. 5:17) Ngano sirongwa esi si tu vatere tu twikire kunkondopeka ukaume wetu naKarunga nokutokomena kurugana mpango zendi. Tu litulireni po siruwo sokuteda ko komatungiko aga tuna kuhafera morwa Jehova Guhyetu, naKarunga gwetu naKaume gwetu.