UPUNGWIRO WOYININKE YANARE
Epuro lyokulikarera monomvhura 100
“Munazinyetu Russell kumoneka nawa mefano kupitakana omu a moneka!”—Yimo ga uyungire gumwe gwava va tarerere “Photo-Drama” momvhura 1914.
MVHURA ezi kuna kara zefere limwe kutunda apa va taresere sidanauka sosiparatjangwa “Photo-Drama of Creation,” elikido eli lyomukumo kwa liwapaikilire mokutunga epuro moBibeli ngoNonkango daKarunga. Monomvhura dina apa epataneso Bibeli nokupura merongo lyelisinto ya kundamene vantu wovanzi, sidanauka “Photo-Drama” kwa nkondopekere asi Jehova yige Musiti.
Charles T. Russell, ogu ga pitisilire Valirongi woBibeli, nga papara nonkedi donongwa po mokuhanesa usili woBibeli pangenderera. Nampili ngomu Valirongi woBibeli ngava nduruka yimbapiratjangwa ure wonomvhura nomurongo ntatu, awo va ya gwene ko nkedi zompe zokuruganesa mafano va kwateka nomazwi.
KUHANESA MBUDI KUPITIRA MOMAFANO VA KWATEKA NOMAZWI
Koyiha yomvhura 1890, awo kwa totere po sidanauka somafano sokudira mazwi pokusilikida kovantu. Ano koyiha 1903 sidauka esi kwa si likidire mongereka zimwe mositata saNew York. Apa munazinyetu Russell ga pwagesere sidauka “Photo-Drama” nokusilikida, azo ngesefa zokulikida yidanauka yomafano ntani tupu zina kutameka 1912. Age ga dimbwilire asi azo kwa kere nkedi zongwa zokuhanesa usili woBibeli nakunye kupitakana kuruganesa tupu yimbapiratjangwa.
Sidauka “Photo-Drama” esi ngava likida novili ntantatu kwa si hangwire momaruha gane, omu mwa hamenene yiuyungwa yoBibeli 96 va kwateka eyi va geve vagavi yiuyungwa wovawa. Mafano ngava ga likida kumwe nomusika. Vanavazinyetugara ngava likida mafano aga va kwateka nomazwi monongarafona ntani noyihorokwa yanare yomoBibeli.
“Mosidanauka kwa hamenene mo mafano kutamekera kesito dogoro mEpangero lyaJesus lyoNomumvho Eyovi.”—F. Stuart Barnes, ogu ga kere nonomvhura 14 momvhura 1914
Sinzi somafano ngava ga ruganene monositudiyo edi ngava futire. Vafaneki mafano modoropa zaPhiladelphia nezi zaNew York nezi zaParis ntani zaLondon ngava faneke poyiperende. Vanavazinyetu womoBeteli ava ngava rugana monzugo zokufanaika nawo kwa fanekere mafano gomanzi. Mokugwederera ko komafano aga ngava randa, vanavazinyetu womoBeteli kwa kava fanekerere moYonkers pepi nositata saNew York, awo kwa dene ruha rwaAbirahamu noru rwaIsaka ntani romuengeli ogu ga kandanene Abirahamu mokuzamba munwendi.—Gen. 22:9-12.
Ava va dewire kwa ruganesere elikido olyo lya kere nomakwateko 26 ntani nomafano 500
Mukwawo zaRussell kwa tanterere vanambudi asi nkedi ezi “ngazi pindura eharo lyovantu wovanzi moMatjangwa kupitakana nayinye eyi ga rugana maukarelikarunga.” Vampitisili womaukareli va haferere nkedi ezi zompe zokuhanesa usili kovantu wovanzi ndi? Hawe, vampitisili owo kwa rwanesere sidanauka “Photo-Drama,” vamwe kwa ruganesere yimpempa mokukondera vantu va dire kusitarera. Kevango limwe, vampitisili kwa dimisire rutjeno mokuhagekesa po elikido olyo lyosidanauka.
Vanavazinyetu ava ngava tambura vantu komapongo kwa gaverere yifo eyi ya kere nomafano gosidanauka “Photo-Drama”
Owo va ya tarerere sidanauka kwava havarekere “Nombandi” da kere nefano lyaJesus ngomumati. Nombandi kwa diworokesere ava va di dwere asi awo “vanambili”
Nampili ngoso, vantu wovanzi ngava zura monosala dokulikidira yidanauka omu ngava tarere elikido olyo mawoko-woko. MoAmerika, moyitata yokusika 80 nkenye ezuva ngava likida mo “Photo-Drama.” Sinzi sava va tarerere sidanauka kwa kere sikando sawo sokuhova kumona ‘mafano gokuuyunga.’ Ntani mosidanauka va likidire mo hena sinhunhwagona omu sina kupwaga meuta nomu sina kukura ntani nomu azi kuru mbya. Pokutarera eyi kwa nkondopekere unongo waJehova wokutetukisa. Ngomu vana yi tumbura petameko, pokumona munazinyetu Russell kuna kugava etwaromo lyelikido ‘lyoPhoto-Drama,’ gumwe gowo va tarerere sidanauka oso kwa uyungire kuhamena muuyungi asi “munazinyetu Russell kumoneka nawa mefano kupitakana omu a moneka!”
EZOKOMEHO LYERONGO LYOBIBELI
Sidanauka “Photo-Drama” kwa si likidire 11 Murongagona 1914 mosala zokulikidira yidanauka mositata saNew York, ezi va ya gusire konyima Valirongi woBibeli
Mutjangi ntani mudivi ehistoli lyoyidanauka Tim Dirks, kwa fatwilire asi “Photo-Drama” kwa kere “sidanauka sokuhova esi sa likidire mafano gomanene aga va kwateka nomazwi.” Yidanauka eyi va rugene mokutemwinina “Photo-Drama” kwa ruganesere ngendeseso zokulifana nye kapi ya kere elikido limwe tupu, unene po esi sa kere nosiparatjangwa soBibeli. Ayo kapi ngava yi tarere vantu wovanzi ngwendi moomu mamiliyona ntane ngaga tarere Photo-Drama moAmerika moEuropa moAustraliya ntani moNew Zealand momvhura zimwe!
Sidanauka “Photo-Drama” kwa si likidire 11 Murongagona 1914 mositata saNew York. Ano konyima zomakwedi ntambali yipo ya horokere Yita yoPomuhowo yoUzuni. Nye mouzuni mudima vantu kwa pongere va tarere “Photo-Drama,” eyi kwa va hengagwidire pokumona matungiko aga ngau reta Uhompa. Yosili, momvhura 1914 sidanauka “Photo-Drama” kwa kere elikido lyokutetukisa.
Malikido norombali gosidanauko oso kwa ga likidire koMuzogo nagunye gwaAmerika
Kuvhura o hafere hena
RUHUNGU (SIFO SELIRONGO)
Omu mbuto zoUhompa va zi hanesere moPortugal
Maudigu musinke va ligwanekerere nago vazuvhisi wokuhova moPortugal?
RUHUNGU (SIFO SELIRONGO)
Yiuyungwa yanavenye kwa hanesere mbudi zongwa moIliranda
Yisinke ya ninkisire munazinyetu Russell a dimburure asi mapya gana fire etezo?
RUHUNGU (SIFO SELIRONGO)
“Siruwoke ngatu kara hena nosigongi?”
Yisinke ya ninkisire sigongi esi si kare nomulyo?
RUHUNGU (SIFO SELIRONGO)
“Eharo noupampi wetu kwa ligwederere”
Konyima zosigongi momvhura 1922, ngapi omu Valirongi woBibeli va tulire pasirugana ekorangedo “diviseni Hompa noUhompa wendi”?
RUHUNGU (SIFO SELIRONGO)
“Kwato nzira zondigu ndi zonde unene”
Konyima zomvhura 1920 ntani 1930, vazuvhisi wokukarerera woupampi kwa litulire mo unene kutwara mbudi zongwa zoUhompa waKarunga konomukunda dokoure moAustralia.
MARAPOTO
