1, 2. (a) Ekwareko lyalye ngali reta ruhafo rorunene meguru? (b) Mapuro musinke natu ka zogera?

AYO kugusa siruwo mokurongikida ekwareko. Nye ngesi tatu ka demenena kekwareko lyokulikarera lyosiuhompa eli va wapaika konyara nomvhura 2 000 dina ka pita. Ntaantani mukwali a ka lipakerere nomufuko gwendi. Musika goruhafo ngagu hagara mombara zaHompa kumwe nombunga zonene zina kudimba asi: “Hamberereni Hompa! Yeeyi Hompa Karunga gwetu Munankondo nadinye ana kara nye mupangeli. Tu hafeni ose tu pembure, tu mu fumadekeni, yeeyi ekwareko lyoNzwigona lina siki mo, ano mufuko gwazo ana mana kuliwapaika.”—Ehor. 19:6, 7.

² “Nzwigona” ezi ga uyunga matjangwa kuna kara Jesus Kristusa. (Joh. 1:29) Ekwareko lyazo ngali reta ruhafo rorunene meguru. Ngapi vana zi dwarekere nonkwara? Yilye mufuko gwazo? Ngapi mufuko va mu wapaikira nonkwara? Siruwoke ngava likwara? Ava va kara nehuguvaro lyokukaparukira narunye pevhu nawo ngava hafera nonkwara edi ngadi kara meguru ndi? Mokugwana malimbururo komapuro aga, tu konakoneni hena Episarome 45.

3, 4. (a) Yisinke ga uyunga muepisarome kuhamena yikoverero yoMukwali yekwareko, ntani yisinke ya gwederera koruhafo rwendi? (b) Wolye ‘vana wohompa,’ ntani ‘mumbanda’ ogu a ligawinine ruhafo noMukwali?

³ Resa Episarome 45:8, 9. Mukwali, Jesus Kristusa, ta dwara yikoverero yendi yekwareko lyosiuhompa. Yikoverero yendi kwa kara nomurora gedumba lyewa gokuvhonga nomira nokasiya, ogu ngava rugana magadi gokupongoka gokugwavekesa aga ngava ruganesa moIsraeli.—Ex. 30:23-25.

⁴ Musika gomuwa gomombara zomukwali kugwederera koruhafo rwendi ngomu siruwo sina kuhedera pepi. Ruhafo rwendi kuruligawinina ‘nomumbanda,’ kutanta asi ruha rwemeguru rombunga zaJehova, omu mwa hamena ‘vana wohompa,’ vaengeli wokupongoka. Ee, ruhafo musi mokuzuvha mazwi meguru gana kutanta asi: “Tu hafeni ose tu pembure, . . . yeeyi ekwareko lyoNzwigona lina siki mo!”

5. Yilye “mukadaNzwigona”?

⁵ Resa Episarome 45:10, 11. Ngesi tuna dimburura mukwali, ano yilye mufuko? Age kuna kara mbunga zovagwavekwa, ano mutwe gombunga ozo Jesus Kristusa. (Resa Vaefeso 5:23, 24.) Awo ngava ka pangera naKristusa meguru moUhompa wendi woUmesiyasa. (Ruk. 12:32) Vakriste owo wovagwavekwa 144 000 “awo kukwama Nzwigona nkenye oku zina vyuka.” (Ehor. 14:1-4) Awo ngava kara “mukadaNzwigona,” nokukakara nendi membo lyendi lyemeguru.—Ehor. 21:9; Joh. 14:2, 3.

6. Morwasinke vagwavekwa ava va tumbwire asi “munwahompa gomukadi,” ntani morwasinke nava ‘divarera makoro gawo’?

⁶ Mufuko kapi ava mu tumbura tupu asi “munwa” nye hena “munwahompa gomukadi.” (Epis. 45:13) Yilye ogo ‘hompa’? Jehova, ano vagwavekwa kuna kara ava ga tambura ‘ngovana’ vendi. (Rom. 8:15-17) Mokumona asi vagwavekwa ngava ka kara mufuko meguru, awo kwa va pangera asi “divareni makoro geni nomambo geni.” Awo kudemenena ‘mokugazara yemeguru, nye kapisi yepevhu.’—Koros. 3:1-4.

7. (a) Ngapi Kristusa ga wapaika mufuko gwendi gokomeho? (b) Ngapi mufuko a tara Mukwali gwendi gokomeho?

⁷ Monomvhura dononzi, Kristusa kwa wapaikira mufuko gwendi ekwareko lyemeguru. Mupositoli Paurusa kwa tjenge asi Kristusa kwa hara mbungakriste, ‘yiyo ga lizumbilira mwarwazo monomfa. Eyi kwa yi rugene, a zereke oku ta pongwere Karunga mbungakriste nomema gekuho nononkango, a zi lisikamekesere, azo zina zere, za hana sivadi ndi egonye ndi nkenye eyi yangoso, nye zi pongoke zi pire usima.’ (Efe. 5:25-27) Paurusa kwa tanterere Vakriste wovagwavekwa womoKolinte asi: “Ame tani mu rwire esupa ngwendi Karunga mwene, yeeyi ame kwa mu vandekerera mugara gumwe, Kristusa, ngani mu rete kweni ngomukadona gomukuhuki.” (2 Kol. 11:2) Morwa ukareli wendi wa zera kosipara saKarunga, Hompa Jesus Kristusa kutara mufuko gwendi asi muwa unene. Mufuko kutongamena mugara gwendi gokomeho nokumutambura asi “hompa” gwendi.

8. Morwasinke mufuko va mu fatwilira asi muwa unene?

⁸ Resa Episarome 45:13, 14a. Mufuko  kuna mu ‘dwarekere nawa mugara gwendi’ nokumuwapaikira ekwareko lyosiuhompa. MEhororo 21:2, mufuko kwa mu fanekesa kositata, Jerusarema zompe. Sitata esi semeguru kwa kara “nouyerere waKarunga,” ntani epaimo lyaso “ngwendi lyemanya lyondiro lya pitakana nagenye, ngwendi lyajasipisi, eli ali paima ngwendi ekende lyokilisitare.” (Ehor. 21:10, 11) Uwa wemoneko lyaJerusarema zompe kwa u faturura mobuke zEhororo. (Ehor. 21:18-21) Ee, mufuko musi kouwa! Eyi yiyo natu ndindira kekwareko lyosiuhompa lyemeguru.

9. Yilye “hompa” ogu vana kutwarera mufuko, ntani ngapi mufuko vana mu wapaike?

⁹ Mufuko tava mu twara komukwali gwendi, Hompa goUmesiyasa. Age kwa mu wapaika ‘nokumuzereka nomema gekuho nononkango.’ Age ‘kwa pongoka ga hana usima.’ (Efe. 5:26, 27) Mufuko gwendi ga hepa kudwara nawa a wapere silika oso. Ano ga dwara! Yosili, “age moyikoverero yourenga wongorodo,” makura ‘tava mu reta kwahompa.’ Mokulikwara nonzwigona, “age kwa mu pulisira a dware yikoverero yoyizera yokupaima, yeeyi yikoverero yoyizera yoyiwa, yiyo yirugana youhungami yovapongoki.”—Ehor. 19:8.

10. Siruwoke ngali kara ekwareko lyoNzwigona?

¹⁰ Resa Ehororo 19:7. Siruwoke ngali kara ekwareko lyoNzwigona? Ehororo kwa tanta asi ‘mufuko vana mana kumuwapaikira’ nonkwara, ano konyima zoyo novelise kapi da singonona omu ngali kara ekwareko. Nye kwa singonona ruha rokuhulilira roudigu wounene. (Ehor. 19:11-21) Eyi kutanta asi ekwareko ngali horoka komeho zapa nga fundilira Hompa ndi? Hawe. Yihorokwa va tumbura mEhororo kapi va yi tjanga yi likwame ngomu ngayi horoka. MEpisarome 45, ekwareko lyosiuhompa ngali kara konyima zapa Hompa Jesus Kristusa nga dwara rufuro rwendi ‘nokukafunda’ nonkore dendi.—Epis. 45:3, 4.

11. Ngapi ngayi likwama yihorokwa yefundo lyaKristusa?

¹¹ Ose tuna lirongo moBibeli asi yihorokwa oyo ngayi horoka ngesi: Sokuhova, ‘hondedi zonene,’ Babironi zonene, maukarelikarunga nagenye goyimpempa ngava ga hanagura po. (Ehor. 17:1, 5, 16, 17; 19:1, 2) Sauvali, Kristusa nga zonagura po uzuni naunye waSatana poHarumagedoni, “yita mezuva olyo lyenene lyaKarunga Munankondo.” (Ehor. 16:14-16; 19:19-21) Sokuhulilira, Hompa gependa nga fundilira pokumanga Satana novaengeli vendi yipo ngava dire kupukisa vantu.—Ehor. 20:1-3.

12, 13. (a) Siruwoke ngali kara ekwareko lyoNzwigona? (b) Wolye ngava ka hafera ekwareko lyoNzwigona meguru?

¹² Momazuva aga gopouhura, vagwavekwa ava ava limburukwa dogoro konomfa kuvavhumbwira keparu lyemeguru. Konyima zapa ngava zonagura po Babironi zonene, nye komeho zoyita yaHarumagedoni, Kristusa nga mana kupongaika wombunga zomufuko ava va hupa po va ze meguru. (1 Tes. 4:16, 17) Ano konyima zoyo, ntani nye ngali kara ekwareko lyoNzwigona. Aso ngasi kara sipito soruhafo sili! Ehororo 19:9 kwa tanta asi: “Vanerago vaava va zigida kosipito sekwareko lyoNzwigona.” Yosili, wombunga zomufuko ngava hafa unene. Ntani Hompa nga hafa unene mokukara nava wombunga zomufuko oku ‘tava li nokunwa’ kumwe pasifanekeso ‘kosiliro moUntungi wendi.’ (Ruk. 22:18, 28-30) Nampili ngoso, mufuko noMukwali kapisi yiwo velike ngava ka hafa.

 ¹³ Ngamoomu tuna yi zogere nare, mazwi gombunga zonene ngaga dimba asi: “Tu hafeni ose tu pembure, tu mu fumadekeni [Karunga], yeeyi ekwareko lyoNzwigona lina siki mo, ano mufuko gwazo ana mana kuliwapaika.” (Ehor. 19:6, 7) Ngapi kuhamena vakareli vaJehova vepevhu? Nawo ngava ka lipakerera mosipito esi ndi?

14. Ngomu vana yi tumbura mEpisarome 45, wolye ‘vakasumbi’ womufuko?

¹⁴ Resa Episarome 45:12, 14b, 15. Muporofete Sakaliya kwa pumbire asi momazuva gopouhura, vantu mouzuni mudima ngava lipakerera kumwe noyihupwa yovagwavekwa mokukarera Jehova. Age kwa tjenge asi: “Momazuva ogo, vanayirongo murongo ngava wiza koMujuda gumwe va mu tantere asi: ‘Ose kuna hara tu kare mositambo soge, yeeyi ose kwa zuvha asi Karunga, neni ga kara.’” (Sak. 8:23) MEpisarome 45:12, “vanayirongo murongo” kwa fanekesa “Vatirusi” ntani “vanangawo.” Awo kuretera mauhwi yihupwa yovagwavekwa ‘nokuyalipakerera kumwe nawo’ va karere Jehova. Kutundilira 1935, mamiliyona govantu kwa pulisira yihupwa yovagwavekwa ‘mokuvaronga va rugane youhunga.’ (Ndan. 12:3) “Vanayirongo murongo” owo, awo vakaume wokulimburukwa wovagwavekwa ava ava zeresa eparu lyawo komaukarelikarunga goyimpempa. ‘Vakasumbi’ owo womufuko kwa ligava vene kwaJehova nokulikida asi awo vakareli wovalimburukwi vaHompa, Jesus Kristusa.

15. Ngapi ‘vakasumbi’ ava ruganene kumwe nombunga zomufuko?

 ¹⁵ Yihupwa yovagwavekwa kuhafa mokulipakerera ‘novakasumbi’ owo, morwa upampi wawo wokudivisa ‘mbudi zongwa zoUntungi waKarunga’ mwa za uzuni mudima. (Mat. 24:14) Kapisi ‘Mpepo nomufuko velike tupu vana kutanta asi: ‘Wiza!’ nye nkenye ogu ana kuzuvha eyi, nage a tante asi: ‘Wiza!’’ (Ehor. 22:17) Eyi kutanta asi ‘nonzwi dapeke’ edi dina kuzuvha vagwavekwa kuna kutanta asi: ‘Wiza!’ nado kuna kulipakerera nawo pokutanta asi: ‘Wiza!’ kovantu navenye mouzuni mudima.—Joh. 10:16.

16. Mfumwa musinke Jehova ga gava kononzwi dapeke?

¹⁶ Yihupwa yovagwavekwa kwa hara nonzwi dapeke ntani vana hafa mokudiva asi Guhya mukwali, Jehova, ga gava mfumwa kononzwi dapeke zokuhafera ekwareko lyoNzwigona. Ayo kwa yi pumba asi ‘vakasumbi’ owo ngava ‘wiza nehafo nelilikido.’ Yosili, nonzwi dapeke, edi da kara nehuguvaro lyokukaparukira pevhu narunye, ngava hafa kumwe uzuni mudima apa ngali kara ekwareko lyoNzwigona meguru. Buke zEhororo kusingonona “emukurumbunga,” asi kuna ‘sikama komeho zosipundi souhompa nokomeho zoNzwigona.’ Awo kukarera Jehova meharango lyontembeli zonene zopampepo apa pevhu.—Ehor. 7:9, 15.

17, 18. Ngapi ekwareko lyoNzwigona ngali reta uwa, ntani kwalye Kristusa nga kara guhya mepangero lyendi lyoNomumvho eyovi?

¹⁷ Resa Episarome 45:16. ‘Vakasumbi’ womufuko gwaKristusa ngava hafa hena pokumona ekwareko kuna kureta mauwa mouzuni woupe. Hompa Jesus Kristusa nga ka vhumbura ‘vazinyakurwa,’ ava ngava ka kara ‘vana’ vendi apa pevhu. (Joh. 5:25-29; Heb. 11:35) Movana owo nga ka horowora mo vamwe va ka kare ‘vapangeli wouzuni mudima.’ Yosili, Kristusa nga ka horowora vamwe mokatji kovakuronambunga vanaina wovalimburukwi va ka kare vapitisili mouzuni woupe.—Jes. 32:1.

¹⁸ Mepangero lyendi lyoNomumvho eyovi, Kristusa nga ka kara guhya kononzwi dapeke. Monkedi musinke? Ava ava likida epuro monzambo zaJesus zosisoweseso ngava ka gwana mwenyo gwanarunye apa pevhu. (Joh. 3:16) Makura nga ka kara “Guhya Gwanarunye.”—Jes. 9:6, 7.

19, 20. Ngapi omu yihorokwa yokutetukisa va tumbura mEpisarome 45 ayi kundama Vakriste wousili naina?

¹⁹ Resa Episarome 45:1, 17. Vakriste navenye va hepa kulitura mo mokudiva yihorokwa va tjanga mEpisarome 45. Vagwavekwa ava simpe vana kara pevhu awo kuhafa mokudiva asi ntaantani ngava ka lipakerere novanavazina meguru kumwe noMukwali. Nonzwi dapeke kuna kudikorangeda mokutwikira kulimburukwa kwaHompa gefumano ntani vana hafa mokukara vakasumbi wombunga zomufuko ezi zina hupu po apa pevhu. Konyima zekwareko, Kristusa nomufuko gwendi ngava poomwena matungiko kovantu ava ngava ka paruka pevhu.—Ehor. 7:17; 21:1-4.

²⁰ Ngomu tuna kundindira nononkondo esikiliromo lyomauporofete kuhamena Hompa goUmesiyasa, yosili ose ngayi tu tumangeda mokugava efumano kedina lyendi. Ngano tu kare mokatji kowo ‘ngava fumadeka Hompa yiruwo nayinye.’