Maukaro gokuguvisa kuvhura kutukundama momudona. Ago kuvhura kurorora magazaro getu nokumana nonkondo detu nokukundama mutaro gwetu keparu. Hompa Ndafita goVaisraeli vanare, kwa ligwanekere nomaudigu gomanzi. Ngapi omu ga ga tere? Mepisarome, Ndafita ta limburura asi: “Ame kuna kukuga ekwafo kwaHOMPA; ame kuna kumulikwambera. Ame tani mu pe masivano gange nagenye; tani mu tantere udigu wange naunye. Nsene tagu hara kupwa mo, nzira zange ga zi diva.” Yosili, Ndafita kwa kandererere kwaKarunga mokuhundira evatero.—Epis. 142:1-3.

Mepisarome lyapeke, Ndafita kwa dimbire asi: “Ame kwa hundira kwaHOMPA sininke simwe; oso sininke simwe oso, yiso sooso nina hara po: sokukara monzugo zaHOMPA moukaro wange naunye, ni tetuke uwa wendi, ame ni hundilire mo egendeso lyendi.” (Epis. 27:4) Ndafita kapi ga kere Murevhi, nye gazara omu ana sikama ponze zeharango lyokupongoka pepi nevango lyoukareli wousili. Mutjima gwaNdafita guna zura ruhafo morwa kuhara kukara monzugo zaKarunga moukaro wendi naunye ntani ‘nokutetuka uwa’ waJehova.

Nkango “uwa” kwa likwatakana noukaro “womagazaro gomawa ndi malizuvho goruhafo.” Ndafita nkenye apa nga likida rupandu kegendeso lyoukareli waKarunga. Kuvhura tu lipure asi: ‘Ame kulizuvha moomu ga lizuvhire Ndafita ndi?’

Momazuva getu, egendeso lyaJehova kapi lya korera ketungo lyontembeli. Nye, kwa kwatera mo ntembeli zopampepo zaKarunga, egendeso lyokupongoka lyoukareli wousili. * Nsene tu likida rupandu kegendeso eli, nose kuvhura ‘kutetuka uwa’ waJehova.

Konakona sizambero songoporo sokuswakererera nonzambo esi va tulire komeho zoNkongoronzugo. (Ex. 38:1, 2; 40:6) Sizambero oso kwa fanekesere eharo lyaKarunga lyokutambura nzambo zaJesus. (Heb. 10:5-10) Gazara eyi ayi tanta eyi koge! Mupositoli Paurusa kwa tjenge asi: “Ose kwa kere nonkore daKarunga. Nye nampili ngomu ya kere ngesi, Karunga kwa tu gwanekedesesa kumwe nendi konomfa daMuzowoli.” (Rom. 5:10) Pokulikida epuro mohonde zaJesus ezi va ya tjisangere, ose kuvhura tu hafere uwa wokukara vakaume vaKarunga wokuhuguvara. Ngoyitundwamo, ose ngatu ‘likwata ukwawo’ naJehova.—Epis. 25:14.

Morwa ‘nonzo detu kudidongonona po,’ Jehova ‘kutupeperesa.’ (Yirug. 3:19, 20) Ukaro wetu kuna lifana nou womunadorogo ogu ana kulivera koyirugana yendi yanare nokutura po marunduruko gomanene ngomu ana kundindira mpanguro zendi. Pokudimburura eyi, mupanguli kumutumangeda a dongwenene po munadorongo ogo, pokudira kumupangwira konomfa. Ee, rufuwo musi na lizuvha munadorongo ogo! Ngwendi mupanguli, Jehova kulikida eharo kovantu ava ava litezurura, pokudira kuvapangwira konomfa.

Yimwe eyi ga haferere Ndafita moukareli wousili konzugo zaJehova kwa kere kuponga kumwe noVaisraeli vakwawo, kuresa veta nokuzifaturura, nedumba lyewa lyononzambo deswakerero ntani yirugana yokupongoka yovapristeli noVarevhi.  (Ex. 30:34-38; Num. 3:5-8; Deut. 31:9-12) Nkedi omu Vaisraeli ngava karere Jehova ya lifana nomomazuva getu.

Ngwendi pwanare, momazuva getu “ya wapa ayo ya tovara yokukara vantu vaKarunga kumwe ngwendi vantu namumbyendi!” (Epis. 133:1) ‘Vapuli vakwetetu’ kwa ligwederera mouzuni mudima. (1 Pet. 2:17) Nonkango daKarunga kudiresa nokudifaturura komapongo getu. Kupitira mombunga zendi, Jehova kugava nondya dopampepo. Pwa kara hena nondya dopampepo dononzi atu gwana kupitira moyimbapiratjangwa eyi natu ruganesa melirongo lyanyamwetu neli lyepata. Gumwe gomoMbungagedesi kwa tanta asi: “Kuteda ko koNonkango daJehova nokugazadara ko eyi adi tanta nokudikwata egano ya vatera nge ni vangarare pampepo nokukara noruhafo.” Yosili, ‘ediwo kutupa ruhafo.’—Yis. 2:10.

Naina, vakareli vaJehova kukanderera kwendi nkenye ezuva. Makanderero gangoso, Jehova kugatara ngwendi nzambo zedumba lyewa. (Epis. 141:2) Ee, omu tupu ayi hafesa mokudiva asi Jehova Karunga kutambura makanderero getu apa atu kanderere kwendi nelinunupiko!

Mosesa kwa kanderere asi: “HOMPA, Karunga gwetu, maswero goge ngano taga kara nose, ga tu pe erago mwanayinye eyi tuna kurugana!” (Epis. 90:17) Ngomu tuna kusikisa mo sirugana setu sokuzuvhisa, Jehova kusitungika. (Yis. 10:22) Ose nampo twa vatera ko vamwe va lironge usili. Nampo twa lididimikira mokuzuvhisa nomvhura dononzi nampili ngomu vantu ava dili kutupurakena ndi mauvera ndi kukora kopamalizuvho ndi makwamakwamo. (1 Tes. 2:2) Nampili ngoso, ose twa mona “uwa” waJehova nokunongonona asi guhyetu gemeguru kuhafera elituromo lyetu.

Ndafita kwa dimbire asi: “HOMPA yige kupa nge ruha rwange rwemepya noru ronkinda zange; . . . kwa tawira nge kevega lyewa, ee, uwa-gona! Hawe, upingwa wange uwa madu.” (Epis. 16:5, 6) Ndafita kwa haferere “ruha” rwendi, kutanta asi elikwatakano lyendi lyewa naJehova nomfumwa zokumukarera. Ngwendi Ndafita, nose kuvhura tu hepe komaudigu, nye twa kara nomatungiko gomanzi gopampepo. Yipo nye, tu twikireni kuhafera ukareli wousili ntani nokulikida nkenye apa rupandu ‘kegendeso’ lyaJehova ndi kontembeli zendi zopampepo.