1. Maukaro musinke gokuguvisa ava ligwanekere nago vantu?

ASO kapi sa kere sitambo saJehova kovantu va hepe koukurupe. Sitambo sendi kwa kere asi vantu va hafere ukanguki wouwa moParadisa. Nye ngesi “unsitwe mudima kukema.” (Rom. 8:22) Omu ono kugazara, ngapi omu a lizuvhu Karunga apa a mono yitundwamo yononzo kovantu? Vakurupe wovanzi kuvasigilira momazuva gawo goukurupe siruwo esi ava hepa ekwafo lyenene.—Epis. 39:5; 2 Tim. 3:3.

2. Morwasinke Vakriste ava litulire mo moukalinawa wovakurupe?

² Vantu vaJehova va kara noruhafo morwa va kara novakurupe monombungakriste dawo. Ose kugwanena mo uwa mounongo wawo nomosihonena sawo sepuro. Vakurupe vamwe kuna kara makoro getu. Nye, nampili yi kare asi vakurupe owo kapisi makoro getu, ose kulitura mo unene moukalinawa wawo. (Gar. 6:10; 1 Pet. 1:22) Natuvenye ngatu gwanena mo uwa nsene tu konakona omu Jehova a tara vakurupe. Tatu ka konakona hena situmbukira sava vemepata nomombungakriste kuhamena vakurupe vetu.

3, 4. (a) Elikwambero musinke lyokulikarera ga hundilire mutjangi gEpisarome 71 kwaJehova? (b) Yisinke vakurupe womombungakriste nava hundira Karunga?

³ Mutjangi gEpisarome 71:9 kwa likwamberere Karunga asi:  “Wa ha nyengera nge ukurupe wange; wa ha zumbira nge asi morwa nonkondo dina pili nge!” Ndafita yige ga tjenge nonkango odo. Age kwa karerere Karunga kutundilira kounona wendi dogoro konomvhura dendi doukurupe, ntani Jehova kwa mu ruganesere moyininke yoyinene. (1 Sam. 17:33-37, 50; 1 Vah. 2:1-3, 10) Nampili ngoso, Ndafita ga lizuvhire hepero zokuhundira Jehova a twikire kumulikida eharo.—Resa Episarome 71:17, 18.

⁴ Wovanzi naina kwa fana gwendi Ndafita. Nampili ngomu vana kurupa unene ntani vana kara ‘momazuva gomadona,’ awo kutwikira kukarera Karunga moomu ava vhulire. (Muud. 12:1-7) Sinzi sawo kapi tava vhuru kurugana eyi ngava sikisa mo moudinkantu wawo, kukwatera mo yirugana yokuzuvhisa. Nye nawo kuvhura kulikwambera Jehova mokutwikira kuvahafera nokuvapakera mbili. Vakurupe wovalimburukwi kuvhura va kare nehuguvaro asi Karunga nga limburura makanderero gawo. Makanderero ogo kwa lifana noyinka eyi ga tjenge Ndafita kupitira mompepo zaKarunga.

5. Ngapi omu Jehova a tara vakurupe wovalimburukwi?

⁵ Matjangwa ga yi zeresa asi Jehova kutara vakurupe wovalimburukwi asi mulyo ntani age kuna kundindira vakareli vendi nawo va fumadeke vantu vangoso. (Epis. 22:24-26; Yis. 16:31; 20:29) Levitikus 19:32 kwa tanta asi: “Omu fe ekuto vantu wokukurupa oku tomu va fumadeke, yeeyi asi one kwa tjira nge. Ame nyame HOMPA.” Yimo, kufumadeka vakurupe womombungakriste kwa kere situmbukira somulyo apa va tjenge nonkango edi, yina lifana nomosiruwo setu. Nye ngapi kuhamena kuvapakera mbili? Aso situmbukira salye?

6. Sihonena musinke ga tulire po Jesus kuhamena kupakera mbili vakurona?

⁶ Nonkango daKarunga kututantera asi: “O fumadeke oguho nonyoko.” (Ex. 20:12; Efe. 6:2) Jesus kwa nkondopekere mpango ezi pokunyokera po Vafalisayi novalirongi womatjangwa ava ngava nyoka kupakera mbili vakurona vawo. (Mar. 7:5, 10-13) Jesus mwene ga tulire po sihonena sosiwa. Pasihonena, apa va mu pamparere kositji, Jesus kwa geve situmbukira sokupakera ozina mbili, ava va kere mufisayawo, komurongwa gwendi Johanesa, ogu ga here po unene.—Joh. 19:26, 27.

7. (a) Mpango musinke ga tjenge mupositoli Paurusa kuhamena kupakera mbili vakurona? (b) Yikaramo musinke eyi ga tjenge Paurusa?

⁷ Mpepo zaKarunga kwa pitisilire mupositoli Paurusa a tjange asi vapuli va hepa kupakera mbili mapata gawo. (Resa 1 Timoteusa 5:4, 8, 16.) Konakona yikaramo eyi Paurusa ga tjangerere Timoteusa. Paurusa kwa zogerere kuhamena ogu na vhura kugwana ekwafo lyoyimaliwa kombungakriste nogu na dira kuligwana. Age kwa yi zeresere asi vakurupe wovafisavayawo va hepa kuvapakera mbili vana vawo novatekuru vawo ntani ekoro lyawo. Pokurugana ngesi, ayo kapi ngayi gava mudigo kombungakriste. Mokulifana nanaina, nkedi zimwe Mukriste na tura pasirugana ‘etjiroKarunga’ kuna kara pokupakera mbili vekoro lyendi.

8. Morwasinke Bibeli za dilira kuvyukilira kutumbura mavyukiso gokuhamena kupakera mbili vakurona wovakurupe?

⁸ Ayo yina zere asi vanona woVakriste wovakondi yiwo va kara nositumbukira sokupakera mbili vakurona vawo wovakurupe. Paurusa kwa zogerere kuhamena ‘vakurupe wovapuli,’ nye vakurupe wovahapuli kapisi tu va sigilire. Monkedi  omu vanona ava gava ekwafo kwa lisiga. Kwato maukaro aga ga lifana. Yihepwa noukaro ntani ukanguki wawo ya lisiga. Vakurupe vamwe kwa kara novana wovanzi, ano vamwe gumwe tupu. Vamwe kugwana ekwafo kepangero, ano vamwe kwato. Eyi va hara, nayo kwa lisiga. Yipo nye, ayo kapi ya wapa mokupangura nkedi zava vana kuhetekera ko kupakera mbili vanekoro vawo wovakurupe. Jehova kuvhura kutungika nkenye etokoro lyoPatjangwa nokulininka li sike mo, eyi yiyo ya horoka kutundilira momazuva gaMosesa.—Num. 11:23.

9-11. (a) Maudigu musinke ava ligwanekere nago vamwe? (Tara efano pepenuno 20.) (b) Morwasinke vanona wovakondi nava dilira kugenderera kusiga yitumbukira yawo yopampepo? Faturura.

⁹ Apa vakurona novanona ava li kara ure, ayo kuvhura kukara udigu mokupakera mbili vakurupe. Elitjindjo lyohararasi moukanguki wovakurona ngwendi kugwa nokuteka sisupa ndi udigu umwe wounene, kuvhura kuninkisa vanona va tokore mokukavatarera po. Konyima zoyo, awo kuvhura va hepe evatero lyopokaruwogona ndi lyosiruwo sosire. *

¹⁰ Vakareli wosiruwo nasinye ava va kare ure nembo morwa yitumbukira yawo yopampepo, kuvhura kuligwanekera nomatokoro goudigu. Ava va kara Vabeteli ndi vatumwa ndi vatareli wokudingura navenye kutara sirugana sawo ngetungiko lyokwaJehova. Nye, nsene vakurona vawo tava vere, nampo kuvhura va gazare asi: ‘Twa hepa kusiga sirugana setu nokutengura kembo tu ka pakere mbili vakurona vetu.’ Nye, ayo ya wapa kugazadara ko nawa nsene asi vakurona vana hepa sili evatero ndi kuna mu harere tupu mu tengure. Kapi nayi wapa kusiga yitumbukira yopampepo pangenderera. Kuvhura yi kare asi uvera wopokaruwogona tupu, ano vamwe womombungakriste kuvhura va lizambere mokugava evatero olyo.—Yis. 21:5.

¹¹ Pasihonena, tu tarurureni sihorokwa sovantu namumbyendi ava ngava ruganene ure nembo. Gumwe kwa kere mutumwa koMbindakano zaAmerika, ano mukwawo nga rugana komberewa zonene momukunda gwaBrooklyn, moNew York. Vakurona wovakurupe wovanavazinyetu owo kwa hepere evatero. Vana owo novakadi vawo kwa dingwire vakurona vawo wovakurupe mokukatara omu nava vhura kuvavatera. Konyima zosiruwo, valikwali ava va kere koMbindakano zaAmerika kwa here kusiga sirugana sawo va tengure kembo. Makura muwapaiki gombunga zovakuronambunga gomombungakriste zovakurona vawo ta va toonene ngodi. Vakuronambunga ava kwa zogerere udigu owo ntani awo kwa here asi vatumwa owo va twikire nosirugana sawo. Vakuronambunga kwa haferere sirugana sovalikwali owo makura tava va tumbwidire asi ngava pakera mbili vakurona vawo wovakurupe. Eyi kwa hafesere epata lyawo nalinye!

12. Yisinke lya hepa kudivilisa epata lyoSikriste kuhamena kugava ekwafo kovakurona vawo wovakurupe?

¹² Yi kare asi nkedi musinke nali ruganesa epata lyoSikriste mokupakera mbili vakurona vawo wovakurupe, va hepa kudivilisa asi kapisi yi retere edina lyaKarunga eswau. Ose kapi tuna hara kukara ngwendi vampitisili womaukarelikarunga womomazuva gaJesus. (Mat. 15:3-6) Ose tuna hara matokoro getu ga yererepeke Karunga ntani nombungakriste.—2 Kol. 6:3.

13, 14. Ngapi omu Matjangwa ga likida asi nombungakriste da hepa kupakera mbili vakurupe?

¹³ Kapisi nombungakriste nadinye vhura kuvatera vakareli wosiruwo nasinye ngomu vana yi zogere. Nye, Bibeli kulikida asi nombungakriste da hepa kurugana paapa da hulira mokuvatera vanavazinyetu wovakurupe. Bibeli kuuyunga kuhamena mbungakriste zomoJerusarema asi “nagumwe si ga hepere.” Eyi kapi yina kutanta asi navenye kwa kere nongawo. Yosili, vamwe kwa kere neyi yoyinunu, nye “awo kwa yi gawinine, nkenye ogu tava mu pe pohepero zendi.” (Yirug. 4:34, 35) Konyima, ukaro wa ya rundurukire. Yipo va gwene erapoto asi “vafisavaya vawo kapi ngava va tara eho” konondya. Makura vapositoli yipo va horowere mo vagara wonkedi zongwa, nokutura po mawapaiko gokudivilisa asi yihepwa yovafisavayawo va yi sikise mo. (Yirug. 6:1-5) Yosili ewapaiko lyangoso kwa kere lyopokaruwogona tupu eli va tulisire po mokukwafa ava va ya kere Vakriste poPentekoste momvhura 33 ntani ava va kere moJerusarema mokunkondopeka epuro lyawo. Nampili ngoso, situmbukira sovapositoli kulikida asi mbungakriste kuvhura kupakera mbili vahepwe.

¹⁴ Paurusa kwa geve mavyukiso kwaTimoteusa aga ga nkondopeka maukaro aga naga ninkisa mufisayendi a vhure kugwana ekwafo kombungakriste. (1 Tim. 5:3-16) Mokulifana, Jakopo kwa tjenge asi Vakriste va kara nositumbukira sokupakera mbili nonsigwe novafisavayawo ntani navamwe momaudigu gawo. (Jak. 1:27; 2:15-17) Mupositoli Johanesa nage kwa fatwilire asi: ‘Nsene pa kara ogu ga weka emona, nye mukwawo a mu hepere moyitarameho, age nombili si, omu nali kara mo eharo lyaKarunga mwendi ngapi nye?’ (1 Joh. 3:17) Yipo nye, nsene nkenye Mukriste ga kara nositumbukira sokupakera mbili vahepwe, nombungakriste nado da kara nositumbukira sokulifana.

15. Nsene kuna kupakera mbili vakurupe, yisinke ya hamena mo?

¹⁵ Moyirongo yimwe, epangero kugava yimaliwa kovakurupe nokuvapakera mbili pokukuta vantu va va vatere pomambo gawo. (Rom. 13:6) Ano mwayimwe, kapi mwa kara mawapaiko gangoso. Nye, omu vekoro ava gava ekwafo ntani nombungakriste kovanavazinyetu wovakurupe kwa lisiga momaukaro. Nsene asi vana vawo kwa kara ure novakurona vawo, ayo kuvhura  kukundama omu vana vawo va hepa kugava evatero. Ya wapa kovanona va uyunge nemanguruko novakuronambunga womombungakriste ezi va kara vakurona vawo yipo va kwate egano ukaro wepata lyawo. Pasihonena, vakuronambunga kuvhura va vatere vakurupe pokuvapaparera mauzera gekwafo eli ali gava epangero momukunda gwawo. Awo kuvhura va dimburure yininke ngwendi nombilive domakongo edi va dira kupaturura ndi nomutji vana kudira kunwa vakurupe, yininke eyi va hepa kudiva vana vawo. Nsene vana vawo novakuronambunga va uyunga kumwe nemanguruko, awo kuvhura ngava kohonone po maudigu gangoso. Nsene pweli gumwe ogu ga kara pepi ogu na gava evatero ndi mavyukiso kepata lyogu ga tunga ure, eyi kuvhura kusesupika yinka yava vemepata.

16. Ngapi omu Vakriste vamwe ava vatere vakurupe womombungakriste?

¹⁶ Morwa kuhara vakurupe, Vakriste vamwe kuruganesa siruwo nononkondo dawo va gave ekwafo eli lina hepa po. Awo kulitura mo unene mokuvatera vakurupe womombungakriste. Ano vamwe womombungakriste kulipa marufo mokupakera mbili vakurupe. Nampili ngomu vanavazinyetu owo ava dili kuvhura kulihameka mo vene mosirugana sosiruwo nasinye, noruhafo awo kuvatera vana wovakurupe owo va kare ngorooro mosirugana sawo. Ee, nkareso musi kouwa ava likida vanavazinyetu owo! Yosili, yi kare asi ngapi omu wopeke nava gava evatero, nye simpe kuna kara situmbukira sovanona sokupakera mbili vakurona vawo wokukurupa.

17, 18. Nkareso musinke nazi rerupika epakerombili lyovakurupe?

¹⁷ Vakurupe nava ava va pakere mbili kuvhura kurerupika ukaro nsene va kwaterera konkareso zongwa. Poyiruwo yimwe ukurupe kuvhura kuninkisa muntu a dompe mutjima ndi a guve. Yipo nye pwa hepera elituromo lyokulikarera mokufumadeka nokukorangeda vanavazinyetu owo wovakurupe. Ngapi omu natu vhura kuyirugana oyo? Pokuzogera kumwe nawo nemanguruko. Vakurupe owo kwa kwaterera koulimburukwi wawo kwaJehova makura va hepa epandadeko. Jehova kapi a divara nayinye eyi va rugana mokumukarera, nose ngosikwawo.—Resa Marakiya 3:16; Vahebeli 6:10.

¹⁸ Yirugana yankenye ezuva ngayi rerupa nsene nkenye gumwe a kara nonkareso zongwa zokuzoragana. (Muud. 3:1, 4) Ntani hena, vakurupe wovanzi kuhetekera ko paapa va hulira mokudira kudigopeka yininke. Awo va yi dimburura asi nsene va kara vagomoki ngava gwana eharo nokuvadingura. Wovanzi ava ava dingura vakurupe narunye kuuyunga asi: “Ame kuna zi ni ka korangede kaume kange gomukurupe, nye name kuna ka gwana ekorangedo.”—Yis. 15:13; 17:22.

19. Ehuguvaro musinke vadinkantu novakurupe va kara nalyo kuhamena meho?

¹⁹ Ose kuna kundindira nononkondo apa ukurupe noruhepo nokudira kusikilira mo ngayi ka haga po. Nye mosiruwo esi, vakareli vaKarunga va hepa kukwaterera kehuguvaro lyawo lyokukaparuka narunye. Epuro lyetu momatumbwidiro gaKarunga kutuvatera moyiruwo yoyidigu. Morwa twa kara nepuro, “ose nokufa si unye. Nampili ga zonauke aga marutu getu, nye nomwenyo tadi kara nompe nkenye ezuva.” (2 Kol. 4:16-18; Heb. 6:18, 19) Yisinke hena yimwe eyi nayi vatera ava va kara nositumbukira sokupakera mbili vakurupe? Magano gamwe gomulyo ngatu ka ga zogera mosirongwa sokukwama ko.