Mbuuyungiso zoge
Konakona sihorokwa esi: Mukuronambunga ogu ga karera po Komitiye zeruganeno nosipangero ta tulisa po ewapaiko namunazina gomudinkantu mokurugana kumwe moyirugana yokuzuvhisa moSondaha kongurangura. Ngurangura zoozo mukuronambunga ogo ta gwana mbudi zeguwo kwamunazinyetugara kuhamena mukadendi ka kere mosiponga setuwa ogu ka va dukisilire kosipangero. Munazinyetugara ogo ta hundire evatero lyomukuronambunga ogo a papare ndokotora ogu na vhura kuhakura mukadendi pwa hana eturohonde. Makura mukuronambunga ogo ta hagekesa po ewapaiko lyokurugana namunazinyetu gomudinkantu moyirugana yokuzuvhisa yipo a ka gave evatero kepata eli lina kara moudigu.
Konakona hena sihorokwa sapeke: Zinya gomudike govana vavali ta gwana ezigido kovalikwali womombungakriste zendi mokukalya nokukazogera kumwe. Zinya ta tantere vana vendi, makura vanona tava yi hafere. Awo kuna kundindira ezigido olyo nononkondo. Nye ezuva limwe ko tupu lisike ezigido lyawo, valikwali tava divisa zinya ogo asi kapi nayi va vhulika kuyakara kumwe morwa pana wiza yimwe yohararasi. Ano konyima ta ya dimburura eyi valikwali vena va hagekesere po ezigido. Morwa valikwali owo nawo kwa va zigidire vakaume vawo ngurova zoozo, ntani va tambwire ezigido olyo.
NgoVakriste twa hepa kusikisa mo nonkango detu. Ose kapi tuna hara kuuyunga asi “Nhi” tu tambe asi “Hawe.” (2 Kol. 1:18, 19) Ngamoomu yina yi likida yihorokwa yina yivali, kapisi maukaro nagenye ga lifana. Poyiruwo yimwe kumoneka asi kwato eyi natu vhura kurugana ko nye twa hepa tupu kuhagekesa po mawapaiko aga twa tulisa po. Sikando simwe mupositoli Paurusa kwa ligwanekerere noudigu wokulifana.
PAURUSA KWA MU RUNDILIRE ASI KUUYUNGA PAVALI
Momvhura 55, apa Paurusa ga kere moEfeso morugendo rwendi rwautatu, age kwa here kuruta Efuta lyaAegean a ze koKolinte ntani na ka za koMakedoniya. Apa ga tundire koJerusarema, kwa here kukadingura mbungakriste zomoKolinte sikando sauvali, mokukapitwira yigava vanavazina womoJerusarema. (1 Kol. 16:3) Eyi kuyimonenena apa atu resa 2 Vakolinte 1:15, 16 asi: “Nehuguvaro eli, yiyo na here ni hove kuwiza kweni, asi mu ya gwane ko hena nkenda rwauvali. Yeeyi ame kwa here ni ya mu dingure pokuza koMakedoniya nopokukatengura koMakedoniya, nkumwe ngomu ya rongerere nge pokuza koJudeya.”
Eyi kumoneka asi mombilive zendi zokuhova Paurusa kwa divisire vanavazina woVakolinte asi nga ya va pita. (1 Kol. 5:9) Konyima tupu zapa ga tjenge mbilive zendi, Paurusa ta zuvhu mbudi kwava vemembo lyaKorowe asi mombungakriste zawo kuna kara mo nomutangu. (1 Kol. 1:10, 11) Makura Paurusa yipo ga tokwere kutjindja egano lyendi lyopomuhowo, nokutjanga mbilive ezi twa ya diva asi Vakolinte wokuhova. Mombilive ozo Paurusa kwa geve mavyukiso nomapukururo. Age hena kwa va divisire asi ana tjindji rugendo rwendi, nokuvatantera asi nga hova kuza koMakedoniya ntani nga ya za koKolinte.—1 Kol. 16:5, 6. *
Ayo kumoneka asi vanavazina womoKolinte va gwene mbilive zendi, ano vamwe mo ‘wovapositoli ava va fumanene’ mombungakriste zina kwa rundilire Paurusa asi age kuuyunga pavali pokudira kusikisa mo matumbwidiro gendi. Mokuvalimburura, Paurusa kwa va pulire asi: “Apa na yi fanekere eyi, nani kapi na yi gazarere nawa eyi? Ndi ame kutokora pasintu eyi ani tokora, ni uyunge sa nye pavali asi, ‘Nhi nhi,’ na ‘Hawe hawe’ pwarumwe tupu.”—2 Kol. 1:17.
Kuvhura tu lipure asi mupositoli Paurusa ngoso ‘kapi ga yi gazarere nawa eyi’ moukaro ou ndi? Hawe! Nonkango va toroka “kapi ga yi gazarere nawa” kutamba komuntu ogu a uyunga pavali, ngwendi gokudira kuhuguvara ndi gokudira kusikisa mo matumbwidiro gendi. Paurusa kwa pulire asi: ‘Ame kutokora pasintu eyi ani tokora ni uyunge sa nye pavali?’ Epuro eli lyokupura kapulilira ngano lya zererere Vakriste womoKolinte asi etokoro lyendi lyokutjindja rugendo kapi lya mu ninkise a kare gokudira kuhuguvara.
Paurusa ga nyokerere po erundiro olyo nononkondo, pokutjanga asi: “Karunga na kugana asi, nonkango detu kweni kapi da kere dapavali!” (2 Kol. 1:18) Yosili, Paurusa ga hepere kutjindja rugendo rwendi morwa vanavazina womoKolinte va gwanene mo uwa. Mo-2 Vakolinte 1:23, tatu resa asi age kwa tjindjire rugendo rwendi rokuza koKolinte morwa ‘kapi ga here asi va hepe mwarwendi.’ Yosili, age kwa va pere mpito va kohonone po nomutangu komeho a ka va gwane. Ngamoomu ga yi huguvarere, apa ga kere moMakedoniya, Paurusa kwa zuvhire mbudi kwaTitusa asi mbilive zendi za tumangedere vanavazina va livere nokulitezurura, ano eyi ya mu reterere ehafo lyenene.—2 Kol. 6:11; 7:5-7.
KUPANDURA KARUNGA POKUTANTA ASI “AMEN”
Erundiro lina kuvhura li tante hena asi nsene Paurusa nokuvhura si kusikisa mo matumbwidiro gendi, eyi kutanta asi nokuvhura si kumuhuguvara mosirugana sendi sokuzuvhisa. Nye Paurusa kwa diworokesere Vakolinte asi age nga va udisire Jesus Kristusa. “MunwaKarunga, Jesus Kristusa, ogu ngatu mu udisire, name naSilivanusa naTimoteusa, nage si kapi ga uyungire asi, ‘Nhi’ a tambe asi ‘Hawe,’ nye ‘Nhi’ yizo nga uyunga.” (2 Kol. 1:19) Jesus Kristusa ogu ga honenene Paurusa, kwa kere muntu gokudira kuhuguvara ndi? Hawe! Meparu lyendi nalinye nomosirugana sendi sokuzuvhisa, Jesus nkenye apa ga uyunga usili. (Joh. 14:6; 18:37) Nsene asi eyi ga zuvhisire Jesus usili ntani kuyihuguvara, nage Paurusa kwa zuvhisire mbudi zokulifana zokuhuguvara.
Yosili, Jehova ‘Karunga goMunasili.’ (Deut. 32:4) Eyi kuyimonenena mononkango daPaurusa dokukwama ko asi: ‘Yeeyi nkenye apa ga hulira matumbwidiro gaKarunga, Jesus yige esikiliromo lyago nagenye.’ Ulimburukwi waJesus apa ga kere pevhu, kwa zeresere masinganyeko govantu kuhamena matumbwidiro gaJehova. Paurusa ta twikire ko asi: “Yiyo nye atu pandwire Karunga morwendi tu tante asi ‘Amen.’” (2 Kol. 1:20) Jesus yige “Amen,” eyi kutanta asi matumbwidiro gaJehova Karunga ngaga sika mo.
Ngamoomu Jehova naJesus ava uyunga usili, Paurusa nage kwa tembe eyi ga uyungire. (2 Kol. 1:19) Age kapi ga uyungire pavali, ngagumwe ogu ga tulisire po matumbwidiro ‘gopasintu.’ (2 Kol. 1:17) Nye, age ‘kwa mu pitisilire mpepo zaKarunga.’ (Gar. 5:16) Mokuruganena kumwe novakwawo, age kwa tulire uwa wawo muhowo. Nhi zendi kwa tembe Nhi!
NHI ZOGE KUTAMBA ASI NHI NDI?
Naina, vantu wovanzi ava ava dili kuparuka kuliza nonompango domoBibeli kutulisa po matumbwidiro ntani nokugateza po nsene pana horoka yuma ndi yininke eyi va hara po. Moyininke yopangesefa “nhi” kapi azi tamba nkenye apa asi “nhi,” nampili malizuvhasano vana ga tura patjangwa. Wovanzi kapi vana kutara hena nonkwara ngetumbwidiro lyokukarerera lyovantu vavali. Morwa sivaro somalizumbo kulikida asi sinzi sovantu kutara nonkwara ngelikwatakano eli nava teza po usimbu.—2 Tim. 3:1, 2.
Ove ngapi? Nhi zoge kutamba asi Nhi ndi? Yosili, ngomu tuna yi konakona ketameko lyosirongwa esi, kuvhura yi horoke asi nove nampo wa hepa kutjindja etumbwidiro lyoge, nye kapisi morwa kapi to li sikisa mo, nye morwa maukaro aga no dira kuvhura kupangera. Nye ngoMukriste nsene o tura po etumbwidiro ndi mugano, wa hepa kurugana paapa wa hulira mokulisikisa mo. (Epis. 15:4; Mat. 5:37) Nsene ngo rugana ngoso, ove ngo kara muntu gokuhuguvara, ogu a uyunga usili nkenye apa. (Efe. 4:15, 25; Jak. 5:12) Apa vantu ava dimburura asi ove kuvhura kukuhuguvara moyininke nayinye, awo ngava hara kukupurakena apa ngo uyunga nawo kuhamena Uhompa waKarunga. Yipo nye, tu ninkeni Nhi zetu zi tambe Nhi!
^ para. 7 Konyima tupu zokutjanga Vakolinte wokuhova, yosili Paurusa kwa gendere zaTorowa a ze koMakedoniya, oku ga ka tjangerere Vakolinte vauvali. (2 Kol. 2:12; 7:5) Konyima yipo ga ka dingwire Kolinte.
