1. Ngapi omu Jesus ga tulisire po sihonena sosiwa selizambero?

APA Jesus ga kere pevhu, age kwa tulisire po sihonena sosiwa selizambero. Yitambo yendi neyi ga here kwa yi tulilire ntere yipo a rugane mpango zaKarunga. (Joh. 5:30) Pokulimburukwa dogoro konomfa, age kwa likidire nkareso zelizambero.—Fil. 2:8.

2. Ngapi natu likida nkareso zelizambero, ntani morwasinke?

² Ngovasikuli vaJesus, nose twa hepa kulikida nkareso zelizambero. Yisinke ayi tanta kukara nonkareso zelizambero? Ayo kutanta asi kutura muhowo uwa wovakweni yipo o va vatere. Ayo kuna kara elilimbo lyonkareso zokuligazara tupu nyamwetu. (Resa Mateusa 16:24.) Nkareso ezi kuvhura kutuvatera tu ture malizuvho neyi va hara wopeke muhowo. (Fil. 2:3, 4) Jesus kwa rongere asi nkareso zelizambero kwa likwatakana noukareli wetu. Monkedi musinke? Eharo lyoSikriste, eli ali tumangeda elizambero kuna kara sidimbwiliso sovarongwa vaJesus wousili. (Joh. 13:34, 35) Gazadara ko komatungiko aga atu hafere morwa ose kwa kara novavanavazinyetu ava ava likida nkareso zelizambero uzuni mudima!

3. Yisinke nayi vhura kudonganesa nkareso zetu zelizambero?

³ Ose kwa tu taparara nkore ezi azi donganesa nkareso zetu zelizambero. Nkore ozo kuna kara nkareso zokuligazara tupu  nyamwetu. Diworoka omu Adamu naEva va likidire nkareso zokuligazara tupu vene. Eva kwa lihere tupu mwene nokuhara kukara ngwendi Karunga. Ano mugara gwendi kwa likidire sikara sokuligazara tupu mwene pokuhara kuhafesa mukadendi. (Gen. 3:5, 6) Kutunda tupu apa Muzonaguli ga gusire Adamu naEva koukareli wousili, age kutwikira kuzeda vantu va ligazare tupu vene. Ntani yizo nkedi ga ruganesere apa ga hetekerere ko kuzeda Jesus. (Mat. 4:1-9) Momazuva getu, Satana ya mu tompoka mokupukisa sinzi sovantu, mokuvazeda va kare nonkareso zokuligazara tupu vene mononkedi dokulisiga-siga. Nkareso ozo kuvhura zi tu kundame morwa azo zina lihanene mouzuni.—Efe. 2:2.

4. (a) Ose kuvhura kugusa po nkareso zokuligazara tupu nyamwetu ndi? Faturura. (b) Mapuro musinke natu ka zogera?

⁴ Nkareso zokuligazara tupu nyamoge kuvhura kuzihetakanesa konkerewe ezi azi kakatere kosivera. Nsene sivera si kara poruzera kuvhura si tameke kukwata nkerewe. Pokuncenuna nkerewe dogoro zi zonagure sivera kuna kara siponga unene. Mokulifana, nampili ngomu natu dira kuvhura kugusa po ediro kusikilira mo ntani nkareso zokuligazara tupu nyamwetu, twa hepa kuvangarara koyiponga eyi ya hamena mo nokutwikira kurwanesa nkareso ozo. (1 Kol. 9:26, 27) Ngapi natu dimburura yidiviso yonkareso zokuligazara tupu nyamwetu? Ngapi natu vhura kutunga po nkareso zelizambero momunene?

5. (a) Ngapi Bibeli za kara ngwendi ntarero? (Tara efano pepenuno 7.) (b) Pokulikonakona konkareso zokuligazara tupu nyamwetu, yisinke twa hepa kunyokera po?

⁵ Ngomu tupu atu ruganesa ntarero mokulitara omu tuna kumoneka, yimo hena natu ruganesa Bibeli mokukonakona muntu gomonda yipo tu ture po mawapukururo aga gana hepa po. (Resa Jakopo 1:22-25.) Ntarero ngazi tu vatera tu limone nsene tuna wapa. Pasihonena, nsene tu vema tupu montarero, ose kuvhura tu dire kumona oku kuna hepa ewapeko. Ndi nsene tu litarera ntarero monontere, ose kuvhura kumona sihwi somuntu gwapeke. Mokulifana, kuruganesa Bibeli tu dimburure mapuko ngwendi nkareso zokuligazara tupu nyamwetu, kwa pitakana tupu kuziresa ndi kuziruganesa mokumona mapuko govakwetetu.

6. Ngapi natu twikira ‘kusikisa mo’ veta ezi za sikilira mo?

⁶ Mokuyifanekesa, ose kuvhura tu rese nkenye apa Nonkango daKarunga, nye simpe kuvhura tu dire kudimburura nkareso zangoso asi kuna kukura mwetu. Ngapi nayi vhura kuhoroka oyo? Konakona eyi: Mosihonena saJakopo sontarero, udigu kapi wa kere asi muntu ogo kapi ga litere nawa montarero. Jakopo kwa tjenge asi muntu ogo ‘kulimona mwene.’ Apa, Jakopo kwa ruganesere nkango zoRugereka ezi azi tanta asi kukonakona ndi kutarurura mo nawa. Moukaro ou, udigu musinke ga kere nawo muntu ogo? Jakopo kwa twikira ko asi: “Eyi na tunda po, ta divara omu ga fana.” Yosili, age kwa sigire ntarero ga hana kuwapukurura eyi ga mwene. Mokulisiga, muntu ogu a yi wapere kapi tupu “a tara mo nawa moVeta ezi za sikilira mo” nye hena ‘kuzisikisa mo.’ Mevango lyokudivara veta ezi za sikilira mo, age kukovekeda kukwama marongo gazo. Jesus nage ga tumbwire sitwa sokulifana pokutanta asi: “One nsene mu kwaterera mononkango dange, sili-sili one ngano varongwa vange.”—Joh. 8:31.

7. Ngapi natu ruganesa Bibeli mokukonakona nkareso zokuligazara tupu nyamwetu?

⁷ Yipo nye, mokufunda po nkareso zangoso, wa hepa pomuhowo kuresa Nonkango daKarunga nawa. Oyo kuvhura yi ku  vatere o dimburure apa wa hepa kuwapukurura. Nye wa hepa kurugana ko yoyinzi. Teda ko unene pokurugana mapaparo. Nsene to resa sihorokwa somoBibeli, litura mo nyamoge pokulipura mapuro aga asi: ‘Ngano nyame, ngano yisinke na rugene? Ngano na tulire po matokoro gouhunga ndi?’ Yomulyo po, konyima zokuteda ko kweyi ono resa, kondja mokuyisikisa mo. (Mat. 7:24, 25) Ngesi tatu ka zogera omu kuruganesa sihorokwa sahompa Sauru nesi somupositoli Peturusa nasi tu vatera tu kwaterere konkareso zelizambero.

8. Nkareso musinke ga kere nazo Sauru apa ga tamekere kupangera, ntani ngapi ga yi likidire eyi?

⁸ Hompa Sauru gwaIsraeli kuna kara sihonena serondoro kwetu kuhamena omu nkareso zokuligazara tupu nyamwetu nazi zonagura po nkareso zetu zokulizambera. Sauru kwa tamekere kupangera nonkareso zelinunupiko. (1 Sam. 9:21) Sauru kapi ga tengekere Vaisraeli ava va mu swawire, nampili ngomu Karunga ga mu pere nonkondo dokuyirugana. (1 Sam. 10:27) Age kwa tambwire epitisiro lyompepo zaKarunga pokupitisira Vaisraeli va funde Vaamoni. Konyima zoyo, age kwa geve mfumwa nazinye kwaJehova.—1 Sam. 11:6, 11-13.

9. Ngapi omu Sauru ga tungire po nkareso zokuligazara tupu mwene?

⁹ Mwaza siruwo, Sauru ga ya pulisilire nkareso zokuligazara tupu mwene nezi zelinenepeko zi kure mwendi, ngwendi sivera sonkerewe. Apa ga fundire Vaamareki, age kwa tulire edowo lyendi muhowo mevango lyokulimburukwa Jehova. Age kwa gusire yininke eyi va ka kwete moyita mevango lyokuyizonagura po ngomu ga mu pangerere Karunga. Morwa kulinenepeka, Sauru kwa litungilire sidiviso somadiworokero gamwene. (1 Sam. 15:3, 9, 12) Apa muporofete Samwere ga mu tantere asi kapi yina hafesa Jehova, Sauru kwa ligusa-gusire mo pokutanta asi age kwa limburukwa kompangera zaKarunga nokupa vakwawo usima. (1 Sam. 15:16-21) Ntani hena, Sauru kwa here kuhafesa vantu kupitakana Karunga. (1 Sam. 15:30) Ngapi omu sihorokwa saSauru nasi tu vatera tu kwaterere konkareso zelizambero?

10, 11. (a) Yisinke sina kuturonga sihorokwa saSauru kuhamena kukwaterera konkareso zelizambero? (b) Ngapi natu nyokera po nkareso zondona zaSauru?

¹⁰ Sokuhova, sihorokwa saSauru kulikida asi nampili twa kere nonkareso zelizambero kapi yina kutanta asi ngorooro ngatu twikira kukara nazo. (1 Tim. 4:10) Diworoka asi Sauru pomuhowo kwa hafesere Karunga, nye kapi ga nyokerere po nkareso zokuligazara tupu mwene. Moruhura, Jehova ga ya nyokere Sauru morwa kudira kulimburukwa kwendi.

¹¹ Sauvali, twa hepa kutakamesa mokudira tupu kudemenena komaruha aga atu sikisa mo meparu, nokuncenuna maruha aga twa hepa kuwapukurura. Eyi kwa fana ngwendi kuna kulitara montarero nokuhafera yidwara yetu yoyipe nye twa hana kudimburura ediro eli lina kara mosipara setu. Nampili ngomu natu dira kukara nelinenepeko ngwendi Sauru, twa hepa kukondja mokunyokera po nkareso ezi nazi tu twaredesa kokudona. Nsene tava tu pukurura, twa ha ligusa-gusa mo ndi tu pe vakwetu usima. Ayo ya wapa kutambura mapukururo.—Resa Episarome 141:5.

12. Ngapi nkareso zelizambero nazi tu vatera nsene tuna tura nzo zonene?

¹² Nye, ngapi nsene tuna tura nzo zonene? Hompa Sauru kwa here kupopera mfumwa zendi, ano eyi kwa mu ninkisire a dire kulitezurura. Mokulisiga, nkareso zokulizambera kutuvatera tu funde po nomuga ntani tu papare evatero eli tuna hepa. (Yis. 28:13; Jak. 5:14-16)  Pasihonena, munazinyetugara gumwe kwa tamekere kutarera mokahore-hore mafano goruhonda nonomvhura 12, ntani ga twikilire kuyirugana ure wonomvhura dokupitakana 10. Age kwa tanta asi: “Ayo kwa digoperere nge kuyitantera mukadange novakuronambunga eyi ngani rugana. Nye kutunda apa na va tanterere, ame kulizuvha rufuwo. Vakaume vange vamwe kwa va dompesere apa va gusire nge situmbukira soukwafimbunga. Nye, ame na yi diva asi Jehova kuhafera ukareli wange ngesi kupitakana apa ngani tarere mafano goruhonda, morwa mutaro gwendi yigo gomulyo po.”

13, 14. Ngapi Peturusa ga likidire nkareso zokuligazara tupu mwene?

¹³ Mupositoli Peturusa kwa likidire nkareso zokulizambera apa ga mu dewire Jesus. (Rukasa 5:3-11) Nye, simpe ga hepere kunyokera po nkareso zokuligazara tupu mwene. Pasihonena, age kwa handukire apa Jakopo naJohanesa va here kugwana yipundi yokuzeruka pokukahingira korulyo nokorumoho rwaJesus moUhompa waKarunga. Nampo Peturusa kwa gazarere asi simwe soyoyipundi kwa kere sendi morwa Jesus kwa tente asi Peturusa nga gwana situmbukira sokulikarera. (Mat. 16:18, 19) Nye, Jesus ga rondwere Jakopo naJohanesa ntani naPeturusa novapositoli vakwawo, va nyokere po nkareso ‘zokupangera’ vanavazina.—Mar. 10:35-45.

¹⁴ Nampili konyima zapa Jesus ga hetekerere ko kuvyukisa magazaro gaPeturusa, Peturusa ga twikilire kukondja mokunyokera po nkareso zelinenepeko. Apa Jesus ga tantere vapositoli asi awo ngava mu zumba pokaruwogona, Peturusa kwa likangangere asi nampili vakwawo va zumbe Jesus, age kapi nga mu zumba. (Mat. 26:31-33) Elikangango lyendi kapi lya kere lyouhunga, morwa masiku googo ya mu sumpilire kulikida nkareso zelizambero. Ano eyi kwa mu twaredesere a lipopere mwene, nokupatana Jesus yikando yitatu.—Mat. 26:69-75.

15. Morwasinke sihonena saPeturusa sa karera sosiwa?

¹⁵ Nampili ngomu nga lipuka-puka, Peturusa kuna kara sihonena sosiwa. Nelituromo  lyendi nevatero zompepo zaKarunga zokupongoka, Peturusa ga vhulire kufunda po nkareso ezi nokulikida elipangero ntani eharo lyokulizambera. (Gar. 5:22, 23) Age kwa lididimikilire maudigu gomanene kupitakana aga ga mu pundukisire muhoverera. Age kwa likidire elinunupiko mokutambura epukururo eli ga mu pere mupositoli Paurusa moyitarameho yanavenye. (Gar. 2:11-14) Konyima zapa va mu pere epukururo, Peturusa kapi ga kere nonkoko kwaPaurusa mokulizuvha asi ana zonagura mfumwa zendi. Peturusa kwa twikilire kulikida Paurusa eharo. (2 Pet. 3:15) Sihonena saPeturusa kuvhura kutuvatera tu tunge po nkareso zelizambero.

16. Ngapi natu likida nkareso zelizambero momaukaro goudigu?

¹⁶ Gazadara ko omu o lizuvhu momaukaro goudigu. Apa Peturusa novapositoli vakwawo vava tulire modorongo nokuvatoona morwa ezuvhiso lyawo, awo kwa hefe “asi Karunga kwa va tere asi va fira kuvahepekera edina lyaJesus.” (Yirug. 5:41) Nove kuvhura o tare mahepeko ngompito zokuhonena Peturusa nokukwama sihonena saJesus mokulikida nkareso zokulizambera. (Resa 1 Peturusa 2:20, 21.) Mutaro gwangesi kuvhura kukuvatera o tambure mapukururo govakuronambunga. Mevango lyokuhanduka, kwama sihonena saPeturusa.—Muud. 7:9.

17, 18. (a) Yisinke natu lipura kuhamena yitambo yetu yopampepo? (b) Yisinke natu rugana nsene tu dimburura asi tuna kara nonkareso zokuligazara tupu nyamwetu?

¹⁷ Nove kuvhura o gwanene ko uwa kosihonena saPeturusa kuhamena yitambo yopampepo. Kuvhura o kondjere yitambo yangoso pokulikida nkareso zelizambero. Nye, wa hepa kutakamesa asi ekondjo lyangoso lya ha kuninkisa o linenepeke. Lipura asi: ‘Eharo lyange lyokuwapukurura ndi lyokutamununa sirugana sange kwaJehova kuninkisa nge ni hare kugwana mfumwa ndi upangeli, ngamoomu ga yi rugene Jakopo naJohanesa pokuhundira Jesus yipundi yokuzeruka ndi?’

¹⁸ Nsene o nongonona asi ono kara nonkareso zokuligazara tupu nyamoge, hundira Jehova a ku vatere yipo o vyukise magazaro nomalizuvho goge, makura kondja unene o demenene mokugava mfumwa kwendi. (Epis. 86:11) Kuvhura o kondjere hena yitambo eyi nayi dira kukupa mfumwa. Pasihonena, kuvhura o tunge po yiyimwa yimwe yopampepo eyi ya kara udigu koge. Ndi nsene ove kuliwapaikira nawa maruha gokomapongo nye kapi wa kara neharo lyokuzeresa Sinyanga soUhompa, kuvhura o litulire po sitambo sokusikisa mo epukururo lyomoVaroma 12:16.—Resa.

19. Yisinke natu rugana mokudira kudompa mutjima nsene tu litara montarero zoNonkango daKarunga makura tu mone epuko?

¹⁹ Apa atu litara nawa nyamwetu montarero zoNonkango daKarunga nokumona mapuko ndi nkareso zokuligazara tupu nyamwetu, kuvhura yi tu dompese mutjima. Nsene yi tu horokera oyo, tu diworokeni omu ya tompokere muntu gomosifanekeso saJakopo. Jakopo kapi ga nkondopekere omu muntu gwina ga genderere kuwapeka maudigu aga ga dimbwilire, nye Jakopo kwa tente asi age kutwikira ‘kutara mo nawa moveta ezi za sikilira mo.’ (Jak. 1:25) Muntu gwina kwa diworokere eyi ga mwene montarero nokutwikira kutura po mawapukururo. Yimo, twikira kukara nomutaro gouhunga kwanyamoge ntani nokudira kusikilira mo koge. (Resa Muudisi 7:20.) Twikira kutara mo nawa moveta ezi za sikilira mo, nokukondja kukwaterera konkareso zoge zelizambero. Jehova ga kara neharo lyokukuvatera, ngwendi moomu a vatere vanavazinyetu wovanzi, ava va dira kusikilira mo nye va gwana ehafero nomatungiko gendi.