Guhya gomoBrasilia kwa tanta asi: “Ose kuhafera unene nonzogera dokulisiga-siga moUkareli wetu wEpata eyi ayi tu twaredesa dogoro pokatji komasiku nsene kapi nina va hagekesa.” Guhya gumwe gomoYapani kwa tanta asi munwendi gonomvhura murongo kapi ga hara va hageke nsene kuna kurugana Ukareli wEpata. Morwasinke? Guhya kwa tanta asi: “Awo kumukorangeda, ano eyi kugwederera koruhafo rwendi.”

Nampili ngoso, kapisi vanona navenye kuvakorangeda, vamwe kapi ava hafere ukareli wepata. Morwasinke? Guhya gomoTogo kwa gava egano eli asi: “Ukareli waJehova kapi wa hepa kukara wokudompesa.” Nsene kudompesa, wa hepa kuwapukurura monkedi omu o rugana ukareli weni wepata. Mapata gomanzi kwa yi dimburura asi ukareli wepata wa hepa kukara ngwendi moomu ga uyungire Jesaya kuhamena Esabata asi ‘gwanena mo ehafo.’—Jes. 58:13, 14.

Vaguhya woVakriste va yi dimburura asi nsene vana hara mapata gawo ga gwane ruhafo moukareli wepata, kapisi va kare noukenya. Ralf, ga kara novana wovakadona vatatu ntani nogu gomumati, kwa tanta asi ukareli wawo wepata kukara ngwendi nzogera nye kapisi ngwendi elirongo, ano eyi kuninkisa navenye va lihameke mo. Yosili, pokuninka asi nkenye ogu a lihameke mo kapi ayi kara ureru. Zinya gumwe kwa tanta asi: “Ame pamwe kapi ani kara nononkondo dokuninka ukareli wepata u kare wokuhafesa ngwendi moomu ani yi harere.” Ngapi no gusa po udigu wangoso?

Guhya govana vavali gomoNdovesiranda kwa tanta asi “twa hepa kukara nonkareso zokurundurura kuliza noukaro.” Natalia, zinya govana vavali kwa tanta asi: “Sininke somulyo po kepata lyetu kuna kara kuruganesa yininke  yokulisiga-siga.” Mapata gomanzi kugava kwava vemepata maruha gokulisiga-siga poukareli wepata. Ano Cleiton, guhya govana vavali wovadinkantu moBrasilia kwa gwederere ko asi: “Ayo kutovareka elirongo nokuninkisa navenye va lihameke mo.” Mokugaununa siruwo selirongo, vakurona kuvhura va vatere nkenye munona noyihepwa yendi nsene mapupi gawo kwa lisiga. Makura vakurona kuvhura va sikise mo yihepwa yankenye gumwe gemepata nokuhorowora yimbapira eyi nava lironga nonkedi omu nava yi ruganesa.

Yisinke aga rugana mapata gamwe mokurugana yininke yokulisiga-siga moukareli? Vamwe kutameka noukareli wawo wepata pokudimba marusumo. Juan gomoMeksiko kwa tanta asi: “Ayo ya wapa kukara nonkareso zongwa mokuliwapaikira yininke komeho zosiruwo.” Epata lyendi kuhorowora marusumo aga ga likwatakana nosirongwa esi vana kurugana poukareli owo wepata.

Sinzi somapata kuresa maruha goBibeli kumwe. Mokutovareka ukareli, vemepata kuvhura kuresa maruha gokulisiga-siga kuliza novantu womoBibeli. Guhya gomoYapani kwa tanta asi kwendi pomuhowo “nkedi ezi zokuresa kulitambagura kwa kere udigu.” Nye vana vendi wovamati vavali kwa va hafesere nkedi ezi zokuresa Bibeli novakurona vawo. Mapata gamwe kurugana masimwititi gomoBibeli pasidanauka moukareli wepata. Roger, guhya govana vavali wovamati gomoAfrika Mbindakano kwa tanta asi: “Vanona kunongonona yininke momareso goBibeli eyi mpamwe atu dili kudimburura ose vakurona.”

Nkedi zimwe hena zokutulisa po malisigo moukareli wepata kuna kara pokurugana kumwe ngwendi kutunga wato waNowa ndi ntembeli zaSaromo. Kurugana yininke yangoso kwa kwatera mo kurugana epaparo ano eyi kuhafesa. Pasihonena, mukadonagona gonomvhura ntano novakurona vendi ntani ozinakuru moAsia kwa fanekere rugendo romupositoli Paurusa routumwa monkondwa zawo zokuhingira poukareli wepata. Mapata gamwe kwa rugana yidanauka yoyihorokwa yomobuke zaExodus poyipakote. Donald gonomvhura 19 gomoTogo kwa tanta asi kuruganesa yininke yokulisiga-siga “moukareli wepata kuna kara nkedi zongwa.” Kuvhura o gazadare ko sirugana esi ngasi ninkisa ukareli weni wepata u kare wokuhafera ndi?

Nampili ngomu kuruganesa yininke yokulisiga-siga moukareli wepata aku reta ruhafo, nye navenye va hepa kuliwapaikira nawa ntani na gwanene mo uwa nkenye gumwe. Mokumona asi vanonagona poyiruwo yimwe kuroroka usimbu, vaguhya va hepa kuhorowora nawa yirongwa yokuwapera nokuliwapaikira nawa. Guhya gumwe kwa tanta asi: “Apa ani liwapaikire nawa, nkenye gumwe kugwanena mo uwa melirongo lyetu.” Guhya gumwe gomoNdovesiranda kudivisa epata lyendi komeho zosiruwo eyi ngava ya zogera mosivike sokukwama ko. Apa guhya gomoBenin govana ntazimwe a tulisa po mawapaiko mokuyatarera dividi zoyirongwa yomoBibeli moukareli wepata, age kugava mapuro aga ngava ya zogera komeho zosiruwo. Yosili, eliwapaikiro mulyo mokutovareka ukareli wepata.

Apa vemepata ava diva komeho zosiruwo eyi ngava ka zogera moukareli, awo kuyizogera mokatji kosivike ano eyi kunkondopeka eharo lyawo. Ntani nsene navenye kuna kara nositumbukira, nkenye gumwe ta lizuvhu asi ukareli wendi.

Kapisi mapata nagenye kuligwanekera noudigu wokulifana kuhamena kurugana ukareli nkenye apa.

Vaguhya wovanzi kurugana novili dononzi mokusikisa mo yihepwa yemepata. Pasihonena, guhya gumwe moMeksiko kutunda membo povili zauntazimwe zongurangura ano kukatengura povili zauntantatu zongurova. Poyiruwo yimwe, pwa kara hepero zokurundurura Ukareli wEpata morwa malikwamo gamwe goyininke yopampepo.

Nampili ngoso, twa hepa kutokomena mokurugana ukareli wepata nkenye apa. Loïs, gonomvhura 11 gomoTogo kwa tanta kuhamena etokomeno lyepata lyawo asi: “Nampili ngomu poyiruwo yimwe atu hulilire kutameka ukareli wetu wepata morwa koyili yimwe yina tu donganesa, ose nkenye apa kurugana ukareli wetu wepata.” No yi kwata egano eyi mapata gamwe aga tulire ukareli wawo wepata ketamekero lyosivike. Nsene yi horoka eyi vana dili kundindira, awo kuvhura kurundwilira ukareli wepata kehagero lyosivike.

Ngomu sitambo soukareli wepata sa yi likida, awo kuna kara ruha roukareli weni kwaJehova. Ninka navenye vemepata lyoge va fumadeke Jehova ‘moomu va yi tumbwidira’ nkenye sivike. (Hos. 14:2) Ngano si kare kwankenye gumwe gemepata siruwo soruhafo, “yeeyi ehafo lyomwaHOMPA, yilyo nonkondo deni.”—Neh. 8:9, 10.