1, 2. (a) Apa ga kere nonomvhura 40, etokoro musinke ga tulire po Mosesa? (Tara efano.) (b) Morwasinke Mosesa ga horowere po yokumuhepeka kumwe nomuhoko gwaKarunga?

MOSESA kwa kere mepata lyosiuhompa. Age ga mwene mauwa gomoEgipite, kukwatera mo mambo gomanene gonongawo. Ntani “kwa mu rongere unongo naunye woVaegipite,” nampo kukwatera mo udivi womaraka nokutjanga nobuke ntani ga divire ehistoli nomuvaru noudiviunsitwe. (Yirug. 7:22) Ngano ga gwene ungawo nononkondo ntani nositumbukira esi ga here nkenye Muegipite!

² Nye apa Mosesa ga kere nonomvhura 40, age kwa tulire po etokoro eli lya piyaganekere epata lyahompa Farawo eli lya mu rerere. Age kwa nyokere eparu eli ga here nkenye Muegipite, nokuhorowora eparu lyokumuhepeka kumwe novapika! Morwasinke? Morwa kwa kere nepuro. (Resa Vahebeli 11:24-26.) Nepuro, Mosesa kwa mwene yokomeho kupitakana mauwa aga ga mu kundurukidire. Age kwa kere nepuro ‘mogu ga ha moneka,’ Jehova, ntani nemesikiliromo lyomatumbwidiro gendi.—Heb. 11:27.

3. Mapuro musinke gatatu natu ka limburura mosirongwa esi?

³ Ngwendi Mosesa, nose twa hepa kumona yokomeho kupitakana eyi au gava uzuni. Twa hepa kukara ngwendi ‘ava va kere nepuro.’ (Heb. 10:38, 39) Mokutuvatera tu nkondopeke epuro, tu konakoneni eyi va tjanga moVahebeli 11:24-26 kuhamena Mosesa. Ose  natu ka gwana malimbururo komapuro aga asi: Ngapi omu epuro lya tumangedere Mosesa a nyokere po madowo gopanyama? Apa ga ligwanekerere nomahepeko, ngapi omu epuro lya mu vaterere a hafere situmbukira sokukarera Jehova? Ntani morwasinke Mosesa ga ‘tamberere po mfeto zokomeho’?

4. Yisinke ga nongwenene Mosesa kuhamena ‘yokuhafera mononzo’?

⁴ Morwa epuro, Mosesa ga yi nongwenene asi ‘kuhafera mononzo’ kapi aku karerere. Vamwe kuvhura va gazare asi nampili ngomu Egipite za zulire yikarunga yoyimpempa noumpure, yizo za kere epangero lyononkondo po mouzuni mudima. Ano vantu vaJehova kwa va hepekere ngovapika! Nye Mosesa ga divire asi Karunga nga ka rundurura yininke. Nampili ngomu ya tompokere ava va demenenene komadowo gopanyama, Mosesa ga kere nepuro asi vadinikarunga ngava va zonagura po. Eyi ya mu vaterere a nyokere po “yokuhafera karuwogona mononzo.”

5. Yisinke nayi tu vatera tu nyokere po “yokuhafera karuwogona mononzo”?

⁵ Ngapi omu no nyokera po “yokuhafera karuwogona mononzo”? Diworoka asi kuhafera mononzo kapi aku karerere. Epuro ngali ku vatera o mone asi “uzuni ngau zonauka po kumwe nomadowo gawo nagenye.” (1 Joh. 2:15-17) Teda ko kuhamena meho zava wokudira kulitezurura. Awo kwa kara ‘pomusenete . . . ngava gwire mezonauko!’ (Epis. 73:18, 19) Nsene kuna kukuzeda o lihameke mononzo, lipura asi: ‘Meho musinke nina hara?’

6. (a) Morwasinke Mosesa ga nyokerere “kumutumbura asi gwamunwaFarawo gomukadi”? (b) Morwasinke ono kugazarera asi Mosesa kwa tulire po etokoro lyouhunga?

⁶ Epuro lyaMosesa kwa mu vaterere a ture po etokoro. “Epuro yiyo lya ninkisire Mosesa apa ga kulire, a nyoke kumutumbura asi gwamunwaFarawo gomukadi.” (Heb. 11:24) Mosesa kapi ga gazarere asi age kuvhura a karere Karunga ngagumwe gomombara zahompa makura a ruganese ungawo noyitumbukira yendi mokuvatera Vaisraeli vakwawo. Nye Mosesa kwa tokomenene kuhara Jehova nomutjima nomwenyo nononkondo dendi nadinye. (Deut. 6:5) Etokoro lyaMosesa lya mu poperere kokukora kokunene. Ungawo naunye woVaegipite ou ga nyokere Mosesa kwa ya u twere Vaisraeli! (Ex. 12:35, 36) Farawo kwa mu fisire nomuga nokumudipaga. (Epis. 136:15) Nye Mosesa ga parukire ntani Karunga ga mu ruganesere a pitisire muhoko nagunye. Age ya mu tompokere meparu.

7. (a) Kuliza naMateusa 6:19-21, morwasinke natu liwapaikira kuhamena meho? (b) Simwitira sihorokwa esi sa nkondopeka malisigo gemona lyopokaruwogona neli lyanarunye.

⁷ Nsene ove mukareli gomudinkantu gwaJehova, ngapi omu epuro nali ku vatera o horowore yirugana? Ove munandunge nsene o liwapaikira kuhamena meho. Kukara nepuro momatumbwidiro gaKarunga ngayi ku tumangeda o lipongaikire emona lyanarunye, nye kapisi lyopokaruwogona tupu. (Resa Mateusa 6:19-21.) Eli yilyo etokoro ga hepere kutura po Sophie ogu nga dana udano ava tumbura asi ballet. Nokampani doudano woballet moAmerika kwa mu pere nzambo zoyimaliwa yokukalirongera eyi ga here. Age kwa tanta asi: “Ayo kwa hafesere nge mokumona asi kwa here nge unene. Ame kwa lizuvhire asi kwa pitakanene vadani vakwetu. Nye kapi na kere noruhafo.” Makura Sophie ta tarere vidiyo Young People Ask—What Will I Do With My Life? Age kwa tanta asi: “Ame na yi dimbwilire asi ngano ya tompokere nge mouzuni nokugwana mfumwa zovantu pokuzumbanesa ukareli wange kwaJehova. Ame kwa kovekedere kukanderera kwaJehova. Makura tani hageke udano ou na here.” Ngapi ana kulizuvha kuhamena etokoro lyendi? Age kwa tanta asi: “Ame kapi nina kugazara eparu lyange lyanare. Ngesi nina kara noruhafo rosili. Kuna kurugana uzuvhisi wokukarerera kumwe namugara gwange. Ose kapi twa kara nomfumwa mouzuni, ntani kapi twa  weka emona lyenzi. Nye ose twa kara naJehova novarongwa woBibeli noyitambo yopampepo. Ame kwato maliverero.”

8. Epukururo musinke lyomoBibeli nali vatera mudinkantu a tokore eyi nga rugana meparu lyendi?

⁸ Jehova ga diva yoyiwa po koge. Mosesa kwa tente asi: “Ove mbunga zaIsraeli, purakena eyi ga hepa ko koge HOMPA Karunga goge: O tjire HOMPA, to rugana nayinye eyi ga ku pangera. Mu hara, to mu ruganene nomutjima goge nagunye nomwenyo goge nagunye, oku to limburukwa koyipango yendi nayinye. Tani yi ku pe naina morwaekwafo lyoge.” (Deut. 10:12, 13) Apa ono kara simpe mudinkantu, horowora yirugana eyi ngayi kupulisira mokuhara nokuruganena Jehova “nomutjima goge nagunye nomwenyo goge nagunye.” Ove kuvhura o yi huguvare asi etokoro lyangoso ngali ku ‘kwafa.’

9. Morwasinke ya mu digoperere Mosesa mokusikisa mo situmbukira sendi? Faturura.

⁹ Mosesa ‘kwa tere eswauro mwaKristusa asi emona lyenene lya pitakana ugawo naunye waEgipite.’ (Heb. 11:26) Mosesa kwa mu tumine ‘ngaKristusa’ ndi ‘ngoMugwavekwa,’ ogu ga horowere Jehova a ka guse muhoko goVaisraeli moEgipite. Mosesa ga yi divire asi kusikisa mo sirugana esi ngayi kara udigu, ntani ngava mu ‘swaura.’ Gumwe goVaisraeli kwa mu swawire pokutanta asi: “Ogu ana ku ninki o kare muhona ndi mupangeli gwetu yilye?” (Ex. 2:13, 14) Konyima, Mosesa mwene kwa pulire Jehova asi: “Farawo yige nye na ka purakena nge ame?” (Ex. 6:12) Mokuliwapaikira maswauro nokugalididimikira, Mosesa kwa kandererere kwaJehova kuhamena yinka noutjirwe ou ga kere nawo. Ngapi Jehova ga vatere Mosesa a sikise mo situmbukira sendi sosidigu?

10. Ngapi Jehova ga vaterere Mosesa a sikise mo situmbukira sendi?

¹⁰ Sikando sokuhova, Jehova kwa tumbwidilire Mosesa asi: “Ame ngani kara noge.” (Ex. 3:12) Sauvali, Jehova kwa mu pere ehuguvaro nouradi pokufaturura eyi ali tanta edina lyendi asi: “Ame ngani kara nkenye eyi na hara.” * (Ex. 3:14, NW) Sautatu, age kwa pere Mosesa nonkondo dokurugana yitetu mokulikida asi Mosesa kwa mu tumine Karunga. (Ex. 4:2-5) Ano saune, Jehova kwa horowere Arona ngomuuyungili po gwaMosesa, ogu ga mu vaterere a sikise mo situmbukira sendi. (Ex. 4:14-16) Kouhura weparu lyendi, Mosesa ga yi divire nawa-nawa asi Karunga kuvatera vakareli vendi va sikise mo nkenye situmbukira esi a va pe. Eyi yiyo ya mu ninkisire a huguvarese Josuwa ogu ga kere mukwami gwendi asi: “HOMPA mwene yige nga mu gendesa, ta kara neni. Age kapi ngayi mu tjindira ndi asi a mu zumbe, ano mwa ha dompa nomutjima ndi asi mu tjire.”—Deut. 31:8.

11. Morwasinke Mosesa ga tarerere situmbukira sendi asi mulyo unene?

¹¹ Nevatero lyaJehova, Mosesa kwa tere situmbukira sendi sosidigu asi mulyo unene kupitakana “ugawo naunye waEgipite.” Yosili, kukarera Farawo kapi to vhuru kukuhetakanesa nokukarera Karunga Munankondo nadinye. Yomulyo po yokukara mupangeli gwaEgipite ndi yokukara Mugwavekwa gwaJehova? Mosesa kwa mu tungikire morwa kukara nomutaro gouhunga. Age kwa haferere elikwatakano lyenene naJehova, ogu ga mu vaterere a rugane “yininke yoyinene yokutjilisa” a pitisire Vaisraeli moSirongo sEtumbwidiro.—Deut. 34:10-12.

12. Yitumbukira musinke ga tu pa Jehova?

¹² Nose twa kara nositumbukira. Kupitira mwaMunwendi, Jehova kwa tu pa sirugana sokuzuvhisa, ngomu ga si rugene mupositoli Paurusa navamwe. (Resa 1 Timoteusa 1:12-14.) Natuvenye twa kara nositumbukira  sokudivisa mbudi zongwa. (Mat. 24:14; 28:19, 20) Vamwe kwa kara mosirugana soUhompa sosiruwo nasinye. Vanavazinyetugara ava va kura pampepo kuruganena vakwawo mombungakriste ngovakwafimbunga novakuronambunga. Nampili ngoso, vekoro lyoge wovahapuli ntani navamwe kuvhura va kare nomasinganyeko kuhamena mulyo goyitumbukira yoge ndi kuvhura va ku swaure kelizambero lyoge lyokukarera Jehova. (Mat. 10:34-37) Nsene va ku dompesa mutjima, kuvhura o tameke kugazara asi malizambero goge kwato mulyo ndi asi kapi to vhuru kusikisa mo situmbukira soge. Nsene yi ku horokera oyo, ngapi omu epuro ngali ku vatera o lididimikire?

13. Ngapi omu Jehova a tu vatere tu sikise mo yitumbukira yetu yoUhompa?

¹³ Nepuro, likwambera Jehova a ku vatere. Mu tantera yinka noutjirwe woge. Mwanayinye, Jehova yige ga ku pa sirugana, ntani age nga ku vatera yi ku tompoke. Monkedi musinke? Monkedi omu ga vaterere Mosesa. Zokuhova, Jehova kukutumbwidira asi: “Ngani ku nkondopeka tani ku kwafa; ngani ku popera tani ku parura.” (Jes. 41:10) Zauvali, age kukudiworokesa asi matumbwidiro gendi gosili: “Nyame na yi uyunga, nye yiyo kusika mo.” (Jes. 46:11) Zautatu, Jehova kukupa ‘nonkondo dononene’ o sikise mo situmbukira soge. (2 Kol. 4:7) Zaune, mokukuvatera o lididimikire situmbukira soge, Guhyetu geharo kwa kupa vapuli vakweni mouzuni mudima yipo mu ‘likorangede-korangede oku tomu likwafa-kwafa.’ (1 Tes. 5:11) Apa Jehova a ku vatere o sikise mo yitumbukira yoge, epuro lyoge mwendi ngali nkondopara unene ntani ngo tara yitumbukira oyo asi mulyo unene kupitakana nayinye eyi au gava uzuni.

14. Morwasinke Mosesa ga karere nehuguvaro asi nga gwana mfeto?

¹⁴ Mosesa “kwa tambere po mfeto zokomeho.” (Heb. 11:26) Yosili, Mosesa kwa ruganesere ediwo lyendi mokukara nomutaro gouhunga kuhamena meho, nampili ngomu lya kere lyesesu. Ngwendi ozinakuru Abirahamu, Mosesa kwa kere nehuguvaro asi Jehova kuvhura kuvhumbura vafe. (Ruk. 20:37, 38; Heb. 11:17-19) Ehuguvaro lyomatungiko gokomeho kwa vaterere Mosesa a dire kutara nomvhura dendi 40 ngomunayirongo ntani nomvhura 40 domomburundu asi domawoko-woko tupu. Nampili ngomu ga dilire kudiva mauzera nagenye kuhamena omu ngaga  sika mo matumbwidiro nagenye gaKarunga, morwa epuro age ga mwene mfeto zokomeho.

15, 16. (a) Morwasinke twa hepera kudemenena komfeto? (b) Matungiko musinke ono ku ndindira mepangero lyoUhompa?

¹⁵ Ove ‘kutamba po mfeto zokomeho’ ndi? Ngwendi Mosesa, nose kapi twa diva mauzera nagenye kuhamena matumbwidiro gaKarunga. Pasihonena, ose ‘kapi twa diva apa ngasi sika mo siruwo’ soudigu wounene. (Mar. 13:32, 33) Nye, ose twa diva yoyinzi kuhamena Paradisa zokomeho kupitakana Mosesa. Nampili ngomu twa dira kudiva mauzera nagenye, matumbwidiro aga twa diva kuhamena eparu moUhompa waKarunga ga gwanena po. Kukara nomagazaro kuhamena uzuni woupe ngayi tu tumangeda tu ture Uhompa muhowo. Ngapi? Gazadara ko kweyi: Ove kuvhura o rande embo eli wa dira kudiva nawa ndi? Hawe! Mokulifana, ose kapi tuna hara kuruganesa eparu lyetu mokukondjera yininke yomawoko-woko. Epuro lyetu kuvhura li tu vatere mokumona eparu lyewa mepangero lyoUhompa.

¹⁶ Negano lyoUhompa waKarunga, ‘tambesera’ eparu lyoge mokuligazara nyamoge asi moParadisa ono kara. Pasihonena, nsene ove kuna kuteda ko keparu lyoVakriste vanare ava va tumbura moBibeli, gazadara ko kuhamena eyi ngo ka va pura apa ngava ka vhumbuka. Gazara eyi nampo ngava ka ku pura kuhamena eparu lyoge pomazuva aga gopouhura. Gazara ruhafo oru ngo ka kara naro pokukamona vekoro lyoge ava va fa nomvhura mafere da ka pita nomu ngo ka va ronga kuhamena eyi ga va ruganena Karunga. Gazara tupu ruhafo oru ngo kara naro ngomu ngo ka lironga kuhamena yikorama yoyinzi pokukayimona mouzuni wombili. Teda ko omu ngo ka lizuvha pokukahedera pepi naJehova ngomu ngatu ka hedera kesikiliromo.

17. Ngapi omu kugazadara ko komfeto zetu zokomeho nayi tu vatera?

¹⁷ Kugazadara ko komfeto zetu zokomeho ngayi tu vatera tu lididimikire noruhafo nokutura po matokoro aga ngaga tu retera eparu lyanarunye. Paurusa kwa tjangerere Vakriste wovagwavekwa asi: “Nsene tu huguvara eyi tuna dili kumona, kuyindindira nedidimiko.” (Rom. 8:25) Mpango ozo kwa tamba hena koVakriste navenye ava va kara nehuguvaro lyomwenyo gwanarunye. Nampili ngomu twa dira simpe kugwana mfeto zetu, epuro lyetu lya pama mokutwikira kundindira “mfeto zokomeho.” Ngwendi Mosesa, ose kapi atu tara nomvhura edi twa kara mosirugana saJehova asi domawoko-woko. Nye, ose twa kara nehuguvaro asi “yininke eyi ayi moneka yantaantani makura, ano eyi ayi dili kumoneka yanarunye.”—Resa 2 Vakolinte 4:16-18.

18, 19. (a) Morwasinke twa hepera kukondja mokukwaterera kepuro lyetu? (b) Yisinke ngatu ka zogera mosirongwa sokukwama ko?

¹⁸ Epuro kutuvatera tu dive “undipo woyininke eyi atu dili kumona” nomeho getu. (Heb. 11:1) Muntu ogu ga dira kudiva Jehova kapi a mono mulyo gokumukarera. Kwendi yitumbukira yopampepo, “ugova.” (1 Kol. 2:14) Nye, ose twa kara nehuguvaro lyomwenyo gwanarunye nokukamona evhumbuko, yininke eyi wa dira kudiva uzuni. Ngwendi varongi womomazuva gaPaurusa ava ngava mu tumbura asi “mukavauki,” sinzi sovantu naina kugazara asi ehuguvaro eli atu zuvhisa kwato mulyo.—Yirug. 17:18.

¹⁹ Ngomu twa kara novantu wokudira epuro, twa hepa kukondja yipo tu kwaterere kepuro lyetu. Kanderera kwaJehova “asi epuro lyoge lya ha pwa mo.” (Ruk. 22:32) Vangarara mokudimburura yitundwamo yononzo, nokutara situmbukira soge sokukarera Jehova asi mulyo, ntani nehuguvaro lyoge lyomwenyo gwanarunye. Epuro lyaMosesa kwa mu vaterere a tara koyininke yokomeho kupitakana eyi au gava uzuni. Mosirongwa sokukwama ko, ngatu ka zogera omu epuro lya vaterere Mosesa a mone “ogu ga ha moneka.”—Heb. 11:27.