1, 2. Ngapi enomeno lyaJehova lya lisiga nenomeno lyomafano aga ava tura moyitora?

MOYIRONGO yoyinzi, venyayitora kwa tura mafano moyitora yawo mokunomena varandi ntani nokukwateka ava vana kuvaka. Makwateko ogo kuvatera venyayitora va kwate vawidi. Morwa mafano aga, vawidi kapi yina kuvatompoka mokuvaka.

² Mafano gangoso kutudiworokesa kuhamena Guhyetu geharo, Jehova ndi? Bibeli kuuyunga kuhamena meho gendi asi “kumona nkenye oku.” (Yis. 15:3) Nye eyi kutanta asi age kunomena nkenye eyi tuna kurugana ndi? Karunga kutunomena nokutara nsene asi ose kuna kusikisa mo noveta dendi, negano lyokututengeka ndi? (Jer. 16:17; Heb. 4:13) Hawe! Jehova kutunomena morwa kwa tu hara ntani ana tu harere uwa.—1 Pet. 3:12.

3. Nonkedi musinke ntano natu ka konakona omu Karunga a likida eharo kwetu?

³ Yisinke nayi tu vatera tu likide rupandu asi Karunga kutunomena morwa kwa tu hara? Tu konakoneni omu ayi rugana eyi. Age kuyirugana (1) pokuturondora apa atu likida nkareso zondona, (2) pokutuvyukisa apa atu gusa nontambo depuko, (3) pokutupitisira kupitira monompango domoNonkango dendi, (4) pokutuvatera apa atu ligwanekere nomaudigu  gokulisiga-siga, ntani (5) pokututungika apa atu rugana youhunga.

4. Sitambo musinke ga kere naso Jehova mokurondora Kaini asi nzo kuna “ku rarere pevero”?

⁴ Pomuhowo, tu konakoneni omu Karunga atu rondora nsene kuna kutunga po nkareso zondona. (1 Hist. 28:9) Pokulikida rupandu kenomeno lyewa lyaKarunga, tu konakoneni omu ga ruganenene kumwe naKaini, ogu ga ‘handukire unene’ apa Karunga ga dilire kutambura nzambo zendi. (Resa Genesis 4:3-7.) Jehova kwa rondwere Kaini asi “rugana yoyiwa.” Makura Jehova ta mu rondora hena asi nzo kuna “ku rarere pevero.” Karunga kwa mu tanterere asi: “Zi funda.” Age kwa here Kaini a tambure erondoro yipo a ‘mu hafere.’ Mokugwana ehafero lyaKarunga age ngano ga poperere elikwatakano lyendi naKarunga.

5. Mononkedi musinke Jehova a tu rondora kuhamena magazaro gomadona natu vhura kukara nago?

⁵ Ngapi kuhamena ose naina? Jehova kumona monomutjima detu, ano kapi tatu vhuru kuhoreka magazaro getu ntani neyi twa hara. Guhyetu geharo kuna tu harere tu kwame nzira zouhunga, nye nampili ngoso, age kapi a tu sininike. Kupitira moNonkango dendi, Bibeli, age kuturondora nsene kuna kuvyuka monzira zepuko. Ngapi? Mereso lyetu lyoBibeli lyankenye ezuva, rorunzi ose kuyalitwa pegano eli nali tu vatera tu funde po nkareso nomagazaro gomadona. Ntani hena, yimbapiratjangwa yetu kutuvatera tu dimburure udigu ou tuna kukondja nawo ntani nokutulikida omu natu u kohonona po. Ano komapongo getu, natuvenye kugwana mapukururo posiruwo sokuwapera!

6, 7. (a) Morwasinke natu tantera asi yimbapiratjangwa va tjangera mamiliyona govantu kulikida asi Karunga kwa ku hara? (b) Ngapi no gwanena mo mauwa mevyukiso lyaJehova?

⁶ Marondoro nagenye gangoso kulikida asi Jehova kwa tu hara ntani kupakera mbili nkenye gumwe gwetu. Yosili, nonkango domoBibeli kwa kara po nomvhura dononzi, ano yimbapiratjangwa azi wapaike mbunga zaKarunga kuyitjangera mamiliyona govantu, ntani mapukururo atu gwana komapongo getu kugatambesera kombungakriste nazinye. Yipo nye, Jehova kuna kukuvyukisa koNonkango dendi asi o wapukurure magazaro goge. Nayinye eyi kulikida asi Jehova kukupakera mbili.

⁷ Mokugwanena mo uwa momarondoro gaKarunga, pomuhowo twa hepa kuyidimburura asi age sili kutufira sinka. Makura twa hepa kulimburukwa koNonkango dendi nokukondjera kunyokera po nkenye magazaro aga naga guvisa Karunga. (Resa Jesaya 55:6, 7.) Nsene tu purakena komarondoro aga a tu pe, ngatu nyokera po kulikoresa nyamwetu. Ngapi nsene tu dira kupurakena? Evatero musinke nga tu pa Guhyetu geharo?

8, 9. Ngapi mapukururo aga a gava Jehova kupitira movakareli vendi aga likida asi age kutufira sinka? Gava sihonena.

⁸ Apa Jehova atu vyukisa, ose kuyayidimburura asi age kutupakera mbili. (Resa Vahebeli 12:5, 6.) Yosili, ose kapi ayi tu hafesa apa ava tu pukurura ndi kutupisura. (Heb. 12:11) Nye, gazadara ko kogu ana gava epukururo asi yisinke ana li gavere. Age kuna yi ruganene morwa ana dimburura eyi o rugana omu nayi kundama elikwatakano lyoge naJehova Karunga, ntani gazara siruwo sendi nelituromo lyendi eyi ana ruganesa mokukulikida moBibeli omu no vhura kuwapukurura nonzira doge yipo o hafese Karunga. Twa hepa kufumadeka mapukururo gangoso, morwa ago kutunda kwaJehova.

⁹ Tu konakoneni sihonena kuhamena omu mapukururo gokutunda kovantu aga likida asi Karunga kutufira sinka. Munazinyetugara  gumwe nga tarere nkenye apa mafano goruhonda komeho a ya dive usili, ga ya hagekere nkareso ezi. Nye, simpe nga gazara kuhamena mafano ogo. Apa ga rende selefoni zompe, ga tengwilire hena konkareso zendi zanare. (Jak. 1:14, 15) Age nga ruganesa selefoni ozo mokuza koInterneta mokutarera mafano goruhonda. Ezuva limwe moyirugana yokuzuvhisira kongodi, age kwa geve selefoni zendi komukuronambunga a ruganese ko mokupapara noaderesi dimwe koInterneta. Apa mukuronambunga ga tamekere kuziruganesa, ta mono maruha gomafano goruhonda. Eyi kwa ya kere etungiko komunazinyetu ogu ga kere moudigu ou. Age kwa gwene mapukururo aga ga hepere ntani ga ga tambwire, ano moruhura ga ya fundire po nkareso ozo zondona. Ruhafo musi natu vhura kukara naro kwaGuhyetu gemeguru geharo, ogu a mono nonzo detu domokahorehore ntani nokutuvyukisa komeho tu zonagure po elikwatakano lyetu nendi!

10, 11. (a) Ngapi no vhura kupapara evyukiso lyaKarunga? (b) Ngapi omu epata limwe lya limonenene unongo wokukwama epitisiro lyaJehova?

¹⁰ Muepisarome kwa dimbire kwaJehova asi: “Ove kupitisira nge mompango zoge.” (Epis. 73:24) Nkenye apa natu hepa epitisiro, ose kuvhura ‘kudiworoka’ Jehova pokutara moNonkango dendi yipo tu gwane mutaro gwendi goyininke. Pokusikisa mo nompango doBibeli kapi tupu atu kara nelikwatakano lyewa naKarunga, nye ado simpe kutuvatera tu pakere mbili yihepwa yetu yopanyama.—Yis. 3:6.

¹¹ Sihonena esi asi likida omu Jehova a pitisire, kuna kara somunandima ogu ga tunga momukunda gonondundu gwaMasbate moPhilippines. Nage namukadendi kurugana uzuvhisi wokukarerera ntani awo kurera epata lyenene. Ezuva limwe, awo kwa tukukire apa va ya gwene mbudi posipepa ezi za tundire kwamwenya farama asi va hepa kudiruka. Morwasinke? Kwa va rundilire asi kapi ava hungike. Nampili ngomu munazinyetu ga kere nosinka kuhamena oku na gwana evango lyokukatunga nepata lyendi, age kwa tente asi: “Jehova ngatu kwafa. Age kutupa nkenye apa yihepwa yetu, yi kare asi yisinke yina kuhoroka.” Ehuguvaro lyamunazinyetu kapi lya kere lyomawoko-woko. Konyima zomazuva gongandi, epata lya ya yi dimbwilire asi kapi va hepa kudiruka. Yisinke ya horokere?  Nampili ngomu vava rundilire, mwenya farama ga yi dimbwilire asi epata eli lyoNombangi kulipitisira nompango doBibeli ntani lya kara nonkareso zefumadeko nezi zombili. Mwenya farama za mu hafesere nkareso ezi va likidire ntani age ga va pere hena evango lyenene. (Resa 1 Peturusa 2:12.) Yosili, Jehova kuruganesa Nonkango dendi mokutupitisira yipo tu lididimikire maudigu meparu.

12, 13. Momaukaro musinke aga ninkisa vamwe va gazare asi Karunga kapi ana kuvafira sinka?

¹² Poyiruwo yimwe, ose kuligwanekera nomaudigu gomanzi. Kuvhura tu kondje nomauvera gokudira kuveruka ndi makwamakwamo gokutunda kovanekoro ndi mahepeko gokutwikida. Ntani ngapi kuhamena madiro kulizuvha gomanene novanavazinyetu aga atu ligwanekere nago mombungakriste?

¹³ Pasihonena, kuvhura yi ku korese eyi ana uyunga munazinyetu. Kuvhura o lipure asi: ‘Eyi ngano kapi tayi vhuru kuhoroka mombunga zaKarunga?’ Nye munazinyetu ogu ana ku koresa ta gwana yitumbukira ntani wovanzi kumumona asi age sihonena sosiwa mombungakriste. Kuvhura o lipure asi: ‘Ngapi omu nayi horoka ngoso? Jehova kapi ana kuyimona ndi? Kapi na rugana ko yuma ndi?’—Epis. 13:1, 2; Hab. 1:2, 3.

14. Konda musinke zimwe zeyi Karunga na dilira kulihameka mo mokukohonona po maudigu getu?

¹⁴ Jehova kuvhura a kare nonokonda domulyo kweyi ana kudilira kurugana ko yuma. Pasihonena, nampo ove kuna kulizuvha asi mukweni yige ana kara mepuko, nye Karunga kuvhura a yi tare monkedi zapeke. KwaKarunga nampo nyove ono kara mepuko lyenene kupitakana omu ono kuyigazara. Eyi ono kugazara asi kuna ku koresa, kuvhura yi kare epukururo lyewa eli wa hepa kugazadara ko. Mesimwititi lyeparu lyendi, munazinyetu Karl Klein, ogu ga kere gumwe gomoMbungagendesi, kwa uyungire asi munazinyetu J. F. Rutherford sikando simwe kwa pukwilire nge kuvyukilira. Konyima, munazinyetu Rutherford kwa kundire munazinyetu Klein noruhafo asi: “Moro, Karl!” Nye morwa munazinyetu Klein kwa kere nehandu kweyi va mu pukwilire, age kapi ga limbwilire nomutjima nagunye. Mokudimburura asi munazinyetu Klein simpe ha ga handukira, munazinyetu Rutherford yipo ga mu rondwere asi ga ha gwira mosiraha soMuzonaguli. Konyima, munazinyetu Klein kwa ya tjenge asi: “Apa atu kara nonkoko kwamunazinyetu, unene po nsene asi ya mu tumbukira mokutupukurura, ose kugwira usimbu moyiraha yoMuzonaguli.” *

15. Yisinke nayi ku vatera mokunyokera po nkareso zokudira kulididimikira maudigu?

¹⁵ Yiruwo yimwe kapi atu vhuru kulididimikira nsene asi udigu kapi una kuhaga po usimbu. Ngapi natu vhura kulididimikira? Tu tante asi ove kuna kara momukweyo nokundindira nsako zoge zomahangu va zi ku kweyere. Ove kapi ono diva asi siruwo sokuhura kupi nayi ku gusa yipo va ku kweyere. Nsene yi ku nyegenyesa ntani o hetekere ko kuza kehina nalyopeke, kuvhura o ka gwene ko mukweyo gomure unene kupitakana ogu ono sigi. Ntani kuvhura yi ka ku guse siruwo sosire. Ngano ko lididimikire ngano hansa. Mokulifana, nsene o twikira kukwama nompango doBibeli, Karunga nga ku vatera o lididimikire nokukasika oku ono tamba.

16. Morwasinke nampo Jehova na dilira kulihameka mo momaudigu getu?

¹⁶ Jehova kuvhura a dire kulihameka mo momaudigu getu morwa ana hara tu lirongere ko komaudigu ogo. (Resa 1 Peturusa  5:6-10.) Nye, Karunga kapi a retesa po maudigu. (Jak. 1:13) ‘Nkore zetu, Satana,’ yige a retesa po maudigu nagenye. Nampili ngoso, Karunga kuvhura kuruganesa ukaro woudigu mokutuvatera tu kare nelikwatakano nendi. Age kumona ruhepo rwetu, ntani morwa ‘kutupakera mbili,’ age nga divilisa asi maudigu getu ga twikire “karuwogona” tupu. Ove kulikida rupandu kenomeno lyaJehova apa o ligwanekere nomaudigu, nokuhuguvara asi age kapi nga ku zumba ndi?—2 Kol. 4:7-9.

17. Nomutjima dalye a konakona Jehova, ntani morwasinke?

¹⁷ Karunga kukonakona nomutjima detu nokonda zomulyo. Kupitira momuporofete Hanani, age kwa divisire hompa Asa asi: “HOMPA yige a takamesa uzuni mudima, age kugava nonkondo kwanavenye ava ava hama kwendi nomutjima nagunye.” (2 Hist. 16:9) Jehova nga ku pa “nonkondo” nsene ngo twikira kurugana youhunga.

18. Apa o lizuvhu asi kwato ogu ana kumona uwa ou ono kurugana, yisinke wa hepa kudiworoka kuhamena Jehova? (Tara efano pepenuno 27.)

¹⁸ Karunga kuna hara asi tu ‘papare yoyiwa,’ ‘tu hare yoyiwa,’ ntani ‘tu rugane uwa’ yipo nga tu ‘fire nkenda.’ (Amosa 5:14, 15; 1 Pet. 3:11, 12) Jehova kumona vahungami ntani nokuvatungika. (Epis. 34:15) Pasihonena, gazara vavhadi woVahebeli oSifira naPuva. Apa Vaisraeli va kere moupika moEgipite, vakadi ava vavali kwa tjilire unene Karunga kupitakana omu va tjilire Farawo, ogu ga va pangerere asi va dipage vakeke navenye wovagara woVahebeli pokuvahampuruka. Yosili, ezwi lyawo lyokomutjima lyewa kwa va tumangedere va dire kudipaga vakeke vena. Konyima Karunga kwa ya pere Sifira naPuva ruvharo rorunzi. (Ex. 1:15-17, 20, 21) Jehova ga mwene yirugana yawo yoyiwa. Pamwe, nose kuvhura tu gazare asi kwato ogu ana kumona uwa ou tuna kurugana. Nye Jehova kutupakera mbili. Age kumona yirugana nayinye yoyiwa atu rugana, ntani age nga tu rugwida kuwoko.—Mat. 6:4, 6; 1 Tim. 5:25; Heb. 6:10.

19. Ngapi omu munazinyetukadi ga yi dimbwilire asi Jehova kumona yirugana yoyiwa?

¹⁹ Munazinyetukadi gomoAustria kwa ya dimbwilire asi Karunga ga mwene sirugana sendi sosinene. Morwa age Muhungaria, kwa gwene aderesi zomuntu ogu a uyunga Ruhungaria ga here kulironga Bibeli. Munazinyetukadi yipo ga zire a ka mu tarere po, nye kapi ga ka mu gwene po pembo. Munazinyetu nga tengwire ko yikando yoyinzi. Poyiruwo yimwe nga lizuvhu asi muntu ana kara mo membo, nampili ngomu ngava dili kumuzegurura. Nkenye apa nga sigi yimbapiratjangwa, nombilive, nomauzera gendi oku nava mu gwana, ntani nayimwe ngoso. Konyima zomvhura zimwe noharufa zokutwikida kutengwira ko, ga liharuka ko evero tali zeguruka! Mukadi gombili ogu ga zegwilire evero ta morora munazinyetukadi nokumutantera asi: “Hwilireni mo. Ame kwa resa nayinye eyi ngomu sigire-sigire nge ntani kwa mu ndindira.” Mukadi ogo kwa kere mouhaku wouvera wokankera ntani kwa lizuvhire asi kapi ta vhuru kukara novantu. Yipo va tamekere nelirongo lyoBibeli. Yosili, Karunga kwa tungikire elituromo lyamunazinyetukadi ogo!

20. Ngapi omu o lizuvhu kuhamena enomeno lyaJehova?

²⁰ Jehova kumona nayinye eyi o rugana ntani nga ku rugwida kuwoko. Apa no yi dimburura asi Karunga kukumona, wa ha lizuvha asi age kuna kukunomena mokutara komapuko goge ngwendi mafano aga aga nomene moyitora. Nye lizuvha asi ove kuna kara pepi naKarunga ogu a ku pakere mbili!