1-3. (a) Udigu musinke woyimaliwa ava ligwanekere nawo vamwe naina? (Tara efano.) (b) Yinka musinke ava kara nayo kuhamena kurera munona?

MARILYN * kwa fatwilire asi: “Mugara gwange James nga tundu koyirugana ana roroka nkenye ezuva, ano yimaliwa eyi nga tambura kapi ya gwanene po mokuranda yihepwa yetu yankenye ezuva. Ano ame kwa here kumuvatera nokurandera munetu, Jimmy, yininke yimwe yoyiwa eyi ngava hafere vanasure vakwawo.” Marilyn kwa here kuvatera ekoro lyawo nokupungura ko hena yimaliwa yimwe eyi ngava ruganesa komeho. Sinzi sovakaume vendi kwa zire moyirongo nayopeke mokukarugana nokukatambura yimaliwa yoyinzi. Nye apa Marilyn ga gazadarere ko mokuza, kwa kere nomasinganyeko. Morwasinke?

² Marilyn kwa kere nowoma wokusiga epata lyendi eli lya kere nelikwamo lyewa lyokukarera Karunga. Nye age simpe kwa twikilire kugazara asi vakwetu va za noyirugana siruwo songandi, ntani mapata gawo simpe ha ga pamena. Nye kapi ga divire omu nga vhura kurera Jimmy apa nga ka kara ure. Ngayi mu tompoka mo kurera munwendi ‘nokumupukurura kuliza neyi ga hara’ Jehova kupitira moInterneta ndi?—Efe. 6:4.

³ Marilyn kwa paparere magano. Mugara gwendi kapi ga here asi a ze, nye age kwa uyungire asi nsene ana tokora kuza kapi  na mu silika. Vakuronambunga ntani navamwe womombunga kwa mu korangedere asi ga ha za, nye vanavazinyetukadi vamwe mombunga kwa mu korangedere asi a ze. Awo kwa mu tanterere asi: “Nsene wa hara epata lyoge, ngo za. Ano ove ngo vhura simpe kukarera Jehova.” Nampili ngomu Marilyn ga kere nomasinganyeko, age kwa tokwere kuza, tarekere munwendi nayendi nokuvatumbwidira asi: “Kapi ngani ka kara ko siruwo sosire.”

4. Morwasinke vantu ava dirukire, nye yilye a pakere mbili vana vawo?

⁴ Jehova kapi ana hara vakareli vendi va fe konzara. Nampili mosiruwo sanare, age ga pulisire vakareli vendi mokudirukira kosirongo nasopeke va ka gwane nondya. (Epis. 37:25; Yis. 30:8) Pasihonena, Jakopo kwa tumine vana vendi va ka rande nondya koEgipite. * (Gen. 42:1, 2) Naina, sinzi sava ava tokora kudirukira koyirongo nayopeke kapi ava yi ruganene morwa nzara, nye morwa kwa kara no makongo gomanzi. Ano vamwe nampo kwa hara tupu kukulika mparukiso zekoro lyawo. Mokusikisa mo yitambo yawo, sinzi sawo kusiga mapata gawo nokukaruganena ure. Rorunzi, awo kusiga vana vawo komukurona gumwe ndi kozinakuru ndi kwagumwe gemekoro ndi kovakaume. Nampili ngomu ayi guvisa ava ava sigi valikwali ndi vana vawo, awo kulizuvha asi kwato eyi nava rugana ko, va hepa tupu kuza.

5, 6. (a) Yisinke ga rongere Jesus kuhamena ruhafo nepopero? (b) Yihepwa musinke ga rongere Jesus vasikuli vendi eyi nava vhura kukanderera? (c) Monkedi musinke Jehova a tu tungike?

⁵ Momazuva gaJesus, sinzi sovantu kwa kere nohepwe ntani awo nampo kwa lizuvhire asi ngava gwana ruhafo nepopero nsene va kara noyimaliwa yoyinzi. (Mar. 14:7) Nye Jesus kapi ga here asi vantu va ture ehuguvaro lyawo moyininke yopokaruwogona tupu. Age kwa here va huguvare mwaJehova. PEudiso lyendi lyopoNdundu, Jesus kwa fatwilire asi ruhafo rosili nepopero kapi ayi tundu ko kukara nemona lyenzi, ndi asi mononkondo danyamwetu, nye koukaume wetu naGuhyetu gemeguru.

⁶ Mekanderero lyendi lyaGuhyetu gemeguru, Jesus kwa tu rongere tu kanderere asi ‘tu pa naina nondya detu dankenye ezuva,’ nye kapisi yokukara noyimaliwa yoyinzi. Age kwa tanterere ava va mu purakenene asi: “Walye omu lipongaikire emona pevhu. . . . Nye omu lipongaikire emona meguru.” (Mat. 6:9, 11, 19, 20) Ose kuvhura kuhuguvara asi Jehova ngatu tungika ngomu ga yi tumbwidira. Apa atu tungike Karunga kapi tupu ayi likida asi age ga tu hara nye hena kulikida asi age kutupa nayinye eyi twa hepa. Yosili, nkedi zimwe tupu zokugwana ruhafo nepopero kuna kara pokuhuguvara mwaGuhyetu ogu atu pakere mbili, nye kapisi moyimaliwa.—Resa Mateusa 6:24, 25, 31-34.

7. (a) Kwalye Jehova ga gava situmbikira sokurera vanona? (b) Morwasinke guhya nazinya va hepera kuronga vana vawo?

⁷ ‘Kupapara muhowo uhungami waKarunga’ kwa kwatera mo kutara yitumbukira yemepata ngamoomu a yi tara Jehova. MoVeta zaMosesa kwa kara mo mpango ezi za kara nomulyo koVakriste: Vakurona va hepa kuronga vana vawo va karere Karunga. (Resa Deuteronomium 6:6, 7.) Karunga kwa pa situmbukira esi kovakurona, kapisi kovazinakuru ndi komuntu nagepeke. Hompa Saromo kwa tente asi: ‘Munwange, o purakene eyi vana kukutantera oguhwo nonyoko.’ (Yis. 1:8) Jehova kwa tembe asi guhya nazinya va hepa kukara po mokuvyukisa nokuronga vana vawo. (Yis. 31:10, 27, 28) Apa vanona ava zuvhu vakurona kuna kuuyunga kuhamena Jehova nokumona omu vana kumukarera  nkenye ezuva, vanona nawo kuvhura va kwame sihonena sawo.

8, 9. (a) Marunduruko musinke aga horoka apa vakurona ava kara ure nomapata gawo? (b) Apa vakurona novanona ava dili kutunga kumwe, udigu musinke ayi retesa po?

⁸ Sinzi sava ava gazara kusiga mapata gawo, va yi dimburura asi etokoro lyawo kuretesa po maudigu, nye ayo udigu kudiva omu etokoro lyangoso nali kundama epata lyawo. (Yis. 22:3) * Apa tupu Marilyn ga zire, age kwa tamekere kulizuvha kukora kopamalizuvho morwa kuligaunuka nepata lyendi. Mugara gwendi namunendi nawo ngosikwawo. Jimmy kwa twikilire kupura ozina asi: “Morwasinke muna kusigira nge?” Marilyn kwa gazarere asi nga ka kara ko tupu makwedi gongandi, nye ngomu nomvhura da pitire ga ya dimbwilire marunduruko gomadona ga horokere mepata lyendi. Jimmy kapi ga ya rongwere hena ozina. Neguwo, Marilyn kwa tanta asi: “Eharo lyendi kwange kwa ya tendere.”

⁹ Apa vakurona novanona ava dili kutunga kumwe ngepata, awo kuhepa pamalizuvho ntani kuzonagura nkareso zawo. * Nsene awo simpe vanonagona makura va ligaunuke novakurona siruwo sosire, ayo kukundama unene elikwatakano lyawo. Marilyn kwa fatwililire Jimmy asi age kwa ka ruganenene ure mokukapapara yimaliwa a ya mu rerese ko. Nye Jimmy kwa lizuvhire asi ozina kapi va mu here yiyo va mu sigilire. Pomuhowo apa va zire ozina, Jimmy kwa mu guvisire. Nye apa va ka tengwire konyima zonomvhura dongandi, kapi ga va haferere. Ngwendi sinzi sovanona ava ava sigi vakurona vawo, Jimmy kwa lizuvhire asi ozina va zumbanesere mfumwa zawo zokuvalikida eharo nokuvalimburukwa.—Resa Yisewe 29:15.

10. (a) Apa vakurona ava gava mauhwi mevango lyokugava siruwo neharo lyawo, ngapi omu ayi kundama vanona? (b) Yisinke ali zumbanesa epata nsene mukurona a rerera vana vendi koure?

¹⁰ Nampili ngomu Marilyn ga hetekerere ko kutuma yimaliwa nomauhwi, age ga yi mwene asi kuna kuligusa ko kwamunwendi ntani ga yi dimbwilire asi age kuna kuronga munwendi a ture yininke yopanyama muhowo kupitakana kukarera Karunga ntani nelikwatakano lyawo ngepata. (Yis. 22:6) Jimmy kwa tanterere ozina asi: “Mwa ha ka tengura. Twikireni tupu ngorooro kutuma mauhwi.” Makura Marilyn yipo ga yi dimbwilire asi kapi ya wapa kurera munona kupitira monombilive nomotelefona ndi koInterneta. Age kwa faturura asi: “Kapi to vhuru kulidingira  ndi kuncumita munoge kupitira koInterneta komeho a ka rare.”

11. (a) Ngapi ayi kundama nonkwara dawo nsene valikwali va likara ure? (b) Ngapi munazinyetukadi gumwe ga yi dimbwilire asi ga hepere kutengura kepata lyendi?

¹¹ Elikwatakano lyaMarilyn naJehova ntani namugara gwendi, James, kwa kere mosiponga. Age nga zi tupu komomapongo nomoyirugana yokuzuvhisa ezuva limwe mosivike, ntani ga hepere kunyokera po muhona gwendi ogu ga here kuhondera nage. Morwa kudira kukara pepi nomulikwali ogu nava vhura kuzogera nendi maudigu gawo, Marilyn naJames navenye kwa tulire po elikwatakano nava wopeke eli nkare li va twaredesere kokuhondera. Marilyn ga yi nongwenene asi nampili ngomu nage namugara gwendi va dilire kuhondera, nye pokulikara ure kapi va vhulire kukwama mavyukiso goBibeli gokulipakera mbili pamalizuvho ntani nomalizuvho gokuligwanekera panyama. Morwa Marilyn naJames kwa likere ure, awo kapi va vhulire kulipa eharo ‘nencumito’ eli va ‘fira kulipa’ valikwali nokugwana ruhafo mononkwara. (Rus. 1:2; 1 Kol. 7:3, 5) Ntani kapi va vhulire kukarera Jehova ngepata. Marilyn kwa tanta asi: “Apa na zuvhire kosigongi somazuva gatatu asi mulyo kwetu kukara noukareli wepata nkenye apa mokukaparuka ezuva lyenene lyaJehova, ame na yi dimbwilire asi na hepa kutengura kembo. Na hepere kutengwidira po elikwatakano lyange naJehova ntani nepata.”

12. Epukururo musinke lyemetjangwa nali vhura kuvatera ava va kara ure nomapata gawo?

¹² Apa Marilyn ga tokwere kutengura kembo, vamwe va yi haferere, ano vamwe kapi va yi haferere. Vakuronambunga wokosirongo esi ga ka ruganene kwa mu pandadekere kepuro nouradi wendi wokutengura kembo. Nye vamwe ava va sigire mapata gawo kapi va mu pandadekere. Mevango lyokukwama sihonena sendi sosiwa, va hetekere ko kumusininika a kare. Awo kwa tente asi: “Ntaantani ngo ka tengure. Ngapi omu ngo pakera mbili epata lyoge nsene o tengura kembo?” Mevango lyokudompesa, Vakriste va hepa kukorangeda “vakadi wovasesu va lirongere ko kuhara vagara vawo novana vawo. . . . Va kare vagolikadizuni,” va rugane momambo gawo, yipo asi “nonkango daKarunga neisi va di swaura.”—Resa Titusa 2:3-5.

13, 14. Morwasinke pwa hepera epuro mokuhuguvara mwaJehova kupitakana eyi va hara vanekoro? Gava sihonena.

¹³ Sinzi sava ava diruka kwa kulira monompo edi adi fumadeke ekoro, kupitakana mapata ganyamwawo. KoMukriste mokunyokera po nompo domomukunda ndi eyi va hara vanekoro mokuhafesa Jehova, ga hepa kulikida epuro.

¹⁴ Tu konakoneni sihorokwa saCarin ogu  ga tanta asi: “Apa na hampurukire munwange Don, name namugara gwange ngatu ruganene kosirongo nasopeke, opo ame ntani tupu nina kutameka kulironga Bibeli. Navenye mekoro lyange kwa here asi ni tume Don kembo va ka mu tu rere po vakurona vange dogoro ngatu gwane yimaliwa yokugwanena po.” Apa Carin ga tokwere asi nga rera mwene munwendi, vekoro lyendi kukwatera mo namugara gwendi kwa mu zorere nokutanta asi age udwa. Carin kwa tanta asi: “Kuuyunga usili, posiruwo sina kapi na divire epuko eli lya kere po mokusigira Don vakurona vange va mu rere nomvhura dongandi. Nye na divire asi Jehova kwa gava situmbukira kwetu sokurera munwetu, ose vakurona.” Apa Carin ga kere hena nomarutu gavali, mugara gwendi gomuhapuli kwa mu tumangedere asi ali guse ezimo. Etokoro lyopomuhowo lyaCarin kwa nkondopekere epuro lyendi, ano eyi ya mu vaterere a dire kuligusa ezimo eyi ya hafesere Jehova. Ngesi nage namugara gwendi ntani novana vawo vana hafa mokukara kumwe. Ngano Carin ga tumine vana vendi va ka va mu rerere po nawopeke, ngano yitundwamo kapi yina lifana.

15, 16. (a) Faturura sihorokwa samunazinyetukadi ogu va rerere ozinakuru. (b) Morwasinke etokoro lyendi lya lisigire neli lyozina?

¹⁵ Munazinyetu Vicky kwa simwitira asi: “Ure wonomvhura dongandi ame kwa rerere nge omama wovakadi, awo vakurona vange kwa kere namumbyange gomukadona. Siruwo esi na tengwire ni ka kare novakurona vange, kapi na kere nelikwatakano lyewa nawo. Mumbyange kwa kere nemanguruko lyokuzogera nokulidingira nokuhafera elikwatakano lyewa kumwe nawo. Ame kapi na kere nelikwatakano lyangoso nawo, nampili moukondi ayo kwa digoperere nge mokupwagesa malizuvho gange kwawo. Ame namumbyange kwa tumbwidira vakurona vetu asi ngatu va pakera mbili moukurupe wawo. Ame ngani yi ruganena morwa situmbukira sange, nye mumbyange nga yi ruganena morwa eharo.”

¹⁶ Vicky kwa tanta asi: “Ngesi onane vana hara ni tume munange va ka mu rerere nge, ngamoomu va tumine nge konane vawo. Monkedi zongwa, ame na nyokere. Name namugara gwange tuna hara kurera munwetu moomu ga yi harera Jehova. Kapi nina hara kuzonagura po elikwatakano lyange namunange.” Vicky ga yi dimburura asi mokukutompoka meparu, wa hepa kutura muhowo Jehova nonompango dendi kupitakana yimaliwa neyi va hara vanekoro. Jesus kwa vyukilire kuuyunga asi: ‘Muntu simpe a vhuru kukerera ohekuru vavali,’ eyi kutanta asi Karunga nomamona.—Mat. 6:24; Ex. 23:2.

17, 18. (a) Matumbwidiro musinke nava vhura kuhuguvara Vakriste wousili? (b) Mapuro musinke ngatu ka zogera mosirongwa sokukwama ko?

¹⁷ Guhyetu, Jehova, ga liwapaikira kutuvatera tu gwane nayinye eyi twa hepa nsene tu tura muhowo Uhompa nouhungami wendi meparu lyetu. (Mat. 6:33) Yi kare asi maudigu musinke tuna kara nago, Jehova kwa tumbwidira asi nga tu ‘wapaikira evega lyokugahenduka’ yipo tu dire kuteza po nompango domoBibeli. (Resa 1 Vakolinte 10:13.) Nsene tu ‘huguvara’ mwaJehova, pokuhundira unongo nomavyukiso gendi kupitira mekanderero ntani nokukwama nompango dendi, ‘age nga tu kwafa.’ (Epis. 37:5, 7) Age nga tungika yirugana yetu yokumukarera gelike ngaHekuru gosili. Nsene ngatu mu tura muhowo, age nga ‘wapeka’ eparu lyetu.—Hetakanesa Genesis 39:3.

¹⁸ Yisinke natu rugana mokuwapukurura ezonauko eli ali retesa po eligaunuko? Nontambo musinke natu vhura kugusa mokupakera mbili mapata getu twa hana kudirukira koyirongo nayopeke? Ntani ngapi omu natu korangeda wopeke va ture po matokoro gomawa koyuma eyi? Sirongwa sokukwama ko ngasi ka zogera mapuro aga.