APA na geve siuyungwa sange 1957, kapi na kere nowoma morwa vapurakeni vasesu. Ame kwa kere nonomuga unene dokuuyunga komeho zovantu. Pounona, ame ngani vanda nsene vagenda vana wiza membo lyetu, nampili na va diva.

Yosili, ove kuvhura o tetuke pokudiva asi sinzi soyitumbukira yange mombunga zaJehova asi yiyo ya ninkisire nge ni zogere novantu wovanzi, vakaume ntani novageni. Nampili ngoso, ame simpe kwa twikira kukondja nonomuga ntani kudira kulihuguvara, yipo nye asi kapi tani vhuru kulipandadekera eyi na vhura kusikisa mo moyitumbukira oyo. Nye, ame na limonena usili wetumbwidiro lyaJehova eli asi: “Ngani ku nkondopeka tani ku kwafa; ngani ku popera tani ku parura.” (Jes. 41:10) Nkedi zimwe omu Jehova ga vatera nge kuna kara pokupitira mevatero lyoVakriste vakwetu. Tanko ni mu tantere ko yimwe, kutundilira unona wange.

MoSondaha kongurangura 1940, Elsie Huntingford kwa wizire kofarama zetu koMbindakano-tokero zaOntario. Onane kwa zire kevero posiruwo oso otate ava va kere nonomuga ngwendi nyame kwa hingilire monda  kumwe name ntani nokupurakena. Pokugazara asi munazinyetukadi Huntingford kwa kere munangesefa ntani asi onane nava randa yininke eyi tuna dili kuhepa, otate yipo va zire kevero nokuuyunga asi kapi tuna hara. Munazinyetukadi Huntingford ta pura asi: “One kuna tamba asi kapi muna hara elirongo lyoBibeli ndi?” Makura otate tava limburura asi: “Nsene asi yoBibeli, tuna yi hara.”

Munazinyetukadi Huntingford kwa ka tu dingwire posiruwo sosiwa. Vakurona vange kwa litulire mo unene moNgereka zawo zaUnited zomoKadana nye awo opo ntani tupu ka va tokwere kutunda mo. Morwasinke? Morwa pepi nevero lyongereka, mupitisili gongereka kwa ramekere po elikwamo lyomadina govagavi yigava navenye kuliza nosivaro soyimaliwa eyi ava gava. Vakurona vange ava va kere asi kapisi nongawo, edina lyawo kwa kere pepi nouhura womadina ogo, ano vakurona wongereka kwa va kondjesere mokugava yoyinzi. Morwa kuhara kutwikira nosirugana sendi, mupitisili gumwe kwa tente asi age kapi a rongo yininke eyi ga pura. Yipo twa tundire mongereka nokutwikira kupapara nonkedi omu natu sikisa mo yihepwa yetu yopampepo.

Morwa yirugana yoNombangi daJehova kwa yi silikire moKanada, munazinyetukadi Huntingford kwa rugene elirongo lyoBibeli nepata lyetu mokuruganesa tupu Bibeli ntani magano ga tjenge mokabuke kokasovagani. Apa ga ya yi dimbwilire asi kapi tatu mu rapota kepangero, yipo ga tu reterere yimbapiratjangwa yoBibeli. Ose ngatu horeke nawa yimbapiratjangwa kehagero lyankenye elirongo. *

Kugusa ko makwamakwamo noyilimbikiso, munazinyetu Huntingford nga zuvhisa mbudi zongwa nomupampi. Upampi wendi kwa kundamene nge ntani kwa tumangedere nge ni kwaterere kousili. Konyima zomvhura zimwe zapa vakurona vange va gwene ekuho ngavamwe woNombangi daJehova, name tani gwana ekuho. Ekuho lyange kwa kere 27 Murongankuru 1949, metemba eli vanafarama ngava nwisire yimuna. Ado nomvhura dange 17. Konyima zoyo, ame kwa tokomenene kurugana sirugana sosiruwo nasinye.

Ame kwa likata-katere mokutameka uzuvhisi wokukarerera. Posiruwo songandi, ame kwa rugene  mombanga ntani nomomberewa morwa kwa lizuvhire asi na hepere yimaliwa mokulivateresa ko. Ngomudinkantu ga hana udivi, ngani zonagura po usimbu yimaliwa eyi ngani tambura. Yipo munazinyetu gedina Ted Sargent ga korangedere nge ni kare nouradi ntani nehuguvaro mwaJehova. (1 Hist. 28:10) Netumangedo olyo lyewa, yipo na tamekere uzuvhisi wokukarerera mwaMangundu 1951. Ame kwa kere tupu 40 dolla nombasikora ntani ndjato zange zompe. Nye Jehova nkenye apa nga pakere mbili yihepwa yange. Ame kuna kupandura kweyi na tambwire ekorangedo mokutameka uzuvhisi wokukarerera! Eyi kwa twaredesere komatungiko gokomeho.

Ezuva limwe kongurova mwaSiwogedi 1952, ame kwa gwene ngodi ezi za tundililire koToronto. Beteli zomoKadana zoNombangi daJehova kwa zigidire nge ni ka tameke kurugana mwaSitarara. Nampili ngomu na kere nonomuga ntani kapi na dingura rumwe mberewa zomutayi, ame kwa hefe unene morwa vazuvhisi vamwe kwa tanterere nge yininke yokuhafesa kuhamena Beteli. Ame kwa lizuvhire emanguruko.

Konyima zonomvhura mbali zapa na ka sikire koBeteli, yipo na pinganenene mo Bill Yacos ogu ga kere mukwafi gombungakriste (ngesi kumutumbura asi muwapaiki gombunga zovakuronambunga) zoruha rwaShaw moToronto. * Apa na kere nonomvhura 23, ame ngani lizuvhu asi mumati gokofarama ogu ga dira kudiva yuma. Nye nelinunupiko neharo, munazinyetu Yacos kwa likidire nge eyi nani rugana. Ntani Jehova kwa vaterere nge unene.

Munazinyetu Yacos, munene rutu ntani musupi gokuzoragana, age kwa here vantu. Age kwa here vanavazinyetu, ano nawo kwa mu here. Age nkenye apa ngava dingura komambo gawo, nye kapisi paapa tupu ngava kara nomaudigu. Bill Yacos kwa korangedere nge name ni rugane yokulifana ntani nokuruganena kumwe novanavazinyetu moyirugana yokuzuvhisa. Age kwa tente asi: “Ken, likida vanavazinyetu asi ove kuvapakera mbili. Oyo ngayi ku vatera o dire kudemenena komapuko gawo.”

Jehova kwa vatera nge monkedi zokulikarera kutundilira mwaMurongagona 1957. Kwedi oko yipo na kwere Evelyn, ogu ga ka kere mombunga 14 zoSikora zaGiliyata. Komeho tu ka likware, age nga ruganene momukunda gwaQuebec omu ngava uyunga Rufransa. Momazuva gena, mukunda gwaQuebec kwa zulire mo Vakatolika. Evelyn kwa kere nositumbukira sosidigu, nampili ngoso age ga likidire ulimburukwi kositumbukira sendi noku kwaJehova.

Evelyn nkenye apa nga likida ulimburukwi mononkwara detu. (Efe. 5:31) Ulimburukwi wendi kwa u hetekere konyima tupu zapa twa likwere! Ose kwa wapaikire rugendo rokuza koFlorida moAmerika, nye ezuva lyokukwama ko konyima zononkwara detu, mberewa zomutayi yipo za pulire nge ni ka kare mepongo eli lya kere ure wosivike moBeteli zomoKanada. Epongo eli kwa donganesere rugendo rwetu, nye name naEvelyn kwa here kurugana nkenye eyi ga tu harerere Jehova tu rugane. Yipo twa hagekere rugendo rwetu. Mosivike oso, mukadange kwa rugene  yirugana yokuzuvhisa pepi noBeteli. Nampili ngomu mukunda ogo gwa lisigire nogu gwaQuebec, age kwa kovekedere kuzuvhisa.

Kouhura wosivike oso, ame kwa gwene mbudi asi tava tumu nge ngomutareli gonombungakriste koMuzogo gwaOntario. Ame kwa kere mupe mononkwara ntani nonomvhura 25 tupu, na hana udivi, nye morwa kuhuguvara mwaJehova yipo twa zire. Posiruwo sokufu unene moKanada, yipo twa rondere momahina gorutenda kumwe novatareli wokudingura woudivi ava va tengaukire kosirugana sawo soutareli. Awo kwa tu korangedere sili unene! Munazinyetu gumwe kwa here kutupa etuwa lyendi eli lya kere nokarafana asi tu ka rare mo, yipo asi kapisi ngatu hingire masiku nagenye poyipundi morwa kudira mararo. Ngurangura zokukwama ko, mazuva 15 konyima tupu zekwareko lyetu, ose kwa ka dingwire kambungagona komoHornepayne, ezi nina tumbura ketamekero.

Name naEvelyn kwa tu ndindilire marunduruko gomanzi. Siruwo esi twa rugene sirugana sokudingura nomukunda kehagero lyomvhura 1960, yipo na gwene ezigido lyokukakara mombunga 36 zoSikora zaGiliyata, sikora somakwedi murongo ezi za tamekere mwaMurongankuru 1961 moBrooklyn, New York. Ame kwa hefe, nye ruhafo rwange kwa ru donganesere morwa Evelyn kapi va mu zigidire mokuza kumwe name. Nye ngwendi vakadi vakwawo ava ya kundamene, Evelyn kwa mu pulire a tjange mbilive zokulikida asi nage ana yi kwatesa ko mokuligaunuka namugara gwendi makwedi murongo. Evelyn kwa lilire, nye ose twa yi tambwire asi ame na hepa kuza kosikora, ntani age ga yi haferere asi ngani ka gwana edeuro lyomulyo koGiliyata.

Mosiruwo oso na zire, Evelyn kwa rugene komberewa zomutayi zomoKanada. Age kwa gwene situmbukira sokulikarera sokukara monzugo zimwe namunazinyetukadi gomugwavekwa, Margaret Lovell. Yosili, name naEvelyn kwa lirongwere unene! Nye nevatero lyaJehova, ose kwa sikisire mo yitumbukira oyo yopokaruwogona. Eharo lyendi lyokuzambera siruwo setu sokukara kumwe yipo tu rugane unene mosirugana saJehova nomombunga zendi kwa kundamene nge unene.

Konyima zomakwedi gatatu gokukara koGiliyata, munazinyetu Nathan Knorr, ogu nga pitisire sirugana sokuzuvhisa uzuni mudima, kwa pere nge hena ezigido lyokulikarera. Age kwa pulire nge nsene asi kuvhura ni sige Sikora zaGiliyata yipo ni tengure koKanada mokukakara murongi goSikora zoYirugana yoUhompa komberewa zomutayi. Munazinyetu Knorr kwa tanterere nge asi kapi na hepa kutambura ezigido olyo. Ame kuvhura ni mane Sikora zaGiliyata nsene nina hara, makura nampo ngava tume nge mosirugana soutumwa. Age hena kwa tente asi nsene ni tokora kutengura koKanada, nampo kapi ngava zigida nge hena koGiliyata, ano konyima kuvhura ngava ninke nge ni tengure hena mosirugana sokuzuvhisa moKanada. Age kwa hundilire nge ni ture po etokoro konyima zokuyizogera namukadange.

Mokumona asi Evelyn ga tanterere nge nare mutaro gwendi kosirugana soUhompa, ame yipo na tanterere munazinyetu Knorr asi: “Nkenye eyi zina tu harere mbunga zaJehova tu rugane, ose tuna hafa  mokuyirugana.” Ose kwa lizuvhire asi kugusa ko eyi twa hara, ose kuvhura kuza nkenye oku ngazi tu tuma mbunga zaJehova.

MwaKudumogona 1961, yipo na sigire Brooklyn nokutengura koKanada mokukaronga Sikora zoYirugana yoUhompa. Konyima zoyo, yipo twa tamekere kurugana moBeteli. Na hana kuyindindira, ame kwa gwene hena ezigido lyokukakara mombunga 40 zoSikora zaGiliyata, ezi za tamekere 1965. Evelyn ga hepere hena kutjanga mbilive zokulikida asi ana yi kwatesa ko mokuligaunuka. Nye konyima zoyivike yongandi, yipo nage ga gwene ezigido lyokukakara kumwe name mosikora ozo, eyi kwa tu reterere ruhafo rorunene.

Konyima zapa twa ka sikire koSikora zaGiliyata, munazinyetu Knorr kwa tu tanterere asi varongwa ava vana kulihameka mosure zeraka lyoRufransa, omu nose twa kere, ngava va tuma koAfrika. Nye apa twa mene, yipo va tu tumine hena koKanada! Ame kwa horowere nge ngomutareli gomupe gomberewa zomutayi (vana kutumbura ngesi asi muwapaiki goKomitiye zomutayi). Ame opo nonomvhura 34, tani tantere munazinyetu Knorr asi: “Ame simpe ni munona.” Nye age kwa pere nge ehuguvaro. Kutundilira ketameko, komeho zokutulisa po matokoro gomanene ame ngani hedere vanavazinyetu wovakurona ava va kere noudivi moBeteli.

Sirugana soBeteli kwa pere nge nompito mokulirongera ko kovakwetu. Ame ngani fumadeke unene vakwetu wombunga zoKomitiye zomutayi. Ame hena kwa kundama nge yihonena yoVakriste wovagara nava wovakadi monaruwa, vadinkantu novakondi ava twa tungire nawo moBeteli ntani nava womonombungakriste dokulisiga-siga omu twa kere.

Sirugana soBeteli kwa pere nge hena mpito zokuronga wopeke nokunkondopeka epuro lyawo. Mupositoli Paurusa kwa tanterere Timoteusa asi: “Kara mousili ou wa lironga.” Age hena kwa tente asi: “Nonkango edi wa zuvha kwange ado nondipo dononzi kuna kutara, di gava kovagara wokuvhura kuhuguvara, nawo ngava vhure hena kudironga vakwaawo.” (2 Tim. 2:2; 3:14) Poyiruwo yimwe Vakriste vakwetu kupura nge eyi na lirongera mo mosirugana soBeteli monomvhura 57. Elimbururo lyange kukara asi: “Rugana tupu nkenye eyi zina ku harere mbunga zaJehova, nokuhuguvara mwendi a ku vatere.”

Ayo kumoneka ngwendi nkera tupu kani ya sikire moBeteli ngomumati gonomuga ntani ga hana udivi. Monomvhura nadinye odo, Jehova kwa ‘nkondopeka nge.’ Unene po kupitira monkenda zendi ntani nemevatero lyovapuli vakwetu, age kuna kutwikira ku pa nge ehuguvaro asi: “Wa ha tjira, ame tani ku kwafa.”—Jes. 41:13.