1. Mbunga musinke za pinganenene po muhoko goVaisraeli ogu gwa nyokere Karunga? (Tara efano.)

MOSIRUWO sanare, Vaisraeli kwa kere muhoko ogu ga horowere Jehova, nye nampili ngoso va mu nyokere. Ano naina vantu vaJehova kumukarera monkedi ezi a hafere. Moomu twa yi zogerere mosirongwa sa ka pita, Jehova kwa horowere vasikuli vaKristusa wokuhova va pinganene po muhoko goVaisraeli. Mbunga ezi zompe ga here Karunga, kwa zi parwire momvhura 70 apa va zonagwire po Jerusarema. (Ruk. 21:20, 21) Yihorokwa yina kwa likidire eyi ngayi ya horokera muhoko gwendi gomupe. Uzuni waSatana ntaantani va ka u zonagure po, nye mbunga zaKarunga ngazi paruka. (2 Tim. 3:1) Ngapi omu twa yi diva eyi?

2. Yisinke ga uyungire Jesus kuhamena “udigu wounene,” ntani ngapi omu ngau tameka?

² Jesus kwa pumbire eyi ngayi horoka pomazuva gopouhura asi: “Ngapa kara udigu wounene, ou wa dilire kukara po kutunda ketameko lyouzuni dogoro nokwanaina, wangoso hena kapi ngau kara po rumwe.” (Mat. 24:3, 21) Udigu ou wounene ngau tameka apa Jehova nga ruganesa mapangero  govantu ga zonagure po “Babironi zonene,” maukarelikarunga nagenye goyimpempa. (Ehor. 17:3-5, 16) Yisinke ngayi kwama ko?

3. Konyima zokuzonagura po maukarelikarunga goyimpempa, yisinke ngayi horokera vantu vaJehova?

³ Konyima zokuzonagura po maukarelikarunga goyimpempa, Satana nouzuni wendi ngava homokera vakareli vaJehova. Pasihonena, kombinga ‘zaGogo mosirongo saMagogo,’ Matjangwa kwa pumba asi: “Age novakwayita vendi nonomuhoko dononzi kumwe nendi ngava homona ngwendi kakunguru, tava kudumike sirongo ngwendi eremo.” Morwa Nombangi daJehova kapi va kara novakwayita ntani awo vantu wombili, awo ngava moneka ngwendi kwato epopero. Nye ngayi kara epuko lyenene kuhomokera vantu vaJehova.—Hes. 38:1, 2, 9-12.

4, 5. Ngapi Karunga nga tara ehomono lyaSatana lyokuzonagura po vakareli vendi?

⁴ Ngapi Karunga nga tara ehomono lyaSatana lyokuzonagura po vakareli vendi? Jehova nga kwatera mo vakareli vendi, pokulikida uhunga woUpangeli wendi wanayinye. Age nga tara ehomono lyovakareli vendi ngwendi yige vana kuhomona. (Resa Sakaliya 2:8.) Makura Guhyetu gemeguru nga rugana ko yuma yipo a tu popere. Konyima zokutupopera, ntani nga zonagura po uzuni waSatana poHarumagedoni, ‘yita mezuva lyenene lyaKarunga Munankondo.’—Ehor. 16:14, 16.

⁵ Kuhamena Harumagedoni, Bibeli kwa tanta asi: “‘HOMPA kuna kara noyuma yokuvyuka nomuhoko nga reta vantu navenye kompanguro, ano vadinikarunga nga va dipaga. HOMPA ana yi uyunga.’ HOMPA Munankondo nadinye ta tanta asi: ‘Simpagwa kuna kuwiza konomuhoko tunda ogu zende ogu, ano kakunguru gomunene kuna kumupongaika oku wa ka twa uzuni. Mezuva olyo yimpu eyi nga dipaga HOMPA, ngayi lihana kutunda kouhura ou wouzuni dogoro koukwawo. Nagumwe si ogu nga va lira, hena kapi ngava va damuna po asi va ka va vhumbike, ngava rara pevhu ngwendi nondambo doruhoho.’” (Jer. 25:31-33) Uzuni ou woudona ngau zonauka po poHarumagedoni. Nye ruha rwepevhu rombunga zaJehova kapi ngava ru zonagura po.

6, 7. (a) Kupi lya tundilira “emukurumbunga”? (b) Ngapi omu emukurumbunga lina kuligwederera?

⁶ Mbunga zaJehova kuna kugenderera kuligwederera morwa kwa kara mo vantu ava ga hara. Bibeli kutanta asi: “Meho gaHompa kwa tara kovahungami, age kupurakena nkenye apa makanderero gawo.” (1 Pet. 3:12) Vahungami kwa kwatera mo “emukurumbunga lya hana kuvhura kuvara” eli ngali “tunda momahepeko gomanene.” (Ehor. 7:9, 14) Nove gumwe gemukurumbunga eli ngali ka paruka ‘poudigu wounene’ ndi?

⁷ Emukurumbunga kwa tundilira monomuhoko nadinye. Sirugana sokuzuvhisa kureta kumwe nomuhoko edi. Moomu ga yi pumbire Jesus asi : “Mbudi zoNgwa ezi zoUntungi waKarunga tanko ngava zi divisa mwa za uzuni mudima, zi kare umbangi wonomuhoko nadinye, ntani nye ngaku kwama uhura.” (Mat. 24:14) Esi kuna  kara sirugana somulyo po mombunga zaKarunga pomazuva aga gopouhura. Morwa Nombangi daJehova kuna kurugana sirugana sokuzuvhisa nokuronga mouzuni mudima, mamiliyona govantu kwa kulironga omu nava karera Karunga ‘mompepo nomousili.’ (Joh. 4:23, 24) Pasihonena, kutundilira 2003 dogoro 2012 vantu wokupitakana mamiliyona 2 707 000 kwa ligava kwaJehova pokugwana ekuho. Mouzuni mudima kwa kara mo Nombangi dokupitakana mamiliyona 7 900 000, ano nkenye mvhura, poMurarero gwaHompa kukara po vantu wokupitakana mamiliyona. Ose kuhafa mokumona emukurumbunga kuna kugenderera kuligwederera, ntani twa yi diva asi ‘Karunga yige ana kulikulisa.’ (1 Kol. 3:5-7) Ano ayo kuna kumoneka asi emukurumbunga kuna kuligwederera nkenye mvhura.

8. Morwasinke mbunga zaJehova zina kugenderera kuligwederera?

⁸ Sivaro sovantu vaJehova Karunga kuna kuligwederera unene, morwa age kuna kukwatesa ko Nombangi dendi. (Resa Jesaya 43:10-12.) Jesaya kwa pumbire kuhamena mazuva gopouhura asi: “Nepata lyeeli lyenunu lyesupi ngali nenepa tali nkondopa ngwendi muhoko. Apa ngasi sika mo siruwo, ngani yi ninka yi horoke usimbu eyi. Ame nyame HOMPA!” (Jes. 60:22) Petameko vagwavekwa kwa kere tupu ‘nepata lyenunu,’ nye sivaro sawo kwa ya ligwederera apa vagwavekwa vakwawo va ya lipakerere nombunga zaKarunga. (Gar. 6:16) Morwa etungiko lyaJehova, ekuro kuna kutwikira mokupongaika emukurumbunga.

9. Yisinke twa hepa kurugana nsene tuna hara meho zongwa ezi ga tu tumbwidira Karunga?

⁹ Yi kare asi tu vagwavekwa ndi vememukurumbunga, Jehova Karunga kwa tu tumbwidira meho zongwa. Mokukagwana meho ozo, twa hepa kulimburukwa konompango dendi. (Jes. 48:17, 18) Pasihonena, apa Vaisraeli ngava limburukwa koveta zaMosesa, kwa va poperere koruhonda nokuvaronga omu nava rera vana vawo ntani kurugana ngesefa monaruwa nomu va hepere kutekura vakwaawo, ntani nayimwe ngoso. (Ex. 20:14; Lev. 19:18, 35-37; Deut. 6:6-9) Nose kugwanena mo uwa apa atu limburukwa koyipango yaKarunga, ntani ayo kapi ya paka udigu. (Resa 1 Johanesa 5:3.) Apa atu yi limburukwa, ose kugwana ruhafo meparu, ntani ‘epuro’ lyetu mwaJehova kunkondopara.—Tit. 1:13.

10. Morwasinke natu litulilira po siruwo sokulironga Bibeli nokurugana Ukareli wEpata nkenye sivike?

¹⁰ Ruha rwepevhu rombunga zaJehova kuna kutwikira komeho nomarunduruko gomape. Pasihonena, azo kuna kutuvatera tu kwate egano usili woBibeli kupitakana pwanare. Eyi yiyo za tumbwidira Bibeli asi: “Nzira ezi ava gendi vahungami, ngwendi ezuva lina kusa, taku zere tupu taku zere dogoro mutenya tagu wiza.” (Yis. 4:18) Nye kuvhura tu lipure asi: ‘Ame kuna kukwama marunduruko gomape omu vana kufaturura usili womoMatjangwa ndi? Ame na kara neharo lyokuresa Bibeli nkenye ezuva ndi? Ame kuresa yimbapiratjangwa nayinye ndi? Ame kukara nkenye sivike noUkareli wEpata ndi?’ Natuvenye kuvhura tu yi kwatese ko asi kapisi ureru kuyirugana. Nye twa hepa kulitulira po siruwo sokuyirugana. Ayo mulyo unene asi tu twikire kulironga Nonkango daKarunga nokuditura pasirugana, nokunkondopeka elikwatakano lyetu naKarunga, unene po ngomu tuna kuhedera pepi noudigu wounene!

11. Morwasinke vakareli vaJehova ava zire komapongo nokoyigongi?

 ¹¹ Mbunga zaJehova kwa tu harera uwa apa azi tu korangeda tu kwame epukururo lyomupositoli Paurusa eli asi: “Atu likoraike-koraikeni mokulihara-hara nomokurugana yirugana yoyiwa. Twa ha zumbeni yigongi yomombungakriste zetu, moomu va yi yika vamwe, nye atu likorangedeni, unene pokumona asi ezuva lyaHompa tali hedere pepi.” (Heb. 10:24, 25) Yipito nomapongo aga ngava kara nago Vaisraeli kwa nkondopekere epuro lyawo. Ntani hena yilika yangoso ngwendi Sipito soYikorogo kwa kere yilika yoruhafo momazuva gaNehemiya. (Ex. 23:15, 16; Neh. 8:9-18) Naina, nose kugwana mauwa gokulifana komapongo nokoyigongi yetu. Tu ruganeseni mawapaiko aga yipo tu gwane ruhafo nokunkondopeka elikwatakano lyetu naKarunga.—Tit. 2:2.

12. Ngapi omu atu lizuvhu kuhamena sirugana sokuzuvhisa?

¹² Natuvenye ava twa lipakerera nombunga zaKarunga, kuhafera ‘yirugana yokupongoka yombudi zongwa zaKarunga.’ (Rom. 15:16) Kulihameka ‘moyirugana eyi yokupongoka’ kutuninkisa tu kare “varugani kumwe” naJehova, “Mupongoki.” (1 Kol. 3:9; 1 Pet. 1:15) Kuzuvhisa mbudi zongwa kukwatesa ko epongoro lyedina Jehova. Ntani aso kuna kara situmbukira sosinene sokuzuvhisa ‘mbudi zongwa zouyerere’ waKarunga.—1 Tim. 1:11.

13. Yisinke twa hepa kurugana mokukara nelikwatakano lyewa naKarunga nokukagwana ezoworo?

¹³ Karunga kuna tu harere tu kare nelikwatakano lyewa kumwe nendi pokumulimburukwa nokukwatesa ko mbunga zendi moyirugana yokulisiga-siga. Mosesa kwa tanterere Vaisraeli asi: “Ame ngesi tani mu pe ehoroworo pokatji komwenyo nonomfa nopokatji ketungiko lyaKarunga nefingiliro lyaKarunga, ame hena tani zigida eguru nevhu, yi kare nondipo dehoroworo lyeni. Horoworeni po mwenyo. Hareni HOMPA Karunga gweni, tomu mu limburukwa oku tomu mu huguvara, asi ngomu pukure mo nyamweni noruvharo rweni mosirongo esi ga tumbwidira ozinyakurweni oAbirahamu naIsaka naJakopo, asi nga si va pa.” (Deut. 30:19, 20) Mokugwana ezoworo, twa hepa kurugana mpango zaJehova nokumuhara nokupurakena kezwi lyendi ntani nokumulimburukwa.

14. Ngapi munazinyetugara gumwe ga lizuvhire kuhamena mbunga zaJehova?

¹⁴ Munazinyetugara Pryce Hughes, ogu ga limburukwire kwaKarunga nokukwatesa ko mbunga zendi, kwa tjenge asi: “Ame kupandura kweyi na ya divire sitambo saJehova komeho tupu zomvhura 1914 . . . Ano sininke somulyo na ya dimbwilire kuna kara sokutwikira kukwatesa ko mbunga zaJehova. Eyi na limonena meparu kwa rongere nge omu ya kara epuko kukwama magano govantu. Kutunda opo, yipo na tokwere kukwatesa ko mbunga zaJehova. Monkedi ezi yimo mwelike Jehova na ku hafera nokukutungika.”

15. Sihonena musinke somoBibeli asi likida omu natu tara marunduruko aga zina kutulisa po mbunga zaJehova?

¹⁵ Nsene tuna hara Jehova atu hafere nokututungika, twa hepa kugenda kumwe nombunga zendi ntani nokutambura marunduruko gomape omu vana kufaturura Matjangwa. Pasihonena, konyima  zonomfa daJesus pwa kere mayovi goVakriste woVajuda ava va kere noupampi mokukwama veta zaMosesa ntani kapi va here kuzisiga. (Yirug. 21:17-20) Nevatero lyombilive zaPaurusa ezi ga tjangerere Vahebeli, awo va yi tambwire asi kapi va va zowora kupitira mononzambo “edi ava zamba moomu za tanta Veta,” nye kupitira ‘mwaJesus Kristusa ogu ga geve rutu rwendi, ru kare nzambo pwarumwe tupu.’ (Heb. 10:5-10) Sinzi soVakriste woVajuda va rundwilire magazaro gawo nokutambura epukururo lyaPaurusa. Twa hepa kulitura mo unene kulironga Bibeli noyimbapiratjangwa, ntani twa hepa kutambura nelinunupiko marunduruko aga zina kutulisa po mbunga zaJehova.

16. (a) Morwasinke eparu moParadisa ngali karera lyoruhafo? (b) Yisinke ono kundindira mouzuni woupe?

¹⁶ Navenye ava ava limburukwa Jehova nombunga zendi ngava gwana matungiko. Vagwavekwa wovalimburukwi ngava ka hafera yitumbukira yoyinene ngovapingi kumwe naKristusa meguru. (Rom. 8:16, 17) Nsene wa kara nehuguvaro lyepevhu, gazara tupu omu ngayi ka kara mokukaparuka moParadisa. Ngoruha rombunga zaJehova, ose tuna hafa mokutantera ko vantu kuhamena etumbwidiro lyaKarunga lyouzuni woupe! (2 Pet. 3:13) Episarome 37:11 kutanta asi: “Valinunupiki yiwo ngava hingira sirongo, awo ngava hafera mpora zonene.” Vantu “ngava litungira mambo omu ngava kara,” ntani “ngava hafera unene yininke eyi va rugana vene.” (Jes. 65:21, 22) Kapi ngaku ka kara hena ruhepo nonzara. (Epis. 72:13-16) Babironi zonene kapi ngazi pukisa hena vantu, morwa ngava zi zonagura po. (Ehor. 18:8, 21) Vafe ngava va vhumbura nokukavapa mpito zokukaparuka narunye. (Jes. 25:8; Yirug. 24:15) Nsene tu nkondopeka elikwatakano lyetu naJehova nokutwikira kukwama mbunga zendi, matumbwidiro nagenye ogo ngaga ka sikilira mo mwetu.

17. Malizuvho musinke twa hepa kukara nago koukareli waJehova nokombunga zendi?

¹⁷ Ngomu uzuni ou una kuza kouhura, tu twikireni kunkondopeka epuro lyetu nokulikida rupandu rorunene kewapaiko lyaKarunga. Ngoso yimo ga lizuvhire Ndafita ogu ga dimbire asi: “Ame kwa hundira kwaHOMPA sininke simwe; oso sininke simwe oso, yiso sooso nina hara po: sokukara monzugo zaHOMPA moukaro wange naunye, ni tetuke uwa wendi, ame ni hundilire mo egendeso lyendi.” (Epis. 27:4) Natuvenye, tu twikireni kulimburukwa Karunga nokutwikira kukwama mbunga zaJehova.