Mokuhamberera Musiti, hompa Ndafita kwa dimbire asi: “Ame kuna tokomene po yokurugana eharo lyoge Karunga gwange! Erongo lyoge tani li paka komutjima.” (Epis. 40:8) Nampili ngomu ga ligwanekerere nomaudigu ntani nomakondjeso meparu, Ndafita kwa hefe mokurugana mpango zaKarunga. Yosili, Ndafita kapisi yige gelike mukareli gwaJehova ogu ga haferere kukarera Karunga gosili.

Pokuuyunga kuhamena nonkango demEpisarome 40:8 edi va tambesera kwaMesiyasa ndi Kristusa, mupositoli Paurusa kwa tjenge asi: “Kristusa, apa ga wizire mouzuni a tantere Karunga asi: ‘Nonzambo noyigava kapi wa yi hara, nye ove kwa wapaikira nge rutu. Nonzambo dehwiko nedi dononzo, kapi wa di panda. Ame makura tani tanta asi: “Hompa, nyame ogu nina wiza ni ya sikise mo mpango zoge, ove Karunga gwange, moomu wa yi tjanga nge mobuke zoVeta.”’”—Heb. 10:5-7.

Apa ga kere pevhu, Jesus ga haferere mokuteda ko unsitwe, nokukara novakaume ntani nokulya novantu. (Mat. 6:26-29; Joh. 2:1, 2; 12:1, 2) Nye, eyi ga tokomenene po ngayi mu retere ruhafo rorunene kuna kara yokurugana mpango zoGuhwe vemeguru. Yosili, Jesus kwa tente asi: “Nondya dange dedi dokurugana mpango zogu ga tuma nge nedi dokusikisa mo sirugana sendi.” (Joh. 4:34; 6:38) Varongwa vaJesus va lirongerere ko kwaHekurwawo, eyi ayi reta ruhafo rosili. Noruhafo rorunene, awo va kere neharo lyenene mokutantera ko wopeke mbudi zoUhompa.—Ruk. 10:1, 8, 9, 17.

Jesus kwa pangerere varongwa vendi asi: “Yipo nye nomu zira konomuhoko nadinye, mu ka di ninke di kare varongwa vange, mu ka di kuhwire medina lyaGuhwe neli lyoMuna neli lyoMpepo zoKupongoka. Ka di rongeni, di ka limburukwire nayinye eyi na mu rekera. Tareni, ame neni ngani kara dogoro nokouhura wouzuni.” (Mat. 28:19, 20) Mokusikisa mo sirugana esi kwa kwatera mo kuzuvhisira nkenye oku natu gwana vantu, nokurugana  matengwiropo kowo vana kulikida elituromo, ntani nokurugana malirongo goBibeli novantu vangoso. Kurugana sirugana esi kuvhura kureta ruhafo rorunene.

Yi kare asi vantu kuna kulikida elituromo mombudi zetu ndi hawe, mokugwana ruhafo moyirugana yokuzuvhisa kwa korera konkareso zetu. Morwasinke atu twikilire kuzuvhisa mbudi zongwa nampili ngomu atu ligwanekere noyininke yokutudompesa? Morwa twa dimburura asi pokulihameka mo mosirugana sokuzuvhisa Uhompa nokutulisa po varongwa, kulikida eharo lyetu kwaKarunga ntani kovakwetetu. Yosili, eparu lyetu neli lyovantu navenye kuna kara mosiponga. (Hes. 3:17-21; 1 Tim. 4:16) Tu konakoneni magano gamwe aga ga vatera vapuli vakwetu va kwaterere koupampi wawo wokuzuvhisa nampili monomukunda donondigu.

Kuruganesa mapuro gokuwapera moyirugana yokuzuvhisa nkenye apa kureta yitundwamo yoyiwa. Ezuva limwe kongurangura, Amalia kwa mwene mugara ana kuresa saitunga mevango lyokupwizumukira. Yipo ga mu hederere nokumupura nsene eyi ga resere kwa kere mo mbudi zongwa. Apa ga limbwilire asi hawe, Amalia ta tanta asi: “Ame nina kara nombudi zongwa kuhamena Uhompa waKarunga.” Eyi kwa pindwire eharo lyomugara ogo, ntani nokutambura elirongo lyoBibeli. Amalia ya mu tompokere mokutameka malirongo goBibeli gatatu mevango eli lyokupwizumukira.

Janice kwa tura evango eli a ruganene ngomukunda gwendi gokuzuvhisira. Apa munomeni namukwawo va likidire elituromo mosirongwa simwe va pwagesere mosifo soRuhungu, Janice ga tamekere kuvaretera nkenye apa yifo oyo. Age kwa rugene yokulifana komurugani mukwawo, ogu ya hafesere yirongwa yokulisiga-siga eyi ava zogere moRuhungu nomoAwake! Ano eyi ya ninkisire hena murugani nagepeke a hundire yifo eyi. Janice kwa tanta asi: “Eli etungiko lyokutunda kwaJehova!” Ano age ga ya kere novantu 11 ava nga twarere yifo oyo nkenye kwedi.

Mutareli gokudingura kwa geve egano asi mosirugana sokuzuvhisa satunda embo zende embo, vazuvhisi kapisi va hagese nzogera nogu vana kuzuvhisira pokutanta asi ngani ka wiza ko ezuva nalyopeke. Nye, awo va hepa kupura muntu mwene asi: “Ono hara ngani ya kulikida omu atu rugana elirongo lyoBibeli ndi?” ndi asi: “Ezuva novili musinke ono hara ngani ka tengwira ko tu ya twikire nonzogera zetu?” Mutareli gokudingura kwa divisire asi pokuruganesa nkedi zangesi, vanavazinyetu womombungakriste zimwe ezi ga ka dingwire kwa tamekere malirongo goBibeli 44 mosivike simwe tupu.

Kurugana matengwiropo wa hana kupitisa po siruwo sosire, kuvhura kureta yitundwamo yoyiwa. Morwasinke? Mokurugana ngoso, kulikida nawa-nawa asi ose tuna litura mo mokuvatera vantu wonomutjima donongwa va kwate egano Bibeli. Apa  va mu pulire eyi ga lirongerere Bibeli noNombangi daJehova, mukadi gumwe kwa tente asi: “Ame kwa tamekere kulironga morwa elituromo neharo lyawo eli va likidire nge.”

Konyima tupu zomazuva gongandi zapa ga tundire koSikora zoVazuvhisi wokukarerera, Madaí kwa rugene malirongo goBibeli 15, ano wokupitakana 5 kwa va geve kovazuvhisi vapeke. Sinzi sovarongwa vendi woBibeli kwa tamekere kuwiza komapongo nkenye apa. Yisinke ya vaterere Madaí a tameke malirongo goBibeli gomanzi ngoso? Sikora kwa mu vaterere omu ya kara nohepero zokutwikira kutengwira ko nkenye apa dogoro ga gwene ava va likidire elituromo lyousili. Mbangi zimwe ezi za vatera vantu wovanzi va lironge usili woBibeli kwa tanta asi: “Ame na lironga asi kukovekeda kurugana matengwiropo kuna kara mulyo unene mokuvatera vantu ava vana hara kudiva Jehova.”

Kurugana matengwiropo ntani malirongo goBibeli kwa hepa elituromo lyenene. Nye yitundwamo kureta ruhafo kupitakana elituromo lyetu. Apa atu litura mo mosirugana sokuzuvhisa, ose kuvhura kuvatera vantu “va ka sike kediwo lyousili,” ntani eyi kutanta asi kuvhura ngava ka paruke. (1 Tim. 2:3, 4) Ano eyi kuvhura yi tu retere ruhafo rorunene oru natu dira kugwana nkenye oku.