1, 2. (a) Sipango musinke sauvali ga uyungire Jesus? (b) Mapuro musinke natu ka zogera?

MOKUHETEKA Jesus, Mufalisayi gumwe kwa pulire asi: “Murongi, sipango esi sa pitakana po yikwawo moVeta zaKarunga nani sipi so po?” Ngamoomu twa yi lirongere mosirongwa sa ka pita, Jesus kwa limbwilire asi: “O hare Hompa Karunga goge nomutjima goge nagunye nomwenyo goge nagunye nonondunge doge nadinye. Esi yiso sipango po sosinene sokuhova.” Jesus kwa gwederere ko asi: “Ano sikwawo sauvali, esi sa hura pwesi, yiso esi asi, ‘Ano a kare mukweni, o mu hare moomu wa lihara nyamoge.’”—Mat. 22:34-39.

² Jesus kwa tente asi twa hepa kuhara vakwetu moomu twa lihara nyamwetu. Ya wapa kulipura asi: Yilye mwene ogo mukwetu? Ngapi omu natu likida eharo kovakwetu?

3, 4. (a) Sifanekeso musinke ga ruganesere Jesus apa ga limbwilire epuro eli asi: “Mwene ogo mukwetu yilye?” (b) Ngapi Musamaliya ga vaterere mugara ogu va hakanene nokumutoona? (Tara efano.)

³ Ose nkenye apa kugazara asi mukwetu kuna kara  muntu ogu twa diva ndi twa hara. (Yis. 27:10) Nye apa mugara gumwe gokulihungameka ga pulire Jesus asi: “Mwene ogo mukwetu yilye?” Melimbururo lyendi, Jesus kwa ruganesere sifanekeso soMusamaliya gonkenda. (Resa Rukasa 10:29-37.) Mugara goMujuda kwa mu hakanene yininke yendi nokumutoona dogoro kuhara kufira mo. Mupristeli noMurevhi, ava va kere worudi rwendi va mu mwene, nye kapi va mu vaterere. Nye Musamaliya yige ga mu vaterere, nampili ngomu va linyengere noVajuda posiruwo sina.—Joh. 4:9.

⁴ Musamaliya makura ta dingi yironda yomugara ogo nokutjira po magadi novhinyu. Makura ta gusa tumaliwa tuvali ta tu pe mwenyahotera a mu pakere mbili. (Mat. 20:2) Eyi kuyimonenena asi yilye mukwawo gomugara gwina va toonene. Sifanekeso saJesus kuturonga omu natu likida nkenda neharo kovakwetu.

5. Ngapi omu vakareli vaJehova ava likida eharo poyiruwo yoyimpagwa?

⁵ Naina udigu kugwana vantu wonkenda ngwendi Musamaliya, morwa kuna kuparuka pomazuva gopouhura apa vantu vana kara nonyanya nokudira nkenda nava woyikotjongana ntani wokunyenga yoyiwa. (2 Tim. 3:1-3) Pasihonena, mwaSikukutu 2012, ekundungu lyononkondo kwa zonagure maruha goSitata saNew York. Sinzi sovantu kapi va kere norutjeno ndi noyininke eyi va hepere. Vantu kwa hakanene ava va kere mosimpagwa. Ano Nombangi daJehova kwa tulire po mawapaiko gokuvatera vanavazinyawo novantu wopeke womukunda ogo. Ado kuyiruganena eyi, morwa eharo lyokuhara vakwawo. Mononkedi musinke dimwe natu likida eharo kovakwetu?

6. Ngapi omu sirugana setu sokuzuvhisa asi hengagwida vakwetu?

⁶ Ruganesa Bibeli mokuhengagwida vantu. Moyirugana yokuzuvhisa, ose kugava ‘ehengagwido lyokutundilira moMatjangwa.’ (Rom. 15:4) Ose kulikida eharo kovakwetu apa atu ruganesa Bibeli mokuvatantera ko mbudi zongwa zoUhompa waKarunga. (Mat. 24:14) Azo mfumwa mokudivisa mbudi zoUhompa zokutunda kwaKarunga ‘ogu a tu pe ehuguvaro.’—Rom. 15:13.

7. Mpango musinke za kara mwaMateusa 7:12, ntani yisinke ngayi horokera ava ava zi kwama?

⁷ Kwama mpango zomwaMateusa 7:12. Jesus pEudiso lyendi lyopoNdundu kwa tente asi: “Nkenye eyi mwa harera vantu asi ava yi mu ninke, none omu yi va ninke, yeeyi eyi yiyo azi tanta Veta nomatjangwa govaporofete.” (Mat. 7:12) Apa atu tekura vantu kuliza nomu tuna hara va tu tekure, ose ngoso kuna kukwama “Veta” ezi va tjanga mwaGenesis dogoro mwaDeuteronomium ntani ‘nomauporofete’ aga va tjanga moMatjangwa goRuhebeli. Matjangwa ogo kwa likida asi Karunga kutungika ava va hara vakwawo. Pasihonena, kupitira mwaJesaya, Jehova kwa tente asi: ‘Ruganeni yousili neyi ya hungama, ame ngani tungika ava ava rugana ngesi.’ (Jes. 56:1, 2) Nsene tu hara vakwetu nokukwama mpango zomwaMateusa 7:12, ose ngava tu tungika.

8. Morwasinke natu harera nonkore detu, ntani yisinke ngayi horoka nsene tu yi rugana?

⁸ Hara nonkore doge. Jesus kwa tente asi: “One mwa zuvha sa omu va tanta asi, ‘O hare mukweni, to nyenge gonkore zoge.’ Nye ame tani mu tantere asi, omu hare wonkore zeni, omu va ruganene yoyiwa  ava va mu nyenga, one tomu kandererere mo ava ava mu rundire oku tava mu hepeke, asi omu kare mu vana vaGuhyeni gemeguru.” (Mat. 5:43-45) Mupositoli Paurusa kwa geve epukururo lyokulifana apa ga uyungire asi: “Nkore zoge nsene zina fu nzara, zi pa nondya zi lye, nsene zina fu enota zi pa ko yokunwa.” (Rom. 12:20; Yis. 25:21) Kuliza noVeta zaMosesa, vantu ngava kwafa sindongili sonkore nsene sina gu ganda murongero. (Ex. 23:5) Pokuliruganena uwa wangoso, ava va kere nonkore kuyakara vakaume wovawa. Morwa Vakriste kulikida eharo, nonkore detu dononzi kwa rundurura mutaro gwado kwetu. Vamwe vawo kuvhura kuyakara vakareli vaJehova.

9. Yisinke ga uyungire Jesus natu rugana nsene tuna lizono namunazinyetu?

⁹ ‘Kondjera kukara nombili nanavenye.’ (Heb. 12:14) Eyi kwa kwatera mo kukara nombili novanavazinyetu, morwa Jesus kwa tente asi: “Nsene o reta sigava sonzambo kosizambero, nye ove o diworoke asi pweli mukweni ogu ono kudira kuzora nendi, siga tanko nzambo zoge posizambero, o ka lipe mbili namukweni, ntani nye no ka tengura o ya zambe sigava soge kwaKarunga.” (Mat. 5:23, 24) Karunga nga tu tungika nsene tu hara vanavazinyetu nokutulisa mbili nsene tuna lizono nawo.

10. Morwasinke natu dilira kupangura vakwetu?

¹⁰ Wa ha pangura vakweni. Jesus kwa tente asi: ‘Walye omu genderere kupangura, Karunga nage nga dire kumupangura. Yeeyi ngava mu pangwisisa koyipangura yeeyi omu pangwisa nayo. Si kare sihetekeso esi omu hetekesa, yiso ngava mu hetekesesa none. Yinke yokuzigira kavambi meho lyamukweni, ano ove wa hana kumona nkambo ezi zina vindama meho lyoge? Ndi ngapi no tantera mukweni asi, “Siga nge ni ku guse kavambi oko kana kara meho lyoge,” nye ove nyamoge kuna ku vindama nkambo meho lyoge? Ano ove muyilipaki, hova tanko kuligusa nkambo ezi zina vindama meho lyoge, ntani nye no wapa kugusa kavambi meho lyamukweni.’ (Mat. 7:1-5) Eyi kutanta asi twa ha pangura vakwetu nsene vana tura mapuko morwa nose kutura mapuko gomanzi.

11, 12. Nkedi musinke zongwa po zokulikida eharo kovakwetu?

¹¹ Pwa kara nonkedi dononzi dokulikida eharo kovakwetu. Ngwendi Jesus, nose kuzuvhisa mbudi zongwa zoUhompa. (Ruk. 8:1) Jesus kwa pangerere vasikuli vendi va ze ‘konomuhoko nadinye va ka di ninke varongwa.’ (Mat. 28:19, 20) Apa atu limburukwa Jesus, ose kuvhura kuvatera vakwetu va sige nzira zangwanyunuka ezi azi twara kokudona nokuvalikida omu nava genda monzira za likokera ezi azi twara komwenyo. (Mat. 7:13, 14) Ose twa yi diva asi Jehova kuhafera elituromo lyetu.

¹² Ngwendi Jesus, ose kuvatera vantu va kwate egano nonkango daKarunga. (Ruk. 11:28) Ose kuhonena Jesus apa atu tantere ko vantu kuhamena ‘mbudi zongwa zaKarunga.’ (Rom. 1:1) Ava ava ya tambura mbudi zoUhompa kuyalikwatakana naKarunga kupitira mwaJesus Kristusa. (2 Kol. 5:18, 19) Kuzuvhisa mbudi zongwa kuna kara nkedi zongwa po zokulikida eharo kovakwetu.

13. Ngapi o lizuvhu apa o rongo vantu kuhamena Jehova?

¹³ Apa atu liwapaikire nawa pokurugana matengwiropo nomalirongo goBibeli, ose kuvhura kuronga vantu va limburukwe Karunga. Vamwe kuhepa kutura po marunduruko gomanzi momparukiso zawo. (1 Kol. 6:9-11) Ayo kutuhafesa apa atu mono omu Jehova ana kuvatera vantu “ava gwa tumbukira mwenyo gwanarunye” va ture po ezokomeho nokuyakara nelikwatakano kumwe nendi. (Yirug. 13:48) Apa ava lirongo Bibeli, vantu ava va dira kukara nehuguvaro kuyakara noruhafo morwa kuhuguvara mwaGuhyetu gemeguru. Azo kuna kara mfumwa mokulikida eharo kovakwetu kupitira mosirugana esi sokulikarera.

14. Ngapi omu Paurusa ga singwenene eharo va tumbura mo-1 Vakolinte 13:4-8?

¹⁴ Nsene tu hara vakwetu monkedi omu ga yi singwenene Paurusa, ose ngatu hafesa Karunga nokunyokera po maudigu gomanzi ntani ngatu hafa. (Resa 1 Vakolinte 13:4-8.) Ngesi tatu ka zogera eyi ga uyungire Paurusa kuhamena eharo nomu natu yi tura pasirugana melikwatakano lyetu novakwetu.

15. (a) Morwasinke twa hepera kukara nelididimiko nombili? (b) Morwasinke natu nyokera kukara nomfudu ntani nelikangango?

¹⁵ “Eharo kwa kwata nedidimiko nounambili.” Jehova age kulididimikira ntani ga kara nombili kovantu navenye nampili ngomu va dira kusikilira mo, nose twa hepa kulididimikira nokukara nombili nsene vakwetu vana tura mapuko ndi vana tu uyungire momudona. “Eharo kapi lya paka mfudu,” eli kuna kara asi eharo kapi ngali tu pulisira tu nyenene yiweka yamukwetu ndi yitumbukira yawo yomombungakriste. Ntani hena, nsene twa kara neharo, ose kapi ngatu likanganga ndi tu litumbe. Bibeli kututantera asi Jehova kwa nyenga ‘wokulitumba.’—Yis. 21:4.

16, 17. Monkedi musinke natu likida eharo kovakwetu ngomu va yi singonona 1 Vakolinte 13:5, 6?

¹⁶ Eharo “kapi ali reta yoyidona.” Nsene twa hara vakwetu ose kapi ngatu va kumbangera ndi tu vake yininke yawo ndi tu rugane nkenye eyi nayi guvisa Jehova. Eharo ngali tu vatera tu dire kupapara eyi twa hara, nye eyi va hara vakwetu.—Fil. 2:4.

¹⁷ Eharo “kapi ali nyegenya, kapi lya paka nkoko,” ntani ngali tu vatera tu dire kugenderera kuhanduka nsene vakwetu vana tu rugana yoyidona. (1 Tes. 5:15) Nsene tu kara nonkoko, kapi ngatu hafesa  Karunga ntani ehandu lyetu ga lihwama ngwendi mundiro nokutukoresa ntani vakwetu. (Lev. 19:18) Eharo kudongwenene po nokudivara. Eharo “kapi ali hafere udona,” kapi nga li tu pulisira tu hafere nampili udigu wogu ga tu nyenga.—Resa Yisewe 24:17, 18.

18. Yisinke tuna lirongo kuhamena eharo eli va tumbura mo-1 Vakolinte 13:7, 8?

¹⁸ Paurusa kwa tjenge asi eharo kwa “kwata nayinye.” Nsene twa hara vakwetu, ose ngatu va gusira po nsene vana tu handukisa. Eharo “kupura nayinye” yomoNonkango daKarunga ntani nokutuninka tu hafere marongo aga atu gwana kombunga zaJehova. Eharo “kuhuguvara nayinye” eyi va tjanga moBibeli ntani eyi kutuninkisa tu tantere ko wopeke ehuguvaro lyetu. (1 Pet. 3:15) Apa atu ligwanekere nomaukaro goudigu, ose kukanderera nokuhuguvara asi natu gwana yitundwamo yoyiwa. Eharo “kudidimika nayinye,” yi kare asi kuna tu zonene ndi kuna kutuhepeka. Ntani hena, “eharo kapi ali haga.” Ava ava limburukwa kwaJehova ngava likida eharo kovakwawo nkenye apa.

19, 20. Epukururo musinke lyomoMatjangwa nali tu tumangeda tu twikire kuhara vakwetu?

¹⁹ Pokutura pasirugana epukururo lyomoBibeli, ose kuvhura kutwikira kulikida eharo kovakwetu. Twa hepa kuhara vantu navenye, yi kare asi wontundiliro musinke ndi worudi musinke. Twa hepa kudiworoka asi Jesus kwa tente asi: “A kare mukweni, o mu hare moomu wa lihara nyamoge.” (Mat. 22:39) Karunga naKristusa kuna kundindira ko kwetu tu hare vakwetu. Nsene kuna kutudigopera kulikida eharo kovakwetu, kuvhura tu kanderere kwaJehova nokuhundira mpepo zendi zokupongoka zi tu pitisire. Twa yi diva asi eyi nga yi hafesa Jehova, ntani age nga tu vatera.—Rom. 8:26, 27.

²⁰ Mpangera zokuhara vakwetu moomu twa lihara nyamwetu kuzitumbura asi “Veta zoUntungi waKarunga.” (Jak. 2:8) Konyima zokutumbura yipango yimwe yomoVeta zaMosesa, Paurusa kwa tente asi: “Yipango eyi noyikwawo nayinye nkenye oku ya ka twa, kwa yi manga kumwe montanto ezi asi, ‘Hara mukweni moomu wa lihara nyamoge.’ Ogu ga hara mukwawo kapi a mu ruganene yoyidona. Yiyo nye asi eharo kusikisa mo Veta mudima.” (Rom. 13:8-10) Eyi yiyo nye twa hepera kutwikira kuhara vakwetu.

21, 22. Morwasinke natu harera Karunga novakwetu?

²¹ Jesus kwa tu vaterere tu kwate egano momunene asi yilye mukwetu apa ga tente asi oGuhwe ‘kupumisira ezuva vadona novawa, ntani hena kurokesera mvhura vahungami novanzoni.’ (Mat. 5:43-45) Twa hepa kulikida eharo kovantu navenye, va kare asi vahungami ndi vanzoni. Ngomu tuna yi zogere nare, nkedi zongwa po zokulikida eharo lyangoso kuna kara pokuzuvhisira muntu mbudi zoUhompa. Nsene a tura pasirugana eyi ana kulironga moBibeli, age nga gwana ruhafo mokukara kaume kaKarunga.

²² Mosirongwa sa ka pita twa lirongere eyi natu harera Jehova nomutjima gwetu nagunye nomwenyo gwetu nagunye nonondunge detu nadinye. Ntani tuna lirongo omu natu likida eharo kovakwetu. Nsene tu hara Jehova novakwetu, ose ngoso kuna kulimburukwa yipango yivali yoyinene po eyi ga uyungire Jesus. Unene po, tatu hafesa Guhyetu geharo, Jehova.