Pwa kara yihorokwa yomoBibeli eyi ya likida asi kwa hwikire yimpu ndi yisupa yovafe. (Jos. 7:25; 2 Hist. 34:4, 5) Nampo kuvhura yi moneke ngwendi asi vantu vangoso kapi va kere nomulyo gokuvavhumbika. Nye apa ngava hwike yimpu, kapi nga yi tanta nkenye apa asi vantu vangoso kapi va kere nomulyo gokuvavhumbika.

Ose kuyimona eyi mosihorokwa sahompa Sauru novana vendi vatatu wovagara. Awo kwa fire apa va rwire yita noVafilisiti. Gumwe govana vendi kwa kere Jonatana, kaume gomunene gwaNdafita ogu nga mu kwatesa ko. Apa Vaisraeli vamwe womapenda ava va tungire moJabesi zomoGiliyata va zuvhire eyi ya horokere, tava zi va ka guse yimpu nokuyayihwika makura yisupa tava yi vhumbike. Konyima Ndafita kwa ya kangangere Vaisraeli vena kweyi va rugene.—1 Sam. 31:2, 8-13; 2 Sam. 2:4-6.

Matjangwa kugava ehuguvaro lyevhumbuko, eyi kutanta asi Karunga nga ka tengwidira vantu keparu. Yi kare asi simpu tava si hwike ndi hawe, Jehova ga kara nononkondo dokukatengwidira muntu keparu morutu rorupe. Vahebeli vatatu wovalimburukwi ava da tembe nomfa pokuvazugumina mesuga lyomundiro ngamoomu ga yi penge hompa Nebukadenesara, kapi va tjilire asi nsene nava va hwika Karunga kapi nga vhura kuvavhumbura. (Ndan. 3:16-18) Eyi ya lifana hena novakareli vaJehova ava va ligwanekera nonomfa dehwiko monokamba doVanazi domahepekero. Vakareli vamwe hena wovalimburukwi vaKarunga kwa zumbanesa eparu lyawo konoboma ndi mononkedi nadopeke omu marutu gawo ga hanaukire po. Nye nampili ngoso, awo ngava ka gwana evhumbuko.—Ehor. 20:13.

Jehova kapi ga hepa kupongaika rutu romufe yipo nga wape kukamuvhumbura. Eyi kuyilikida apa a vhumbura Vakriste wovagwavekwa keparu lyemeguru. Ngwendi Jesus, ogu va “pindwire koufe pampepo,” Vakriste wovagwavekwa kuvapindura koufe ngamoomu va fene nye norutu ropampepo. Awo kapi ava zi nomarutu gawo gopanyama meguru.—1 Pet. 3:18; 1 Kol. 15:42-53; 1 Joh. 3:2.

Ehuguvaro lyetu lyevhumbuko, kapi lya korera kokuhwika yimpu yetu ndi hawe, nye kepuro lyetu mwaKarunga ogu ga kara nononkondo neharo lyokusikisa mo matumbwidiro gendi. (Yirug. 24:15) Nampili ngomu twa dira kudiva omu Jehova Karunga ga rugene evhumbuko pwanare ntani nomu nga ka yi rugana komeho, ose simpe kuhuguvara mwendi. Morwa age kwa horora “usili” weyi apa ga vhumbwire Jesus.—Yirug. 17:31; Ruk. 24:2, 3.

Ya wapa koVakriste mokuhonena nompo domomukunda noveta zosirongo kuhamena omu ava vhumbike vafe. (2 Kol. 6:3, 4) Yi kare asi simpu tava si hwike ndi hawe, eyi kwa korera ketokoro lyomuntu mwene ndi lyekoro.