Wa resa nawa yifo yoyipe yoRuhungu ndi? Tara nsene kuvhura o limburure mapuro gana kukwama ko:

Siruwo musinke va hepere kudipaga nzwigona zoPaska mwaNisani 14?

Nobibeli dimwe kwa tanta asi nzwigona va hepere kuzidipaga “nguvora,” ndi kaudiudi, konyima zokukatoka ezuva. (Ex. 12:6)—12/15, epenuno 18-19.

Nompango musinke doBibeli nava ruganesa vadinkantu mokutura po matokoro gomawa?

Ado kwa kara ntatu: (1) Hova tanko kupapara Untungi waKarunga nouhungami wendi. (Mat. 6:19-34) (2) Gwana ruhafo mokuvatera wopeke. (Yirug. 20:35) (3) Hafera kukarera Jehova moudinkantu woge. (Muud. 12:1)—1/15, epenuno 19-20.

Siruwoke ngali kara “ekwareko lyoNzwigona”? (Ehor. 19:7)

“Ekwareko lyoNzwigona” ngali kara konyima zapa Hompa Jesus Kristusa nga fundilira, eyi kutanta asi konyima zapa nga zonagura po Babironi zonene ntani poyita yaHarumagedoni.—2/15, epenuno 10.

Yisinke ya ninkisire Vajuda va kare ‘nendindiro’ lyaMesiyasa? (Ruk. 3:15)

Ayo kwa moneka ngwendi asi vantu womomazuva gaJesus nampo kapi va kwete egano uporofete waNdaniyera kuhamena Mesiyasa. (Ndan. 9:24-27) Nampo awo kwa zuvhire ediviso lyomuengeli kovasita vamwe ndi eyi ga uyungire muporofete gomukadi Ana montembeli kuhamena munona Jesus. Ntani, vakonentu kwa wizire va ya tare ‘hompa goVajuda ogu va hampurukire.’ (Mat. 2:1, 2) Konyima, Johanesa Mukuhwi kwa ya divisire asi Kristusa ogu va ndindira ana ya siki.—2/15, epenuno 26-27.

Ngapi no nyokera po kuuyunga Nhi o tambe asi Hawe? (2 Kol. 1:18)

Yosili, poyiruwo yimwe kuhepa kutjindja etumbwidiro, morwa maukaro aga no dira kuvhura kupangera. Nye ngoMukriste nsene o tura po etumbwidiro ndi mugano, wa hepa kurugana paapa wa hulira mokulisikisa mo.—3/15, epenuno 32.

Ngapi natu vhura kunyokera po eheteko lyokutara mafano goruhonda?

Nonkedi dantatu edi nadi tu vatera kuna kara: (1) Nsene o mona efano lyokupindura madowo, tara usimbu nakopeke. (2) Nyokera po magazaro gomadona nokudemenena komagazaro gomawa ntani nokukanderera kwaKarunga. (3) Gamena nonzira doge pokunyokera po kutarera nomuvi ndi maruha gokoInterneta aga ga kara nomafano goruhonda.—5/1, epenuno 12-14.

Yitundwamo musinke yokudira kundindira ayi kara nsene Mukriste a ka ruganena ure nepata lyendi morwa yimaliwa?

Apa vakurona ava dili kutunga kumwe ngepata, vanona kuhepa pamalizuvho ntani kuzonagura nkareso zawo. Awo kapi ava hafere hena vakurona. Ntani valikwali apa ava dili kukara pepi novalikwali vawo, kuvhura kugwira meheteko lyokuhondera.—4/15, epenuno 19-20.

Mapuro musinke gane twa hepa kudiworoka apa atu lihameke moyirugana yokuzuvhisa?

Vantu musinke nina hara kuzogera nawo? Pevango musinke nina kuzogera nawo? Siruwo musinke souhunga kuzogera nawo? Ngapi nani tameka nzogera nawo?—5/15, epenuno 12-15.