1, 2. Ngapi Jehova a tara vakareli vendi?

APA vakurona ava tara vana vawo omu vana kudanauka, awo kuvatetura udivi ou va kara nawo vanona. Nove wa yi limonena. Munona gumwe kuvhura a kare nevhuliko lyoudano wokuduka unene, ano gumwe lyokufaneka nawa. Yi kare asi evhuliko musinke va kara nalyo vanona, vakondi kwa kara neharo lyokuvatera vana vawo yi va tompoke.

² Jehova nage kwa hara kumona omu yina kutompoka vakareli vendi. Age kuvatara ‘ngemona lyonomuhoko nadinye.’ (Hag. 2:7) Awo mulyo unene kwendi morwa kumulimburukwa. Nampo nove wa yi dimburura asi vanavazinyetu va kara noudivi wokulisiga-siga wokurugana yininke. Pasihonena, vanavazinyetugara vamwe vauyungi wovawa, ano vamwe kwa diva kugendesa nawa yininke. Sinzi sovanazinyetukadi kudiva usimbu maraka nokugaruganesa mokuzuvhisa, ano vamwe va diva nawa kupakera mbili vaveli ntani nokuvakorangeda. (Rom. 16:1, 12) Ayo kuturetera ruhafo mokukara novanavazinyetu ava mombungakriste.

3. Mapuro musinke natu ka zogera mosirongwa esi?

 ³ Nampili ngoso, vanavazinyetu wovadinkantu nava wovape, kuvhura va lizuvhe asi kwato eyi vana kuvhura kurugana mombungakriste. Ngapi omu natu va vatera yipo va sikise mo eyi nava vhura kurugana? Morwasinke natu tarera koyikara yoyiwa yovanavazinyetu ngwendi moomu ayi tara Jehova?

4, 5. Ngapi sihorokwa somoVapanguli 6:11-16 asi likida asi Jehova kumona eyi nava vhura kurugana vakareli vendi?

⁴ Bibeli kulikida asi Jehova kutara koyikara yoyiwa yovakareli vendi, ntani neyi nava vhura kurugana. Pasihonena, apa Karunga ga horowere Ngidiyona a mangurure Vaisraeli koVamidiyani, nampo kwa mu tukukisire apa muengeli ga mu tanterere asi: “HOMPA noge na kara, ntoni ove zoupampi!” Ayo kumoneka asi Ngidiyona kapi ga lizuvhire asi age ‘ntoni.’ Ntani hena kapi ga lizuvhire asi kuvhura a popere vantu vaKarunga, nye Jehova kwa mu tere monkedi zapeke. Age ga mwene eyi na vhura kurugana, yiyo ga mu ruganesere a popere Vaisraeli.—Resa Vapanguli 6:11-16.

⁵ Jehova kwa kere nehuguvaro asi Ngidiyona nga popera Vaisraeli morwa ga mwene udivi wendi. Pasihonena, age ga mwene omu Ngidiyona ana kuhwaga rukokotwa nononkondo. Posiruwo sina, vanandima ngava hwagere nombuto dawo ponze, nye Ngidiyona kwa hwagerere rukokotwa mevango omu ngava kamene mandjembere yipo a ru popere koVamidiyani. Jehova ga mwene hena asi Ngidiyona mugara gonondunge ogu na vhura kukwata egano ukaro nokutura po matokoro gomawa. Yosili, Jehova ga mwene eyi na vhura kurugana Ngidiyona, yipo ga mu ruganesere.

6, 7. (a) Ngapi Jehova ga tere Amosa? (b) Ngapi tuna yi diva asi Jehova kapi ga lipukire pokuhorowora Amosa?

⁶ Mokulifana, Jehova kwa mwene eyi na vhura kurugana Amosa, nampili ngomu vamwe va mu mwene asi kwato mulyo. Ntani Amosa mwene kwa lisingwenene asi age musita goyimuna nomutakamesi goyitji yomaukuzu. Nye Jehova ga mu horowere a ka rondore mazimo murongo goVaisraeli ava va hagekere kumukarera. Vaisraeli vamwe kwa gazarere asi Jehova ga lipukire pokuhorowora Amosa. Morwasinke?—Resa Amosa 7:14, 15.

⁷ Amosa kwa tundilire momukunda goruhepo, nye ga divire nompo novapangeli womosiruwo sawo, nampo eyi kwa yi lirongerere kovanangesefa ava ngava zi momukunda gwawo. Ntani ga divire hena nomuhoko edi dava kundurukidire ntani udona ou ngava rugana Vaisraeli. (Amosa 1:6, 9, 11, 13; 2:8; 6:4-6) Ntani age kwa kere mutjangi gomuwa, ogu ga ruganesere nonkango doureru ntani dononkondo. Age kapi ga tjilire kurondora mupristeli Amasiya koudona ou nga rugana. Yosili, Jehova kwa horowere muntu gouhunga mokukaudisa mbudi zendi, morwa ga mwene asi ta ka yi sikisa mo.—Amosa 7:12, 13, 16, 17.

8. (a) Ekorangedo musinke Jehova ga pere Ndafita? (b) Ngapi nonkango demEpisarome 32:8 adi korangeda ava va dira kulihuguvara?

⁸ Jehova kumona eyi nava vhura kurugana vakareli vendi navenye. Age kwa korangedere hompa Ndafita asi nga mu pukurura ‘nokumutakamesa.’ (Resa Episarome 32:8.) Morwasinke nonkango edi dina karere ekorangedo kwetu? Morwa Jehova kuvhura kutuvatera tu sikise mo yitambo eyi nayi moneka udigu kwetu, nampili ngomu pamwe atu dili kulihuguvara.  Ngwendi moomu murongi gomuwa a vatere murongwa ogu ga dira kukara noudivi, Jehova nage ga kara neharo lyokutuvatera tu sikise mo eyi natu vhura kurugana. Ntani age kuvhura a ruganese vanavazinyetu mokutuvatera tu sikise mo eyi natu vhura kurugana. Mononkedi musinke?

9. Ngapi natu tura pasirugana epukururo lyaPaurusa ‘lyokupakera mbili vakwetu’?

⁹ Paurusa kwa korangedere Vakriste navenye asi ‘va pakere vapuli vakwawo mbili.’ (Resa Vafilipi 2:3, 4.) Yisinke ya hamenene mo mepukururo eli? Twa hepa kudimburura eyi nava vhura kurugana vanavazinyetu nokuvapandadeka. Ngapi omu o lizuvhu nsene gumwe ta ku pandadeke koyikara yoge yoyiwa? Yosili, ayo kututumangeda tu twikire kukura pampepo. Nsene tu dimburura elituromo lyovanavanzinyetu nokuvapandadeka, ngayi va korangeda mokutura po ezokomeho mokukarera Jehova.

10. Wolye va hepa unene evatero lyetu?

¹⁰ Natuvenye poyiruwo noyiruwo kuhepa evatero. Nye vadinkantu ntani nava wovape va hepa unene evatero lyetu yipo va lizuvhe asi nawo kuvhura kuvaruganesa mombungakriste. Eyi ngayi va vatera va lizuvhe asi nawo mulyo mombunga zaJehova. Nye nsene tu dira kuvavatera kapi ngava kara neharo lyokukondjera yitumbukira mombungakriste.—1 Tim. 3:1.

11. (a) Ngapi mukuronambunga gumwe ga vaterere mudinkantu gonomuga? (b) Yisinke natu lirongera ko kosihorokwa saJulien?

¹¹ Mukuronambunga gedina Ludovic kwa tanta asi: “Apa ani likida elituromo mwamunazinyetu, age kutura po usimbu-usimbu ezokomeho.” Ludovic kwa tanta hena asi: “Ame kwa dimbwilire asi mudinkantugara gedina Julien kwa kere nonomuga, ano apa nga hetekere ko kurugana unene mombungakriste, age ngayi mu digopere. Nye nayi dimbwilire hena asi age muntu gombili ogu ga hepere evatero. Ame kapi ngani mu pangura, nye kwa tere yikara yoyiwa mwendi nokuhetekera ko kumukorangeda.” Konyima, Julien ya ya mu tompokere kukara mukwafimbunga ntani muzuvhisi gokukarerera.

12. Yisinke twa hepa kurugana mokuvatera vanavazinyetu? Gava sihonena.

¹² Nsene tuna hara tu vatere vanavazinyetu va sikise mo eyi nava vhura kurugana, twa hepa kulitura mo mwawo. Twa ha demenena komapuko gawo, nye twa hepa kutara koyikara yawo yoyiwa. Jesus nage yiyo ga rugene komupositoli gwendi Peturusa. Nampili ngomu Peturusa ga dilire kulikida epuro lyokupama poyiruwo yimwe, Jesus ga mwene yikara yoyiwa mwendi ntani nokumutantera asi nga kara nepuro lyokupama ngwendi emanya.—Joh. 1:42.

13, 14. (a) Ngapi omu Baranabasa ga likidire elituromo momudinkantu Marukusa? (b) Ngapi omu munazinyetugara gomudinkantu ga gwanene mo uwa mevatero ngwendi lyeeli ga gwene Marukusa? (Tara efano pepenuno 28.)

¹³ Baranabasa nage kwa likidire elituromo mwaJohanesa, ogu ga kere nedina lyoSiroma, Marukusa. (Yirug. 12:25) Morugendo rwaPaurusa rokuhova routumwa kumwe naBaranabasa, Marukusa yige ga kere “mukwafi gwawo.” Nye apa va ka sikire moPamufiliya, Marukusa kwa sigire vakwawo a tengure. Awo va hepere kutwikira rugendo rwawo velike momukunda gosiponga. (Yirug. 13:5, 13) Konyima, Baranabasa ga mwene yikara yoyiwa yaMarukusa, ntani nokutwikira kumudeura. (Yirug. 15:37-39) Eyi yiyo ya vaterere Marukusa  a ture po ezokomeho ngomukareli gwaJehova. Konyima zonomvhura dongandi, Marukusa kwa kwefe Paurusa, ogu ga kere modorongo moRoma, ntani apa Paurusa ga tjangerere mbungakriste zoVakorosi, age kwa pandadekere Marukusa. (Koros. 4:10) Gazara tupu ruhafo oru ga kere naro Baranabasa apa Paurusa ga hundilire Marukusa a ka mu kwafe.—2 Tim. 4:11.

¹⁴ Mukuronambunga gedina Alexandre kudiworoka omu munazinyetu ga mu vaterere. Age kwa tanta asi: “Apa na kere mudinkantu ngayi digopere nge mokukanderera mombungakriste. Mukuronambunga gumwe kwa likidire nge omu nani liwapaikira nomu nani kara nina litura komeho ni kanderere. Age kwa pere nge mpito zokukanderera nkenye apa komapongo goyirugana yokuzuvhisa. Mwaza siruwo, woma wa ya pwire nge.”

15. Ngapi omu Paurusa ga likidire rupandu kovapuli vakwawo?

¹⁵ Yisinke o rugana apa o dimburura yikara yoyiwa moVakriste vakweni? Ove kuvapandadeka ndi? MoVaroma egaununo 16, Paurusa kwa pandadekere vapuli vakwawo wokupitakana 20 koyikara yawo yoyiwa. (Rom. 16:3-7, 13) Pasihonena, Paurusa kwa pandadekere Andoronikusa naJuniasa morwa awo kwa kere varongwa vaKristusa siruwo sosire ntani kwa kere nelididimiko. Paurusa kwa pandwire hena ozina vaRufusi ava va mu pakerere mbili.

16. Mauwa musinke aga tundu mokupandadeka mudinkantu?

¹⁶ Apa atu pandadeke vanavazinyetu ayo kureta mauwa. Tarurura sihonena saRico, mudinkantugara gomoFransa, ogu ga dompere mutjima morwa oguhwe kwa kere vahapuli ntani kapi va mu harere a gwane ekuho. Rico kwa gazarere asi ga hepa kundindira dogoro nga gwanese nomvhura 18 ntani nga karera Jehova momunene. Ntani age kwa guvire morwa vanasure vakwawo ngava mu sindi morwa epuliro lyendi. Frédéric, mukuronambunga ogu ga lirongere nendi, kwa tanta asi: “Ame ngani pandadeke Rico pokumutantera asi marwaneso aga ana kuligwanekera nago ta ga mu pe mpito zokulikida epuro lyendi.” Nonkango odo kwa nkondopekere Rico a tokomene kutura po ezokomeho, ntani a wapukurura elikwatakano lyendi noguhwe. Rico ga ya gwene ekuho apa ga kere nonomvhura 12.

17. (a) Ngapi omu natu vatera vanavazinyetugara va ture po ezokomeho? (b) Ngapi mutumwa gumwe ga likidire elituromo kovadinkantu, ntani yitundwamo musinke ya kere?

¹⁷ Nkenye apa atu pandadeke vanavazinyetu koyininke yoyiwa eyi vana rugana, awo kugwana etumangedo lyokutwikira kukarera Jehova momunene. Sylvie, * ogu ga rugana koBeteli moFransa nomvhura dononzi, kwa tanta asi vanavazinyetukadi nawo kuvhura va pandadeke  vanavazinyetu wovagara. Age ga lizuvhire asi nage ga kara nositumbukira sangoso. Vanavanzinyetukadi kudimburura mauzera aga pamwe ava dili kudimburura vanavazinyetugara. Apa vanavazinyetukadi ava pandadeke vanavazinyetugara koyirugana yawo, ayo kukwatesa ko epandadeko eli ava va pe vanavazinyetugara. (Yis. 3:27) Jérôme, mutumwa gomoFransa Guiana, kwa vatera vadinkantugara wovanzi mokuwapera sirugana soutumwa. Age kwa tanta asi: “Ame na ya yi dimbwilire asi apa ngani pandadeke vadinkantugara moyirugana yokuzuvhisa ndi komalimbururo gawo gomawa mepongo, ya va vaterere va ture po ezokomeho.”

18. Morwasinke ya wapera mokurugana novadinkantu?

¹⁸ Nose kuvhura kukorangeda Vakriste vakwetu va ture po ezokomeho pokuzuvhisa kumwe nawo. Pasihonena, mukuronambunga kuvhura a pure mudinkantugara a nduruke mauzera gamwe koInterneta zetu jw.org aga naga vhura kukorangeda vakurupe ava va dira nokompiuta. Ndi nsene asi ove ono kara noyirugana koSinyanga soUhompa, kuvhura o pure mudinkantu a ku vatere. Nsene o rugana kumwe novadinkantu, ayo ngayi ku pa mpito zokudimburura eyi nava vhura kurugana nokuvapandadeka ntani nokumona marunduruko vana kutura po.—Yis. 15:23.

19, 20. Morwasinke natu vaterera vakwetu va ture po ezokomeho?

¹⁹ Apa Jehova ga horowere Josuwa a pitisire Vaisraeli, age kwa pangerere Mosesa a ‘korangede’ Josuwa ‘nokumukoreka.’ (Resa Deuteronomium 3:28.) Naina vantu wovanzi kuna kuyalipakerera kumwe nose mokukarera Jehova. Twa hepa vanavazinyetugara wokuwapera ava nava vhura kupitisira mombunga zendi. Navenye womombungakriste va hepa kuvatera vadinkantu ndi wovape va sikise mo eyi nava vhura kurugana. Ngoyitundwamo, wovanzi ngava vhura kurugana sirugana sosiruwo nasinye nokukara vana wapere ‘kuronga vakwaawo.’—2 Tim. 2:2.

²⁰ Yi kare asi ose kwa kara mombungakriste omu mwa kara vanavazinyetugara ava va kura pampepo ndi mokambungagona, ose kuvhura kuvatera vadinkantu yipo komeho ngava vhure kupitisira mbunga zaJehova. Mokututompoka eyi, twa hepa kuhonena Jehova pokutara koyikara yoyiwa yovanavazinyetu.