KATHERINE kwa kulilire moAmerika ntani age kwa gwene ekuho apa ga kere nonomvhura 16 ngagumwe goNombangi daJehova. Age kwa litulire mo unene mosirugana sokuzuvhisa, nye vantu womomukunda ogu nga zuvhisire kapi ngava tambura mbudi zoUhompa. Age kwa tente asi: “Ame ngani resa yihorokwa yokuhamena vantu ava ngava kanderere kwaKarunga asi ava tumine ko muntu gumwe ogu na ya va ronga va mu dive. Kwa here kugwana vantu vangoso, nye kapi na va gwene.”

Konyima zokuzuvhisira momukunda ogo nomvhura dongandi, Katherine kwa tamekere kugazadara ko kudirukira komukunda oku vantu nava ka tambura mbudi zoUhompa. Nye ga lipulire hena nsene kuvhura nga ka yi sikise mo. Rumwe tupu ga sigire epata lyawo ure woyivike yivali, nye kwa ka rongwere kembo. Eharo lyendi lyokuhara kulimonena ruhafo mokuvatera vantu vana kupapara Jehova kwa mu ninkisire a dire kutengura kembo. Konyima zokugazadara ko kuhamena yirongo eyi ga here kudirukira, yipo ga tjangerere mberewa zomutayi moGuam makura ta gwana mauzera nagenye aga ga hepere. Apa Katherine ga kere nonomvhura 26, yipo ga dirukilire koSaipan mwaPembankuru 2007, kosirudi sEfuta lyaPacific, esi sa kara ure wonokilometa 10 000. Yisinke ga ka limonenene?

Konyima tupu zokukasika mombungakriste zompe, Katherine kwa gwene Doris mukadi gonomvhura dokupitakana 40 ngoso, ogu ga tambwire elirongo lyoBibeli. Apa ga mene kulironga nage magaununo gatatu gokuhova mobuke Marongo goBibeli, Katherine kwa kere nosinka. Age kwa simwitira asi: “Doris kwa kere murongwa gomuwa, ntani ame kapi na here kuzonagwisa elirongo lyendi lyoBibeli. Ame kapi na rugana rumwe elirongo lyoBibeli nomuntu gelituromo lyenene, yipo na lizuvhire asi Doris ana hepa munazinyetukadi gepupi lyendi ga kara noudivi va lironge nendi.” Katherine kwa kanderere kwaJehova a mu vatere a gwane munazinyetukadi gokuwapera ogu na lironga naDoris. Yipo ga tokwere kutantera ko Doris kuhamena elitjindjo melirongo lyawo lyoBibeli.

Katherine kwa tanta hena asi: “Komeho ni mu tantere, Doris ta tantere nge asi ana kara noudigu ou ana hara kuzogera name. Konyima zokumupurakena, tani mu tantere omu Jehova ga vaterere nge apa na ligwanekerere noudigu wokulifana. Yipo ga pandwire nge.” Makura Doris ta tantere Katherine asi: “Jehova  kwa kutuma o ya vatere nge. Ezuva lyokuhova wa wizire pembo lyange, ame kwa resere Bibeli novili dononzi. Tani lili, nokukanderera kwaKarunga asi a tumine nge ko muntu ogu na ya vatera nge ni kwate egano Bibeli. Makura nove to moneka. Jehova kwa limbwilire ekanderero lyange!” Apa ga yi zuvhire eyi Katherine ta tameke kuganda mahodi. Katherine kwa tanta asi: “Nonkango daDoris kwa limbwilire ekanderero lyange. Jehova kwa likidire nge asi na hepa kutwikira elirongo lyoBibeli naDoris.”

Doris kwa gwene ekuho 2010, ngesi age kuna kurugana malirongo goBibeli gomanzi. Katherine kwa tanta asi: “Nina hafa asi eharo lyange eli na kere nalyo siruwo sosire lyokuvatera muntu a kare mukareli gwaJehova lina siki mo!” Age ngesi kuna kurugana uzuvhisi wosiruwo nasinye posirudi saPacific moKosrae.

Vanavazinyetu wokupitakana pefere (wokoyiha yonomvhura 19 yi tware 79) wokoyirongo yapeke kuna kuzuvhisira moMicronesia. Erica ogu ga dirukilire moGuam 2006 nonomvhura 19, kwa faturura malizuvho govazuvhisi woupampi ava ava dirukire konomukunda nadopeke, pokutanta asi: “Kuzuvhisira momukunda omu vantu wovanzi va kara neharo lyokulironga Bibeli kureta ruhafo rorunene. Ame kupandura unene Jehova kweyi ga vatera nge ni rugane sirugana esi. Azo nkedi zongwa po zeparu!” Ngesi, Erica kuna kuhafera uzuvhisi wosiruwo nasinye moEbeye moyirudi yaMarshall. Yimo, kuzuvhisira mosirongo nasopeke kuligwanekera nomaudigu. Tatu ka zogera maudigu gamwe gatatu nokukadimburura owo va dirukira koMicronesia va ga kohonona po.

Mparukiso. Konyima zapa Simon gonomvhura 22 ga ka sikire posirudi saPalau 2007, kwa yi dimbwilire asi nga gwana tupu yimaliwa yoyinunu kupitakana eyi nga gwana kosirongo sawo, moIngiranda. Simon kwa tanta asi: “Ame na lirongere kudira kuranda tupu nkenye eyi. Ngesi ame kuhetakanesa nomukoso moyitora yipo ni rande yininke kombiliha. Nsene koyili yina zonauka membo, ame kukapapara eyi va ruganesa nare nokugwana gumwe ogu na vhura kuvatera nge mokuyiwapeka.” Ngapi omu kurerupika eparu ya kundama mparukiso zendi? Age kwa tanta asi: “Ayo kwa vatera nge ni lironge yininke yomulyo po meparu ntani nomu nayi gwanena nge po eyi na kara nayo. Ame kwa limonena evatero lyaJehova yikando yoyinzi. Monomvhura ntambali edi na zuvhisira omu, kapi na hepere nondya ndi mararo.” Yosili, Jehova kuvatera ava ava rerupike eparu lyawo morwa kutura muhowo Uhompa.—Mat. 6:32, 33.

Kurongora kembo. Erica kwa tanta asi: “Ame kwa hara unene vemepata lyetu, ntani na kere nosinka asi malizuvho gokuvarongora ngaga donganesa sirugana sange sokuzuvhisa.” Yisinke ga rugene mokuliwapaikira? Age kwa tanta asi: “Komeho zokudiruka, ame ngani resa yirongwa yomoRuhungu yokuhamena kurongora vekembo. Eyi kwa vaterere nge ni lididimikire udigu ou. Mosirongwa simwe, zinya gumwe kwa korangedere munwendi gomukadona kuhamena epakerombili lyaJehova pokumutantera asi: ‘Jehova  nga ku pakera mbili kupitakana omu ngani kupakera mbili.’ Ehuguvareso olyo kwa nkondopekere nge unene.” Hannah namugara gwendi Patrick, kuzuvhisira moMajuro, simwe soyirudi yaMarshall. Hannah kwa lididimikira udigu wokurongora kembo pokudemenena koyihepwa yovanavazina womombungakriste. Age kwa tanta asi: “Ame nkenye apa kupandura Jehova kouumwe wovanavazinyetu mouzuni mudima morwa nawo ekoro lyange. Pwa hana evatero lyawo, ngano kapi ya tompoka nge mokuzuvhisira oku kuna hepa vazuvhisi.”

Kutulisa po ukaume. Simon kwa tanta asi: “Pokukasika mosirongo sosipe, yininke nayinye kumoneka namopeke. Kwato gokuliteura nage, morwa kapi tava kukwata egano.” Erica kwa tanta asi: “Pomuhowo, ame kwa lizuvhire mukuma, nye eyi ya vaterere nge kuna kara pokugazadara kositambo seyi na dirukilire. Ame kwa dirukilire mokuyakarera Jehova nye kapisi mokuyapapara uwa wanyamwange.” Age kwa gweda ko asi: “Mwaza siruwo, na ya tulisire po vakaume wovawa, ava vana kara nomulyo kwange.” Simon kwa kondjere mokulironga Rupalawana, eyi ya mu vaterere a tulise po ukaume novapuli vakwawo womomukunda ogo. (2 Kol. 6:13) Elituromo lyendi lyokulironga eraka kwa tumangedere vanavazinyetu va mu hare. Apa vanavazinyetu womomukunda ava ruganene kumwe nava ava dirukire momukunda gwawo, navenye kuhafera ukaume wouwa mombungakriste. Mauwa musinke gamwe hena ava hafere ava ava ligava vene mokukazuvhisira oku kuna hepa vazuvhisi?

Mupositoli Paurusa kwa tjenge asi: “Ogu a kunu neharo lyewa, kuzangura yoyinzi.” (2 Kol. 9:6) Mpango ezi kwa tamba kwava ava tamununa sirugana sawo sokuzuvhisa. Mauwa musinke ava ‘zangura’ moMicronesia?

MoMicronesia, muna kara simpe nompito dokuvareka malirongo goBibeli nokulimonena omu vantu vana kurundurura eparu lyawo morwa kulironga nokutura pasirugana usili womoNonkango daKarunga. Patrick naHannah kwa ka zuvhisilire hena moAngaur, kasirudigona kakara novantu 320. Konyima zokukazuvhisira mo makwedi gavali, awo kwa gwene zinya gomudike. Age kwa tambwire elirongo lyoBibeli nokutura po marunduruko meparu lyendi. Hannah kwa tanta asi: “Nkenye ezuva konyima zelirongo lyetu, name namugara gwange ngatu hafa nokutanta asi: ‘Mpandu Jehova!’” Age kwa gweda ko hena asi: “Nayi diva asi Jehova ngano ga kokere ogu mukadi a tambure usili kupitira monkedi nazopeke, nye morwa ose kwa dirukilire komukunda ogu gwa hepere vazuvhisi, ya tu vhulikire mokugwana mukadi ogu nokumuvatera a dive Jehova. Esi kuna kara sihorokwa sosiwa po twa limonena meparu lyetu!” Ngwendi moomu ga yi tanta Erica asi: “Kapi to vhuru kufaturura ruhafo rokuvatera gumwe a dive Jehova!”

Moyirongo yoyinzi, muna kara hepero zovazuvhisi woUhompa. Nove kuvhura o kare gumwe gowo vana kudirukira konomukunda edi dina hepa vazuvhisi ndi? Hundira Jehova a nkondopeke eharo lyoge lyokutamununa sirugana soge sokuzuvhisa. Yi zogera kumwe novakuronambunga nomutareli gonombunga ndi nowo ava zuvhisire mosirongo muna hepa vazuvhisi. Apa no tameka kuliwapaikira, tjangera mberewa zomutayi ezi azi pakere mbili sirongo oso ono hara kukazuvhisira, nokuvapura mauzera. * Nampo nove no lipakerera novanavazinyetu mayovi wovagara nava wovakadi, wovadinkantu nava wovakondi, wovadike ntani valikwali, va ligava vene nokulimonena ruhafo ‘rokuzangura yoyinzi.’