1. Yisinke ya kara nomulyo unene moukareli wetu?

WA MONA rumwe edina Jehova kuna litjanga petungo lyonzugopungwiro zoyininke yanare ndi pwankenye etungo ndi? Yosili, ove wa lizuvhire ruhafo rorunene. Ose Nombangi daJehova, edina lyaKarunga mulyo unene moukareli wetu! Kwato mbunga zimwe mouzuni mudima azi ruganesa edina lyaKarunga ngwendi moomu atu liruganesa. Nye nampili ngoso, kusimba edina lyaKarunga kuna kara situmbukira sosinene.

2. Kuruganesa edina lyaKarunga ya gwanena po mokumuhafesa ndi?

² Kuruganesa edina lyaKarunga kapi ya gwanena po mokumuhafesa. Twa hepa kuparuka kuliza nonompango dendi. Yipo nye Bibeli azi tu diworokesere asi vantu vaJehova va hepa ‘kusuwurukwa kurugana udona.’ (Epis. 34:14) Mupositoli Paurusa kwa tembe kompango ezi apa ga tjenge asi: “Nkenye ogu a tumbura edina lyaHompa, a sige kurugana yoyidona.” (Resa 2 Timoteusa 2:19.) NgoNombangi, ose kwa tu divira pokutumbura edina Jehova. Nye ngapi omu natu siga kurugana yoyidona?

3, 4. Nonkango musinke da koka valirongi woBibeli va twikire kudiva ko yoyinzi, ntani morwasinke?

³ Tarurura yikaramo yononkango daPaurusa da kara mwa-2 Timoteusa 2:19. Nonkango edi kwa tamba ‘ketateko lyaKarunga lya kora’ ntani kwa tumbura yininke yivali. Sokuhova, Jehova “ga diva ava vendi mo,” eyi kulikida asi Paurusa kwa temwininine nonkango domwaNumeri 16:5. (Tara sirongwa sa ka pita.) Sauvali, “nkenye ogu a tumbura edina lyaHompa, a sige kurugana yoyidona,” nonkango edi kwa koka valirongi woBibeli va twikire kudiva ko yoyinzi. Morwasinke?

⁴ Nonkango daPaurusa kwa likida asi nage kwa di temwininine ketjangwa nalyopeke. Nye moMatjangwa goRuhebeli kwato oku atu gwana nonkango dokuvyukilira ngedi ga temwininine Paurusa. Kosinke nye ga tembe mupositoli apa ga tente asi: “Nkenye ogu a tumbura edina lyaHompa, a sige kurugana yoyidona”? Komeho a tumbure nonkango edi, Paurusa kwa temwininine nonkango dimwe domwaNumeri egaununo 16, edi da zogera urwanesi waKora. Nonkango edi nado kwa tembe kuhamena yihorokwa yourwanesi owo ndi?

5-7. Yihorokwa musinke yomomazuva gaMosesa ayi kwatesa ko nonkango daPaurusa domwa-2 Timoteusa 2:19? (Tara efano pepenuno 12.)

⁵ Bibeli kutanta asi Datani naAbiramu, vana wovagara vaEliyaba, kwa lipakerere naKora ngovapitisili mokurwanesa Mosesa naArona. (Num. 16:1-5) Awo kapi va fumadekere Mosesa ntani kwa nyokere upangeli ou ga mu pere Karunga. Varwanesi owo kwa twikilire kukara mokatji kovantu vaJehova, nokuzonagura epuro lyovantu wovalimburukwi. Apa lya sikire mo ezuva, Jehova kwa likidire elisigo pokatji kovakareli vendi novarwanesi owo, pokugava mpangera zokuvyukilira.

⁶ Etjangwa kutanta asi: “HOMPA ta tantere Mosesa asi: ‘Tantera vantu va lipore ko konontenta doKora naDatani naAbiramu.’ Mosesa kumwe nomasimbi goVaisraeli tava zi koDatani naAbiramu. Age makura ta tantere vantu asi: ‘Liporeni ko konontenta dovantu ava wovadona, mwa ha guma kwankenye kaninke aka va weka, neisi nava mu komberera none morwa nonzo dawo.’ Awo makura tava lipora ko konontenta doKora naDatani naAbiramu.” (Num. 16:23-27) Makura Jehova yipo ga zonagwire po varwanesi owo navenye. Nye vakareli wovalimburukwi, ava va liporere ko kokurugana yoyidona, kwa va parwire.

⁷ Jehova kumona eyi ya kara momutjima! Age kumona ulimburukwi wava va hama kwendi. Vakareli vendi wovalimburukwi kwa tulire po etokoro lyewa, pokulipora ko kovantu wovadona. Eyi kulikida asi Paurusa kwa tembe kosihorokwa somwaNumeri 16:5, 23-27 apa ga tjenge asi: “Nkenye ogu a tumbura edina lyaHompa, a sige kurugana yoyidona.” Egano eli kwa li kwatesa ko nonkango edi asi Jehova “ga diva ava vendi mo.”—2 Tim. 2:19.

8. Morwasinke kutumbura edina Jehova ndi kuhama kombungakriste ya dilira kugwanena po?

⁸ Pokutamba koyihorokwa yomomazuva gaMosesa, Paurusa kwa diworokesere Timoteusa mulyo gokurugana ko yuma yipo a popere elikwatakano lyendi naJehova. Kuhama kombungakriste kapi ya gwanene po, ngwendi moomu tupu ya dilire kugwanena po yokutumbura edina  Jehova momazuva gaMosesa. Vakareli wovalimburukwi va hepa kurugana ko yuma, pokusiga kurugana yoyidona. Yisinke ya tente eyi kwaTimoteusa? Ntani yisinke natu lirongera ko naina ngovantu vaJehova kepukururo lyaPaurusa?

9. Ngapi ‘nompata dougova da hana nondunge’ da kundamene mbungakriste zomomazuva gaPaurusa?

⁹ Nonkango daKarunga kugava mapukururo gokuvyukilira kuhamena udona ou va hepa kunyokera po Vakriste. Pasihonena, komeho a uyunge nonkango domwa-2 Timoteusa 2:19, Paurusa kwa tanterere Timoteusa asi: ‘Walye o litatagana morwanonkango’ ntani “livageka [ndi nyokera po] nonzogera donondona doyikavauka.” (Resa 2 Timoteusa 2:14, 16, 23.) Vamwe womombungakriste kwa kwatesere ko marongo govarwanesi usili. Ntani vamwe kwa kere nomagano gokupatanesa. Nampili ngomu magano gangoso ga dilire kulilimba nomatjangwa, kwa retesere po nompata. Ago ngaga reta nomutangu ntani nokuzonagura po nkareso zongwa zomombungakriste. Yipo nye, Paurusa ga korangedere mulyo ‘gokunyokera po nompata dougova da hana nondunge.’

10. Yisinke twa hepa kurugana nsene tu ligwanekera novarwanesi usili?

¹⁰ Naina, vantu vaJehova kapi ava kara nkenye apa novarwanesi usili mombungakriste. Nye, morwa kuna kuparuka mouzuni omu muna zura marongo ga dira kutunda momatjangwa, twa hepa kuganyokera po. Ayo ugova kulipatana novarwanesi usili, pokuzogera nawo ndi kukumburura konombudi dawo. Nampili kuna kara nositambo sokuhara kuvavatera, nonzogera dangoso kwa lilimba nomatjangwa aga tuna zogere. Nye, ngovantu vaJehova twa hepa kunyokera po varwanesi usili.

11. Yisinke nayi vhura kuretesa po “nompata dougova,” ntani ngapi omu vakuronambunga nava tulisa po sihonena sosiwa?

¹¹ Kugusa ko varwanesi usili, pwa kara hena yininke yimwe ayi zonagwisa po mbili zomombungakriste. Pasihonena, magano gokulisiga-siga kuhamena yilihafeso kuvhura kuretesa po “nompata dougova da hana nondunge.” Nsene vamwe mombungakriste kuna kuruganesa yilihafeso eyi ya lilimba nonompango daJehova, vakurongambunga va ha tarerera nkareso zangoso, morwa kutjira nomutangu. (Epis. 11:5; Efe. 5:3-5) Nye, vakuronambunga va hepa kutakamesa asi kapisi va ruganese magano gavene. Awo va kwatese ko noulimburukwi epukururo eli va gava kovapitisili asi: “Kareni vasita wosiunda saKarunga esi ga mu pa. . . . Walye omu kara ohompa vava va mu pa asi mu va takamese, kareni sihonena kombunga.”—1 Pet. 5:2, 3; resa 2 Vakolinte 1:24.

12, 13. (a) Mutaro musinke da kara nado Nombangi daJehova koyilihafeso, ntani nompango musinke doBibeli ava kwama? (b) Ngapi nompango tuna zogere moparagarafu 12 nava di ruganesa koyuma yokulisiga-siga?

¹² Kuhamena yilihafeso, mbunga zaJehova kapi za kara nelikwamo lyokuvyukilira kuhamena nomuvi, maudano nonobuke ndi nomusika edi twa hepa kunyokera po. Morwasinke? Morwa Bibeli kukorangeda nkenye gumwe gwetu mokudeura ‘nondunge dendi yipo a yike kuhangura uwa koudona.’ (Heb. 5:14) MoBibeli kwa kara mo nompango edi nadi vatera Mukriste nsene kuna kuhorowora yilihafeso. Yi kare asi moukaro musinke tuna kara, sitambo setu sa hepa kukara ‘sokukambadara kulironga eyi ya za Hompa komutjima.’ (Efe. 5:10) Bibeli kuronga asi vanturagumbo yiwo vapangeli vepata, ano va kara nononkondo dokunyokera po yilihafeso  ya dira kuwapera epata lyawo.—1 Kol. 11:3; Efe. 6:1-4.

¹³ Nompango doBibeli edi tuna zogere kapi tupu da hamena koyilihafeso. Magano gokuhamena ndwareso nomaliwapaiko getu noukanguki ntani nonondya nayo kuvhura kureta nompata. Nsene asi kapi ya lilimba nonompango doBibeli, vantu vaJehova va hepa kunyokera po kulipatana kuhamena yuma oyo, morwa “mukereli gwaHompa kapi a kara nonompata. A kare nombili kovantu navenye.”—2 Tim. 2:24.

14. Sifanekeso musinke ga ruganesere Paurusa mokulikida mulyo gokunyokera po ukaume woudona?

¹⁴ Monkedi musinke ava vana ‘kutumbura edina lyaKarunga, nava siga kurugana yoyidona’? Pokunyokera po ukaume novantu ava ava rugana yoyidona. Ayo mulyo pokudiva asi Paurusa kwa ruganesere sifanekeso sapeke konyima zokuruganesa sifanekeso ‘setateko lyaKarunga lya kora.’ Age kwa tjenge asi “membo lyenene kapi amu kara yipako yongorodo neyi yosisiliveli tupu yelike, nye amo kukara mo hena neyi yositji neyi yerova. Eyi yomutompo kuyiruganesa pomazuva goyipito, ano eyi ya hana mutompo kuyiruganesa mazuva-zuva.” (2 Tim. 2:20, 21) Makura yipo ga korangedere Vakriste va ‘likuhure,’ ndi va liguse ko vene, koyipako “ya hana mutompo.”

15, 16. Yisinke natu lirongera ko kosifanekeso ‘sembo lyenene’?

¹⁵ Yisinke asi tanta sifanekeso oso? Paurusa kwa ruganesere malifanonkango pokuhetakanesa mbungakriste ‘kembo lyenene,’ ano womombungakriste ‘koyipako’ yemembo. Yipako yimwe yemembo kuvhura yi nyate kouhungu ou nau vhura kukara siponga. Mwenya embo nga hangura yipako oyo kweyi yokuzera, ngwendi yokuterekera ngoso.

 ¹⁶ Naina, vantu vaJehova ava vana kukondja mokulizeresa vene, va hepa kulikara ure nava ava nyoka kulimburukwa konompango daJehova mombungakriste. (Resa 1 Vakolinte 15:33.) Nsene vamwe womombungakriste kuvhura kutupukisa, eyi kutupa konda zomulyo zeyi natu ‘likarera ure’ novantu va hana asi wombungakriste, morwa sinzi sawo ‘kwa dowokera yimaliwa, kapi ava zuvhu yovakurona vawo, kapi va pongoka, varundili nava woyikotjongana, awo kwa nyenga yoyiwa, awo nombudi ntani kwa hara mahafo goparutu kupitakana omu va hara Karunga.’—2 Tim. 3:1-5.

17. Nkareso musinke va kere nazo Vaisraeli wovalimburukwi pokunyokera po kurugana yoyidona?

¹⁷ Bibeli kwa tumbura omu Vaisraeli va kere netokomeno apa va va tantere asi va “lipore ko konontenta doKora naDatani naAbiramu.” Etjangwa kwa tanta asi “awo makura tava lipora ko.” (Num. 16:24, 27) Awo kapi va likata-katere ndi va liranga-range. Etjangwa kwa likida hena ulimburukwi ou va kere nawo. Valimburukwi vena kapi va here kulitura mosiponga. Ulimburukwi wawo kapi wa kere wokomusininiko ndi womutjimakoka. Awo kwa kwatesere ko Jehova nokunyokera po kurugana yoyidona. Yisinke natu lirongera ko kosihorokwa esi?

18. Yisinke ga tembe Paurusa apa ga korangedere Timoteusa asi a ‘tjwayuke madowo gosiudinkantu’?

¹⁸ Pokupopera elikwatakano lyetu naJehova, twa hepa kugenderera kurugana ko yuma. Eyi yiyo ga tembe Paurusa apa ga korangedere Timoteusa asi a ‘tjwayuke madowo gosiudinkantu.’ (2 Tim. 2:22) Posiruwo sina, Timoteusa age nare mugara gomukondi, ogu nampo ga kere nonomvhura 30. Nampili ngoso, “madowo gosiudinkantu” kapi aga kwama nomvhura. Apa ga ligwanekerere nomadowo gangoso, Timoteusa ga hepere ‘kugatjwayuka.’ Eyi kutanta asi ga nyokerere po ‘kurugana yoyidona.’ Jesus kwa geve epukururo lyokulifana apa ga tente asi: “Eho lyoge, ntene tali ku twaredesere konzo, li korora mo, o lizugumine kwina li ku lipore.” (Mat. 18:9) Naina, Vakriste ava ava limburukwa kompangera ezi, kunyokera po usimbu-usimbu maheteko.

19. Ngapi omu vamwe ava popere elikwatakano lyawo naJehova?

¹⁹ Vamwe ava va kere nonkorwe komeho zokuyakara Nombangi, va tokora kunyokera po yikorwesa nayinye. Vamwe kunyokera po yilihafeso yongandi eyi nayi vhura kupindura madowo gawo nampili ngomu ya dira kukara epuko. (Epis. 101:3) Pasihonena, komeho zokuyakara Mbangi, munazinyetugara gumwe nga hafere kuza koyipito yondaneso zokunyata. Apa ga ya lironga usili, age kwa nyokera po kudana nampili pomapongasano goNombangi morwa kutjira asi kuvhura yi pindure madowo ndi magazaro gendi ganare. Yosili, Bibeli kapi za silika Vakriste kumakera yikorwesa ndi kudana ntani nayimwe ngoso eyi ya dira kukara epuko. Nye twa hepa kunyokera po nkenye eyi nayi zonagura po elikwatakano lyetu naJehova.

20. Nampili ngomu ayi kara udigu ‘kusiga kurugana yoyidona,’ yisinke ayi tu pe ehengagwido nehuguvaro?

²⁰ Kusimba edina lyaKarunga kuna kara situmbukira sosinene. Twa hepa ‘kusiga kurugana yoyidona nokusuwurukwa ko.’ (Epis. 34:14) Yosili, ayo kapisi ureru. Nye ayo kuhengagwida mokudiva asi Jehova ga hara “vendi” ntani nava ava limburukwa konompango dendi.—2 Tim. 2:19; resa 2 Histoli 16:9a.