PETURUSA kwa lilire makurulira konyima zokupatana Jesus. Nampili ngomu mupositoli ga kondjere mokunkondopeka elikwatakano lyendi naJehova, Jesus kwa here kumuruganesa a vatere vakwawo. Jesus ta mu tantere asi: “Apa ngo tengwira kwange, ngo koreke vakweni.” (Ruk. 22:32, 54-62) Peturusa nage kwa ya kere gumwe govapitisili mombungakriste zokuhova. (Gar. 2:9) Mokulifana, mugara ga kere mukuronambunga kuvhura kumutengwidira situmbukira sendi ntani nga gwana ruhafo mokunkondopeka vapuli vakwawo.

Vamwe ava va kere vapitisili kwa va gusa situmbukira sawo, ano eyi nampo ya va dompesa. Julio, * ogu ga kere mukurombunga koMbindakano zaAmerika ure wonomvhura 20, kwa tanta asi: “Kuliwapaikira yiuyungwa nokutarera po vanavazinyetu nokurugana edinguro lyokukorangeda womombungakriste kwa hafesere nge! Hararasi nayinye tani yi zumbanesa, eyi kwa guvisire nge. Esi kwa kere siruwo sosidigu kwange.” Ngesi, Julio va mu tengwidira situmbukira sendi.

Murongwa Jakopo kwa tjenge asi: “Vakwetu, omu hafe tupu unene, nsene taga mu gwana maheteko gomanzi.” (Jak. 1:2) Jakopo kwa tembe komaheteko aga atu ligwanekere nago morwa kudira kusikilira mo. Age kwa tumbwire madowo gomadona ntani kuliza noyikara yovantu nayimwe hena ngoso. (Jak. 1:14; 2:1; 4:1, 2, 11) Apa Jehova a tu rungurura, kuvhura tu zuvhe kukora. (Heb. 12:11) Nye twa ha pulisira maheteko ga tu guse ruhafo.

Nampili tu zumbanese situmbukira setu mombungakriste, simpe twa kara nompito zokukonakona epuro lyetu nokulikida eharo lyetu kwaJehova. Kuvhura hena tu gazadare ko eyi twa tambwilire situmbukira sina. Kwa kere nositambo sokugwanena mo uwa, ndi eharo lyokuhara Jehova ndi morwa wa  pura asi mbungakriste zaJehova ntani za hepa epakero mbili? (Yirug. 20:28-30) Ava va kere nare vakuronambunga kwa twikira kukarera Jehova noruhafo mokulikida kwanavenye, kukwatera mo Satana asi awo kwa kara neharo lyosili kwaJehova.

Apa hompa Ndafita va mu piswire morwa nzo zendi, kwa tambwire episuro olyo ntani va mu gusilire po. Age kwa dimbire asi: “Gerago googu va dongwenena po nonzo dendi, nomausima gendi va ga kudumika. Gerago googu a dili kuvarwira HOMPA nonzo, ogu ga ha tanta yimpempa.” (Epis. 32:1, 2) Episuro kwa wapukwilire Ndafita a kare musita gomuwa govantu vaKarunga.

Vanavazinyetu ava ava tengwidire yitumbukira yawo youkuronambunga kukara vasita wovawa kupitakana omu va hovere kukara. Mukuronambunga gumwe kwa tente asi: “Ngesi nina yi kwata egano omu nani tekura ava ava tura mapuko.” Mukuronambunga gumwe hena kwa tente asi: “Ngesi ame kuna kutara situmbikira sange sokuruganena vanavazinyetu asi mulyo unene.”

Muepisarome kwa tjenge asi Jehova “kapi a handuka narunye.” (Epis. 103:9) Yipo nye, twa ha gazara asi Karunga kapi nga huguvara hena muntu ogu ga tulire nzo zonene. Ricardo ogu ga zumbanesere yitumbukira yendi konyima zokukara noyitumbukira oyo nomvhura dononzi, kwa tanta asi: “Ame kwa handukire unene morwa mapuko ganyamwange. Malizuvho gangesi kwa ninkisire nge ni dire kutura po marunduruko yipo ni gwane hena yitumbukira yange. Kapi na kere nehuguvaro asi ngava huguvara nge hena. Nye morwa kuhafera kuvatera wopeke, ame na vhulire kurugana malirongo goBibeli nokukorangeda vanavazinyetu koSinyanga soUhompa ntani nokurugana nawo moyirugana yokuzuvhisa. Eyi ya vaterere nge ni lihuguvare hena nyamwange, ano ngesi ame kuna kara hena mukuronambunga.”

Kukara nonkoko kuvhura kukondera munazinyetu mokugwana hena situmbukira soukuronambunga. Ee, omu tupu ya wapa mokukara ngwendi Ndafita mukareli gwaJehova, ogu ga dilire kukara nonkoko nahompa Sauru! Ndafita kwa nyokere kutengwida kuwoko Sauru, nampili ngomu ga gwene  nompito dokuyirugana. (1 Sam. 24:4-7; 26:8-12) Apa Sauru ga fire moyita, Ndafita kwa lilire nomfa dendi, nokumutumbura namunwendi Jonatana asi “wokuhara wovawa.” (2 Sam. 1:21-23) Ndafita kapi ga kere nonkoko.

Nsene o lizuvha asi kuna kukuninkilira mo, wa ha pulisira nkoko zi pangere magazaro goge. Pasihonena, apa William ogu ga kere mukuronambunga moBritania ure wonomvhura 30, apa va mu gusire situmbukira oso, kwa kere nonkoko kovakuronambunga vamwe. Yisinke ya vaterere William? Age kwa tente asi: “Kuresa buke zaJoba kwa vatera nge. Nsene asi Jehova kwa vaterere Joba a tulise po mbili novakaume vendi vatatu, name kuvhura a vatere nge ni tulise po mbili novakuronambunga!”—Joba 42:7-9.

Nsene wa tokwere kusiga situmbukira sokutakamesa siunda saKarunga, ya wapa mokugazadara ko eyi wa yi ruganenene. Ove kwa kere nomaudigu gomanzi ndi? Ndi koyili eyi ya ya kere mulyo meparu lyoge? Ove kwa ku dompesere ediro kusikilira mo lyava wopeke ndi? Yi kare asi yisinke ya horokere, diworoka asi apa wa kere mukuronambunga ove kwa kere nonompito dokuvatera wopeke mononkedi dononzi. Yiuyungwa yoge ngayi va nkondopeke, sihonena soge ngasi va korangeda, ntani edinguro lyoge ngali va vatere va lididimikire maudigu. Sirugana soge soulimburukwi soukuronambunga kwa hafesere mutjima gwaJehova ngamoomu sa ku hafesere nyamoge.—Yis. 27:11.

Jehova kwa vatera vakuronambunga va tengwidire po ruhafo ntani neharo lyawo lyokupitisira mombungakriste. Nsene asi kwa sigire situmbukira soukuronambunga ndi kwa si ku gusire, ove kuvhura hena o ‘tokomene kukara mupitisili gombungakriste.’ (1 Tim. 3:1) Paurusa ‘kapi ga hagekere kukandererera’ asi Vakriste woVakorosi va va zwide ediwo lyompango zaKarunga asi ngava ‘wape kukara moomu ga hara Hompa, oku tava rugana nkenye apa yokumuhafesa.’ (Koros. 1:9, 10) Nsene va ku tengwidira situmbukira soukuronambunga, huguvara mwaJehova a ku pe nonkondo nedidimiko ntani noruhafo. Momazuva aga gopouhura, vantu vaKarunga vana hepa evatero lyovasita veharo. Ono kara neharo lyokunkondopeka vapuli vakweni ndi?