Epuro eli kwa kara nomulyo, unene po kwava va fisa valikwali vawo. Awo kuvhura va kare neharo lyenene lyokukatwikira nonkwara dawo mouzuni woupe. Mufisayendi gumwe kwa tanta asi: “Name namukadange kapi twa tokwere kuhagekesa po nonkwara detu. Alyo kwa kere eharo lyetu mokutwikira ngovalikwali nokukarera Karunga kumwe dogoro narunye. Ano simpe na kara nomalizuvho gangesi.” Pwa kara konda zeyi natu huguvarera asi konyima zevhumbuko valikwali ngava ka twikira hena mononkwara ndi? Elimbururo kuna kara asi kapi tatu diva.

Nomvhura dononzi, yimbapiratjangwa yetu kwa uyungire asi nonkango daJesus dokuhamena evhumbuko nokudira kukakwara mouzuni woupe nampo kwa tembe kwava ngava vhumbwira pevhu. * (Mat. 22:29, 30; Mar. 12:24, 25; Ruk. 20:34-36) Nampili ngomu ya dira kuzera, kuvhura tu tante nye asi nonkango daJesus kwa tembe kwava ngava ka vhumbwira meguru ndi? Tu konakoneni eyi ga uyungire Jesus.

Tu konakoneni ukaro. (Resa Rukasa 20:27-33.) Vasadukayi, ava va dilire kupura mevhumbuko, kwa hetekere Jesus nepuro lyokuhamena evhumbuko ntani nonkwara. * Jesus kwa limbwilire asi: “Vantu womouzuni ou kulikwara-kwara. Nye ava wa wapera uzuni wokomeho nevhumbuko lyovafe, kapi ava likwara-kwara. Yeeyi awo kapi ngava fa hena, awo ngava fana ngwendi vaengeli, awo hena vana vaKarunga, morwa awo vevhumbuko.”—Ruk. 20:34-36.

Morwasinke yimbapiratjangwa yetu ya uyungira asi Jesus nampo kwa tembe kwava ngava vhumbwira pevhu? Morwa nokonda edi mbali. Zokuhova, kuna kara asi Vasadukayi kwa kere negano lyevhumbuko lyepevhu ano Jesus ga vhulire ngano kuvalimburura kuliza nepuro lyawo. Zauvali, Jesus kwa hagesere nelimbururo lyendi pokutumbura Abirahamu, naIsaka naJakopo, masimbi gokulimburukwa aga ngaga ka gwana evhumbuko lyepevhu.—Ruk. 20:37, 38.

Ayo kuvhura yi kare asi Jesus kwa tembe kevhumbuko lyava ngava za meguru. Morwasinke natu karera negano lyangoso? Tu konakoneni novelise mbali dina kukwama ko.

‘Ava va wapera evhumbuko lyovafe.’ Vagwavekwa wovalimburukwi awo kwa ‘wapera Untungi waKarunga.’ (2 Tes. 1:5, 11) Awo kwa va hungamekesesa kosizoweseso, ntani awo kapi ava fire morwa epanguro lyononzo. (Rom. 5:1, 18; 8:1) Vagwavekwa kuvatumbura asi ‘vanerago, ntani kwa pongoka’ ntani awo va wapera evhumbuko lyokuza meguru. (Ehor. 20:5, 6) Mokulisiga, ava ngava ka vhumbwira pevhu kwa hamena mo “vadona.” (Yirug. 24:15) Kuvhura  tu tante nye asi nawo va ‘wapera’ evhumbuko ndi?

“Yeeyi awo kapi ngava fa hena.” Matoroko gamwe kwa toroka ntanto ozo asi “nomfa kapi ngadi va pangera hena” ntani asi “nomfa kapi ngadi kara nononkondo kwawo.” Vagwavekwa ava ava fu noulimburukwi ngava ka gwana mfeto zokudira kufa. (1 Kol. 15:53, 54) Nomfa kapi ngadi kara hena nononkondo kowo ngava ka vhumbura va ze meguru. *

Kuliza neyi tuna zogere, yisinke natu vhura kutanta? Kuvhura tu tante asi nonkango daJesus kuhamena kudira kukwara ntani evhumbuko kwa tembe kwava ngava ka vhumbura va ze meguru ndi? Nsene yimo, nonkango dendi kututantera yininke yoyinzi kuhamena ava ngava ka vhumbwira keparu lyemeguru: Awo kapi ngava ka kwara, ntani kapi ngava fa, ngava ka kara ngwendi vaengeli. Nye ayo kuvhura kuretesa po mapuro gamwe.

Lyokuhova, morwasinke Jesus ga tumbwilire evhumbuko lyava ngava za meguru pokulimburura Vasadukayi, ava va divire tupu evhumbuko lyepevhu? Jesus kapi nga limburura nkenye apa varwanesi vendi kuliza neyi ngava gazara. Pasihonena, Vajuda ava va mu pulire kuhamena sidiviso sononkondo dendi, age kwa va limbwilire asi: “Zungurureni ntembeli ezi, nye ame ngani zi tunga hena momazuva gatatu.” Jesus ga yi divire asi awo kwa gazarere ntembeli zene-zene, “nye age kwa uyungire ntembeli zorutu rwendi.” (Joh. 2:18-21) Nampo Jesus kwa lizuvhire asi kapisi hepero a limburure Vasadukayi ava va dilire kukara neharo lyokudiva usili, ntani ava va dilire kupura mevhumbuko ndi asi vaengeli yipo va kara. (Yis. 23:9; Mat. 7:6; Yirug. 23:8) Age nampo kwa here kuhorora mausili kuhamena evhumbuko lyava ngava za meguru yipo varongwa vendi ava nawo ngava za meguru va gwanene mo uwa.

Lyauvali, morwasinke Jesus ga hagesere nzogera zendi pokutumbura Abirahamu naIsaka ntani naJakopo, ava ngava ka vhumbwira pevhu? (Resa Mateusa 22:31, 32.) Koneka asi Jesus kwa tamekere nzogera zendi kuhamena masimbi ogo nononkango edi asi: “Yokuhamena evhumbuko.” Nonkango edi kwa di ruganesere mokupameka egano lyevhumbuko. Jesus kwa ruganesere nonkango daMosesa edi va pulire Vasadukayi, mokulikida asi evhumbuko yiko sili ngali ka kara, ngamoomu ga yi harera Karunga.—Ex. 3:1-6.

Lyautatu, nsene asi nonkango daJesus kuhamena evhumbuko nokudira kukwara kwa tamba kwa va ngava vhumbura va ze meguru, eyi kutanta asi ava ngava ka vhumbwira pevhu ngava ka kwara ndi? Nonkango daKarunga kapi da gava elimbururo lyokuvyukilira kepuro olyo. Mokumona asi Jesus kwa uyungire kuhamena ava ngava ka vhumbura va ze meguru, nonkango dendi kapi adi likida nsene asi ava ngava ka vhumbwira pevhu kuvhura ngava ka kware mouzuni woupe ndi hawe.

Ose twa yi diva asi nonkango daKarunga kwa tanta asi nomfa yido adi gaununa elikwatakano lyomononkwara. Mufisayendi ga ha lizuvha unzoni pokutokora kukwara hena. Olyo etokoro lyamwene, wopeke kapisi va mu pangure nsene ana hara kukwara.—Rom. 7:2, 3; 1 Kol. 7:39

Yimo, kuvhura tu kare nomapuro gomanzi kuhamena eparu mouzuni woupe. Mevango lyokugazarera malimbururo komapuro ogo, twa hepa tupu kundindira. Nye kuvhura tu kare nehuguvaro asi: Vantu wovalimburukwi ngava ka hafa, morwa Jehova nga ka sikisa mo yihepwa yawo nayinye.—Epis. 145:16.