Ove kuna kugwana “nondya posiruwo sado” ndi?
OSE kuna kuparuka mosiruwo sosidigu unene. (2 Tim. 3:1-5) Eharo lyetu lyokuhara Jehova netokomeno lyetu lyokuparuka kuliza nonompango dendi kuna kuliheteka nkenye ezuva. Jesus ga divire siruwo esi, yipo ga tumbwidilire vasikuli vendi asi ngava gwana makorangedo aga va hepa va lididimike dogoro kouhura. (Mat. 24:3, 13; 28:20) Age kwa tulisa po mukareli gokulimburukwa a va pe “nondya posiruwo sado,” yipo di va nkondopeke.—Mat. 24:45, 46.
Kutunda tupu apa va tulisa po mukareli gokulimburukwa 1919, mamiliyona “govantu” womaraka nagenye kuna kuwiza kombunga zaKarunga nokuyagwana nondya dopampepo. (Mat. 24:14; Ehor. 22:17) Nye, kapi twa kara noyimbapiratjangwa momaraka nagenye ntani kapisi vantu navenye va kara noyikwakompiuta mokugwana yimbapiratjangwa yetu koIntaneta. Pasihonena, sinzi sovantu kapi va kara nonovidiyo ntani kapi ava gwana yirongwa eyi ya kara ko-jw.org. Eyi kutanta nye asi vamwe kapi ava gwana nondya edi va hepa yipo va kare nelikwatakano lyewa naKarunga ndi? Mokugwana malimbururo, tu konakoneni mapuro gane gomulyo.
1. Ruha musinke romulyo ronondya edi a tu pe Jehova?
Apa Satana ga hetekere Jesus asi a situnukise mamanya ga kare mboroto, Jesus kwa limbwilire asi: “Muntu kapi a paruka komboroto zelike, muntu kuparuka kwankenye nkango ezi azi tundu mokana kaKarunga.” (Mat. 4:3, 4) Nonkango daJehova kwa kara moBibeli. (2 Pet. 1:20, 21) Yipo nye, Bibeli kuna kara ruha romulyo po ronondya dopampepo.—2 Tim. 3:16, 17.
Mbunga zaJehova kwa toroka Bibeli nazinye zoNew World Translation of the Holy Scriptures ndi ruha rwazo momaraka gokusika 120 ntani maraka gomanzi kuna kugagwederera ko nkenye mvhura. Kugusa ko etoroko eli, pwa kara matoroko gamwe gokusika komamiliyona goBibeli nazinye ndi ruha rwazo momaraka gokusika komafere. Etompoko eli lyokutetukisa kwa liza nompango zaJehova ezi asi “vantu navenye va paruke, awo hena va ka sike kediwo lyousili.” (1 Tim. 2:3, 4) Ntani morwa “kutupu sisitwa esi sa mu horama,” ose twa yi diva asi Jehova nga kokera kombunga zendi vantu ava “ava fire nzara nenota uhungami” ntani nokuvapa nondya dopampepo.—Heb. 4:13; Mat. 5:3, 6; Joh. 6:44; 10:14.
2. Ngapi yimbapiratjangwa yetu ayi kwatesa ko kugava nondya dompapepo?
Mokuninka asi muntu a nkondopeke epuro lyendi, ga hepa kurugana ko yoyinzi kupitakana tupu kuresa Bibeli. Age ga hepa kukwata egano eyi ana kuresa nokutura pasirugana eyi ana kulironga. (Jak. 1:22-25) Erenga lyaEtiyopiya lyomosiruwo sovapositoli kwa haferere kuresa Nonkango daKarunga. Alyo kwa resere Nonkango daKarunga, ano Filipusa ta li pura asi: “Enye tomu yi zuvhu tupu eyi muna kuresa?” Erenga tali limburura asi: “Omu nani yi zuvha ngapi pwa hana ogu na vyukisa nge?” (Yirug. 8:26-31) Filipusa kwa tambwire situmbukira sokuvatera erenga li kwate egano Nonkango daKarunga. Eyi lya lirongere kwa li kundamene makura tali gwana ekuho. (Yirug. 8:32-38) Mokulifana, yimbapiratjangwa yetu yoBibeli kwa tu vatera tu kwate egano usili. Eyi twa lironga kutukundama ntani kututumangeda tu yi ture pasirugana.—Koros. 1:9, 10.
Kupitira moyimbapiratjangwa, vakareli vaJehova kugwana yoyinzi yokulya neyi yokunwa. (Jes. 65:13) Pasihonena, Ruhungu oru rwa kara momaraka gokupitakana 210, kufaturura mauporofete goBibeli aga aga kulike ediwo lyetu kousili, ntani nokututumangeda tu paruke kuliza nonompango doBibeli. Sifo Awake! va pwagesa konyara momaraka 100, kunkondopeka ediwo lyetu koyisitwa yaJehova ntani kutulikida omu natu tura pasirugana mapukururo gomoBibeli. (Yis. 3:21-23; Rom. 1:20) Mukareli gokulimburukwa kutupa yimbapiratjangwa yoBibeli momaraka gokupitakana 680. Ove kulitulira po siruwo sokuresa Bibeli nkenye ezuva ndi? Ove kuresa nkenye sifo noyimbapiratjangwa yoyipe eyi ava pwagesa meraka lyeni nkenye mvhura ndi?
Mokugwederera ko koyimbapiratjangwa, mbunga zaJehova kuwapaika yiuyungwa yoBibeli eyi ava gava komapongo nopoyigongi. Ove kuhafera yiuyungwa noyidanauka nomalikido nomapuragero eyi ayi horoka pomapongo ogo ndi? Yosili, Jehova kutupa nondya dononzi dopampepo!—Jes. 25:6.
3. Nsene asi ove kapi wa kara noyimbapiratjangwa nayinye meraka lyoge, ngo fa nzara pampepo ndi?
Hawe. Ayo kapi ayi tu tetukisa asi vakareli vamwe vaJehova kugwana nondya dononzi kupitakana vakwaawo. Morwasinke? Tu konakoneni sihonena sovapositoli. Awo kwa gwene mavyukiso gomanzi kupitakana varongwa vakwaawo. (Mar. 4:10; 9:35-37) Nampili ngoso, varongwa owo kapi va kere nonzara zopampepo, morwa va gwene nondya edi va hepere.—Efe. 4:20-24; 1 Pet. 1:8.
Yoyinzi eyi ga uyungire Jesus neyi ga rugene apa ga kere pevhu kapi va yi tjanga moMavangeli. Mupositoli Johanesa kwa tjenge asi: “Poyili hena yininke yoyinzi eyi ga ruganene Jesus. Nye nganosi nayinye kwa tundilira ko kuyitjanga simwe-simwe, amesi uzuni mudima ngano kapi nkare u vhure kukwata nobuke edi nkare va tjange.” (Joh. 21:25) Nampili ngomu vasikuli vaJesus wokuhova va kere nomauzera gomanzi kuhamena mugara gokusikilira mo Jesus kutupita, nye kapi tuna kufa nzara pampepo. Jehova kudivilisa asi tu dive yokugwanena po kuhamena Jesus yipo tu rugane moomu nga rugana age.—1 Pet. 2:21.
Gazara hena nombilive edi va tumine vapositoli konombungakriste dokuhova. Mbilive zimwe ezi ga tjenge Paurusa kapi va zi tjanga mo moBibeli. (Koros. 4:16) Ngoso kapi tuna kara nonondya dokugwanena po morwa kapi twa kara nombilive ozo ndi? Hawe. Jehova ga diva eyi twa hepa ntani ga tu pa yokugwanena po tu nkondopeke elikwatakano lyetu nendi.—Mat. 6:8.
Jehova ga diva eyi twa hepa ntani kutupa nondya dokugwanena po tu nkondopeke elikwatakano lyetu nendi
Naina, vakareli vamwe vaJehova va kara nonondya dopampepo dononzi kupitakana vakwaawo. Ove kuuyunga eraka eli lya kara tupu noyimbapiratjangwa yoyisesu ndi? Nsene yimo, diva asi Jehova kukupakera mbili. Lironga yimbapiratjangwa eyi wa kara nayo, nokuza komapongo gemeraka eli o zuvhu. Ntani kara nehuguvaro asi Jehova nga nkondopeka epuro lyoge.—Epis. 1:2; Heb. 10:24, 25.
4. Nsene asi kapi wa kara noyikwakompiuta mokugwana yimbapiratjangwa ko-jw.org, ngo fa pampepo ndi?
KoIntaneta zetu, kwa kara ko yifo ntani yimbapiratjangwa yoBibeli. Ako kugwana ko hena yirongwa eyi nayi vhura kuvatera valikwali, vadinkantu ntani nava va kara novanonagona. Mapata kugwanena mo uwa pokukonakona yirongwa oyo moUkareli wawo wEpata. Ntani hena, ko-jw.org kugwana ko marapoto gokulikarera ngwendi kuhamena varongwa wokoGiliyata nepongo lyankenye mvhura noyimpagwa eyi yina kuhorokera vanavazinyetu uzuni mudima ntani nonompanguro edi dina kukundama vanavazinyetu. (1 Pet. 5:8, 9) Intaneta zetu kuna kara hena siruganeso sosinene mokuzuvhisa mbudi zongwa nampili moyirongo omu va silika sirugana setu.
Ove kuvhura o nkondopeke elikwatakano lyoge naJehova yi kare asi wa kara noIntaneta ndi hawe. Mukareli gokulimburukwa kurugana unene mokunduruka yimbapiratjangwa yokugwanena po mokutuvatera. Yipo nye, ya ha ku tumangeda mokuranda yikwakompiuta morwa ono hara kuruganesa jw.org. Vamwe kutura po mawapaiko yipo va nduruke yimbapiratjangwa eyi ayi kara ko-jw.org nokuyigava kowo va dira Intaneta, nye nombungakriste kapi va di pulisira mokuyirugana oyo.
Ose kuna kupandura Jesus kweyi ga sikisa mo etumbwidiro lyendi lyokutupa nondya dopampepo. Ngomu mazuva gopouhura goudigu gana kuhedera pepi, kuvhura tu kare nehuguvaro asi Jehova nga twikira kutupa nondya dopampepo “posiruwo sado.”