1, 2. Ngapi Jehova a uyungisa vakareli vendi?

JEHOVA nga vyukisa vantu vendi kutundilira kwanare. Age nga uyunga nawo kupitira movaengeli nomomamoneko nomononzodi mokuvahorwera yokomeho. Jehova kwa va pere hena yirugana eyi va hepere kurugana. (Num. 7:89; Hes. 1:1; Ndan. 2:19) Vamwe ngava gwana mavyukiso kupitira movantu ava ngava karere po Jehova. Yi kare asi monkedi musinke vantu vaJehova ngava gwana mavyukiso gendi, ava ngava ga kwama ngava va tungike.

² Naina, Jehova kuvyukisa vantu vendi kupitira moBibeli nomompepo zendi zokupongoka ntani nomombungakriste. (Yirug. 9:31; 15:28; 2 Tim. 3:16, 17) Mavyukiso aga atu gwana kwendi kwa fana ngwendi kuna ‘kuzuvha ezwi konyima zetu asi: “Nzira zezi. Zi kwameni.”’ (Jes. 30:21) Jesus kututantera mavyukiso gaJehova ngomu ana kupitisira mbungakriste kupitira ‘momukareli gokulimburukwa gonondunge.’ (Mat. 24:45) Twa hepa kupurakena komavyukiso nokugatambura, morwa mwenyo gwanarunye kwa korera moulimburukwi wetu.—Heb. 5:9.

3. Yisinke nayi tu ninkisa tu dire kulimburukwa komavyukiso gaJehova? (Tara efano.)

³ Sitambo saSatana Muzonaguli sokuninkisa mapukururo aga atu gwana kwaJehova ga moneke ngwendi kwato mulyo.  Ntani hena ‘mutjima gwetu gokuzura yimpempa’ kuvhura kutuninkisa tu dire kulimburukwa komavyukiso gaJehova. (Jer. 17:9) Tu konakoneni omu natu nyokera po eyi nayi tu donganesa kupurakena kezwi lyaKarunga. Natu ka zogera hena omu euyungokumwe naJehova nali tu vatera tu nkondopeke elikwatakano lyetu kumwe nendi yi kare asi moukaro musinke tuna kara.

4. Ngapi Satana a hetekere ko kupukisa magazaro govantu?

⁴ Satana kuhetekera ko kupukisa magazaro govantu pokuruganesa nombudi nomaropoto goyimpempa. (Resa 1 Johanesa 5:19.) Nosaitunga nonobuke noyifo nonoradio nonotivi ntani noIntaneta kuhanesa nombudi uzuni mudima. Ayo kuvhura kugava nombudi domulyo, nye hena unene po kuhanesa nonkareso dokulilimba nonompango daJehova. (Jer. 2:13) Pasihonena, kuvhura va tante asi kapi ya kara epuko kulirara mugara nomugara ndi mukadi nomukadi, eyi ayi ninkisa vantu wovanzi va gazare asi Bibeli kusilika umanguruki womuntu.—1 Kol. 6:9, 10.

5. Ngapi natu nyokera po kutupukisa magano gaSatana goyimpempa?

⁵ Ngapi omu ava va hara nompango daJehova ava nyokere po kuvapukisa magano gaSatana goyimpempa? Ngapi omu nava hangura uwa koudona? Bibeli kwa limburura asi: ‘Nsene tava livyukisisa kononkango daKarunga.’ (Epis. 119:9) Nonkango daKarunga kwa kara mo mavyukiso gomulyo aga naga tu vatera tu hangure usili komagano goyimpempa. (Yis. 23:23) Pokutemwinina Matjangwa, Jesus kwa tente asi: “Muntu kuparuka kwankenye nkango ezi azi tundu mokana kaKarunga.” (Mat. 4:4) Twa hepa kulironga omu natu sikisa mo nompango doBibeli meparu lyetu. Pasihonena, komeho Mosesa a ka tjange veta zaJehova kuhamena ruhonda, mudinkantugara Josefa ga divire asi kuligwanekera panyama nomuntu ga hana asi mulikwali goge nzo. Apa ga mu zedere mukadaPotifara asi va rare, Josefa kapi ga gazarere kuteza po ulimburukwi wendi. (Resa Genesis 39:7-9.) Nampili ngomu mukadaPotifara nga mu kondjesa siruwo sosire, Josefa kapi ga purakenene kezwi lyendi nye kezwi lyaKarunga. Mokuhangura uwa koudona, twa hepa kupurakena kezwi lyaJehova nokunyokera po magano gaSatana goyimpempa.

6, 7. Yisinke twa hepa kurugana yipo tu nyokere po magano gaSatana goyimpempa?

⁶ Uzuni kuna zura marongo goyimpempa gomaukarelikarunga, ntani vantu wovanzi kugazara asi pwato ukarelikarunga wousili. Nye Jehova kwa gava mavyukiso gendi gomawa kwava vana hara kugapurakena. Twa hepa kutokora asi kwalye natu purakena. Mokumona asi nokuvhura si kupurakena komazwi gavali posikando simwe, twa hepa ‘kudiva ezwi’ lyaJesus nokulipurakena.  Jehova kwa horowora Jesus a pitisire nonzwi dendi.—Resa Johanesa 10:3-5.

⁷ Jesus kwa tanta asi: “Takameseni kweyi muna kuzuvha.” (Mar. 4:24) Mavyukiso gaJehova kwa hungama, nye twa hepa kuwapaika nomutjima detu mokugapurakena nokugatambura. Nsene kapi tuna kutakamesa, kuvhura tu purakene komagano gaSatana goyimpempa mevango lyokupurakena komavyukiso gaKarunga. Wa ha pulisira nomusika nonovidiyo nomalikwamo gokotivi nonobuke novakaume ndi vagavi magano womouzuni va pangere eparu lyoge.—Koros. 2:8.

8. (a) Morwasinke Satana ayi mu rerupilire kupukisa nomutjima detu? (b) Yisinke nayi horoka nsene tu ncenuna yidiviso yokuturondora?

⁸ Satana ga diva asi ose twa kara nomadowo gomadona, ntani age kutuzeda tu sikise mo madowo ogo. Apa Satana a tu zedagwire monkedi zangesi, ayo kutudigopera mokukwaterera koulimburukwi wetu. (Joh. 8:44-47) Pasihonena, ose kuvhura tu hageke kukanderera nokudira kuza moyirugana yokuzuvhisa nokutameka kufaura komapongo, ano eyi kuna kara yidiviso yokuturondora kweyi yina kuhoroka momutjima gwetu ntani twa ha yi ncenuna. Nsene kapi tuna kutakamesa kanunu-kanunu kuvhura tu hageke kupurakena kezwi lyaJehova. Ano moruhura, kuvhura tu gwire momadowo getu nokurugana yininke yoyidona eyi twa dira kugazara kurugana. (Rom. 7:15) Nye kuvhura tu nyokere po kurugana udona wangoso nsene tu nongonona usimbu yidiviso oyo nokurugana ko yuma. Nsene tu purakena nawa kezwi lyaJehova, kapi ngatu purakena komagano govantu woyimpempa.—Yis. 11:9.

9. Morwasinke ya karera nomulyo kudimburura usimbu madowo gomadona?

⁹ Nsene va dimburura usimbu uvera womuntu, kuvhura kumuparura. Mokulifana, nose kuvhura kunyokera po madowo gomadona aga aga tu twaredesa konzo, nsene tu ga dimburura usimbu. Twa hepa kurugana ko yuma usimbu-simbu nsene tuna ga dimburura, komeho Satana a ‘tu kwate tu rugane eyi ga hara.’ (2 Tim. 2:26) Yisinke natu rugana nsene tu dimburura asi magazaro nomadowo getu gana lisigi neyi ana hara Jehova tu rugane? Nelinunupiko, twa hepa kugenderera kutengura kwendi nokupurakena komapukururo gendi nonomutjima detu nadinye. (Jes. 44:22) Twa hepa kudimburura asi kutulisa po etokoro lyedona kuvhura kutukundama momudona, ntani ngayi tu retera kukora  kokunene mouzuni ou. Ee, omu tupu ya wapa mokudira kusiga Jehova!

10, 11. (a) Ngapi elinenepeko nali vhura kulihorora? (b) Yisinke natu lirongera ko kosihonena sosidona saKora naDatani ntani Abiramu?

¹⁰ Twa hepa kuyitambura asi mutjima gwetu kuvhura gu tu pukise. Pasihonena, kuvhura gu tu ninkise tu linenepeke ndi tu dowokere emona. Ngesi tatu ka konakona omu nkenye sikara oso nasi tu donganesa mokupurakena kezwi lyaJehova ntani nokututwaredesa tu ture mapuko gomanene. Muntu gokulinenepeka kulimona mwene asi age mulyo ntani asi kuvhura a rugane nkenye eyi ana hara. Age kuvhura a lizuvhe asi kwato ogu na mu tantera eyi na rugana, yi kare asi Vakriste vakwawo ndi vakuronambunga ndi nampili mbunga zaKarunga. Muntu gwangoso, kapi a purakene kezwi lyaJehova.

¹¹ Apa Vaisraeli va kere momburundu, Kora naDatani ntani Abiramu kwa rwanesere upangeli waMosesa naArona. Morwa kwa linenepekere, awo kwa here kukarera Jehova monkedi zavene. Ngapi omu ga yi tere Jehova? Age kwa va dipagere. (Num. 26:8-10) Kuvhura tu lirongere ko sirongwa somulyo kosihorokwa sina. Kurwanesa Jehova kutwaredesa kezonauko. Tu diworokeni hena asi “elinenepeko kureta ehanauko.”—Yis. 16:18; Jes. 13:11.

12, 13. (a) Gava sihonena sina kulikida omu edowo ali twaredesa kokudona. (b) Faturura omu edowo ali kuru nokukutulisa nzo nsene kapi ono kulikandana po.

¹² Kudowokera emona siponga. Muntu gokudowokera emona nkenye apa kugazara asi mavyukiso gaJehova kapi ga mu tamba, ntani kuvhura a guse yininke ya hana asi yendi. Konyima zapa mupitisili govakwayita Vaasiliya Namani ga verukire kouvera wendi woyingondwe, age kwa here kugava mauhwi komuporofete Elisa, nye Elisa ga nyokere kugatambura. Nye mukareli gwendi Gehasi kwa dowokerere mauhwi ogo. Gehasi ta litantere mwene asi: “Yosili HOMPA muzuni, tani duka ni mu sikure [Namani] a ka pe nge ko yuma.” Ga hana kuyidivira Elisa, Gehasi ta sikura Namani nokukahumundira “yimaliwa yoyitenda yosisiliveli mayovi gatatu noyikoverero yivali.” Yisinke ya horokerere Gehasi morwa kukumbagera muporofete gwaJehova? Age kwa mu zugumine yingondwe!—2 Vah. 5:20-27.

¹³ Edowo kutameka kanunu-kanunu, nsene kapi ono kulikandana po, kuvhura li kure nokukutulisa nzo. Eyi kwa lilikida mosihorokwa somoBibeli saAkana. Koneka omu edowo lyendi lyokudowokera emona lya kulire. Age kwa tente asi: ‘Ame kwa mwene sikoverero soSibabironi sosiwa nosisiliveli sonokilogarama 2 nongorodo zonogarama 500. Ame kwa yi tokomenene unene, makura tani yi gusa.’ Mevango lyokunyokera po edowo lyedona, Akana kwa veke yininke nokuyihoreka motenta zendi. Apa unzoni waAkana wa divikwire, Josuwa kwa tanterere Akana asi Jehova nga mu zonagura po. Akana nepata lyendi kwa va dipagere nomamanya ezuva lyooyo. (Jos. 7:11, 21, 24, 25) Nampili nyose, kuvhura tu dowokere emona ngwendi Akana. Eyi yiyo twa hepera ‘kutakamesa kedowo lyemona.’ (Ruk. 12:15) Nampili ngomu poyiruwo yimwe atu kara nomagazaro gomadona ndi goruhonda, ya kara nomulyo kupangera magazaro getu yipo madowo ogo ga dire kututwaredesa konzo.—Resa Jakopo 1:14, 15.

14. Yisinke twa hepa kurugana nsene tu dimburura mwetu nkareso zelinenepeko ndi zokudowokera emona?

¹⁴ Elinenepeko nedowo nayinye kutwaredesa kokudona. Kugazadara ko koyitundwamo  yokurugana udona ngayi tu vatera tu twikire kupurakena kezwi lyaJehova. (Deut. 32:29) Kupitira moBibeli, Karunga gosili kapi tupu a tu tantere yitundwamo yokugenda monzira zouhunga nye hena noyitundwamo yokukwama nzira zepuko. Nsene tu gwira meheteko lyokuhara kurugana udona morwa elinenepeko ndi edowo lyemona, twa hepa kugazadara ko omu yitundwamo ngayi tu kundama ntani nomu ngayi kundama vantu ava twa hara nelikwatakano lyetu naJehova.

15. Yisinke natu lirongera ko kosihonena saJesus?

¹⁵ Jehova kuna tu harere uwa. (Epis. 1:1-3) Age kutupa mavyukiso gouhunga posiruwo esi tuna ga hepa. (Resa Vahebeli 4:16.) Nampili ngomu Jesus ga kere gokusikilira mo, age nga uyunga nkenye apa naJehova mekanderero. Jehova kwa vaterere Jesus nokumupitisira mononkedi dokutetukisa. Age kwa tumine vaengeli va ya pakere mbili Jesus nokumupa mpepo zokupongoka ntani nokumupitisira a horowore vapositoli 12. Ezwi lyaJehova kwa tundire meguru mokulikida asi age kukwatesa ko Jesus ntani ga mu hara. (Mat. 3:17; 17:5; Mar. 1:12, 13; Ruk. 6:12, 13; Joh. 12:28) Ngwendi Jesus, nose twa hepa kukanderera nkenye apa kwaKarunga. (Epis. 62:7, 8; Heb. 5:7) Makanderero kutuvatera tu kare nelikwatakano naJehova ntani tu paruke monkedi ezi azi gava efumano kwendi.

16. Ngapi omu Jehova a tu vatere tu purakene kezwi lyendi?

¹⁶ Nampili ngomu Jehova ga tu pa mavyukiso, age kapi a tu sininike tu ga kwame. Twa hepa kuhundira mpepo zendi zokupongoka, ntani age nga zi tu pa. (Resa Rukasa 11:10-13.) Ya kara nomulyo tu takamese ‘mokupurakena kwetu.’ (Ruk. 8:18) Pasihonena, nsene tu hundira Jehova a tu vatere tu nyokere po madowo gomadona, nye simpe tu twikire kutarera mafano ndi nomuvi doruhonda, ose ngoso kuna kulikida asi kapi tuna hara evatero lyendi. Twa hepa kukara komapongo getu oku za kara mpepo zaJehova. Vakareli vaJehova wovanzi kwa nyokera po udona pokupurakena kwaJehova posiruwo somapongo. Ngoyitundwamo, apa ava nongonona asi kuna kutunga po edowo lyedona momutjima gwawo, awo kukohonona po udigu owo.—Epis. 73:12-17; 143:10.

17. Morwasinke ya karera siponga kulihuguvara nyamwetu?

¹⁷ Tu konakoneni sihonena sahompa Ndafita. Ngomudinkantu, age kwa fundire Mufilisiti getundusika Golyata. Ndafita kwa ya kere mukwayita, hompa, mupopeli ntani nga tulire po muhoko goVaisraeli matokoro gomawa. Nye apa ga tamekere kulihuguvara mwene, mutjima gwendi kwa mu pukisire ntani ga honderere naBeteseba, nokudipagesa mugara gwendi Uliya. Apa Jehova ga mu piswire, Ndafita ga tambwire epuko lyendi nelinunupiko ntani ga tengwidilire po elikwatakano lyendi naJehova.—Epis. 51:4, 6, 10, 11.

18. Yisinke nayi tu vatera mokutwikira kupurakena kezwi lyaJehova?

¹⁸ Tu tambureni epukururo lyomo-1 Vakolinte 10:12 ntani kapisi tu lihuguvare nyamwetu. Bibeli kwa vyukilira kuuyunga asi kapi atu vhuru kulipitisira nyamwetu, eyi kutanta asi kuvhura tu purakene kezwi lyaJehova ndi lyaSatana. (Jer. 10:23) Ngano tu kanderere nkenye apa ntani nokukwama evyukiso lyompepo zokupongoka nokupurakena nawa kezwi lyaJehova.