NKANGO “eureka!” kutanta asi: “Nina zi gwana!” Koyiha 1800 vantu ngava papara ngorodo moKalifoniya, moAmerika, nsene munamina ana gwana ngorodo age nga zigire asi “eureka!” Nye Charles Taze Russell noValirongi vakwawo woBibeli posiruwo sina kwa gwene yomulyo kupitakana ngorodo, ano ayo kwa kere usili womoBibeli. Ntani awo kwa here kutantera ko wopeke.

Koyiha yaPembagona naSitarara 1914, vantu mamiliyona ava va kere moyitata yoyinene kwa zire va ka tarere “Photo-Drama of Creation,” ezi nga zi dana ure wonovili ntantatu va rugene Valirongi woBibeli. Mosidanauka esi kwa hamenene mo mafano, nesanseko lyosidanauka ntani nomusika, aso kwa likidire etameko lyounsitwe nehistoli lyovantu dogoro kouhura wEpangero lyoNomumvho Eyovi lyaJesus Kristusa.—Ehor. 20:4. *

Nye ngapi kuhamena ava va tungire monodoropagona nokonomukunda? Mokuninka asi va gwane nawo usili, mwaSiwogedi 1914 Valirongi woBibeli kwa pwagesere sidanauka “Eureka,” esi va gusire “koPhoto-Drama” sa kere ureru kutaresa. Aso kwa kere nomaruha gatatu, ano nkenye ruha kwa kere momaraka gongandi: Sidanauka “Eureka X” kwa hamenene mo masimwititi ntani musika. “Eureka Y” kwa hamenene mo makwateko gomasimwititi nomusika ntani mafano. Ntani “Eureka Family Drama,” ezi va wapaikilire mapata, kwa hamenene mo masimwititi gamwe nononsumo doUhompa. Awo kwa ruganesere hena nongarafona edi da kere mbiliha ntani mahina gokulikidisa mafano.

Eyi ya rerupilire Valirongi woBibeli va ka tarese sidanauka esi konomukunda edi da kere ure mokutwara mbudi zoUhompa. Sidanauka “Eureka X” ngava vhuru kusipurakena masiku ndi mutenya. Sidanauka “Eureka Y” ngava si likida nampili kwato rutjeno, pokuruganesa tupu ramba zohasi. Ruhungu romoRufinnish kwa rapotere asi: “Ose kuvhura kulikida yidanauka eyi nkenye oku.” Ano ayo yimo sili ya horokere!

Mevango lyokuhehera nosala dononene dokulikidira, Valirongi woBibeli kwa gwene mavango gomawoko-woko aga ngava ruganesa, ngwendi nonkondwarongero nononzugopangwiro, nomononzugo omu ngava ndindilire mahina gorutenda ntani momambo gomanene. Rorunzi, malikido aga ngava ga ruganene ponze, awo kwa hepere kuruganesa ekehe lyezera eli ngava kulike nkenye oku kuna wapere. Anthony  Hambuch kwa tjenge asi: “Vanafarama kwa wapaikire evango eli va tulire magogwa, eli ngava hingire vantu nokuhafera malikwamo.” Valirongi ava, ngava ruganesa karukara mokusimbira mo yiruganeso nonondjato nonotenta dawo ntani noyipako eyi ngava terekere.

Ava ngava tarerere sidanauka “Eureka” kwa kere vasesu nye konyima va ya ligwederere. MoAmerika, apa va likidire sidanauka oso posure modoropa zovantu 150, vantu wokusika 400 kwa ka pongere. Komavango nagopeke, vamwe kwa gendere sinano sokusika konokilometa ntantatu mokukatarera sidanauka oso. MoSweden, vamusinda vaCharlotte Ahlberg ava va ya pongere membo lyendi “kwa va gumine komutjima” apa va zuvhire ekwateko lyosidanauka. Mositata sonomina somoAustralia vantu 1 500 kwa wizire va ya tarere sidanauka. Ruhungu kwa rapotere asi konosure nokonokoledji, “varongi novarongwa kwa haferere mafano gomosidanauka.” Sidanauka “Eureka” kwa divikwire nampili komavango oku ngava taresa nomuvi.

Sidanauka “Eureka” kwa ya kere siruganeso sosiwa kovatareli wonomukunda, ava ngava tumu Valirongi woBibeli mokukatameka elirongo nava wovape. Kapi tuna diva asi vantu wokuhura kupi va mwene sidanauka “Eureka.” Nye yiruganeso yosidanauka esi kwa yi ruganesere nkenye apa. Mo-1915 monombunga 86 edi ngadi likida sidanauka, 14 yido tupu ngadi gava marapoto gosivaro. Morwa kudira kugava marapoto nagenye, kehagero 1915 kwa divisire asi vantu wokupitakana pemiliyona kwa mwene sidanauka oso. Ano wokusika 30 000 kwa tulire mo mahundiro va gwane yimbapiratjangwa yoBibeli.

Nampili ngomu sidanauka esi sa dira kudivikwa, vantu wokusika komamiliyona ava va tungire moAustralia yi tware moArgentina, nomoAfrika Mbindakano yi tware kosirudi saBritania nomoIndia ntani noyirudi yefuta lyaCaribbean, nampo va mwene elikido eli lyokulikarera. Sinzi sawo kwa gwana usili kupitakana ngorodo ntani kuvhura kuzigira asi “Eureka!”