1. Ngapi Paurusa ga lizuvhire kuhamena ava ngava rugana unene mokuzuvhisa mbudi zongwa?

MUPOSITOLI PAURUSA kwa diworokere owo ngava rugana unene mokuzuvhisa mbudi zongwa. Paurusa kwa tjenge asi: “Ose kapi atu tuda kudiworoka komeho zaKarunga Guhyetu yirugana yepuro lyeni nomupampi geharo nehuguvaro lyeni kwaKarunga Guhyetu mwaHompa gwetu Jesus Kristusa.” (1 Tes. 1:3) Jehova nage kudiworoka nokuhafera nayinye eyi ava rugana vantu vendi mokumukarera, yi kare asi yoyinunu ndi yoyinene.—Heb. 6:10.

2. Yisinke natu ka konakona mosirongwa esi?

² Sinzi sovakareli vakwetu kwa tura po malizambero gomanene mokukarera Jehova mosirugana sosiruwo nasinye. Mosirongwa esi tatu ka konakona omu vamwe womosiruwo sanare va karerere Jehova. Ntani tatu ka lironga yirugana yosiruwo nasinye eyi vana kurugana naina ntani nomu natu vhura kuvavatera.

3, 4. (a) Mononkedi musinke Vakriste womosiruwo saJesus ngava karere Jehova? (b) Ngapi omu ngava lipakere vene mbili?

³ Konyima tupu zapa va mu kuhwire, Jesus kwa tamekere kuzuvhisa Uhompa ntani kwa rongere wopeke va rugane yokulifana.  (Ruk. 3:21-23; 4:14, 15, 43) Konyima zonomfa dendi, vapositoli vendi kwa twikilire kutamununa sirugana sokuzuvhisa. (Yirug. 5:42; 6:7) Vakriste vamwe, ngwendi Filipusa kwa kere vauudisi novatumwa mosirongo saPalestina. (Yirug. 8:5, 40; 21:8) Paurusa novakwawo kwa zuvhisilire mbudi zongwa moyirongo yoyinzi yokoure. (Yirug. 13:2-4; 14:26; 2 Kol. 1:19) Vakwawo, kwa kere Marukusa naRukasa ntani naSilivanusa, ogu ga kere hamutjanga govatjangi woBibeli. (1 Pet. 5:12) Vanavazinyetu wovakadi kwa rugene kumwe novanavazinyetu owo. (Yirug. 18:26; Rom. 16:1, 2) MoMatjangwa goRugereka goSikriste, kwa kara mo yihorokwa yovanavazinyetu ava ntani kutudiworokesa asi Jehova kuhafera yirugana yovakareli vendi.

⁴ Ngapi omu Vakriste womosiruwo saJesus va lipakerere vene mbili? Awo kapi ngava sininike Vakriste vakwawo va va vatere, nye ngava rugana mokulipakera vene mbili. (1 Kol. 9:11-15) Nampili ngoso, ngava tambura evatero lyoVakriste vakwawo pokukalya kumwe nawo nokugwana ko mararo ntani nayimwe hena. (Resa Yirugana 16:14, 15; Vafilipi 4:15-18.) Paurusa novakwawo nawo ngava rugana yirugana yopokaruwogona mokulirera vene.

5. Malizuvho musinke va pwagesa valikwali vamwe kuhamena kurugana sirugana sosiruwo nasinye?

⁵ Naina, wovanzi kulitura mo unene mokurugana mosirugana sosiruwo nasinye. (Tara kakende “ Yirugana yoUhompa yosiruwo nasinye.”) Ngapi omu ava lizuvhu owo ava howora yirugana oyo? Ove ngayi kukorangeda nsene o pura vanavazinyetu vamwe womosirugana oso epuro eli. Pasihonena, munazinyetugara ogu ga kere muzuvhisi gokukarerera, nomuzuvhisi gosiruwo nasinye nomutumwa ntani Mubeteli kwa tanta asi: “Ame kulizuvha asi kurugana sirugana sosiruwo nasinye kuna kara etokoro lyewa po eli na tulire po. Apa na kere nonomvhura 18, kwa digoperere nge kutokora pokatji kokuza kounivesiti ndi kurugana sirugana sosiruwo nasinye ndi uzuvhisi wokukarerera. Eyi na limonena ya likida asi Jehova kapi a divara ava ava tura po malizambero mokumukarera siruwo nasinye. Ame kwa ruganesa udivi wange ou ga pa nge Jehova mononkedi dokulisiga-siga ou ngano na dilire kuruganesa mouzuni.” Mukadendi kwa tanta asi: “Nkenye sirugana kwa vatera nge ni ture po ezokomeho. Ose twa limonena epopero nevyukiso lyaJehova monkedi omu nkare tu dire kuligwana ngano twa rugene mouzuni. Ame kupandura Jehova nkenye ezuva kweyi ga tu pa mpito tu rugane sirugana sosiruwo nasinye.” Nove ono hara kuhafera eparu lyangoso ndi?

6. Ngapi omu Jehova a lizuvhu kuhamena sirugana setu?

⁶ Yimo, vamwe kuvhura u dire kuvapulisira ukaro wawo mokurugana sirugana sosiruwo nasinye. Ose twa kara nehuguvaro asi Jehova kuhafera elituromo lyawo lyokumuruganena nomutjima nagunye. Gazadara ko kowo ga tumbwire Paurusa mwaFiremoni 1-3, kukwatera mo ava va kere mombungakriste zoVakorosi. (Resa.) Paurusa ga haferere sirugana sawo, ano Jehova nage ngosikwawo. Mokulifana, Guhyetu gemeguru kuhafera sirugana soge. Ngapi omu no vatera ava va kara mosirugana sosiruwo nasinye?

7, 8. Yisinke ya hamena mo mosirugana souzuvhisi wokukarerera, ntani ngapi womombungakriste nava va vatera?

⁷ Ngwendi vaudisi womosiruwo sanare, vazuvhisi wokukarerera womupampi sihonena sawo kukorangeda mbungakriste.  Wovanzi kurugana novili 70 nkenye kwedi mokuzuvhisa. Ngapi omu no vhura kuvavatera?

⁸ Muzuvhisi gumwe gokukarerera gedina Shari, kwa tanta asi: “Vazuvhisi wokukarerera kumoneka asi va kara nelikwatakano lyokupama naJehova, nye simpe va hepa ekorangedo.” (Rom. 1:11, 12) Ano munazinyetukadi gumwe ogu ga zuvhisa nomvhura dongandi kwa tanta kuhamena vazuvhisi wokukarera womombungakriste zawo asi: “Awo kurugana unene. Apa wopeke ava va vatere nougendero nokuvazigida va ka lye kumwe nawo nokuvapa ko yimaliwa ntani nayimwe hena, awo kuyihafera. Ayo kuvaninkisa va lizuvhe asi wa va hara.”

9, 10. Yisinke vamwe va rugana mokuvatera vazuvhisi wokukarerera womombungakriste zawo?

⁹ Nove ono hara kuvatera vazuvhisi wokukarerera ndi? Bobbi, muzuvhisi gokukarerera kwa tanta asi: “Ose kuhepa evatero mokatji kosivike.” Muzuvhisi mukwawo gokukarerera kwa gweda ko asi: “Ayo udigu kugwana gokurugana nage mokuzuvhisa kositenguko.” Munazinyetukadi ogu ana kara ngesi koBeteli zaBrooklyn kwa simwitira kuhamena uzuvhisi wendi wokukarerera asi: “Munazinyetukadi ogu ga kere netuwa kwa tente asi, ‘Nkenye tupu apa no dira kukara nogu no rugana nendi mokuzuvhisa, tantera nge yipo ni ya ze noge mokuzuvhisa.’ Yosili age kwa vaterere nge unene mouzuvhisi wange wokukarerera.” Munazinyetukadi Shari, kwa tanta asi: “Konyima zokuzuvhisa, vazuvhisi wokukarerera wovadike rorunzi kukara velike. Kuvhura o va zigide ko moukareli woge wepata poyiruwo noyiruwo. Ntani va hameka mo moyininke hena yimwe mokuvavatera va nkondopare.”

¹⁰ Munazinyetukadi gumwe ogu ga kara mosirugana sosiruwo nasinye konyara nomvhura 50 kwa uyunga kuhamena evatero eli ga gwene ntani novapuli vakwawo wovadike pokutanta asi: “Vakuronambunga vetu ngava dingura vazuvhisi wokukarerera konyima zomakwedi gongandi. Awo ngava pura kuhamena ukanguki wetu noyirugana yetu ntani nokudivilisa nsene tuna kara nankenye udigu. Awo kutuvatera sili. Awo kuwiza oku twa tunga yipo va tare nsene tuna hepa evatero.” Eyi kutudiworokesa rupandu  rwaPaurusa oru ga geve kepata lyaOnesiforusi gomoEfeso.—2 Tim. 1:18.

11. Yisinke ya hamena mo mosirugana sosiruwo nasinye?

¹¹ Nombungakriste dimwe kwa di tungika mokukara novazuvhisi wosiruwo nasinye. Vanavazinyetu owo kurugana novili 130 nkenye kwedi moyirugana yokuzuvhisa. Morwa novili edi ava rugana moyirugana yokuzuvhisa ntani nokuvatera wopeke mononkedi dokulisiga-siga, awo kapi va kara nosiruwo sokurugana yirugana yomouzuni. Ano mberewa zomutayi kuvavatera yipo va demenene kosirugana sawo.

12. Ngapi omu vakuronambunga nava wopeke nava vatera vazuvhisi wosiruwo nasinye?

¹² Ngapi omu natu vatera vazuvhisi wosiruwo nasinye? Mukuronambunga gumwe gokomberewa zomutayi ogu ga zogera novazuvhisi wovanzi owo, kwa tanta asi: “Vakuronambunga va hepa kuzogera nawo, va dive maukaro gawo ntani nomu nava vhura kugava evatero. Vamwe kugazara asi vazuvhisi wosiruwo nasinye va kara noyihepwa nayinye morwa kugwana yimaliwa, nye vanavazinyetu womomukunda kuvhura va gave evatero mononkedi dokulisiga-siga.” Ngwendi vazuvhisi wokukarerera, vazuvhisi wosiruwo nasinye kuhepa ava nava rugana nawo mokuyirugana yokuzuvhisa. Kuvhura o vatere ndi?

13, 14. (a) Yisinke twa hepa kudiworoka kuhamena vatareli wonombungakriste? (b) Yisinke no vhura kurugana yipo o va vatere mosirugana sawo?

¹³ Vatareli wonombungakriste novakadi vawo kwa hwa kuvatara asi va kara nelikwatakano lyokupama naJehova. Eyi yimo, nye nawo va hepa makorangedo nava wokuzuvhisa nawo ntani nokuvazigida ko koyilihafeso. Ngapi nsene kuna kuvera ntani vana va kondere mosipangero, ndi nampo vana hepa etauro ndi uhaku umwe? Awo ngava yi hafera nsene vanavazinyetu va va dingura nokuvavatera koyihepwa yawo. Gazara tupu Rukasa, ‘ndokotora gwetu ogu twa hara’ omu ga vaterere Paurusa novadinguli vakwawo.—Koros. 4:14; Yirug. 20:5–21:18.

¹⁴ Vatareli wonombungakriste novakadi vawo va hepa eharo nomakorangedo gokutunda kovakaume. Mutareli gumwe kwa tjanga asi: “Vakaume vange kuyidimburura nsene nina hepa makorangedo. Awo kupura mapuro, ano eyi kuvatera nge ni pwagese sinka sange. Apa ava purakene nge, ayo kukorangeda nge unene.” Vatareli wonombungakriste novakadi vawo kuvahafesa elituromo eli ava va likida vapuli vakwawo.

15, 16. Yirugana musinke ava rugana Vabeteli nava ava tungu Yinyanga yoYigongi, ntani ngapi natu vhura kuvavatera?

¹⁵ Uzuni mudima, ava ava rugana koBeteli nava ava tungu Yinyanga yoYigongi kukwatesa ko sirugana soUhompa moyirongo eyi ya kara megendeso lyomberewa zawo zomutayi. Nsene mombungakriste ndi momukunda gweni mwa kara Vabeteli, ngapi omu no vhura kuvavatera?

¹⁶ Sikando sokuhova ava ya siki koBeteli kuvhura va lizuvhe mukuma nokurongora kembo novakaume. Ayo kuyihafera sili apa Vabeteli vakwawo nava womombungakriste ava tulisa po ukaume nawo! (Mar. 10:29, 30) Elikwamo lyawo lyoyirugana yokoBeteli kuvapulisira va ze komapongo nomoyirugana yokuzuvhisa nkenye sivike. Nye poyiruwo yimwe, Vabeteli kukara noyirugana yoyinzi. Awo kuyihafera apa womombungakriste ava kwata egano yirugana yawo yokoBeteli nokulikida rupandu kosirugana esi ava rugana.—Resa 1 Vatesaronika 2:9.

17, 18. Yirugana musinke ava rugana ava ava ka ruganena moyirongo nayopeke?

¹⁷ Vazuvhisi vamwe wosiruwo nasinye  kutambura sirugana sokukazuvhisira kosirongo sapeke. Awo kuvhura yi va digopere kuyika nondya nokulironga eraka lyapeke nonompo ntani nomparukiso zompe. Morwasinke ava tambwire sirugana omu mwa hamena marunduruko gangoso?

¹⁸ Vatumwa vamwe kuruganesa siruwo sawo nasinye mosirugana sokuzuvhisa, ano udivi wawo wokuzuvhisa nokuronga kuvatera womombungakriste va gwanene mo uwa. Mberewa zomutayi kupa vatumwa mararo noyimaliwa yipo va livaterese koyihepwa yawo. Vamwe ava ava ka ruganena koyirongo nayopeke, kukarugana komberewa zomutayi ndi kuvatera kokutunga noBeteli nonomberewa detoroko ntani noYinyanga yoUhompa neyi yoYigongi. Kuvapa nondya nomararo ntani nayimwe hena. Ngwendi Vabeteli, nawo kuza komapongo nkenye apa nomoyirugana yokuzuvhisa, ano nombungakriste kugwanena mo mauwa mwawo.

19. Ngapi omu no vhura kuvatera vatumwa?

¹⁹ Ngapi omu no vhura kuvavatera? Diworoka asi pomuhowo kuvhura va dire kuyika nondya domomukunda gweni. Nsene to va zigida mu ya lye kumwe nawo, pomuhowo va pura nondya edi nava vhura kulya. Lididimikira ngomu vana kulironga eraka ntani nompo zomosirongo seni. Kuvhura ngayi guse siruwo komeho va kwate egano monkedi omu o uyunga, nye nayi wapa kuvavatera omu nava tumbura nonkango, morwa vana hara kulironga!

20. Monkedi musinke natu vhura kuvatera vazuvhisi wosiruwo nasinye ntani novakurona vawo?

²⁰ Mwaza siruwo, vazuvhisi owo kuvhura va hepe kuvatera vakurona vawo wokukurupa. Nsene vakurona vawo Nombangi awo ngava harera vana vawo va twikire ngorooro mosirugana sawo. (3 Joh. 4) Yimo, vazuvhisi wosiruwo nasinye ngava kondja mokuvatera vakurona vawo wokukurupa ntani nokuvadingura nsene hepero. Nye owo va tunga pepi novakurona wovazuvhisi wosiruwo nasinye kuvhura va gave evatero. Tu diworokeni asi vazuvhisi owo kurugana unene mokukwatesa ko sirugana sokuzuvhisa, sirugana somulyo mouzuni mudima. (Mat. 28:19, 20) Kuvhura o vatere vazuvhisi owo pokupakera mbili vakurona vawo ndi?

21. Ngapi ava lizuvhu vazuvhisi wosiruwo nasinye kuhamena evatero nokomakorangedo gava wopeke?

²¹ Vantu wovanzi kurugana unene morwa vana hara kungawopa, nye vazuvhisi wosiruwo nasinye kurugana unene morwa kwa hara kugava kwaJehova ntani nokuvatera vantu. Awo kuhafera nkenye evatero no va pa. Munazinyetukadi ogu a ruganene uzuvhisi wosiruwo nasinye mosirongo nasopeke kwa tanta asi: “Nampili nonkango vana tjanga posipepagona dokupwagesa rupandu kulikida asi wopeke kuna kukugazadara ntani kuna kuhafera eyi ono kurugana.”

22. Ngapi o lizuvhu kuhamena sirugana sovazuvhisi wosiruwo nasinye?

²² Kukarera Jehova mosirugana sosiruwo nasinye kuna kara nkedi zongwa zeparu. Aso kuvhura si ku vatere o tunge po yikara eyi ngo ka hepa mouzuni woupe. Ntaantani vakareli vaJehova ngava ka rugane sirugana esi ngasi ka va retera ruhafo nkenye ezuva. Tu twikireni ‘kudiworoka yirugana nomupampi’ wovazuvhisi wosiruwo nasinye.—1 Tes. 1:3.