Yipo nye, age kwa uyungire kuliza neyi ya mu horokerere meparu. Age ga dimbwilire nawa-nawa omu Karunga a pakere mbili vakareli vendi. (Episarome 37:25) Nye nonkango daNdafita kapi adi tanta asi kwato mukareli gwaJehova ogu nga kara noudigu wonondya.

Poyiruwo yimwe Ndafita nage kapi ga kere nonondya. Siruwo simwe kuna kara apa ga tjwayukire Sauru. Ndafita kapi ga kere nonondya, yipo ga hundilire mboroto. (1 Sam. 21:1-6) Mosihorokwa esi Ndafita kwa “papare nondya.” Nye, moukaro wina woudigu, age ga divire asi Jehova kapi na mu sigilira. Kwato oku twa resa asi Ndafita kwa hundagerere nondya yipo a paruke.

MwaMateusa 6:33, tatu gwana mo nonkango daJesus asi Karunga nga sikisa mo yihepwa yovakareli vendi ava va tura muhowo Uhompa meparu lyawo. Age kwa tente asi: “Yipo nye nomu hovera tanko kupapara Untungi waKarunga neyi ga hepa ko kweni, ano yininke eyi nayinye [kukwatera mo nondya noyikunwa ntani noyidwara] ngano ngava yi mu gwederera po.” Nye Jesus kwa tente hena asi morwa mahepeko ‘vamumbya’ vendi kuvhura ngava hepe konzara. (Mat. 25:35, 37, 40) Oyo yiyo ya horokerere mupositoli Paurusa. Poyiruwo yimwe, age kwa kere nonzara nenota.—2 Kol. 11:27.

Jehova kututantera asi ngava tu hepeka mononkedi dokulisiga-siga. Kuvhura pamwe tu ligwanekere nomasiliko gongandi nampo pokututwara konompanguro, edi a retesa po Muzonaguli. (Joba 2:3-5) Pasihonena, vanavazinyetu vamwe kwa va tulire monokamba domahepekero daNazi, ano eyi kwa va ninkisire va kare moudigu wounene. Kapi ngava va pe nondya dokugwanena po, ano ezi kwa kere nkedi zondona zokutezesa po ulimburukwi wawo. Nombangi dokulimburukwa kwa kwaterere koulimburukwi wado kwaJehova, ano kapi ga va sigilira. Age ga va pulisilire va pite momahepeko aga, ngomu tupu a pulisire Vakriste navenye va ligwanekere nomahepeko gokulisiga-siga. Jehova kuvatera navenye ava ava hepere morwa edina lyendi yipo va lididimike. (1 Kol. 10:13) Tu diworokeni nonkango domoVafilipi 1:29 edi asi: “One mwa gwana nkenda zokukerera Kristusa, kapisi pokumupura kwelike, nani nye nopokumunyandera.” Jehova kwa tumbwidira asi nga vatera vakareli vendi. Jesaya 54:17 kwa tanta asi: “Nosirwiso si simwe esi ngasi ku rwadeka.” Etumbwidiro eli nagamwe kulikida asi Jehova kupopera vantu vendi ngombunga. Nampili ngoso, Mukriste kuvhura a ligwanekere nomahepeko aga naga vhura pamwe kumutwaredesa dogoro a zumbanese eparu lyendi.