FERNANDO * kwa kere nowoma. Vakuronambunga vavali kwa mu pulire va uyunge nendi kompengi. Konyima zomadinguro gongandi gomutareli gonombunga, vakuronambunga kwa mu tantererere eyi ga hepere kurugana yipo a wapere yitumbukira mombungakriste. Ngomu sa pitire siruwo, Fernando kwa tamekere kulipura nsene ngava mu horowora a kare mukuronambunga. Mutareli gonombunga ntani tupu ka ya dingwire hena mbungakriste. Yisinke nava uyunga ko vakuronambunga posikando esi?

Fernando kwa purakenene ngomu mukuronambunga ga mu uyungisire. Mukuronambunga kwa tumbwire 1 Timoteusa 3:1 nokutanta asi vakuronambunga vana gwana mbudi asi age vana mu howorora a kare mukuronambunga. Fernando ta vyukilire kuhingira nokupura asi: “Yisinke muna uyunga?” Munazinyetu kwa rugwilire eyi ga uyungire, makura Fernando ta tameke kumenya-menya. Ano apa va mu divisire mombungakriste, navenye kwa hefe.

Ayo epuko kuhara kugwana yitumbukira mombungakriste ndi? Hawe. Kuliza 1 Timoteusa 3:1, “muntu nsene a hara kukara mupitisili gombungakriste, kuna tokomene sirugana sombeyo.” Vakriste wovagara wovanzi kutura pasirugana ekorangedo olyo ntani kutura po ezokomeho yipo va wapere yitumbukira mombungakriste. Yitundwamo, vantu vaKarunga kuvatungika pokukara vakuronambunga novakwafimbunga wokuwapera wokusika pomayovi. Morwa monombungakriste kuna kuhoroka mo ekuro lyenene, pana kara hepero zovanavazinyetu wovagara mokukondjera yitumbukira. Monkedi musinke zongwa va hepa kuyirugana oyo? Ava vana hara kukara vapitisili va hepa nye kukara nkenye apa nosinka asi siruwo musinke ngava kara vakuronambunga ngwendi Fernando ndi?

Nkango zomoBibeli “kuhara kukara mupitisili” kwa zi toroka konkangorugano zoRugereka ezi azi tanta asi kutokomena ndi kugonyonona ewoko. Eyi  kuvhura yi ku diworokese komuntu ana kugonyonona ewoko lyendi a kwate enyango lina kuzenzerera kositji. Kuhara kukara mupitisili kapi yina kutanta asi kukara nedowo lyokukara mupitisili. Morwasinke? Morwa sitambo sowo vana hara kukara vakuronambunga sa hepa kukara sokurugana “sirugana sombeyo” kapisi sokugwana tupu situmbukira.

Yihepwa yosirugana esi sombeyo kwa yi tumbura mwa-1 Timoteusa 3:2-7 ntani mwaTitusa 1:5-9. Kuhamena yihepwa oyo, mukuronambunga gedina Raymond kwa faturura asi: “Kwange, yomulyo po kuna kara nkareso zetu. Kuuyunga nokuronga mulyo, nye kapi ya pitakana yikara eyi ngwendi uhungami nononkedi donongwa nonondunge nokupakera mbili vagenda ntani mbili.”

Munazinyetu ogu sili ana hara kukara mupitisili kulikida asi muhungami pokunyokera po nkenye eyi yokunyata. Age kukara nononkedi donongwa nonondunge nombili, ntani vakareli vakwawo kwa mu huguvara mokupitisira mbunga nokuvavatera komaudigu gawo. Morwa kupakera mbili vagenda, age kukara ntundiliro zekorangedo kovadinkantu ntani noku kwava wovape mousili. Age kuhengagwida nokuvatera wokuvera ntani novakurupe morwa kwa hara uwa. Age kutunga po yikara yangoso yipo wopeke va gwanene mo uwa, nye kapisi morwa kuhara kumuhorowora. *

Mbunga zovakuronambunga kuhafa mokugava mapukururo nomakorangedo, nye ava vana hara kukara vapitisili kukondja mokusikisa mo yihepwa yomoMatjangwa. Henry, mupitisili ogu ga kara noudivi, kwa tanta asi: “Nsene ono hara kukara mupitisili, rugana unene o likide asi ono wapere.” Kuliza noMuudisi 9:10, Henry kwa uyunga asi: “‘O rugane unene paapa wa hulira.’ Nkenye sirugana nava ku pa vakuronambunga, litura mo unene mokusisikisa mo. Hara kurugana yirugana nayinye eyi vana ku pe mombungakriste, kukwatera mo kukomba. Mwaza siruwo, yirugana nelituromo lyoge ngava yi dimburura.” Nsene ono hara ezuva limwe ngo kare mukuronambunga, kara murugani gomunene ntani va ku huguvare moyirugana nayinye yokupongoka. Wa hepa kulikida sikara selinunupiko, kapisi selinenepeko.—Mat. 23:8-12.

Vamwe ava ava hara kukara vapitisili mombungakriste kuvhura va likide nkareso zokuhara yitumbukira ndi kuhetekera ko kuzeda vakuronambunga. Vamwe kuhanduka apa vakuronambunga ava va pe mapukururo. Vantu vangoso va hepa kulipura vene asi: ‘Ame kuna kuliharera uwa wanyamwange ndi kuna hara kupakera mbili nonzwi daJehova?’

Ava vana hara kukara vapitisili va hepa kudiworoka asi kukara mukuronambunga, wa hepa hena ‘kukara sihonena kombunga.’ (1 Pet. 5:1-3) Ogu ga kara sihonena kombungakriste kunyokera po magazaro noyirugana yoyidona. Yi kare asi vana mu horowora ndi simpe, age kutunga po elididimiko. Kukara mukuronambunga kapi ayi kondere muntu kokurugana mapuko. (Num. 12:3; Epis. 106:32, 33) Ntani hena, munazinyetugara kuvhura a ‘dire kukara negima komutjima gwendi,’ nye wopeke kuvhura va mone mwendi mapuko gongandi. (1 Kol. 4:4) Nampili ngoso, nsene vakuronambunga va ku pa mapukururo gomawa gomoBibeli, ga tambura, wa ha handuka. Makura ga tura pasirugana.

Vanavazinyetugara wovanzi kwa ndindira siruwo sosire komeho va ya horowore. Nsene ove kwa here ‘kukara mupitisili’ nomvhura dononzi, ove kukara nosinka poyiruwo yimwe ndi? Nsene yimo, koneka nonkango edi: “Endindiro nsene li teka po, yigo mutjima guna teka po, nye nsene yi sika mo eyi wa rotera nzodi, to hafa unene.”—Yis. 13:12.

Apa ayi dili kusika mo eyi ga ndindira muntu, kuvhura yi mu guvise. Yimo ga lizuvhire ngoso Abirahamu. Jehova kwa mu tumbwidilire muna, nye kwa pitire po nomvhura dononzi nage naSara va hana kukara nomuna. (Gen. 12:1-3, 7) Moukurupe wendi, Abirahamu kwa pulire asi: “HOMPA Karunga, yinke ngo pa nge, ame nyame ogu ngani lifira kutupu vana? . . . Ame nyame ogu wa dira kupa ruvharo.” Jehova kwa mu pere ehuguvaro asi etumbwidiro lyendi lyokuhamena muna ngali sika mo. Nye kwa pitire po nomvhura dokupitakana 14 ntani Jehova ga sikisire mo nonkango dendi.—Gen. 15:2-4; 16:16; 21:5.

Ngomu ga ndindilire, Abirahamu ngoso ga zumbanesere ruhafo rwendi rokukarera Jehova ndi? Hawe. Age ga huguvarere momatumbwidiro gaJehova. Age kwa twikilire kundindira nononkondo. Mupositoli Paurusa kwa tjenge asi: “Ano matumbwidiro Abirahamu ga ga mwene pokulididimika a ndindire.” (Heb. 6:15) Mouhura, Karunga Munankondo nadinye kwa tungikire Abirahamu kupitakana omu ga yi ndindilire. Yisinke no lirongera ko kwaAbirahamu?

Nsene ove kwa hara kukara mukuronambunga nye pana piti nomvhura dononzi va hana kukuhoworora, twikira kuhuguvara mwaJehova. Wa ha zumbanesa ruhafo mokukarera Jehova. Warren, ogu ga vatera vapuli vakwawo wovanzi va ture po ezokomeho, kwa faturura asi: “Munazinyetugara ga hepa kundindira siruwo songandi mokuwapera situmbukira. Mwaza siruwo, yikara nediwo lyamunazinyetu  kuyalihorora kanunu-kanunu kupitira monkareso zendi ntani nomu a sikisa mo yirugana yomombungakriste. Vamwe kugazara asi nsene va gwana situmbukira, ngayi va tompoka mokukarera Jehova. Magazaro gangoso epuko ntani kuninkisa muntu a linenepeke. Nsene o karera Jehova noulimburukwi nkenye oku ndi nkenye eyi ono kurugana, ove ngayi ku tompoka.”

Munazinyetu gumwe kwa ndindilire nomvhura dononzi komeho a ya kare mukuronambunga. Pokutamba kesingonono lya divikwa eli lya kara mobuke zaHesekiyeli egaununo 1, age kwa simwitilire sirongwa esi ga lirongerere ko asi: “Jehova kugendesa etemba ndi mbunga zendi, monkedi omu ana yi harere. Yomulyo po kapisi moomu tuna yi harere nye moomu ana yi harere Jehova. Mokukara mukuronambunga, yomulyo po kapisi eyi ono hara. Eyi ono hara nampo kwaJehova kapisi yiyo ono hepa.”

Nsene ono hara ezuva limwe kurugana sirugana sombeyo sokukara mupitisili gombunga, kondja mokugwederera koruhafo romombungakriste. Nsene kuna kumoneka asi siruwo kuna kuliwora, nyokera po yinka ntani nediro kulididimikira. Raymond, vana tumbura nare, kwa tanta asi: “Nsene ove kulinenepeka kapi to gwana ruhafo. Ava ava kara nkenye apa nosinka kuzumbanesa ruhafo oru aru tundu mokukarera Jehova.” Tunga po yiyimwa yompepo, unene po edidimiko. Kondja mokuwapukurura elikwatakano lyoge naJehova kupitira mokulironga Matjangwa. Lihameka mo unene mokuzuvhisa mbudi zongwa ntani nokulironga Bibeli nava vana kulikida elituromo. Pitisira epata lyoge moyirugana yokuzuvhisa ntani moukareli wepata. Hafera nkenye mpito ezi ono gwana mokukara novapuli vakweni. Ngomu ono kutwikira kusikisa mo sitambo soge, ove ngo hafera kukarera Jehova.

Kugwana yitumbukira mombungakriste kuna kara etungiko lyokutunda kwaJehova, ntani age nombunga zendi kuna hara asi owo vana kuhara kukara vapitisili va kare noruhafo. Karunga kuvatera nokutungika ava ava mu karere nositambo souhunga. Yosili, ove ngava ku tungika nsene o ‘rugana unene.’—Yis. 10:22.

Nampili ove kwa kondjera kukara mupitisili nomvhura dongandi, simpe kuvhura o twikire kuwapukurura elikwatakano lyoge naJehova. Ngomu ono kukondja kutunga po yikara eyi yina hepa po nokurugana unene mombungakriste ntani nokuvatera epata lyoge pampepo, Jehova kapi nga divara nayinye eyi wa rugana mokumukarera. Yi kare asi yitumbukira musinke wa gwana, ngano nkenye apa o kare noruhafo mokukarera Jehova.