1. Ngapi vampitisili womaukarelikarunga goyimpempa va lihamekere moyita?

AZO mpango zaKarunga asi Vakriste wousili va ze koyita ntani nokukadipaga vantu womarudi gokulisiga-siga ndi? Monomvhura 100 dina ka pita, oyo yiyo va rugana wovanzi ava ava litumbura asi Vakriste. Varuti woVakatolika kwa tungika vakwayita noyirwiso yawo mokukarwisa Vakatolika worudi rwapeke. Vampitisili woVaporotestande nawo yiyo va rugana. Ano eyi kwa retesere po edipago lyenene poYita yaUvali yoUzuni.

2, 3. Yisinke da rugene Nombangi daJehova poYita yaUvali yoUzuni ntani konyima zoyita oyo, ntani morwasinke?

² Yisinke Nombangi daJehova da rugene mosiruwo soyita yina? Ehistoli kulikida asi ado kapi da lihamekere mo moyita. Morwasinke? Morwa ado kukwama sihonena saJesus ntani nomarongo gendi. Age kwa tente asi: “Nsene mu lihara-hara, yipo ngava divira vantu asi one sili varongwa vange.” (Joh. 13:35) Ntani ado kwa tambwire mapukururo gomupositoli Paurusa aga ga tjangerere Vakriste womoKolinte.—Resa 2 Vakolinte 10:3, 4.

 ³ Yipo nye, Vakriste wousili ava va deura ezwi lyawo lyokomutjima kuliza noBibeli, kapi ava lihameke moyita. Morwa kudira kulihameka moyita, Nombangi dononzi kukwatera mo vadinkantu novakurupe, vagara novakadi, kwa di hepeka. Wovanzi kwa va hepeka pokuvatura nomodorongo ntani monokamba dokuvaruganesa unene. Posiruwo sepangero lyaNazi moNdovesiranda, vamwe kwa va dipagere. Yi kare asi mahepeko musinke da ligwanekerere nago moEuropa, Nombangi kapi da hagekere sirugana sado sokuzuvhisa mbudi zongwa zoUhompa waJehova. Ado kwa twikilire kuzuvhisa nampili monodorongo nomonokamba dounkwate. Ntani ado kapi da lihamekere moyita yorudi eyi ya horokere moRwanda 1994. Ado kapi da lihamekere mo medipago lyenene lyoyita yoVabalikani eyi ya horokere mosirongo saYugoslavia.

4. Ngapi omu kudira kulihameka koNombangi daJehova moyita ya kundama wopeke?

⁴ Morwa Nombangi daJehova kapi adi lihameke moyita, eyi kwa ninkisa wovanzi mouzuni mudima va dimburure asi Nombangi kwa kara neharo lyosili kwaKarunga nokovakwaawo. Ado kurugana ukareli wousili. Ntani, pwa kara yininke yimwe youkareli wetu eyi ayi ninkisa wovanzi va tare Nombangi asi Vakriste wousili.

5. Erunduruko musinke va ligwanekerere nalyo varongwa wokuhova vaKristusa?

⁵ Ketamekero lyosirugana sendi, Jesus kwa nkondopekere mulyo gokudivisa mbudi zongwa zoUhompa waKarunga. Age kwa horowere varongwa 12 va lihameke mosirugana sokuzuvhisa uzuni mudima, ano konyima Jesus kwa ya dewire varongwa 70. (Ruk. 6:13; 10:1) Pomuhowo, awo kwa va dewire va ka zuvhisire Vajuda. Konyima, varongwa vaJesus kwa ya twere mbudi ozo kovapagani ava va dilire kurugana yovamba. Esi kwa kere sininke sokutetukisa! Ee, erunduruko musi lya kere kovarongwa owo woupampi!—Yirug. 1:8.

6. Yisinke ya ninkisire Peturusa a dimburure asi Jehova kwato mpongo?

⁶ Mupositoli Peturusa kwa mu tumine a ze membo lyaKoroneliusa, mupagani ogu va dilire kurugana yovamba. Makura Peturusa yipo ga dimbwilire asi Karunga kapi ga paka mpongo. Koroneliusa nembo lyendi kwa gwene ekuho. Mbudi zongwa kwa lihene, ano vantu womarudi nagenye va zi zuvhire nokuzitambura. (Yirug. 10:9-48) Makura mbudi tazi lihanene mouzuni mudima.

7, 8. Yisinke za rugana mbunga zaJehova? (Tara efano pepenuno 7.)

⁷ Mehistoli lyoNombangi daJehova, ava ava pitisire kwa kara noupampi wokuzuvhisa mbudi zongwa ntani nokuronga mouzuni mudima. Naina, konyara Nombangi dokusika mamiliyona ntantatu kuna kulihameka mo unene mokuhanesa mbudi momaraka gokupitakana 600. Nombangi daJehova kuvadimbwilira kosirugana sawo sa tunda embo zende embo ntani nokuzuvhisira mononzira, ano poyiruwo yimwe kuruganesa sitafura soyimbapirajtangwa mokuzuvhisa.

⁸ Vatoroki wokupitakana 2 900 kwa gwana edeuro lyokulikarera lyokutoroka Bibeli ntani noyimbapiratjangwa. Awo kapi tupu ava toroka maraka aga ga divikwa unene kovantu wovanzi. Nye awo kutoroka hena maraka aga ga dira kudivikwa unene aga ava uyunga vantu wovanzi.  Pasihonena, moSipanye Vakatarani wokusika pomamiliyona kuuyunga eraka lyawo nkenye ezuva. Momazuva gantani, eraka lyoVakatarani kwa tameka hena kuliruganesa monomukunda dokulisiga-siga ngwendi Andora, Alikante, noyirudi yaBareliki, ntani Varensiya. Nombangi daJehova ngesi kuna kurugana yimbapiratjangwa yoBibeli moRukatarani, ntani mapongo nago kuna kugarugana meraka olyo.

9, 10. Yisinke yina kulikida asi mbunga zaJehova zina litura mo unene mokuzuvhisira vantu navenye?

⁹ Sirugana esi setoroko ntani sokuronga kuna kusirugana momarudi gomanzi. Meksiko kuna kara sirongo omu ava uyunga Rusipanye, nye mwa kara hena vantu ava ava uyunga maraka nagopeke. Rumaya kuna kara limwe lyomaraka ogo. Beteli zomoMeksiko kwa tuma vatoroki woRumaya va ka tunge mosirongo omu ava uyunga nkenye ezuva eraka olyo. Sihonena simwe kuna kara Runepali, eraka eli ava uyunga mosirongo saNepali, omu mwa kara vantu wokupitakana pomamiliyona 29. Mosirongo oso kuuyunga mo konyara maraka 120, nye vantu wokupitakana mamiliyona murongo kuuyunga Runepali ngeraka lyawo lyomvharerwa, ano koveli hena wovanzi va li lironga. Yimbapiratjangwa yetu nayo kuna kuyirugana meraka olyo.

¹⁰ Ekwatesoko lyetoroko mouzuni mudima kulikida asi mbunga zaJehova zina litura mo unene mosirugana sokuzuvhisa mbudi zongwa zoUhompa. Yitratate noyifo yokupitakana pomamiliyona kuyihanesa mouzuni mudima, pwa hana mfeto. Yimaliwa eyi ava ruganesa koyimbapiratjangwa oyo kutunda koNombangi daJehova, ava ava kwama evyukiso lyaJesus eli asi: “Mawoko-woko muna yi gwana, none ka yi gaveni mawoko-woko.”—Mat. 10:8.

11, 12. Ngapi sirugana sokuzuvhisa uzuni mudima esi adi rugana Nombangi daJehova sa kundama wopeke?

¹¹ Nombangi daJehova da yi pura asi da gwana usili, eyi yiyo adi litulire mo unene mokuzuvhisira mbudi zongwa vantu womarudi nomaraka gokulisiga-siga. Wovanzi kwa rerupika eparu lyawo nokulironga eraka lyapeke ntani  nokutambura mparukiso zeraka olyo, yipo va vhure kulihameka mosirugana esi somulyo. Sirugana esi sokuzuvhisa nokuronga uzuni mudima kwa ninkisa wovanzi va pure asi Nombangi kuna kara vasikuli wousili vaJesus Kristusa.

¹² Nombangi kuyiruganena eyi morwa da yi pura asi ado da gwana usili. Nye yisinke hena ya ninkisa vantu wovanzi va pure asi Nombangi daJehova kwa gwana usili?—Resa Varoma 14:17, 18.

13. Ngapi omu Nombangi adi zeresa mbunga zaJehova?

¹³ Kuvhura tu gwanene mo uwa momalimbururo goVakriste ava va pura asi va gwana usili. Mukareli gumwe ogu ga karera Jehova siruwo sosire, kwa pwagesa malizuvho gendi asi: “Yi kare asi yilye vana kupukurura ndi vana kupisura, vanavazinyetu kwa litura mo mokuzeresa mbunga zaJehova.” Yisinke ayi va vatere mokuyirugana oyo? Pokukwama nompango domoNonkango daKarunga ntani nosihonena esi ga tulisire po Jesus novarongwa vendi. Yipo nye, naina wongandi kwa va gusa mombunga morwa kudira kukwaterera konompango daKarunga. Wovanzi kwa kwaterera komparukiso zokukuhuka, kukwatera mo vamwe ava va kere nare nomparukiso zokunyata nye yiyo va ya rundurura nkareso zawo.—Resa 1 Vakolinte 6:9-11.

14. Yisinke va rugana ava va gusire mo mombunga, ntani noyitundwamo musinke?

¹⁴ Ngapi kuhamena ava va gusa mo mombunga kuliza nomavyukiso gomoMatjangwa? Vantu wokusika komayovi kwa litezurura koyirugana yawo yoyidona ntani va va tambura hena mombungakriste. (Resa 2 Vakolinte 2:6-8.) Kukwaterera konompango doBibeli kwa ninkisa mbungakriste zi kare zina kuhuka ntani va zi huguvare. Mokulisiga nonongereka, Nombangi daJehova kwa kwaterera konompango doBibeli, ano eyi kwa ninkisa wovanzi va pure asi ado kurugana ukareli wousilli.

15. Yisinke ya ninkisa munazinyetugara gumwe a pure asi ga gwana usili?

¹⁵ Morwasinke Nombangi dimwe da pulira asi da gwana usili? Munazinyetugara gumwe gonomvhura 54, kwa faturura asi: “Ame kwa yi pura kutundilira kounona wange asi epuro lyange kwa litatekera moyininke eyi yitatu asi: (1) Karunga yipo ga kara; (2) yige ga retesa po Bibeli; ntani (3) naina age kuna kuruganesa mbungakriste zoNombangi daJehova nokuzitungika. Ngomu da pita nomvhura dononzi, ame nkenye apa kwa hetekera ko kukonakona yininke oyo ntani nokulipura nyamwange nsene sili kwa tundilira ketatako lyousili. Maumbangi aga na gwana monomvhura nadinye odo,  kwa nkondopeka epuro lyange asi ose twa gwana usili.”

16. Usili musinke wa kundama munazinyetukadi gumwe?

¹⁶ Munazinyetukadi gokukwara ogu a rugana komberewa zonene moNew York kwa uyunga kuhamena mbunga zaJehova asi: “Azo yizo zelike azi divisa edina Jehova. Umbangi weyi kuumonenena metengwidiromo edina lyaKarunga moBibeli konyara yikando 7 000! Ame kuhafera ekorangedo atu gwana 2 Histoli 16:9 eli asi: ‘HOMPA yige a takamesa uzuni mudima, age kugava nonkondo kwanavenye ava ava hama kwendi nomutjima nagunye.’” Age kwa twikira ko asi: “Usili wa vatera nge omu nani karera Jehova nomutjima nagunye yipo a pe nge nonkondo. Elikwatakano lyange naJehova yiso sininke somulyo po kwange. Ntani ame na kara norupandu kweyi Jesus ga pa nge ediwo lyaKarunga eli ali nkondopeke nge.”

17. Yisinke ya ninkisire mugara gumwe a pure mwaKarunga, ntani morwasinke?

¹⁷ Mugara gumwe ogu ga dilire kupura mwaKarunga kwa tanta asi: “Unsitwe kuninkisa nge ni pure asi Karunga kwa hara vantu va hafere eparu ntani kapi nga pulisira ruhepo ru twikire dogoro narunye. Ngomu uzuni una kudonapa unene, vantu vaJehova kuna kunkondopara unene mepuro nomoupampi ntani nemeharo. Mpepo zaJehova yizo zelike zokuvhura kusikisa mo yininke eyi.”—Resa 1 Peturusa 4:1-4.

18. Ngapi gana kukundama malizuvho aga va pwagesa vanavazinyetu ava vavali?

¹⁸ Mbangi zimwe ezi za karera Jehova siruwo sosire, kwa tumbura konda zeyi za pulira mousili ou atu zuvhisa asi: “Melirongo lyange na ya dimburura asi Nombangi kulitura mo unene mokuhonena Vakriste wokuhova. Ngomu na genda mouzuni mudima, ame na limonena uumwe woNombangi daJehova. Usili womoBibeli kwa retera nge ruhafo.” Apa munazinyetugara gonomvhura dokupitakana 60 va mu pulire eyi ga pulira asi ga gwana usili, age kwa demenene kwaJesus Kristusa pokufaturura asi: “Ose twa lironga eparu nosirugana saJesus ntani nokuhafera sihonena sendi. Ose kwa tura po marunduruko meparu lyetu yipo tu hedere Karunga kupitira mwaJesus Kristusa. Ose twa dimburura asi nzambo zaKristusa yizo zelike ngazi tu zowora. Ntani twa yi diva asi age kwa mu vhumbwire koufe. Ose twa kara noumbangi wayo wokuzulilira.”—Resa 1 Vakolinte 15:3-8.

19, 20. (a) Situmbukira musinke ga nkondopekere Paurusa kombungakriste zomoRoma? (b) NgoVakriste, situmbukira musinke twa kara naso?

¹⁹ NgoVakriste ava twa hara vakwetu, kapi atu lipungwire usili ou twa gwana. Paurusa kwa tanterere vapuli vakwawo womombungakriste zomoRoma asi: “Nsene o tongonona Hompa Jesus nokana, ove hena o pure momutjima goge asi, Karunga kwa mu pindura koufe, Karunga ngano nga ku parura. Yeeyi muntu age kupura momutjima gwendi, makura tava mu hungameke, age kugava undipo weyi nokana kendi, makura tava mu parura.”—Rom. 10:9, 10.

²⁰ NgoNombangi daJehova, ose twa yi pura asi twa gwana usili ntani twa kara nositumbukira sokuzuvhisira ko wopeke mbudi zongwa zoUhompa waKarunga. Sitambo soge kapisi si kare tupu sokuronga wopeke kuhamena Bibeli, nye mparukiso zoge zi likide asi eyi wa pura usili.