1, 2. (a) Yitumbukira musinke yimwe va kere nayo vasita mosiruwo soVaisraeli? (b) Ngapi omu vakurona va lifana novasita?

MOSIRUWO soVaisraeli vasita ngava paruka eparu lyedigu. Awo ngava lididimikire mutenya nomufu, nye va hepere kupopera siunda koyikasama nokovantu. Awo ngava konakona nonzwi nkenye apa nokupakera mbili dokuvera nedi dokuremana. Unene po nonzwigona morwa ado kapi da pama.—Gen. 33:13.

² Mokulifana, vakurona woVakriste nawo kwa fana ngwendi vasita, ntani kulikida yikara yomusita. Awo va kara nositumbukira sokurera vana vawo ‘nokuvapukurura kuliza neyi ga hara Hompa.’ (Efe. 6:4) Aso sirugana soureru ndi? Hawe! Vanona kuna kuligwanekera nomapukiso gaSatana ntani nediro kusikiliramo lyanyamwawo. (2 Tim. 2:22; 1 Joh. 2:16) Nsene wa kara novanona, ngapi omu no vhura kuvavatera? Tu konakoneni nonkedi ntatu omu no vhura kupakera mbili vana woge, va diva, va ronga ntani va vyukisa.

3. Yisinke ya kwatera kovakurona mokudiva vana vawo?

³ Musita gomuwa kukonakona nawa nkenye nzwi mokudivilisa asi zina kanguka. Mukurona nage kuvhura a rugane yokulifana. Bibeli kuuyunga asi: “Lisa nonzwi doge noyimuna yoge moomu wa vhulira.” (Yis. 27:23) Mokuyirugana eyi, wa hepa kudiva nkareso nomalizuvho gamunoge. Ngapi omu no vhura kuyisikisa mo? Nkedi zimwe zongwa kuna kara pokuzogera nawo nkenye apa.

4, 5. (a) Magano musinke naga vhura kuvatera munona a kare nemanguruko lyokuuyunga novakurona vendi? (Tara efano pepenuno 17.) (b) Yisinke wa rugana mokuninka munoge a kare nemanguruko lyokuuyunga nove?

⁴ Vakurona va dimburura asi ayo udigu kuzogera novana vawo apa ava ya kara vadinkantu, kuvhura va dire kulizuvha emanguruko mokupwagesa malizuvho gawo. Nsene yiyo yina kuhorokera munoge, yisinke no vhura kurugana? Mevango lyokusininika munoge mu zogere maudigu gendi, hetekere ko kuzogera nendi nkenye eyi poyiruwo apa gana dili po maudigu. (Deut. 6:6, 7) Tura po siruwo sokukara kumwe nage. Kuvhura mu gende po kumwe ndi mu danauke po udano ndi kurugana kumwe yirugana yemembo. Eyi ngayi va vatera va kare nemanguruko lyokuuyunga nove nkenye eyi.

⁵ Ngapi nsene munoge simpe kapi ana hara kuzogera? Pasihonena, mevango lyokupura munoge omu lina mu gendi po ezuva, tumbura omu lina gendi po lyoge. Eyi kuvhura yi mu ninkise a hare nage kukutantera omu lina gendi po lyendi. Ndi mokudiva omu a gazara kuhamena yininke yongandi, mu pura monkedi omu nayi dira kutamba kwendi. Kuvhura o mu pure omu vakwawo ava lizuvhu kuhamena yininke yongandi. Makura mu pura mapukururo aga na vhura kugava kwa mukwawo.

6. Yisinke ayi tanta ureru kukuhedera ntani kukara nosiruwo sokuzogera?

⁶ Mokuninka asi vanona va kumangurukire, va hepa kudiva asi ove ureru kukuhedera ntani wa kara nosiruwo sokuzogera nawo. Nsene vakurona nkenye apa kumoneka ngwendi va kara noyirugana yoyinzi, vanona kapi ngava va pwagesera maudigu gawo. Ngapi no yi likida asi ove ureru kukuhedera? Ayo kapi ya gwanena po pokuuyunga tupu asi: “Nsene ono hara kuzogera kuvhura o wize kwange nkenye apa.” Vana woge va hepa kulizuvha asi kapi ngava kuhandukisa ndi o dire kuvakwata egano. Vakurona wovanzi kutura po sihonena sosiwa moyuma eyi. Kayla gonomvhura murongo nantane kwa tanta asi: “Ame kuvhura kuuyunga notate kuhamena nkenye eyi. Awo kapi ava kwata nge meraka ndi va pangure nge, nye kupurakena nge. Ntani awo nkenye apa kupa nge mapukururo gomawa.”

7. (a) Ngapi omu vakurona nava kara nehatakano mokuzogera kuhamena elivandekero? (b) Ngapi omu vakurona nava vhura kunyegenyesa vana vawo?

⁷ Nampili pokuzogera kuhamena elivandekero, wa ha va rondora tupu nkenye apa nye va vyukisa omu nava yi gendesa. Mokuyifanekesa: Tu tante asi to zi kohotera nye to dimburura asi pelikwamo lyawo lyonondya kwa tjanga po tupu marondoro kuhamena udona wokutunda monondya. Ove ngo nyegenya nokuza kohotera nazopeke. Mokulifana, munona kuvhura a nyegenye nsene nkenye apa na ku pura mapukururo ove kumupa tupu marondoro. (Resa Vakorosi 3:21.) Wa hepa kukara nehetakano. Mudinkantukadi gumwe gedina Emily kwa tanta asi: “Apa vakurona vange ava uyunga name kuhamena elivandekero,  kapi ava yi uyunga monkedi zondona. Awo kunkondopeka ruhafo aru tundu mokudiva muntu ndi kugwana mulikwali gokuwapera. Eyi kwa vatera ni lizuvhe umanguruki kuuyunga nawo kuhamena elivandekero. Ame kuvatantera nkenye elikwatakano ani kara nalyo mevango lyokuyivahorekera.”

8, 9. (a) Mauwa musinke aga tundu mokupurakena nawa wa hana kumukwata meraka? (b) Yitundwamo musinke wa gwanena mo mokupurakena kovana woge?

⁸ Kuliza neyi ga uyungire Kayla, kuvhura o likide asi ove ureru kukuhedera apa o purakene vana woge nelididimiko. (Resa Jakopo 1:19.) Katia, zinyagomudike kwa tanta asi: “Nare kapi ngani lididimikire munange. Kapi ngani mu pulisire a mane eyi ana kutantera nge. Ame kapi na kere neharo lyokumupurakena ntani kapi na here a donganese nge. Ngomu na rundurura nkareso zange, munange nage ga rundurura zendi. Ntani nage ngesi kupurakena nge.”

⁹ Guhya gedina Ronald kwa kere noudigu wokulifana namunendi gomukadona. Age kwa tanta asi: “Apa ga tanterere nge asi ana kara nomumati kosure, ame kwa handukire. Nye konyima zapa na tedere ko kelididimiko lyaJehova kovakareli vendi na ya lizuvhire asi nayi wapa kwange mokupulisira munwange a pwagese malizuvho gendi komeho ni mu vyukise. Ame nina hafa kweyi na yi rugene! Ame na ya kwete egano malizuvho gamunange. Apa ga mene, ayo ya rerupilire nge kuuyunga nage monkedi zongwa. Ano age ga tambwire mapukururo gange. Age kwa tanterere nge asi ta rundurura nkareso zendi.” Kuuyunga nkenye apa novana woge ngayi kupa mpito mokudiva magazaro nomalizuvho gawo. Ngoyitundwamo, ngayi ku vatera o lihameke mo momatokoro aga nava vhura kutura po. *

10, 11. Ngapi no vatera vana woge va dire kusiga usili?

¹⁰ Musita gomuwa ga diva asi nzwi kuvhura zi zumbane. Nampo kuvhura zi tameke kulya wayi ou una kara ure nosiunda, kanunu-kanunu ta zi ligora ko kononkwawo. Mokulifana, munona kuvhura a sige usili kanunu-kanunu, nampo  pokukara novakaume wovadona ndi kulihameka moyilihafeso yoyidona. (Yis. 13:20) Ngapi omu no vhura kumuvatera mokukandana po udigu owo?

¹¹ Pokuronga munoge, genderera kumuvatera nsene ono dimburura apa ga hepa kuwapukurura. Mu vatera mokunkondopeka yikara yendi yoSikriste. (2 Pet. 1:5-8) Siruwo soukareli wepata kuna kara siruwo sosiwa kuyirugana oyo. Mokukwatesa ko ewapaiko eli, simbapira saSikukutu 2008 soYirugana yoUhompa kwa tanta asi: “Vanturagumbo kuna kuvakorangeda mokusikisa mo situmbukira sawo kwaJehova sokurugana elirongo lyoBibeli nomapata gawo nkenye apa.” Ove kuruganesa mpito ezi mokuvatera vana woge ndi? Kara nehuguvaro asi vana woge kuhafera elituromo lyoge lyokuvavatera va kare nelikwatakano naJehova.—Mat. 5:3; Fil. 1:10.

12. (a) Ngapi omu vadinkantu va gwanena mo uwa moukareli wepata? (Kukwatera mo kakende “ Awo kuhafera ukareli wepata.”) (b) Ngapi omu wa gwanena mo uwa moukareli wepata?

¹² Mudinkantukadi Carissa nepata lyawo kwa gwanena mo uwa moUkareli wEpata. Age kwa tanta asi: “Ame kuyihafera pokuhingira kumwe nokuzogera. Apa atu yi rugana, kunkondopeka elikwatakano lyetu ngepata. Otate kwa kwaterera kelikwamo lyetu lyoUkareli wEpata. Ayo kukorangeda nge mokumona asi otate kwa litura mo, ano eyi ku ninkisa nge name ni liture mo. Eyi kuninkisa nge ni va fumadeke unene.” Mudinkantukadi gedina Brittney kwa tanta asi: “Ukareli wEpata kwa hedesera nge pepi novakurona vange. Ayo kulikida nge asi awo vana hara kuzuvha maudigu gange ntani nokupakera nge mbili. Ntani kutuvatera tu nkondopeke elikwatakano lyetu ngepata.” Sitambo sovakurona kuna kara sokuronga vana vawo va hare Jehova, ano ukareli wepata kuna kara nkedi zongwa zokuyirugana oyo. *

13. Yisinke nayi tumangeda munona a karere Jehova?

¹³ Musita gomuwa kuruganesa siuro sendi mokuvyukisa nokupopera siunda sendi. Sitambo sendi sokuvyukisa nonzwi dendi ‘komaliro gowayi woutarara.’ (Hes. 34:13, 14) Ngomukurona, ove wa kara nositambo sokulifana. Ove ono hara kuvyukisa vana woge va karere Jehova. Ono hara vana woge va lizuvhe ngwendi muepisarome ogu ga tjenge asi: “Ame kuna tokomene po yokurugana eharo lyoge Karunga gwange! Erongo lyoge tani li paka komutjima.” (Epis. 40:8) Nsene vana woge va lizuvha monkedi zangoso, awo ngava hara kuligava kwaJehova ntani nokugwana ekuho. Awo va hepa kukara nediwo mokutura po etokoro lyomulyo, ntani va hepa kukara neharo lyokukarera Jehova.

14, 15. (a) Sitambo musinke va hepa kukara naso vakurona woVakriste? (b) Morwasinke mudinkantu pamwe na karera nomasinganyeko kuhamena ukareli wousili?

¹⁴ Yisinke no rugana nsene vana woge kapi vana kukulika elikwatakano lyawo naJehova ndi kuna kusinganyeka kuhamena epuro lyawo? Kondja mokunkondopeka eharo lyawo kwaJehova Karunga ntani va ronga va likide rupandu kweyi ga va ruganena. (Ehor. 4:11) Makura apa ngava kara asi vana wapere, awo ngava tokora mokukarera Jehova.

¹⁵ Nsene vana woge vana kara nomasinganyeko kuhamena usili, lididimikira nokuhetekera ko kuvavyukisa. Va vatera va kwate egano asi kukarera Jehova kuna  kara nkedi zongwa po meparu ntani kugwanena mo mauwa gokukarerera. Ntani hetekera ko kudiva nokonda deyi vana karere nomasinganyeko. Pasihonena, munoge gomugara kapi a kwatesa ko eyi za uyunga Bibeli ndi kutjira tupu vakwawo? Munoge gomukadona kwa kara nomasinganyeko konompango daKarunga ndi morwa kulizuvha mukuma ndi kudira kukara novakaume?

16, 17. Mononkedi musinke vakurona nava vatera vana vawo va tambure usili pwavene?

¹⁶ Ngapi omu no vatera vana woge va guse po masinganyeko aga va kara nago kuhamena usili? Vakurona wovanzi kuvatompoka mokuvatera vana vawo pokuvapura mapuro gana kukwama ko: “Ngapi o lizuvhu kukara Mukriste? Omu ono kugazara, mauwa musinke ga kara mo mokukara Mukriste? Yisinke ya hamena mo mokukarera Jehova? Ngapi omu ono kulizuvha kuhamena mauwa aga atu gwana ngesi naga gokomeho? Ago mulyo kupitakana malizambero aga atu tura po mokukarera Jehova ndi?” Pura mapuro ogo mononkango danyamoge ntani monkedi zongwa zombili. Wa ha ninkisa vana woge va lizuvhe asi kuna kuvapangura. Kuvhura mu zogere Marukusa 10:29, 30. Vadinkantu vamwe kuvhura va hare kutjanga mauwa aga ava gwanene mo nokugahetakanesa nomalizambero aga ava tura po. Eyi ngayi vatera vana woge va dimburure maudigu aga vana kuligwanekera nago ntani nomu nava ga kohonona po. Nsene asi ove kulironga novantu mobuke Marongo goBibeli ntani ‘Eharo lyaKarunga,’ ayo mulyo unene asi o lironge novana woge! Oyo yiyo ono kurugana ndi?

¹⁷ Mwaza siruwo, vanona ngava hepa kutura po matokoro nsene ngava karera Jehova ndi hawe. Wa ha gazara asi nawo ngava tambura usili morwa ove wa u tambura. Vana woge va hepa kutambura usili pwavene. (Yis. 3:1, 2) Ngapi nsene munoge kuna kumudigopera kutulisa po elikwatakano naKarunga? Mu korangeda a likonakone mwene pokulipura mapuro aga: “Ngapi omu na yi diva asi Karunga yipo ga kara? Ngapi omu na yi diva asi Jehova sili ga hara nge? Na yi pura asi nompango daJehova kuretera nge uwa ndi?” Vakurona, kareni vasita wovawa pokuvyukisa vana veni nokuvavatera va dimburure asi kukarera Jehova yizo nkedi zongwa po zeparu.—Rom. 12:2.

18. Ngapi vakurona nava honena Musita goMunene, Jehova?

¹⁸ Vakriste navenye wousili va hepa kuhonena Musita goMunene, Jehova. (Efe. 5:1, 2; 1 Pet. 2:25) Vakurona va hepa kudiva vana vawo ntani nokukondja mokuvavyukisa yipo ngava ka gwane matungiko aga ga tumbwidira Jehova. Rera vana woge pokutwikira kuvavatera va lironge usili.