1, 2. Yisinke ngayi pameka epuro lyetu asi Uhompa ngau sikisa mo sitambo saKarunga kovantu, ntani morwasinke? (Tara efano.)

NGONOMBANGI DAJEHOVA, ose kuzuvhisa nomupampi asi Uhompa waKarunga yiwo welike ngau gusa po maudigu getu. Nye ose twa kara nepuro lyokupama asi Uhompa ngau ka sikisa mo sitambo saKarunga ndi? Maumbangi musinke twa kara nago aga aga pameke epuro lyetu moUhompa?—Heb. 11:1.

² Kupitira moUhompa woUmesiyasa, Munankondo nadinye nga sikisa mo sitambo sendi kovantu. Uhompa kwa u tatekera ketateko lyokupama, morwa Jehova yige ga wapera kupangera. Yilye nga kara hompa gwawo? Wolye ngava ka pangera kumwe nendi? Kupi ngava ka pangera? Nayinye eyi kwa yi tulisa po kupitira momagwanekero ndi momalizuvhasano gopaveta aga ga tulisire po Karunga ndi Munwendi, Jesus Kristusa. Pokuteda ko komagwanekero ogo, ngayi kulika ediwo lyetu kuhamena sitambo saKarunga nokukara nepuro lyokupama asi ngasi ka sika mo.—Resa Vaefeso 2:12.

3. Yisinke natu ka konakona mosirongwa esi ntani sokukwama ko?

 ³ Bibeli kwa tumbura magwanekero ntazimwe aga ga likwatakana noUhompa woUmesiyasa mepitisiro lyaJesus Kristusa. Ago kuna kara (1) egwanekero naAbirahamu, (2) egwanekero lyoVeta, (3) egwanekero naNdafita, (4) egwanekero lyokukara mupristeli ngwendi Merekisedeki, (5) egwanekero lyepe, ntani (6) egwanekero lyoUhompa. Tu konakoneni omu nkenye egwanekero lya likwatakana noUhompa mokukasikisa mo sitambo saKarunga kevhu nokovantu.—Tara kakende “ Omu Karunga nga ka sikisa mo sitambo sendi.”

4. Ngomu va yi tumbura mwaGenesis, yininke musinke Karunga ga divisire kuhamena vantu?

⁴ Konyima zokuwapaika evhu yipo vantu va tunge po, Jehova kwa divisire yininke yitatu kuhamena vantu: Karunga kwa ungire vantu va mu fane, vantu va hepere kunenepeka Paradisa nokuzwida evhu kumwe noruvharo rwawo, ntani kwa silikire vantu asi va ha lya kositji zokugava ediwo lyeyi yoyiwa neyi yoyidona. (Gen. 1:26, 28; 2:16, 17) Konyima zokusita muntu, kulimburukwa koyininke yivali oyo yiyo ya hepere po mokusikisa mo sitambo saKarunga. Morwasinke pwa heperere magwanekero?

5, 6. (a) Ngapi Satana ga rwanesere sitambo saKarunga? (b) Ngapi omu Jehova ga limbwilire erwaneso lyaSatana?

⁵ Satana Muzonaguli kwa rwanesere Karunga nositambo sendi. Age kwa zonagwisire po ulimburukwi wovantu pokuzeda mukadi gokuhova, Eva, a lye kositji sokugava ediwo lyeyi yoyiwa neyi yoyidona. (Gen. 3:1-5; Ehor. 12:9) Mokurugana ngoso, Satana kwa rwanesere unankondo waKarunga wokupangera yisitwa yendi. Konyima, Satana ga ya rundilire vakareli vaKarunga asi kumukarera mokugwanena mo tupu mauwa.—Joba 1:9-11; 2:4, 5.

⁶ Ngapi omu Jehova ga limbwilire erwaneso lyaSatana? Ga vhulire kuzonagura po varwanesi. Nye ngano ga yi rugene, sitambo sendi sokuzwida evhu noruvharo rwaAdamu naEva ngano kapi sa sikire mo. Mevango lyokuzonagura po varwanesi vena poopo, Musiti gwetu ga divilisire asi nonkango dendi di sike mo kupitira mouporofete wetumbwidiro lyomoEdeni.—Resa Genesis 3:15.

7. Ehuguvaro musinke lya tu pa etumbwidiro lyomoEdeni kuhamena ezoka noruvharo rwalyo?

⁷ Kupitira metumbwidiro lyomoEdeni, Jehova kwa pangwire ezoka noruvharo rwalyo, eyi ya fanekesa Satana Muzonaguli ntani nanavenye ava va hamena kwendi pokurwanesa unankondo waKarunga wokupangera. Karunga gosili ga geve nonkondo koruvharo romukadi ru zonagure po Satana. Etumbwidiro lyomoEdeni kwa likidire asi Satana nomaudona aga ga retesa po morwa urwanesi wendi ngava ka yi gusa po, ntani kwa likidire hena omu ngayi ka horoka.

8. Ngapi va divisa mukadi ntani ruvharo rwendi?

⁸ Yilye ga ya kara ruvharo romukadi? Mokumona asi ruvharo ngaru myona mutwe gwezoka, ‘nokuhanagura po’ Satana Muzonaguli sisitwa sopampepo, eyi kutanta asi ruvharo romukadi naro sisitwa sopampepo. (Heb. 2:14) Yipo nye, mukadi ogu ga hampurukire ruvharo kuna kara gopampepo. Ngomu ruvharo rwezoka rwa ligwederera, Jehova kapi ga horwere mukadi noruvharo rwendi  dogoro konyara nomvhura 4 000 konyima zapa ga geve etumbwidiro lyomoEdeni. Nye Jehova Karunga kwa tulisire po magwanekero aga ga divisa ruvharo nokuhuguvaresa vakareli vendi asi ruvharo yiro nga ruganesa ru zonagure po Satana ogu ga retera vantu maudigu.

9. Egwanekero musinke ga tulire po Jehova naAbirahamu, ntani mvhura musinke lya tamekere kusika mo?

⁹ Konyima zonomvhura 2 000 kutunda apa ga tulisire po etumbwidiro lyomoEdeni, age kwa pangerere Abirahamu a tunde mositata saUru a ze kosirongo saKanani. (Yirug. 7:2, 3) Jehova kwa tanterere Abirahamu asi: “Tunda mo mosirongo seni nemekoro lyoge nemembo lyoguho, o ze kosirongo esi ngani ku likida. Makura ame ngani ku ninke, ngo kare muhoko gomunene, ngani ku tungike, edina lyoge ngani li fumbure asi ngo ntungipire mo. ‘Ame ngani tungika ava ngava ku tungika, ame ngani fingilira ava nga va ku fingilira, ano moge yimo ngani ntungipikira nomuhoko nadinye domouzuni.’” (Gen. 12:1-3) Eli kuna kara etumbwidiro lyokuhova eli ga tulisire po Jehova Karunga ngegwanekero naAbirahamu. Kapi ya divikwa nawa-nawa asi mvhura musinke Jehova ga tulisire po egwanekero eli naAbirahamu. Nye, alyo kwa tamekere kusika mo nomvhura 1 943 komeho zokuwiza Kristusa, apa Abirahamu ga rutire mukuro gwaEufurata age nomvhura dendi 75.

10. (a) Ngapi Abirahamu ga likidire epuro lyenene momatumbwidiro gaKarunga? (b) Mauzera musinke ga horwere Jehova kanunu-kanunu kuhamena ruvharo romukadi?

¹⁰ Jehova kwa rugurukire etumbwidiro  lyendi kwaAbirahamu nokugweda ko mauzera gamwe. (Gen. 13:15-17; 17:1-8, 16) Apa Abirahamu ga likidire epuro lyenene pokuhara kuzamba munwendi, Jehova kwa nkondopekere etumbwidiro lyendi. (Resa Genesis 22:15-18; Vahebeli 11:17, 18.) Konyima zapa egwanekero naAbirahamu lya tamekere kusika mo, Jehova kwa tamekere kuhorora kanunu-kanunu mauzera kuhamena ruvharo romukadi. Ruvharo ngaru tundilira mwaAbirahamu, aro ngaru kara rorunzi nokukara vahompa nokuzonagura nonkore nadinye ntani ngaru retera matungiko vantu wovanzi.

11, 12. Ngapi aga likida Matjangwa asi egwanekero naAbirahamu lya kara nesikiliromo lyenene, ntani mauwa musinke ngatu gwanena mo?

¹¹ Nampili ngomu egwanekero naAbirahamu lya sikililire mo apa ruvharo rwendi rwa pingire Sirongo sEtumbwidiro, Matjangwa kulikida hena asi egwanekero olyo ngali sikilira mo momunene. (Gar. 4:22-25) Kuhamena esikiliromo eli, mupositoli Paurusa kwa fatwilire asi ruvharo rwaAbirahamu kuna kara Kristusa ntani ruha rwauvali kwa tamba koVakriste wovagwavekwa 144 000. (Gar. 3:16, 29; Ehor. 5:9, 10; 14:1, 4) Ano mukadi ogu ga retere ruvharo oru kuna kara “Jerusarema zekeguru” ezi za tamba koruha rwemeguru rombunga zaKarunga, omu mwa hamena vaengeli wovalimburukwi. (Gar. 4:26, 31) Ngomu ga yi tumbwidilire Jehova kupitira megwanekero naAbirahamu, ruvharo romukadi ngaru retera vantu matungiko.

¹² Egwanekero naAbirahamu kuna kara malizuvhasano gopaveta gokulikida asi Uhompa yipo ngau kara, nokukapa mpito Hompa nava ngava ka pangera nendi mokukapinga Uhompa. (Heb. 6:13-18) Siruwo sokuhura kupi ngali kara egwanekero eli? Genesis 17:7 kwa uyunga asi ‘ngali kara elikwatakano lyanarunye.’ Ngali karerera dogoro Uhompa woUmesiyasa ngau zonagure po nonkore nadinye daKarunga ntani nokutungika vantu navenye. (1 Kol. 15:23-26) Nye ava ngava parukira pevhu ngava gwanena mo mauwa ganarunye. Eyi kulikida asi kupitira megwanekero naAbirahamu, Jehova nga ka sikisa mo sitambo sendi ‘sokuzwida evhu’ novantu wovahungami!—Gen. 1:28.

13, 14. Egwanekero naNdafita, yisinke lya nkondopeka kuhamena epangero lyoUmesiyasa?

¹³ Etumbwidiro lyomoEdeni ntani negwanekero naAbirahamu kulikida asi upangeli waJehova kupitira moUhompa woUmesiyasa kwa u tatekera konompango douhunga. (Epis. 89:14) Epangero lyoUmesiyasa ngali donapa makura ngava li hagekese po ndi? Egwanekero nalyopeke kwa nkondopeka asi eyi kapi ngayi horoka.

¹⁴ Tu konakoneni eyi Jehova ga tumbwidilire hompa Ndafita kupitira megwanekero naNdafita. (Resa 2 Samwere 7:12, 16.) Jehova kwa tulire po egwanekero naNdafita, pokumutumbwidira asi Mesiyasa nga tundilira moruvharo rwendi. (Ruk. 1:30-33) Kupitira megwanekero eli, Jehova kwa likidire asi ‘ogu va horowora mokupangera’ moUhompa woUmesiyasa nga tundilira moruvharo rwaNdafita. (Hes. 21:25-27) Kupitira mwaJesus, uhompa waNdafita ‘ngau karerera dogoro narunye.’ Yosili, ruvharo rwaNdafita ‘ngaru kara nkenye apa, siruwo  esi lina kuminikira ezuva.’ (Epis. 89:34-37) Epangero lyoUmesiyasa kapi ngali donapa, ntani mauwa aga ngali ka sikisa mo ngaga kara narunye!

15-17. Kuliza negwanekero lyokukara mupristeli ngwendi Merekisedeki, situmbukira musinke hena ngaru ka kara naro ruvharo romukadi, ntani morwasinke?

¹⁵ Nampili ngomu egwanekero naAbirahamu ntani egwanekero naNdafita lya wapaikire ruvharo romukadi ru kare vahompa, magwanekero aga kapi ga gwanena po mokuretera vantu navenye mauwa. Mokugwana mauwa, va hepere kuvamangurura ko koukaro wononzo nokuvareta mepata lyaJehova. Mokusikisa mo eyi, ruvharo rwa hepere kukara mupristeli. Mokusikisa mo eyi, Musiti ga tulisire po elizuvhasano lyopaveta nalyopeke, egwanekero lyokukara mupristeli ngwendi Merekisedeki.

¹⁶ Jehova kwa yi horwere kupitira mwahompa Ndafita asi age nga tulisa po egwanekero naJesus nokumupa yitumbukira yivali: ‘sokuhingira korulyo rwaKarunga’ dogoro noku nga pangera nonkore dendi ntani mokukara “mupristeli gwanarunye pomukaro goupristeli waMerekisedeki.” (Resa Episarome 110:1, 2, 4.) Morwasinke nga karera ‘mupristeli pomukaro gwaMerekisedeki’? Morwa komeho ruvharo lyaAbirahamu ru ka pinge Sirongo sEtumbwidiro, Merekisedeki, hompa gwaSaremu, kwa kere “mupristeli gwaKarunga gekeguru-guru.” (Heb. 7:1-3) Age kwa mu horowere Jehova mokukara hompa ntani mupristeli. Age yige gelike va tumbura moMatjangwa goRuhebeli ga kere noyitumbukira yivali oyo posiruwo simwe. Mokumona asi kwato ogu ga mu pinganenene po, yiyo ava mu tumbwire asi age “mupristeli narunye-narunye.”

¹⁷ Jesus kwa mu horowora a kare mupristeli kupitira megwanekero eli ga tulisire po Jehova kumwe nendi, ntani age nga kara ngorooro “mupristeli gwanarunye, pomukaro gwaMerekisedeki.” (Heb. 5:4-6) Eyi kulikida nawa-nawa asi Jehova mwene ga tokora kuruganesa Uhompa woUmesiyasa u sikise mo sitambo sendi kevhu.

18, 19. (a) Magwanekero aga tuna zogere, yisinke ga likida kuhamena Uhompa? (b) Epuro musinke ayi retesa po?

¹⁸ Ngomu tuna konakona magwanekero, ose tuna dimburura omu ga likwatakana noUhompa woUmesiyasa ntani nomu ewapaiko lyoUhompa va li tatekera komalizuvhasano gopaveta. Etumbwidiro lyomoEdeni kulikida asi Jehova nga sikisa mo sitambo sendi kevhu nokovantu kupitira moruvharo romukadi. Yilye ga ya kere ruvharo, ntani situmbukira musinke rwa ya kere naro? Egwanekero naAbirahamu kwa gava mauzera kuhamena eyi.

¹⁹ Egwanekero naNdafita kwa likida ezimo eli nga tundilira Mesiyasa nokumupa nonkondo dokupangera evhu narunye. Egwanekero lyokukara mupristeli ngwendi Merekisedeki kulikida asi ruvharo ngaru kara mupristeli. Jesus kapi nga rugana gelike mokukaninka vantu va ka sikilire mo. Koveli vamwe ava va horowora mokukara vahompa novapristeli. Kupi va tunda? Epuro eli ngatu ka li zogera mosirongwa sokukwama ko.