1, 2. (a) Yisinke yina kulikida asi Vakriste womombunga zomoKorosi kwa kere mosiponga? (b) Ekorangedo musinke va gwene?

VAKRISTE womombunga zomoKorosi kwa kere mosiponga. Vamwe mombungakriste kwa retesere po maligaunuko pokukorangeda vantu va kwame Veta zaMosesa. Ano vamwe kwa korangedere magano gosipagani gokudira kulihameka moyilihafeso. Mokunyokera po marongo aga goyimpempa, mupositoli Paurusa kwa tjangerere Vakorosi mbilive zekorangedo asi: “Omu takamese, walye ava mu diinine po vantu nounongo nomasanseko goyimpempa aga ga tunda konompo dovantu nekepangero lyonompepo douzuni, ya hana si yokutunda kwaKristusa.”—Koros. 2:8.

² Vakriste wovagwavekwa ngano kwa demenene kokugazara yininke ‘youzuni ou,’ awo ngano va nyokerere po nkedi zaJehova zokuvazowora. (Koros. 2:20-23) Mokuvavatera va kwaterere kelikwatakano lyawo naKarunga, Paurusa kwa va korangedere asi: “Omu gazare yemeguru, walye omu gazara yepevhu.” (Koros. 3:2) Vamumbya vaKristusa va hepere kugazara kuhamena upingwa wawo wouwa ou va va “wapaikira meguru.”—Koros. 1:4, 5.

3. (a) Kehuguvaro musinke ava demenene Vakriste wovagwavekwa? (b) Mapuro musinke natu ka zogera mosirongwa esi?

 ³ Mokulifana, Vakriste wovagwavekwa naina kudemenena kugazara Uhompa waKarunga wemeguru nekehuguvaro lyawo lyokukakara “vapingi kumwe naKristusa.” (Rom. 8:14-17) Nye ngapi kuhamena ava va kara nehuguvaro lyepevhu? Ngapi omu nonkango daPaurusa da va kundama? Monkedi musinke ‘nonzwi dapeke’ nadi ‘gazara koyininke yemeguru’? (Joh. 10:16) Ntani ngapi omu natuvenye natu gwanena mo uwa moyihonena yovagara wovalimburukwi ngwendi Abirahamu naMosesa, ava va demenene koyininke yemeguru nampili momaudigu?

4. Ngapi nonzwi dapeke nadi demenena kugazara yemeguru?

⁴ Nampili ngomu nonzwi dapeke da dira kukara nehuguvaro lyemeguru, nado kugazara yininke yemeguru. Monkedi musinke? Pokutura muhowo Jehova Karunga ntani nosirugana soUhompa meparu lyawo. (Ruk. 10:25-27) Mokuyisikisa mo eyi, twa hepa kuhonena Kristusa. (1 Pet. 2:21) Ngwendi vanavazinyetu womosiruwo saPaurusa, nose kuligwanekera nomagano ntani marongo goyimpempa, nekorangedo lyemona mouzuni ou waSatana. (Resa 2 Vakolinte 10:5.) Ngomu tuna kuhonena Jesus, twa hepa kulikunga komagano aga naga zonagwisa po elikwatakano lyetu naJehova.

5. Ngapi omu natu konakona magazaro getu kuhamena emona?

⁵ Ose kulikida nkareso zouzuni zokukondjera emona ndi? Yininke eyi twa hara kulilikida momagazaro ntani nomoyirugana yetu. Jesus kwa tente asi: “Oku aku kara emona lyoge, yiko kooko aku kara mutjima goge.” (Mat. 6:21) Mokudimburura eyi yina kara momutjima gwetu, twa hepa kulikonakona nyamwetu poyiruwo noyiruwo. Lipura asi: ‘Siruwo sokuhura kupi ani ruganena mokugazara kuhamena yimaliwa? Ame kukara nosinka sosinene koyimaliwa youpungwiro meho ndi kuna kukondjera eparu lyokuzeruka eli nali vhura kumana siruwo sange? Ndi ame kuna kudemenena yininke yopampepo?’ (Mat. 6:22) Jesus kwa yi likida asi ava ava kondjere kulipongaikira emona lyepevhu’ kutura elikwatakano lyawo naJehova mosiponga.—Mat. 6:19, 20, 24.

6. Ngapi natu funda po nkareso zokukondjera emona?

⁶ Kudira kusikilira mo kwetu kututumangeda tu kondjere yininke eyi ayi tu hafesa. (Resa Varoma 7:21-25.) Pwa hana mpepo zokupongoka zaKarunga, ose ngano kuvhura tu kondjere “yirugana eyi ya hamena komundema.” Yirugana eyi kwa kwatera mo ‘makurulya noruhonda nomokulizumbilira monkareso zondona.’ (Rom. 13:12, 13) Mokufunda po nkareso ‘zokulipongaikira emona pevhu,’ twa hepa kudemenena kugazara yemeguru. Mokurugana eyi, pwa hepa elituromo. Eyi yiyo mupositoli Paurusa ga uyungilire asi: “Ame kuyomberesa rutu rwange ru zire mo.” (1 Kol. 9:27) Mokutwikira kugenda monzira zeparu, twa hepa kulidina nyamwetu. Ngesi tatu ka konakona vagara vavali wovalimburukwi ava va ‘zire Karunga komutjima.’—Heb. 11:6.

7, 8. (a) Maudigu musinke Abirahamu naSara va ligwanekerere nago? (b) Kosinke ga demenene Abirahamu?

⁷ Apa Jehova ga tanterere Abirahamu a dirukire mosirongo saKanani nepata  lyendi, age ga limburukwire. Morwa ulimburukwi nepuro lyendi, Jehova ga tulisire po egwanekero nendi pokutanta asi: “Ame ngani ku ninke, ngo kare muhoko gomunene, ngani ku tungike.” (Gen. 12:2) Nampili ngoso, konyima zonomvhura dononzi, Abirahamu namukadendi Sara simpe kapi va kere nomuna. Jehova ga divarere etumbwidiro lyendi kwaAbirahamu ndi? Ntani hena, eparu moKanani kapi lya kere ureru. Abirahamu nepata lyendi kwa sigire embo ntani ekoro lyawo moUru, sitata sosiwa moMesopotamiya. Awo kwa gendere ure wonokilometa dokupitakana 1 600 mokukasika ko Kanani, oku va ka tungire monotenda, nokukalididimikira erumbu novanamahaka. (Gen. 12:5, 10; 13:18; 14:10-16) Nye, kapi va kere neharo lyokutengura kositata sawo sosiwa Uru!—Resa Vahebeli 11:8-12, 15.

⁸ Mevango lyokudemenena ‘koyininke yepevhu,’ Abirahamu “makura ta pura HOMPA.” (Gen. 15:6) Age kwa gazarere yininke yemeguru pokudemenena komatumbwidiro gaKarunga. Yitundwamo, Karunga gekeguru-guru kwa tungikire Abirahamu apa ga mu monekerere nokumutantera asi: “Tara keguru o varure nombungururu, nsene no vhura kudivarura. Ano ruvharo roge naro yipo ngaru hura.” (Gen. 15:5) Nonkango odo kwa nkondopekere Abirahamu! Nkenye apa nga tara keguru nokumona nombungururu, ngayi mu diworokesa etumbwidiro lyaJehova lyokuvhukisa ruvharo rwendi. Kuliza nosiruwo saKarunga, Abirahamu ga ya kere noruvharo ngamoomu ga yi mu tanterere.—Gen. 21:1, 2.

9. Ngapi natu honena Abirahamu?

⁹ Ngwendi Abirahamu, nose kuna kundindira matumbwidiro gaKarunga ga sike mo. (2 Pet. 3:13) Nsene kapi tuna kudemenena yemeguru, ngatu mona asi matumbwidiro gaKarunga kuna kuliranga makura kapi ngatu litura mo mosirugana sendi. Nampo nare wa tulire po malizambero mokukara muzuvhisi gokukarerera ndi kurugana yirugana yimwe yosiruwo nasinye. Nye yisinke ono kurugana ngesi? Diworoka asi Abirahamu kwa twikilire kundindira “sitata esi sa kara nomatateko.” (Heb. 11:10) Age “kwa pulire Karunga, makura epuro lyendi kwa li mu varwilire uhungami.”—Rom. 4:3.

10. Yisinke va mu rongere Mosesa apa ga kere mudinkantu?

¹⁰ Mosesa nage gumwe ogu ga demenene kugazara yemeguru. Apa ga kere mudinkantu, age “kwa mu rongere unongo naunye woVaegipite.” Eli kwa kere erongo lyokuzeruka! Mosesa kwa kulilire mepata lyaFarawo. Erongo olyo yilyo lya mu ninkisire a “fumanene mononkango nomoyirugana.” (Yirug. 7:22) Gazara tupu nompito donongwa edi ga kere nado! Nye, Mosesa kwa demenenene kurugana mpango zaKarunga.

11, 12. Unongo musinke ga tere Mosesa asi mulyo, ntani ngapi omu twa yi diva?

¹¹ Apa Mosesa ga kere munona, ozina Jokebedi kwa mu rongere kuhamena Karunga goVahebeli. Mosesa kwa tere unongo wokutunda kwaJehova ngosininke somulyo unene kupitakana nkenye ungawo. Eyi yiyo ga nyokerere nompito noyitumbukira eyi nkare a gwane ngagumwe gemepata lyaFarawo. (Resa Vahebeli 11:24-27.) Ediwo lyaMosesa lyokudiva Jehova nepuro lyendi, kwa mu tumangedere a demenene kugazara yemeguru.

 ¹² Mosesa kwa gwene erongo lyenene, nye kapi ga li ruganese mokugwana sipundi sokuzeruka moEgipite ndi mfumwa ndi ungawo. Ntani age kwa nyokere “kumutumbura asi gwamunwaFarawo gomukadi. Age kwa horowere po yokumuhepeka kumwe nomuhoko gwaKarunga, kupitakana yokuhafera karuwogona mononzo.” Nayinye eyi kulikida asi Mosesa kwa ruganesere ediwo eli va mu rongere ozina mokusikisa mo sitambo saJehova.

13, 14. (a) Yisinke ya vaterere Mosesa a wapere situmbukira esi ga mu pere Jehova? (b) Ngwendi Mosesa, yisinke twa hepa kurugana?

¹³ Mosesa kwa here unene Jehova ntani novantu vendi. Apa ga kere nonomvhura 40, Mosesa kwa gazarere asi ana wapere kuzowora vantu vaKarunga moupika waEgipite. (Yirug. 7:23-25) Nye Jehova ga yi divire asi Mosesa ga hepere simpe kumuronga. Age ga hepere kutunga po yikara ngwendi elinunupiko, nelididimiko, nougomoki ntani elipangero. (Yis. 15:33) Mosesa ga hepere edeuro eli yipo a wape kukalididimikira maudigu nomahepeko aga ga mu ndindilire. Konyima zokukara musita gononzwi nomvhura 40, Mosesa ga gwene edeuro mokutunga po yikara eyi ga hepere.

¹⁴ Mosesa ga lirongerere ko kedeuro eli ga gwene apa ga kere musita ngononzwi. Morwa Nonkango daKarunga kwa tanta asi Mosesa “kwa kere mugara gomulinunupiki kupitakana vantu navenye vepevhu.” (Num. 12:3) Age ga tungire po elinunupiko, eli lya mu vaterere mokulididimikira vantu wokulisiga-siga nomaudigu gawo gomanene. (Ex. 18:26) Nose twa hepa kutunga po yikara yopampepo eyi ngayi tu vatera tu ka pite “momahepeko gomanene” yipo ngatu ka hwilire mouzuni woupe waKarunga wouhungami. (Ehor. 7:14) Ose kuvhura kuruganena kumwe novantu navenye, kukwatera mo ava ava handuka usimbu ndi? Ayo ya wapa kutura pasirugana nonkango domupositoli Peturusa, ogu ga korangedere vapuli vakwawo asi: “Omu fumadeke vantu navenye. Hareni vapuli vakweneni.”—1 Pet. 2:17.

15, 16. (a) Morwasinke ya karera nomulyo kugazara yemeguru? (b) Morwasinke ya karera nomulyo koVakriste mokukara nonkareso zongwa?

¹⁵ Ose kuna kuparuka ‘poyiruwo yoyidigu.’ (2 Tim. 3:1) Mokukara tuna vangarara, ya wapa kudemenena kugazara yemeguru. (1 Tes. 5:6-9) Tu konakoneni omu natu yi rugana oyo momaruha gatatu geparu lyetu.

¹⁶ Nkareso zetu: Peturusa kwa yi dimbwilire asi nkareso zongwa mulyo. Age kwa tente asi: “Omu kare moukaro wouwa mokatji kovapagani, asi awo, . . . ngava dimburure yirugana yeni yoyiwa, nkumwe ngava fumadekere po Karunga.” (1 Pet. 2:12) Yi kare asi membo tuna kara ndi koyirugana ndi kosure ndi kuna kulihafesa ndi moyirugana yokuzuvhisa, twa hepa kulitura mo unene mokuyererepeka Jehova kupitira monkareso zetu zongwa. Ngovantu wokudira kusikilira mo, natuvenye kuzona. (Rom. 3:23) Nye ‘pokulirombera elirombero lyewa lyepuro,’ ose kuvhura kurwanesa po kudira kusikilira mo kwetu.—1 Tim. 6:12.

17. Ngapi natu honena magazaro aga ga kere nago Kristusa? (Tara efano pepenuno 28.)

¹⁷ Magazaro getu: Mokukara nkareso zongwa twa hepa kukara nomagazaro gomawa. Mupositoli Paurusa kwa tente asi: “Magazaro gokufana ngesi yigo nye nomu kara-kara nago mokatji keni, moomu ga kere nago Jesus Kristusa.” (Fil. 2:5) Nkareso musinke ga kere nazo  Jesus? Zokulinunupika. Azo kwa mu tumangedere a ligave mwene mosirugana sokuzuvhisa. Jesus nkenye apa nga gazara kuzuvhisira wopeke kuhamena mbudi zongwa zoUhompa waKarunga. (Mar. 1:38; 13:10) Jesus kwa tere Nonkango daKarunga asi kwa kara nononkondo. (Joh. 7:16; 8:28) Age kwa lirongere Matjangwa gokupongoka yipo a vhure kugatemwinina nokugapopera ntani nokugafaturura. Nsene tu linunupika nokulitura mo mosirugana sokuzuvhisa ntani nokulironga Bibeli, nose ngatu kara nomagazaro ngwendi gaKristusa.

18. Monkedi musinke natu kwatesa ko sirugana saJehova?

¹⁸ Ekwatesoko lyetu: Jehova kwa tokora asi “navenye va twire edina lyaJesus nongoro, nava vemeguru nava vepevhu.” (Fil. 2:9-11) Nampili ngomu va mu zerura unene, Jesus kulinunupika pokulimburukwa oGuhwe, nose twa hepa kumuhonena. (1 Kol. 15:28) Monkedi musinke? Pokukwatesa ko nomutjima nagunye sirugana esi va tu pa ‘sokuninka varongwa monomuhoko nadinye.’ (Mat. 28:19) Ntani, tuna hara ‘kuruganena navenye uwa,’ va kare asi vanavazinyetu ndi vantu wopeke.—Gar. 6:10.

19. Yisinke tuna tokomene kurugana?

¹⁹ Ayo kutuhafesa kweyi Jehova atu diworokesa tu demenene kugazara yemeguru! Natuvenye tu ‘dukeni nedidimiko melirombero lina tu kara komeho.’ (Heb. 12:1) Ntani tu ruganeneni Jehova “nomutjima nagunye,” makura age nga tu pe mfeto ezi ga tu tumbwidira.—Koros. 3:23, 24.