NOMVHURA mbali komeho sihorokwa esi tuna tumbura si ka horoke, Evelyn Trabert, ogu ga kere mutumwa mukwetu kwa ka mene nendi kosikora zaGiliyata, ezi za kere pepi nomukunda gwaIthaca, mositata saNew York. Kwa tu tumine tu ka zuvhisire moSanta Ana. Nye komeho ni twikire kusimwitira sirugana sange soutumwa monomvhura 29, tanko ni mu tanterere eyi na tokwerere kurugana sirugana oso.

Vakurona vange John naEva Olson, kwa tungire momukunda Spokane, Washington moAmerika. Ano ame kwa hampuruka nge momvhura 1923. Awo kwa kere mEvangeli nye kapi va pulire erongo lyongereka lyomundiro gwanarunye morwa kwa pulire asi Karunga yige eharo. (1 Joh. 4:8) Otate ngava rugana mokukanga nomboroto, ano ezuva limwe murugani mukwawo kwa va tanterere asi Bibeli kapi azi rongo asi mundiro gwanarunye kuna kara evango lyokuhepekera. Konyima, vakurona vange yipo va tamekere kulironga noNombangi daJehova nokuyadiva eyi azi rongo Bibeli sili kuhamena eyi ayi horoka apa a fu muntu.

Ame opo nomvhura dange ntane, nye simpe tani diworoka eyi va uyungire vakurona vange apa va lirongere  Bibeli. Apa va ya divire edina lyaKarunga gosili, Jehova, yipo va mangurukire mo merongo lyaKarunga mutatu gumwe. Name na tamekere kukwata egano usili womoMatjangwa ‘ou au zowora’ muntu. (Joh. 8:32) Ame nkenye apa ngani hafere kulironga Bibeli, Nonkango daKarunga. Nampili ngomu na kere nonomuga, ngani zi novakurona vange moyirugana yokuzuvhisa. Mo-1934 vakurona vange yipo va gwene ekuho. Ano 1939, yipo na gwene ekuho ame nomvhura dange 16.

Mo-1940, vakurona vange kwa randesere embo lyetu, makura moutatu wetu yipo twa tamekere uzuvhisi wosiruwo nasinye moCoeur d’Alene, Idaho. Ose kwa kere membo eli ngatu hehere ntani yimo hena ngatu ruganene mapongo, morwa posiruwo sina kapi pwa kere Yinyanga yoUhompa yoyinzi.

Mo-1941, name novakurona vange kwa kere posigongi moSt. Louis, Missouri. Sondaha kwa kere “Ezuva lyovanona,” ano vanona wonomvhura 5 dogoro 18 kwa va hingidikire komeho. Mokatji kosiuyungwa sendi, munazinyetu Joseph F. Rutherford kwa uyungisire vadinkantu asi: “Namuvenye . . . vanona . . . ava mwa tokora kulimburukwa Karunga naHompa Jesus, katukeni!” Natuvenye kwa katukire. Makura munazinyetu Rutherford yipo ga uyungire asi: “Tareni, vazuvhisi wovape woUhompa wokupitakana 15 000!” Eyi kwa ninkisire nge ni kwaterere ketokoro lyange lyokukara muzuvhisi gosiruwo nasinye.

Makwedi gongandi konyima zosigongi, epata lyetu kwa dirukilire koMbindakano zaKalifoniya. Mositata saOxnard, kwa tu pere situmbukira sokutulisa po mbungakriste. Ose ngatu rara mosikotogona esi sa kere nombete zimwe tupu. Mbete zange kwa kere sitafura somonkondwa zokulira, makura nkenye ngurova na hepere kuzara, alyo kwa kere erunduruko lyenene kwange.

Komeho tupu zokukasika moKalifoniya, 7 Sindimba 1941 vakwayita vaJapani yipo va homwene ezenga lyomoHawaii ava tumbura asi Pearl. Ezuva lyokukwama ko Vaamerika yipo va tamekere Yita yaUvali yoUzuni. Epangero kwa geve mpangera asi twa hepa kudimisa noramba masiku. Vakwayita vaJapani vemefuta ngava kara nkenye apa konontere defuta lyaKalifoniya, ano pokudimisa noramba kwa vaterere mokudira kudipaga vantu womosirongo.

Konyima zomakwedi gongandi, mwaSitarara 1942, ose kwa kere nosigongi “Epangero lyouzuni woupe” moCleveland, Ohio. Ose kwa purakenene kosiuyungwa samunazinyetu Nathan H. Knorr “Mbili ngazi karerera ndi?” Age kwa fatwilire Ehororo egaununo 17, eli lya tanta asi “sikasama esi ko mono, yiyo sina pili po, ngasi tunda mosirongo sokonhi.” (Ehor. 17:8, 11) Munazinyetu Knorr kwa fatwilire asi “sikasama” kwa fanekesa mbunga zElipakerero lyoNomuhoko ezi za ya hege po 1939. Bibeli kwa pumba asi mbunga zElipakerero lyoNomuhoko ngava zi pinganesera po, ano eyi ngayi twaredesa kombili zopokaruwogona. Ano eyi yimo ya ya horokere 1945, apa ya hege Yita yaUvali yoUzuni. Konyima zoyo, “sikasama” kwa ya monekere hena ngombunga zElipakerero lyoNomuhoko. Nombangi daJehova yipo da tamwinine sirugana sado sokuzuvhisa.

Uporofete ou kwa vaterere nge ni kwate egano yihorokwa yokomeho. Apa va divisire asi Sikora zaGiliyata tazi tameke mvhura zokukwama ko,  eharo lyange lyokukara mutumwa kwa nkondoparere. Mo-1943, yipo va tumine nge koPortland, moOregon, ngomuzuvhisi gokukarerera. Posiruwo sina, ngatu ruganesa nongaramafona pokuninka mwenya embo a purakene kosiuyungwa sokukwateka, ano konyima ngatu gava simbapiratjangwa sokuhamena Uhompa waKarunga. Nomvhura nadinye odo, ame ngani gazara tupu kuhamena sirugana soutumwa.

Mo-1944, ame kwa hefe pokugwana ezigido lyokuza koSikora zaGiliyata nakaume zange Evelyn Trabert. Momakwedi gatano, vapitisili wosikora ngava tu rongo omu natu gwana ruhafo pokulironga Bibeli. Elinunupiko lyawo kwa tu kundamene. Poyiruwo yimwe, apa ngatu li, vanavazinyetu owo yiwo ngava gavere nondya. Ose kwa mene sikora zetu 22 Murongagona 1945.

Name naEvelyn naLeo ntani Esther Mahan, kwa ka sikire moEl Salvador, mwaPembagona 1946, kosirugana setu. Ose twa yi dimbwilire asi ‘mapya gana fire etezo.’ (Joh. 4:35) Sihorokwa esi vana tumbura ketamekero lyosirongwa esi kulikida asi varuti kwa handukire unene. Ose kwa kere nosigongi sokuhova moSanta Ana. Yipo twa divisire kuhamena siuyungwa sanavenye ntani ya tu hafesere apa twa ya kere novakalimo wokusika koyiha 500. Mevango lyokutjira nokutunda mo modoropa, ose kwa tokomenene kukara moomo nokuvatera vantu wonomutjima donongwa. Nampili ngomu varuti va rondwere vantu asi va ha resa Bibeli, wovanzi kwa kere neharo lyokudiva usili. Awo va yi haferere kweyi twa litulire mo mokulironga Rusipanye yipo tu va ronge usili kuhamena Jehova Karunga nositambo sendi sosiwa sokukaninka evhu li kare Paradisa.

Rosa Ascencio kwa kere gumwe govarongwa vange wokuhova. Apa ga tamekere kulironga Bibeli, age kwa linyokere namumati gwendi. Mumati gwendi nage konyima ga ya tamekere kulironga Bibeli. Tava likwara, makura konyima tava gwana ekuho nokukara Nombangi daJehova doupampi. Rosa kwa kere muzuvhisi gokuhova gokukarerera moSanta Ana. *

Rosa kwa kere nositora sosinunu. Apa nga zi mokuzuvhisa, nga pata sitora sendi nokuhuguvara mwaJehova asi na mu pakera mbili. Apa nga ya paturura sitora sendi konyima zonovili dongandi, varandi ngava gogomoka va ya rande. Age ga limonena usili womwaMateusa 6:33 ntani ga kere mulimburukwi dogoro konomfa.

Posiruwo simwe, varuti kwa ka dingwire mugara ogu ga tu heheresere nonzugo natuvenye vatumwa ntazimwe nokumurondora asi nsene na twikira kutuheheresa, nage namukadendi ngava va tjida mo mongereka. Mwenya nonzugo kwa kere ngawo za divikwire, ano nkareso zovaruti nage kapi za mu hafesere ntani kapi ga tjilire matjiliso gawo. Age kwa tanterere varuti asi kapi ana kara  nowoma wokumutjida mo mongereka. Age kwa tu korangedere asi kuvhura tu kare mo dogoro siruwo esi tuna hara nyamwetu.

Monkurudoropa zaSan Salvador, mutumwa gumwe kwa lirongere Bibeli namukada Baltasar Perla, mutungi. Mugara ogo kapi ga pulire mwaKarunga morwa nkareso zouyilipaki zovapitisili womaukarelikarunga. Apa sa sikire siruwo sokutunga Beteli, Baltasar nampili ngomu simpe ga dilire kutambura usili, ga geve evatero pokufaneka omu ngali kara etungo ga hana kupura mfuto.

Konyima zokurugana kumwe noNombangi posirugana setungo, Baltasar yipo ga yi pulire asi ana gwana ukareli wousili. Kwa mu kuhwire 22 Pembankuru 1955, ano mukadendi Paulina nage konyima kwa ya gwene ekuho. Vana vawo navenye kuna kukarera Jehova noulimburukwi. Munwendi, Baltasar, Jr., kwa rugana nomvhura 49 koBeteli zomoBrooklyn, mokukwatesa ko sirugana sokuzuvhisa mbudi zongwa uzuni mudima, ano ngesi kuna kara gumwe gomoKomitiye zoBeteli zomoAmerika. *

Apa twa tamekere kurugana yigongi moSan Salvador, munazinyetu Perla kwa tu pere nzugo zendi zonene zelidewiro rutu tu ruganene mo yigongi. Pomuhowo, ngatu ruganesa ruha royipundi yongandi, nye nevatero lyaJehova, sivaro setu kwa twikira kuligwederera, eyi ya tu ninkisa tu nenepeke etungo olyo! Poyilika oyo yoruhafo, ame ngani mono ava na lirongere nawo Bibeli. Ame ngani lizuvhu ruhafo apa varongwa vange ngava likida nge varongwa vawo wovape ava va gwana ekuho ava va ya kere “ngovatekuru” vange.

Posigongi simwe, munazinyetugara kwa wizire kwange nokuuyunga asi ana hara kupura egusiropo. Kapi na mu dimbwilire. Ta tanta asi: “Ame gumwe govamati vena va mu zugumine mamanya moSanta Ana.” Ngesi nage kuna kukarera Jehova! Ame kwa hefe sili unene. Nzogera zina kwa likidire nge asi sirugana sosiruwo nasinye kuna kara sirugana sosiwa po esi na vhura kurugana nkenye ogu.

Konyara nomvhura 29, ame kwa twikira mosirugana soutumwa moEl Salvador, pomuhowo mositata saSanta Ana, ano konyima moSonsonate, ntani moSanta Tecla, ano mouhura moSan Salvador. Mo-1975, yipo na tokwere kuhageka sirugana sange soutumwa nokutengura koSpokane. Na hepere kukapakera mbili vakurona vange wokukurupa.

Mo-1979 konyima zapa va fire otate, ame kwa pakerere mbili onane ava va kurupire unene. Kutunda opo, awo kwa parukire nomvhura ntantatu, apa va ya fire awo nomvhura dawo 94. Posiruwo oso soudigu, ame kwa lizuvhire eroroko parutu nopamalizuvho. Ayo kwa koresere nge hena unene panandunge. Nye nevatero lyaJehova, na vhulire kulididimikira. Ayo kwa fene ngwendi Jehova kwa uyungire asi: ‘Ame ngani kupakera mbili; ame ngani kukwafa tani ku yoworora.’—Jes. 46:4.

Mo-1990, ame kwa dirukilire koOmak, moWashington. Ame kwa ka zuvhisilire momukunda omu ava uyunga Rusipanye, ntani varongwa vange woBibeli wongandi kwa gwene ekuho. Koyiha yaMangundu 2007, kapi hena ngani vhuru kupakera mbili embo lyange lya kere moOmak, makura tani dirukire monzugo zimwe za kara pepi nodoropa zaChelan, moWashington. Mbungakriste zoRusipanye kwa pakera nge nawa mbili. Mokumona asi nyamelike Mbangi gokukurupa unene mombungakriste ozo, vanavazinyetu kutekura nge “ngazinyakurwawo.”

Nampili ngomu na dira kukwara ntani kapi na kara nepata, nye na kara novana wopampepo. (1 Kol. 7:34) Ame na yi divire asi mouzuni ou nokuvhura si kukara nanayinye. Ame na tura muhowo eligawo lyange mokukarera Jehova nomutjima nagunye. Mouzuni woupe, ngatu ka kara nosiruwo sosinzi sokuhafera yininke yoyiwa. Etjangwa lyange na hara kuna kara Episarome 145:16, eli ali tu tantere asi Jehova nga ka ‘kutika nayinye.’

Nampili ngomu nina kara nonomvhura 91 simpe ukanguki wange uwaawa, ntani kuna kutwikira nouzuvhisi wokukarerera. Uzuvhisi wokukarerera kuninkisa nge ni lizuvhe ngwendi ni munona nokuhafera eparu. Sikando sange sokuhova na ya sikire moEl Salvador, aso sirugana sokuzuvhisa ntani tupu sina kutameka. Nampili ngomu Satana a twikire kurwanesa, ngesi muna kara vazuvhisi wokupitakana 39 000 mosirongo esi. Eyi kwa nkondopeka epuro lyange. Yosili, Jehova kuna kutungika elituromo lyovantu vendi.