MwaJeremiya 31:15 kwa tanta asi: “HOMPA ta tanta asi: ‘Ezwi kuna kuzuvhika moRama ezwi lyokulira kokunene. Rakera kuna kulilira vana vendi, awo vana fu, ano age ana nyoka kumuhengagwida.’”

Rakera yige ga hovere kufa komeho vana vendi vavali va ya fe. Ayo kumoneka asi eyi ga tjenge Jeremiya nomvhura 1 000 da ka pita konyima zonomfa daRakera kapi ya vyuka.

Mbeli zaRakera kwa kere Josefa. (Gen. 30:22-24) Ano konyima ga ya kere hena nomuna gwauvali gedina Benyameni. Nye apa ga hampurukire Benyameni Rakera ta fu. Eyi kuretesa po epuro eli asi: Morwasinke Jeremiya 31:15 za uyungira asi Rakera kuna kulilira vana vendi ava vana “fu”?

Koneka asi mbeli zendi Josefa, konyima ga ya kere guhyaManase naEfurayimi. (Gen. 41:50-52; 48:13-20) Konyima, Efurayimi kwa ya kere rudi rononkondo oru rwa fumanene mouhompa waIsraeli wokoMuzogo womazimo murongo nokugakarera po. Ano rudi rwaBenyameni munwaRakera gwauvali, kwa ya kere ruha rouhompa wokoMbindakano kumwe naJuda. Monkedi zangesi, Rakera kwa ya kere ngwendi zinya gomazimo gouhompa wokoMuzogo waIsraeli nou wokoMbindakano waJuda.

Apa buke zaJeremiya va ya zi tjenge, uhompa waIsraeli wokoMuzogo womazimo murongo awo nare kuna kara mepangero lyoVaasiliya ntani vantu wovanzi kwa va twere mounkwate. Nye ruvharo rumwe rwaEfurayimi kwa tjwayukilire mositata saJuda. Mo-607 komeho zokuwiza Kristusa Vababironi yipo va ya fundire uhompa waJuda wokoMbindakano womazimo gavali. Ayo kumoneka asi mefundo eli, wovanzi kwa va pongekere moRama, konyara nokilometa ntantatu koMuzogo gwaJerusarema. (Jer. 40:1) Nampo vamwe yimo va ka va dipagerere mositata saBenyameni omu va vhumbikire Rakera. (1 Sam. 10:2) Kulira kwaRakera oku ga uyunga Jeremiya kwa tamba koVabenyameni ava va dipagere moRama. Ayo kwa tamba hena kovazinya wovantu vaKarunga ava va lilire nomfa nekwato lyoVaisraeli.

Nonkango daJeremiya kuhamena Rakera kuna kulira vana vendi kwa kere uporofete ou wa ya sikilire mo mosiruwo saJesus ogu ga kere mosiponga apa ga kere mukeke. Hompa Herodesa kwa pangerere asi va ka dipage vanona wovagara womoBeterehema wonomvhura dokutundilira pwambali. Vanona owo navenye kwa va dipagere. Gazara tupu malirankali aga va kere nago vazinya wovanona owo wovagara! Ayo kwa fene ngwendi malirankali gena kwa zuvhikire nomoRama ezi za kere koMuzogo gwaJerusarema.—Mat. 2:16-18.

Mosiruwo saJeremiya nesi saJesus, Rakera kwa lilire vana vendi mokulikida ruguwo rorunene oru va kere naro vazinya woVajuda apa va fisire vana vawo. Yimo, ava va fire nokuza ‘mosirongo sovanankore’ mounkwate wonomfa, ngava ka tengura keparu apa ngava ka zonagura po nkore zokuhulilira, nomfa.—Jer. 31:16; 1 Kol. 15:26.