VADINKANTU vamwe woVakriste kwa tokwere kuza va ka tarere muvi. Awo kwa zuvhire asi vakwawo wokosure kwa tarerere muvi ozo nokuzihafera. Apa va ka sikire mevango lyokutaresera nomuvi, tava mono mafano va rameka kekuma govakadi wokudira kudwara nawa vana kwaterere mauta. Yisinke va hepere kurugana? Va tarerere muvi ozo ndi?

Sihorokwa esi kulikida asi ose kuligwanekera nomaukaro omu twa hepa kutulisa po matokoro, yi kare asi etokoro eli nali kundama elikwatakano lyetu naJehova momuwa ndi momudona. Poyiruwo yimwe, kuvhura o hare kurugana yininke yongandi, nye konyima zokugazudurura ko, makura to rundurura etokoro lyoge. Eyi ngesi kutanta nye asi kapi o vhuru kutokora ndi?

Eharo lyetu kwaJehova kwa tu tumangedere tu ligave kwendi nokugwana ekuho. Alyo eharo lyetu lyokomutjima mokukara ngorooro valimburukwi kwaKarunga. Nye, nkore zetu Satana Muzonaguli kwa tokomena kuteza po ulimburukwi wetu. (Ehor. 12:17) Ose twa tura po etokoro lyokukarera Jehova ntani nokulimburukwa konompango dendi. Mokumona asi twa ligava kwaJehova, kapi tayi wapa kurundurura etokoro lyetu. Morwa ayo kuvhura kukundama eparu lyetu.

Konyara nomvhura 2 600 da ka pita, hompa gwaBabironiya Nebukadenesara kwa dikire efano lyenene lyongorondo nokupangera vantu va li kanderere. Nkenye ogu ga nyokere kulikanderera va hepere kumuzugumina mesuga lyomundiro gokutwera. Vakareli vatatu vaJehova wovalimburukwi, Saduraka naMesaka naAbetenego kapi va limburukwire kompangera ozo. Awo kwa nyokere kukanderera efano, makura tava va zugumine mesuga lyomundiro gokutwera. Morwa awo kwa tulire eparu lyawo  mosiponga pokutokora kukarera tupu Jehova Karunga, yipo ga va zowere pasitetu.—Ndan. 3:1-27.

Konyima, muporofete Ndaniyera nga kanderere kwaJehova, nampili ngomu va mu tjilisire asi ta va mu zugumine mekero lyovanyime. Age nkenye apa nga kanderere kwaJehova yikando yitatu mezuva. Ndaniyera kapi ga rundwilire etokoro lyendi lyokukarera Karunga gosili. Eyi yiyo ya ninkisire Karunga a mu ‘parure kovanyime.’—Ndan. 6:1-27.

Vakareli vaKarunga vanaina nawo kuparuka kuliza neligawo lyawo. Posure zimwe moAfrika, vanasure woNombangi kwa nyokere kulihameka mokukarera erembe lyosirongo. Awo kwa va tjilisire asi tava va tjida mo mosure nsene kapi nava karera erembe. Kapi pwa pitire siruwo, ministera gerongo yipo ga ya dingwire doropa ozo nokuyazogera kumwe novanasure vamwe woNombangi. Monkedi zongwa ntani zouradi, vanasure owo kwa fatwilire epuliro lyawo. Kutunda opo kapi hena ava va sininike. Vanavazinyetu wovadinkantu ava ngesi awo kuza kosure va hana kuvakondjesa mokuteza po elikwatakano lyawo naJehova.

Koneka sihorokwa saJoseph, mukadendi kwa verere unene kouvera wokankera makura konyima ta fu. Ekoro lyaJoseph va yi kwete egano ntani va fumadekere etokoro lyendi kuhamena omu nava gendesa nomfa damukadendi. Nye ekoro lyamukadendi kapi va kara mousili, ano awo kwa here kuhamesera mo nompo edi adi dili kuhafesa Karunga. Joseph kwa tanta asi: “Morwa kapi na rundwilire etokoro lyange yipo va hetekerere ko kuzeda vana vange, nye nawo kapi va yi kwatesere ko. Ntani awo kwa here hena kutura etamu pembo lyange, nye ame kwa va tanterere asi ntudi kapisi membo lyange. Awo va yi divire asi kutura etamu kapi ya liza nepuliro lyange neli lyamukadange, ano konyima zokuyizogera yipo va ka tulilire etamu kevango lyapeke.

“Mosiruwo esi soudigu, ame kwa kanderere kwaJehova a vatere nge nepata lyange tu dire kuteza po nompango dendi. Age ga zuvhire makanderero getu nokutuvatera tu funde po makondjeso gena.” Joseph novana vendi kapi va rundwilire etokoro lyawo.

Konyima tupu zoPentekoste 32, mukadi gumwe goMukanani kwa hederere Jesus Kristusa mosirongo saSidoni. Age kwa likwamberere Jesus a verure munwendi. Pomuhowo, Jesus kapi ga mu limbwilire. Ta tantere varongwa vendi asi: “Ame kwa tuma nge ni wizire nonzwi deedi da zumbana momuhoko gwaIsraeli.” Apa mukadi ga twikilire kulikwambera, Jesus ta tanta asi: “Eyi yokugusa mboroto zovanona, o zi zugumine nombwagona, kapisi yiwa.” Morwa mukadi kwa kere nepuro lyenene, ta limburura asi: “Ani yimo Hompa, nye tumbwagona nato kulya sa ruvhugunyu, oru aru kukumuka kositafura sohekurwato.” Jesus yipo ga tambwire ehundiro lyomukadi nokuverura munwendi.—Mat. 15:21-28.

Pokurugana oyo, Jesus kwa honenene Jehova mokurundurura etokoro lyendi kuliza noukaro. Pasihonena, Karunga kwa tokwere kuzonagura po Vaisraeli apa va rugene ntana zongorodo, nye apa Mosesa ga likwamberere kwendi, Karunga ga rundwilire etokoro lyendi.—Ex. 32:7-14.

Mupositoli Paurusa kwa honenene Jehova naJesus. Sikando simwe Paurusa kwa lizuvhire asi kapi ya wepe kuza naJohanesa Marukusa morugendo rwawo routumwa morwa age kwa ka zumbire Paurusa naBaranabasa morugendo rwawo rokuhova. Konyima, Paurusa ga ya dimbwilire asi Marukusa ga tura po marunduruko ntani ana wapere kumuruganesa. Makura Paurusa ta tantere Timoteusa asi: “Ngo ka rete Marukusa, ngomu wize nendi, yeeyi age nga vhura kukwafa nge unene moyirugana.”—2 Tim. 4:11.

 Ose ngapi? Mokuhonena Guhyetu gemeguru gonkenda neharo, nose kuvhura tu rundurure matokoro getu kuliza noukaro. Pasihonena, ose kuvhura kurundurura mutaro gwetu kwava wopeke. Nsene asi Jehova naJesus wokusikilira mo va rundwilire matokoro gawo kuliza noukaro, nose kuvhura tu rugane yokulifana.

Kurundurura matokoro kuvhura yi wape nsene kuna kugazadara ko kuhamena yitambo yopampepo. Vamwe ava vana kulironga Bibeli nokuza komapongo kuvhura va likata-kate kutokora kugwana ekuho. Ndi vanavazinyetu kuvhura va likata-kate kurugana uzuvhisi wokukarerera nampili yi kare asi kuvhura va yi vhure. Vanavazinyetu vamwe kukara nowoma wokukondjera kukara mupitisili gombungakriste. (1 Tim. 3:1) Nove gumwe ogu o lizuvhu ngoso ndi? Jehova kuna ku harere o hafere yitumbukira oyo. Rundurura magazaro goge nokugwana ruhafo pokuruganena Jehova novantu.

Ella, ogu a rugana komberewa zomutayi zoNombangi daJehova moAfrika kwa tanta asi: “Apa na wizire koBeteli, kapi na gazarere asi ngani ya kara ko siruwo sosire. Ame na kere neharo lyokuruganena Jehova nomutjima nagunye, nye na rongwere hena unene epata lyetu. Nye mukwetu ogu twa kere nage monzungo zimwe kwa korangedere nge, yipo na tokwere kukara. Konyima zokukara moBeteli ure wonomvhura murongo, ame kuna kulizuvha asi nina hara kukara moomu nokuruganena vanavazinyetu.”

To diworoka eyi ya horokerere Kaini apa ga fililire mumbyendi mfudu nokuhanduka unene ndi? Karunga kwa tanterere Kaini asi  nsene a rugana yoyiwa ngano ta mu hafere. Karunga kwa pukwilire Kaini asi ga ha tarerera nzo ezi zina mu “rarere pevero” zi mu pangere. Kaini ga vhulire ngano kurundurura nkareso nomagazaro gendi nye age kwa ncenwine epukururo lyaKarunga. Yitundwamo, Kaini ga dipagere mumbyendi nokukara mudipagi gokuhova!—Gen. 4:2-8.

Tu konakoneni sihorokwa sahompa Usiya. Pomuhowo, age kwa rugene youhunga kosipara saJehova nokutwikira kumulimburukwa. Mwaza siruwo, Usiya kwa zonagwire nkareso zendi zongwa pokulinenepeka. Age kwa hwililire montembeli a ka zambe, nampili ngomu ga dilire kukara mupristeli. Apa vapristeli va mu rondwere asi ga ha tura nzo ozo, ga rundwilire etokoro lyendi ndi? Hawe. Usiya ‘kwa handukire’ nokuncenuna erondoro olyo. Yitundwamo, Jehova kwa mu zugumine yingondwe.—2 Hist. 26:3-5, 16-20.

Yosili, pwa kara yiruwo yimwe apa twa hepa kurundurura matokoro getu. Tu konakoneni sihonena somomazuva getu. Joachim kwa gwene ekuho 1955, nye 1978 tava mu gusa mo mombungakriste. Konyima zonomvhura dokupitakana 20, age kwa litezwilire makura tava mu tengwidire mo mombungakriste. Apa ga mu pulire mukuronambunga eyi ga ndindilire siruwo sosire ga hana kulitezurura. Joachim kwa limbwilire asi: “Ame kwa handukire nokulinenepeka. Ame kuna kulivera kweyi na ndindira siruwo sosire. Nampili ngomu va gusire nge mombunga, na divire asi Nombangi daJehova kuronga usili.” Age ga hepere kurundurura nkareso zendi nokulitezurura.

Nose kuvhura tu ligwanekere noukaro ou twa hepa kurundurura magazaro nonkareso zetu. Ngano tu kare neharo lyokurugana ngoso, yipo tu hafese Jehova.—Epis. 34:8.